1 Thiab nim no kuv hais rau koj, Yauxej, kuv tus tub ntxawg. Koj tau yug nyob rau hauv roob moj sab qhua ntawm kuv tej kev txom nyem; muaj tseeb tiag, koj niam tau yug koj thaum kuv muaj kev tu siab tshaj plaws.

2 Thiab thov kom tus Tswv muab thaj av no fij tseg cia rau koj, uas yog ib thaj av uas muaj nqis heev, pub rau koj ua qub txeeg qub teg thiab rau koj cov tub ki ua qub txeeg qub teg nrog rau koj cov tij laug, pub rau nej nyob nyab xeeb mus ib txhis li, yog hais tias nej ua raws li cov neeg Ixayees tus Dawb Huv tej lus txib.

3 Thiab nim no, Yauxej, kuv tus tub ntxawg, tus uas kuv tau coj tawm hauv roob moj sab qhua ntawm kuv tej kev txom nyem tuaj, thov kom tus Tswv foom koob hmoov rau koj mus ib txhis, vim koj cov tub ki yuav tsis raug puas tsuaj huv tib si li.

4 Vim saib seb, koj yog kuv tus xeeb leej xeeb ntxwv; thiab kuv yog ib tug xeeb ntxwv ntawm Yauxej tus uas raug coj mus ua qhev nyob rau hauv Iyiv teb chaws. Thiab tus Tswv tej kev khi lus uas nws tau khi rau Yauxej yog tej uas tseem ceeb heev.

5 Yog li ntawd, Yauxej twb tau pom lub caij uas peb nyob no tiag. Thiab nws tau txais ib txoj kev cog lus los ntawm tus Tswv, hais tias tus Tswv uas yog Vajtswv yuav tsa ib ceg uas ncaj ncees tawm ntawm nws cov xeeb leej xeeb ntxwv sawv los rau tsev neeg Ixayees; tsis yog tus Mexiyas, tiam sis yog ib ceg uas raug ntshua tawm, txawm li ntawd los, kom nco ntsoov nyob hauv tus Tswv tej kev khi lus hais tias tus Mexiyas yuav tshwm sim los rau lawv nyob rau hauv hnub nyoog kawg, los ntawm lub txiaj ntsim hwj chim, los coj lawv tawm hauv qhov tsaus ntuj mus rau qhov kaj—muaj tseeb tiag, tawm ntawm txoj kev tsaus ntuj uas npog nrees thiab tawm ntawm txoj kev poob cev qhev mus rau txoj kev ywj pheej.

6 Vim Yauxej ua tim khawv tseeb, hais tias: Tus Tswv uas yog kuv tus Vajtswv yuav tsa ib tug pom tau, uas yog tus pom tau uas tseem ceeb heev los rau koj cov xeeb leej xeeb ntxwv.

7 Muaj tseeb tiag, Yauxej tau hais tseeb hais tias: Tus Tswv hais li no rau kuv hais tias: Kuv yuav tsa ib tug pom tau uas tseem ceeb heev sawv tawm hauv koj cov xeeb leej xeeb ntxwv los; thiab nws yog ib tug uas koj cov xeeb leej xeeb ntxwv yuav hwm heev. Thiab kuv yuav muab lus txib rau nws kom nws ua tau ib txoj hauj lwm pub rau koj cov xeeb leej xeeb ntxwv, uas yog nws cov kwv tij, qhov uas yuav muaj nqis heev rau lawv, twb yuav ua kom lawv paub txog tej kev khi lus uas kuv tau khi nrog koj tej yawg koob.

8 Thiab kuv yuav muab ib lo lus txib rau nws kom nws tsis txhob ua lwm yam hauj lwm, tsuas yog ua txoj hauj lwm uas kuv txib kom nws ua xwb. Thiab kuv yuav ua kom nws muaj hwj chim nyob ntawm kuv lub qhov muag; vim nws yuav ua kuv txoj hauj lwm.

9 Thiab nws yuav muaj hwj chim zoo li Mauxes, tus uas kuv tau hais tias kuv yuav tsa sawv los rau nej, los tso kuv haiv neeg dim, auj tsev neeg Ixayees.

10 Thiab kuv yuav tsa Mauxes sawv, los tso koj cov neeg dim tawm hauv teb chaws Iyiv.

11 Tiam sis kuv yuav tsa ib tug pom tau sawv tawm hauv koj cov xeeb leej xeeb ntxwv los; thiab kuv yuav muab hwj chim rau nws los qhuab qhia kuv tej lus rau koj cov xeeb ntxwv cov tub ki—thiab tus Tswv hais tias, tsis yog yuav los qhuab qhia kuv tej lus xwb, tiam sis yuav los yaum kom lawv ntseeg kuv tej lus, tej uas twb xub muab rau lawv lawm.

12 Yog li ntawd, koj cov tub ki yuav sau ntawv; thiab Yudas cov tub ki los yuav sau ntawv; thiab zaj uas koj cov tub ki yuav sau, thiab zaj uas Yudas cov tub ki yuav sau, yuav los koom ua ib ke, los rhuav tej lus qhia uas tsis tseeb thiab los txo tej kev sib cav sib ceg, thiab los tsim kev thaj yeeb rau koj cov tub ki, thiab los coj lawv kom los paub txog lawv cov yawg koob nyob hauv hnub nyoog kawg, thiab kom los paub txog kuv tej kev khi lus thiab, tus Tswv hais li ntawd.

