Tshooj 10
Yakhauj piav hais tias cov Neeg Yudais yuav muab lawv tus Vajtswv ntsia rau saum ntoo khaub lig—Lawv yuav tawg khiav ri niab mus txog thaum uas lawv pib ntseeg Nws—Teb chaws Amelikas yuav yog ib thaj av ywj pheej uas nyob tsis muaj vaj ntxwv kav—Rov los sib raug zoo nrog Vajtswv thiab txais txoj kev cawm seej los ntawm Nws txoj kev tshav ntuj. Kwv yees li 559–545 xyoos ua ntej Yexus yug los.
1 Thiab nim no kuv, Yakhauj, rov qhia rau nej dua, kuv cov kwv tij uas kuv hlub, ntsig txog ceg neeg ncaj ncees uas kuv tau hais txog.
2 Vim saib seb, tej lus cog tseg uas peb tau txais yog tej lus cog tseg rau peb raws li sab cev nqaij daim tawv; yog li ntawd, Vajtswv tau qhia rau kuv tias muaj coob leej ntawm peb cov me nyuam yuav piam sij rau sab cev nqaij daim tawv vim txoj kev tsis ntseeg, txawm li ntawd los, Vajtswv tseem yuav hlub tshua coob leej; thiab Vajtswv yuav muab peb cov me nyuam txum tim rov los, xwv kom lawv yuav lees txais qhov uas muab tau kev paub tseeb txog lawv tus Txhiv Dim rau lawv.
3 Yog li ntawd, ib yam li kuv tau hais rau nej, yeej yuav tsum muaj tias Khetos—vim nag hmo tus tim tswv tau hais rau kuv tias nws lub npe hu li no—yuav los rau hauv cov Neeg Yudais, los rau hauv cov neeg uas phem dua ntais lwm cov; thiab lawv yuav muab nws ntsia rau saum ntoo khaub lig—vim peb tus Vajtswv yuav tsum ua li no, thiab yeej tsis muaj ib haiv neeg twg nyob hauv ntiaj teb no uas yuav muab lawv tus Vajtswv ntsia rau saum ntoo khaub lig.
4 Yog hais tias muaj tej txuj ci tseem ceeb uas muaj hwj chim no los rau lwm haiv neeg ces ntshe lawv twb yuav hloov siab lees txim, thiab paub hais tias nws yog lawv tus Vajtswv.
5 Tiam sis vim tej tswv yim xib hwb cuav thiab tej kev ua phem, lawv cov uas nyob hauv Yeluxalees yuav ua lawv lub caj dab tawv qhawv tawm tsam nws, kom nws raug ntsia rau saum ntoo khaub lig.
6 Yog li ntawd, vim lawv tej kev ua phem, tej kev puas tsuaj, tej kev tshaib nqhis, tej kab mob phem, thiab tej kev nqaij ntuag ntshav nrog yuav los raug lawv; thiab lawv cov uas tsis raug puas tsuaj yuav tawg khiav ri niab mus rau txhua haiv neeg.
7 Tiam sis saib seb, tus Tswv uas yog Vajtswv hais li no: Thaum txog hnub uas lawv ntseeg kuv, ntseeg tias kuv yog tus Khetos, kuv tau khi lus rau lawv cov yawg koob tias thaum ntawd yuav muab lawv txum tim rov los ntawm sab cev nqaij daim tawv, nyob rau hauv lub ntiaj teb, rov mus rau tej thaj av uas yog lawv qub txeeg qub teg.
8 Thiab yuav muaj tias tom qab ntau xyoo uas lawv tau tawg khiav ri niab yuav muab lawv sau los ua ke, sau ntawm tej koog pov txwv ntawm tej dej hiav txwv los, thiab sau ntawm plaub ceg kaum ntuj los; thiab tej haiv ntawm Lwm Haiv Neeg yuav tsim txiaj heev nyob ntawm kuv lub qhov muag, Vajtswv hais li ntawd, vim lawv yuav coj cov neeg Yudais mus rau tej thaj av uas yog lawv qub txeeg qub teg.
9 Muaj tseeb tiag, Lwm Haiv Neeg tej vaj ntxwv yuav ua txiv qhuav tu yug lawv, thiab lawv tej niam vaj ntxwv yuav los ua lawv niam qhuav tu yug; yog li ntawd, tus Tswv tej lus cog tseg yog tej uas tseem ceeb rau Lwm Haiv Neeg, vim nws tau hais li, thiab leej twg yuav muaj peev xwm xyeej tau?
10 Tiam sis saib seb, thaj av no, Vajtswv hais tias, yuav yog ib thaj av uas cia ua nej qub txeeg qub teg, thiab Lwm Haiv Neeg yuav tau txais koob hmoov nyob hauv thaj av no.
11 Thiab thaj av no yuav yog ib thaj av ywj pheej pub rau Lwm Haiv Neeg, thiab yuav tsis muaj vaj ntxwv nyob hauv thaj av no, tsa rau Lwm Haiv Neeg.
12 Thiab kuv yuav txhawb thaj av no lub dag lub zog tawm tsam lwm haiv neeg huv tib si.
13 Thiab Vajtswv hais tias, tus uas tuaj tawm tsam Xi-oos yuav raug piam sij.
14 Vim tus uas tsa ib tug vaj ntxwv sawv tawm tsam kuv yuav raug piam sij, vim kuv, tus uas yog tus Tswv, uas yog tus vaj ntxwv saum ntuj ceeb tsheej, yuav los ua lawv tus vaj ntxwv, thiab kuv yuav ua lub teeb rau lawv cov uas mloog kuv tej lus mus ib txhis li.
