1 Tiam sis saib seb, yuav muaj coob leej—nyob rau hnub ntawd thaum kuv yuav ua ib txoj hauj lwm zoo kawg nkaus rau lawv, xwv kom kuv nco txog kuv tej kev khi lus uas kuv tau khi rau noob neej, xwv kom kuv yuav tsa kuv txhais tes dua zaum ob los cawm kuv cov neeg, uas yog tsev neeg Ixayees;

2 Thiab, xwv kom kuv nco txog tej lus cog tseg uas kuv tau cog rau koj, Nifais, thiab rau koj txiv thiab, hais tias kuv yuav nco txog koj cov tub ki; thiab xwv kom tej lus ntawm koj tej tub ki yuav tawm ntawm kuv lub qhov ncauj mus rau koj cov tub ki; thiab kuv tej lus yuav nrov ncha mus thoob ntiaj teb, ua ib tug chij mus rau kuv cov neeg, uas yog tsev neeg Ixayees;

3 Thiab vim kuv tej lus yuav nrov ncha mus—muaj coob leej ntawm Lwm Haiv Neeg yuav hais tias: Ib phau Npaivnpaum! Ib phau Npaivnpaum! Peb twb muaj ib phau Npaivnpaum lawm, thiab muaj tsis taus ib phau Npaivnpaum ntxiv lawm.

4 Tiam sis tus Tswv uas yog Vajtswv hais li no: Auj cov neeg ruam, lawv yuav muaj ib phau Npaivnpaum; thiab phau Npaivnpaum yuav tawm ntawm cov Neeg Yudais los, uas yog kuv cov neeg khi lus txheej thaum ub. Thiab lawv puas tau ua cov Neeg Yudais tsaug vim phau Npaivnpaum uas lawv tau txais ntawm lawv los? Muaj tseeb tiag, Lwm Haiv Neeg xav li cas xwb? Lawv puas nco qab txog cov neeg Yudais tej teeb meem, thiab tej kev iab kev khwv, thiab tej kev mob kev nkeeg, thiab lawv tej kev rau siab ntso ntseeg kuv, es thiaj coj tau kev cawm seej los rau Lwm Haiv Neeg?

5 Auj nej cov uas yog Lwm Haiv Neeg es, nej puas nco qab txog cov Neeg Yudais, uas yog kuv cov neeg khi lus txheej thaum ub? Nej yeej tsis nco qab txog; tiam sis nej tau foom tsis zoo rau lawv, thiab tau ntxub lawv, thiab tsis tau nrhiav kev coj lawv rov qab los. Tiam sis saib seb, kuv yuav rov qab muab txhua yam no los tso rau saum nej lub taub hau; vim kuv uas yog tus Tswv tsis tau hnov qab kuv cov neeg.

6 Nej cov neeg ruam, uas yuav hais tias: Ib phau Npaivnpaum, peb twb tau ib phau Npaivnpaum lawm, thiab peb tsis xav tau ib phau Npaivnpaum ntxiv lawm. Nej puas tau ib phau Npaivnpaum yog tias tsis yog los ntawm cov Neeg Yudais los?

7 Nej tsis paub hais tias muaj ntau dua li ib haiv neeg no los? Nej tsis paub tias kuv, tus Tswv uas yog nej tus Vajtswv, tau tsim neeg txhua tus, thiab tsis paub tias kuv yeej nco txog lawv cov uas nyob saum tej koog pov txwv ntawm dej hiav txwv; thiab tsis paub tias kuv kav saum ntuj puag saud thiab hauv ntiaj teb puag hauv; thiab kuv coj kuv txoj lus tawm los rau noob neej, muaj tseeb tiag, kuv twb coj los rau txhua haiv neeg hauv lub ntiaj teb?

8 Yog li ntawd nej yws yws ua tus dab tsi, vim nej yuav tau txais kuv txoj lus ntau ntxiv? Nej puas paub hais tias cov lus tim khawv ntawm ob haiv neeg yog ib qho pov thawj rau nej tias kuv yog Vajtswv, thiab kuv nco txog ib haiv neeg zoo ib yam li kuv nco txog lwm haiv neeg? Yog li ntawd, kuv hais tib co lus rau ib haiv neeg zoo ib yam li hais rau lwm haiv neeg. Thiab thaum ob haiv neeg koom ua ke cov lus tim khawv ntawm ob haiv neeg kuj yuav koom ua ke thiab.

9 Thiab kuv ua li no xwv kom kuv yuav ua tim khawv qhia rau coob leej tias zoo ib yam nag hmo, hnub no, thiab mus ib txhis li kuv yeej yuav zoo li ntawd; thiab hais tias kuv hais kuv tej lus tawm tuaj mus raws li kuv lub siab nyiam. Thiab vim tias kuv tau hais ib lo lus lawm nej tsis txhob xav hais tias kuv tsis muaj cuab kav hais ntxiv; vim kuv txoj hauj lwm tsis tau tiav; thiab yuav tsis tau tiav kom txog thaum tsis muaj tib neeg, thiab yuav tsis tau tiav txij li lub caij ntawd ntxiv mus thiab mus ib txhis li.

10 Yog li ntawd, vim tias nej muaj ib phau Npaivnpaum nej tsis txhob xav hais tias phau Npaivnpaum muaj tag nrho kuv tej lus; thiab nej tsis txhob xav hais tias kuv tsis tau kom muab sau ntau ntxiv.

11 Vim kuv txib txhua tus neeg, tsis hais nyob sab hnub tuaj thiab sab hnub poob, thiab sab qaum teb, thiab sab qab teb, thiab nyob hauv tej koog pov txwv ntawm dej hiav txwv, kom lawv sau tej lus uas kuv hais rau lawv; vim kuv yuav txiav txim rau neeg ntiaj teb tawm ntawm tej phau ntawv uas muab sau cia, txhua tus neeg raws li tej yam nws tau ua, raws li tej uas tau muab sau tseg.

12 Vim saib seb, kuv yuav hais lus rau cov Neeg Yudais thiab lawv yuav muab sau cia; thiab kuv kuj yuav hais lus rau cov Neeg Nifais thiab lawv yuav muab sau cia; thiab kuv kuj yuav hais lus rau lwm xeem neeg ntawm tsev neeg Ixayees, uas kuv tau coj khiav tawm, thiab lawv yuav muab sau cia; thiab kuv kuj yuav hais lus rau txhua haiv neeg hauv lub ntiaj teb thiab lawv yuav muab sau cia.

13 Thiab yuav muaj tias cov Neeg Yudais yuav tau cov Neeg Nifais tej lus, thiab cov Neeg Nifais yuav tau cov Neeg Yudais tej lus; thiab cov Neeg Nifais thiab cov Neeg Yudais yuav tau tej xeem neeg Ixayees uas tau ploj lawm tej lus; thiab tej xeem neeg Ixayees uas tau ploj lawm yuav tau cov Neeg Nifais thiab cov Neeg Yudais tej lus.

14 Thiab yuav muaj tias kuv yuav muab kuv cov neeg, cov uas yog tsev neeg Ixayees, sau los tsev los rau tej av uas yog lawv qub txeeg qub teg; thiab kuj yuav muab kuv txoj lus sau ua ke los ua ib phau thiab. Thiab kuv yuav qhia rau lawv cov uas ntaus tawm tsam kuv txoj lus thiab tawm tsam kuv cov neeg, cov uas yog tsev neeg Ixayees, paub tias kuv yog Vajtswv, thiab paub tias kuv tau khi lus nrog Anplaham tias kuv yuav nco qab ntsoov txog nws tej tub ki mus ib txhis li.