13 Thiab tawm hauv txoj kev qaug zog tus Tswv yuav ua rau nws muaj zog, nyob rau hnub thaum kuv txoj hauj lwm yuav pib mus thoob plaws rau kuv haiv neeg, kom muab koj txum tim rov qab los, auj tsev neeg Ixayees, tus Tswv hais li ntawd.

14 Thiab Yauxej tau qhia tej yuav muaj los yav tom ntej li no, hais tias: Saib seb, tus Tswv yuav foom koob hmoov rau tus pom tau ntawd; thiab lawv cov uas nrhiav kev ua kom nws puas tsuaj yuav raug puas tsuaj tas; vim yuav muaj raws li cov lus cog tseg no uas kuv tau txais los ntawm tus Tswv, hais txog kuv cov xeeb leej xeeb ntxwv. Saib seb, kuv paub tseeb hais tias yuav muaj raws li cov lus cog tseg no;

15 Thiab nws lub npe yuav hu li kuv lub; thiab yuav hu nws raws nws txiv lub npe. Thiab nws yuav zoo li kuv; vim tej yam uas tus Tswv yuav ua tawm ntawm nws txhais tes los, los ntawm tus Tswv lub hwj chim yuav coj tau kuv haiv neeg los mus rau txoj kev cawm seej.

16 Muaj tseeb tiag, Yauxej qhia tej uas yuav muaj los yav tom ntej li no: Kuv paub tseeb txog tej yam no, twb ib yam li kuv paub tseeb txog Mauxes cov lus cog tseg; vim tus Tswv tau hais rau kuv tias, kuv yuav tsom kwm koj cov tub ki mus ib txhis li.

17 Thiab tus Tswv tau hais tias: Kuv yuav tsa ib tug Mauxes sawv; thiab kuv yuav muab lub hwj chim rau nws nyob hauv ib tug pas nrig; thiab kuv yuav muab lub tswv yim zoo rau nws sau Vajtswv lus. Tiam sis kuv yuav tsis muab nws tus nplaig daws, kom nws hais lus ntau, vim kuv yuav tsis ua kom nws hais tau lus npliag. Tiam sis kuv yuav xuas tus ntiv tes ntawm kuv txhais tes kiag sau kuv tej kev cai rau nws; thiab kuv yuav muab ib tug cev lus rau nws.

18 Thiab tus Tswv kuj tau hais rau kuv ntxiv tias: Kuv yuav tsa ib tug rau koj cov xeeb leej xeeb ntxwv; thiab kuv yuav muab ib tug cev lus rau nws. Thiab kuv, saib seb, kuv yuav cia rau nws sau koj cov tub ki tej ntaub ntawv, pub rau koj cov xeeb leej xeeb ntxwv; thiab tus cev lus ntawm koj cov tub ki yuav tshaj tawm zaj no.

19 Thiab tej lus uas nws yuav sau yuav yog tej lus uas tsim nyog raws li kuv laj lim tswv yim uas yuav mus rau koj cov xeeb leej xeeb ntxwv. Thiab yuav zoo li koj cov xeeb leej xeeb ntxwv tau qw tawm hauv av los rau lawv; vim kuv paub lawv txoj kev ntseeg.

20 Thiab lawv yuav qw nrov nrov tawm hauv av los; muaj tseeb tiag, twb yuav qw kom lawv cov kwv tij hloov siab lees txim, txawm tias twb tau ntau ntau tiam neeg tom qab lawv tau dhau mus. Thiab yuav muaj tias lawv lub suab qw yuav mus, raws li lawv tej lus uas yooj yim to taub.

21 Vim lawv txoj kev ntseeg lawv tej lus yuav tawm ntawm kuv lub qhov ncauj mus rau lawv cov kwv tij uas yog koj cov xeeb leej xeeb ntxwv; thiab qhov qaug zog ntawm lawv tej lus kuv yuav ua kom muaj zog nyob hauv lawv txoj kev ntseeg, kom nco txog kuv txoj kev khi lus uas kuv tau khi rau lawv tej yawg koob.

22 Thiab nim no, saib seb, kuv tus tub Yauxej, kuv yawg koob thaum ub tau qhia tej yuav muaj los yav tom ntej zoo li no.

23 Yog li ntawd, vim yog txoj kev khi lus no koj thiaj li tau txais koob hmoov; koj cov tub ki yuav tsis raug puas tsuaj, vim lawv yuav mloog tej lus uas nyob hauv phau ntawv.

24 Thiab ib tug uas muaj hwj chim nyob hauv lawv yuav sawv los, tus uas yuav ua ntau yam zoo, ntawm kev hais lus thiab kev ua dej ua num huv tib si, thiab nws yuav ua ib rab cuab yeej nyob hauv Vajtswv txhais tes, uas muaj txoj kev ntseeg heev, los ua tau tej txuj ci uas xav tsis thoob loj heev, thiab ua tej yam uas tseem ceeb rau Vajtswv pom, kom coj tau ntau yam txum tim rov qab los rau tsev neeg Ixayees, thiab rau koj cov kwv tij cov tub ki.

25 Thiab nim no, koj tau koob hmoov, Yauxej. Saib seb, koj tseem yau; yog li ntawd cia li mloog koj tus tij laug, Nifais, tej lus, thiab koj yuav tau txais raws li tej lus uas kuv tau hais. Nco ntsoov koj txiv tus uas tab tom yuav tuag tej lus. Amees.