15 Yog li ntawd, vim tej yam xwm no, kom yuav muaj raws li kuv tej kev khi lus uas kuv tau khi rau noob neej, uas kuv yuav ua rau lawv thaum lawv tseem muaj cev nqaij daim tawv, kuv yeej yuav tsum ua kom tej yam lawv ua ntsiag to ntawm txoj kev tsaus ntuj, tej neeg tua neeg, thiab tej kev phem kev qias puas tsuaj mus.
16 Yog li ntawd, tus uas tawm tsam Xi-oos, tsis hais cov Neeg Yudais los sis Lwm Haiv Neeg, tsis hais cov neeg ua qhev los sis cov neeg ywj pheej, tsis hais poj niam los sis txiv neej, yuav piam sij; vim lawv yog cov uas yog tag nrho ntiaj teb tus niam ntiav; vim cov uas tsis tuaj kuv tog yog cov uas tawm tsam kuv, peb tus Vajtswv hais li.
17 Vim kuv yuav ua kom muaj raws li kuv tej lus uas kuv tau cog tseg rau noob neej, hais tias kuv yuav ua rau lawv thaum lawv tseem muaj cev nqaij daim tawv—
18 Yog li ntawd, kuv cov kwv tij uas kuv hlub, peb tus Vajtswv hais li no: Kuv yuav ua rau nej cov tub ki muaj kev kub ntxhov los ntawm Lwm Haiv Neeg txhais tes; txawm li ntawd los, kuv yuav ua kom Lwm Haiv Neeg muaj siab mos siab muag, xwv kom lawv yuav zoo li leej txiv rau nej cov tub ki; yog li ntawd, Lwm Haiv Neeg yuav tau koob hmoov thiab Vajtswv yuav suav lawv nrog tsev neeg Ixayees.
19 Yog li ntawd, kuv yuav muab thaj av no fij tseg cia rau nej cov tub ki, thiab rau lawv cov uas yuav los nrog nej cov tub ki nyob, mus ib txhis li, ua thaj av uas yog lawv qub txeeg qub teg; vim Vajtswv hais rau kuv tias nws yog thaj av uas zoo tshaj txhua thaj av, yog li ntawd, kuv xav kom txhua tus neeg uas nyob rau hauv thaj av no teev tiam kuv, Vajtswv hais li.
20 Thiab nim no, kuv cov kwv tij uas kuv hlub es, vim peb pom tias peb tus Vajtswv uas muaj siab hlub tshua tau qhia rau peb paub ntau yam txog tej xwm no, cia peb nco ntsoov txog nws, thiab muab peb tej kev txhaum tso pov tseg, thiab tsis txhob nyo peb tej taub hau, vim Vajtswv tsis tau muab peb tso pov tseg; txawm li ntawd los, cov neeg tim Yeluxalees tau ntiab peb tawm ntawm thaj av uas yog peb qub txeeg qub teg; tiam sis tus Tswv tau coj peb tuaj rau ib thaj av uas zoo dua, vim tus Tswv tau muab tus dej hiav txwv ua peb txoj kev, thiab peb nyob hauv ib lub koog pov txwv hauv dej hiav txwv.
21 Tiam sis tus Tswv tej lus cog tseg uas nws tau cog rau lawv cov uas nyob hauv tej koog pov txwv muaj nuj nqis heev; yog li ntawd vim qhov no hais tias tej koog pov txwv, ces yuav tsum muaj ntau lub koog pov txwv dua no, thiab kuj yog peb cov kwv tij uas nyob hauv tej koog pov txwv ntawd.
22 Vim saib seb, tus Tswv uas yog Vajtswv tau coj cov neeg khiav tawm hauv tsev neeg Ixayees tej lub sij hawm, raws li nws lub siab nyiam thiab nws pom zoo. Thiab nim no saib seb, tus Tswv nco ntsoov tag nrho cov uas tau ntshua lawm, yog li ntawd nws kuj nco ntsoov txog peb thiab.
23 Yog li ntawd, nej cia li zoo siab hlo, thiab nco ntsoov tias nej muaj kev ywj pheej xaiv ua rau nej tus kheej—xaiv txoj kev tuag uas kav mus ib txhis los sis xaiv txoj sia nyob mus ib txhis.
24 Yog li ntawd, cov kwv tij uas kuv hlub es, rov los sib raug zoo ua raws li Vajtswv lub siab nyiam, thiab tsis ua raws li tus dab phem thiab cev nqaij daim tawv lub siab nyiam; thiab nco ntsoov tias, tom qab nej rov los sib raug zoo nrog Vajtswv, twb yog los ntawm Vajtswv txoj kev tshav ntuj xwb nej thiaj txais tau kev cawm seej.
25 Yog li ntawd, thov kom Vajtswv tsa nej sawv hauv qhov tuag rov qab los los ntawm txoj kev sawv rov los lub hwj chim, thiab tsa nej sawv hauv qhov tuag uas kav ib txhis rov qab los los ntawm txoj kev theej txhoj lub hwj chim, xwv kom Vajtswv yuav txais nej mus rau hauv Vajtswv lub nceeg vaj uas nyob mus ib txhis, xwv kom nej yuav qhuas nws los ntawm Vajtswv txoj kev tshav ntuj. Amees.