1 Thiab yuav muaj ib tug ceg hlav tawm ntawm Yexais tus kav los, thiab yuav muaj ib ceg hlav tawm ntawm nws tej cag tuaj.

2 Thiab tus Tswv tus Ntsuj Plig yuav los nrog nws nyob, lub txiaj ntsim muaj tswv yim thiab txoj kev to taub, lub txiaj ntsim txawj ntuas thiab muaj hwj chim, lub txiaj ntsim muaj kev txawj ntse thiab txoj kev hwm tus Tswv;

3 Thiab yuav ua kom nws to taub sai txog txoj kev hwm tus Tswv; thiab nws yuav tsis txiav txim raws li nws lub qhov muag pom, los sis yuav tsis qhuab ntuas raws li nws lub pob ntseg hnov.

4 Tiam sis nws yuav siv kev ncaj ncees los txiav txim rau cov neeg pluag, thiab siv kev ncaj los qhuab ntuas neeg kom pab cov uas muaj siab mos siab muag hauv lub ntiaj teb; thiab nws yuav xuas tus pas ntawm nws lub qhov ncauj los nplawm lub ntiaj teb, thiab xuas cov pa ntawm nws daim di ncauj los tua cov neeg phem.

5 Thiab kev ncaj ncees yuav yog txoj siv sia ntawm nws duav, thiab kev mob siab rau ntseeg yuav yog txoj siv sia ntawm nws ntsag.

6 Tus hma yuav nyob nrog tus me nyuam yaj, thiab tus tsov txaij yuav pw nrog tus me nyuam tshis, thiab tus thav nyuj thiab tus thav tsov ntxhuav thiab tej nyuj twm uas rog yuav nyob ua ke; thiab ib tug me nyuam yaus yuav coj lawv kev.

7 Thiab tus nyuj thiab tus dais yuav noj ua ke; nkawd cov me nyuam mos yuav da pw ua ke; thiab tus tsov ntxhuav yuav noj quav nyab ib yam li tus heev nyuj.

8 Thiab tus me nyuam uas tseem noj mis yuav ua si ntawm lub qhov uas nab taug nyob, thiab tus me nyuam uas tso mis lawm yuav tso nws txhais tes rau saum nab raj kub sai lub qhov.

9 Lawv yuav tsis ua kom mob thiab tsis ua kom puas tsuaj nyob thoob plaws hauv kuv lub roob dawb huv, vim kev paub txog tus Tswv yuav puv mus thoob plaws lub ntiaj teb, ib yam li tej dej npog mus thoob hiav txwv.

10 Thiab nyob rau hnub ntawd Yexais yuav muaj ib tug cag, uas yuav yog ib tug chij ntawm cov neeg; tus cag no yog tus uas Lwm Haiv Neeg yuav nrhiav; thiab nws qhov chaw so yuav muaj yeeb koob.

11 Thiab yuav muaj tias nyob rau hnub ntawd tus Tswv yuav cev nws txhais tes dua zaum ob los pab cov seem tshuav ntawm nws cov neeg kom zoo li qub, txij li puag tim Axilias, thiab tim Iyiv, thiab tim Patalaus, thiab tim Kuses, thiab tim Elames, thiab tim Sinas, thiab tim Hamas, thiab tim tej koog pov txwv hauv dej hiav txwv.

12 Thiab nws yuav tsa ib tug chij rau tej haiv neeg, thiab yuav sau Ixayees tej neeg uas raug ncaws tawm los ua ke, thiab sau cov neeg Yudas uas raug faib mus nyob thoob plaws plaub ceg kaum ntuj lawm los ua ke.

13 Efala-is tej kev sib khib kuj yuav ncaim mus, thiab Yudas tej yeeb ncuab yuav raug txiav tawm; Efala-is yuav tsis khib Yudas, thiab Yudas yuav tsis thab Efala-is.

14 Tiam sis nkawd yuav ya nyob saum cov Neeg Filitees lub xub pwg mus rau sab hnub poob; nkawd yuav sib koom tes nyiag cov neeg uas nyob sab hnub tuaj; nkawd yuav xuas tes nthos Edoos thiab Mau-am; thiab Amoos cov me nyuam yuav mloog nkawd lus.

15 Thiab tus Tswv yuav rhuav tus nplaig ntawm cov neeg Iyiv tus dej hiav txwv kom puas tsuaj huv tib si; thiab los ntawm nws tej cua muaj zog nws yuav nchos nws txhais tes rau saum tus dej, thiab yuav muab nws nplawm nyob hauv xya tus dej, thiab yuav cia neeg mus ko taw qhuav rau saud.

16 Thiab yuav muaj ib txoj kev loj rau cov seem tshuav ntawm nws cov neeg, uas seem los ntawm Axilias, zoo ib yam li tau muaj rau Ixayees nyob rau hauv hnub uas Ixayees tau tawm ntawm thaj av tim Iyiv los.