1 Npanpiloos lub nra hnyav, uas Yaxayas, Amauxes tus tub, tau pom.

2 Cia li tsa ib tug chij rau saum lub roob siab, tsa suab qw rau lawv, co tes, kom lawv mus rau hauv tej neeg muaj meej mom tej rooj vag.

3 Kuv tau txib kuv cov neeg uas hloov ua dawb huv, kuv kuj tau hu kuv cov neeg uas muaj hwj chim, vim kuv txoj kev npau taws tsis yog rau lawv cov uas zoo siab txog kuv lub yeeb koob.

4 Hnov pab neeg lub suab nyob hauv tej roob zoo li ib co neeg uas muaj hwj chim, hnov ib lub suab ntawm tej nceeg vaj ntawm tej haiv neeg uas tau sib sau tuaj ua ke, Ib Tsoom Tub Rog tus Tswv sau cov tub rog ntawm tej tshav rog los ua ke.

5 Lawv tuaj puag tim ib lub teb chaws uas deb heev tuaj, tuaj puag tim ntuj kawg tuaj, muaj tseeb tiag, tus Tswv, thiab tej cuab yeej ua rog ntawm nws txoj kev npau taws, tuaj ua kom tag nrho thaj av puas tsuaj.

6 Nej cia li nyiav heev, vim tus Tswv hnub twb yuav txog lawm; hnub ntawd yuav los zoo li txoj kev puas tsuaj los ntawm tus Muaj Hwj Chim Tag Nrho los.

7 Yog li ntawd txhua txhais tes yuav qaug zog, txhua tus neeg lub siab yuav yaj ua kua;

8 Thiab lawv yuav ntshai; kev mob nkeeg thiab kev tu siab yuav los tuav lawv; lawv ib leeg yuav xav tsis thoob rau ib leeg; lawv tej ntsej muag yuav zoo li tej nplaim hluav taws.

9 Saib seb, tus Tswv hnub twb yuav los, ua nruj ua tsiv nrog kev chim thiab kev npau taws heev, los ua kom thaj av tsis muaj neeg nyob; thiab nws yuav ua kom cov neeg muaj kev txhaum uas nyob hauv puas tsuaj tawm mus.

10 Vim tej hnub qub saum ntuj thiab tej txhiaj txiv mim uas nyob saud yuav tsis ci; lub hnub yuav tsaus nti thaum nws tawm tuaj, thiab lub hli yuav tsis ua kom nws lub teeb ci.

11 Thiab kuv yuav rau txim rau neeg ntiaj teb vim yog tej kev phem, thiab rau txim rau cov neeg phem vim lawv txoj kev ua txhaum; kuv yuav ua kom txoj kev muab hlob ntawm cov neeg khav txiv tu mus, thiab yuav txo cov neeg txaus ntshai txoj kev khav txiv.

12 Kuv yuav ua kom ib tug neeg muaj nqis dua tej tseem kub; twb yuav ua kom ib tug neeg muaj nqis dua Aufis daim kub.

13 Yog li ntawd, kuv yuav co lub ntuj, thiab lub ntiaj teb yuav txav tawm ntawm nws qhov chaw mus, nyob hauv Ib Tsoom Tub Rog tus Tswv txoj kev npau taws, thiab nyob hauv hnub ntawm nws txoj kev npau taws heev.

14 Thiab thaum ntawd yuav zoo li tus mos lwj uas raug raws, thiab zoo li tus yaj uas tsis muaj neeg sau; thiab lawv txhua tus yuav tig rov mus rau lawv cov neeg, thiab txhua tus yuav khiav mus rau lawv thaj av.

15 Txhua tus uas khav txiv yuav raug hno kom tshab; muaj tseeb tiag, thiab txhua tus uas koom nrog cov neeg phem yuav vau los ntawm hniav ntaj.

16 Lawv cov me nyuam kuj yuav raug tsoo ua tej dwb daim rau lawv qhov muag pom; lawv tej vaj tse yuav raug txeeb thiab lawv tej poj niam yuav raug yuam.

17 Saib seb, kuv yuav txhaub kom cov neeg Medes tuaj tawm tsam lawv, cov uas tsis ntshaw nyiaj thiab kub, thiab lawv yuav tsis zoo siab rau tej ntawd.

18 Lawv tej hneev yuav tsoo cov tub hluas kom ua tej dwb daim; thiab lawv yuav tsis muaj lub siab hlub rau cov me nyuam mos hauv plab; lawv lub qhov muag yuav tsis tseg tej me nyuam yaus.

19 Thiab Npanpiloos, lub yeeb koob ntawm tej lub nceeg vaj, tej hauj lwm zoo nkauj uas Khadees ua tau, yuav zoo li thaum Vajtswv ua rau lub nroog Xaudoos thiab Kaumaulas puas tsuaj.

20 Npanpiloos yuav tsis muaj neeg los nyob ntxiv li lawm, thiab yuav tsis muaj neeg los nyob ntawm ib tiam neeg mus rau ib tiam: thiab tej neeg Alanpias yuav tsis tuaj tsa tsev pheeb suab ntaub rau ntawd; thiab cov neeg yug yaj yuav tsis ua lawv tej nkuaj yaj rau ntawd.

21 Tiam sis tej tsiaj qus tom tiaj suab puam yuav los da ntawd; thiab lawv tej vaj tse yuav muaj tej tsiaj phem nyob puv nkaus; thiab tej plas yuav los nyob ntawd, thiab tej sai yuav los dhia ntawd.

22 Thiab tej tsiaj qus ntawm tej koog pov txwv yuav los quaj nyob rau hauv lawv tej vaj tse uas khoob lug, thiab tej zaj yuav los nyob hauv lawv tej tsev vaj ntxwv uas zoo nkauj; thiab Npanpiloos lub caij twb los ze lawm, thiab yuav tsis ncua nws hnub nyoog. Vim kuv yuav ua kom nws puas tsuaj nrawm kawg nkaus; muaj tseeb tiag, vim kuv yuav hlub tshua kuv cov neeg, tiam sis cov neeg phem yuav piam sij.