1 Thiab nim no, Yakhauj tau hais ntau yam ntxiv rau kuv cov neeg nyob rau lub sij hawm ntawd; txawm li ntawd los tsuas yog tej yam no xwb uas kuv tau ua kom muab sau tseg, vim tej uas kuv tau muab sau tseg txaus kuv siab.

2 Thiab nim no kuv, Nifais, sau ntxiv txog Yaxayas tej lus, vim kuv tus ntsuj plig zoo siab rau nws tej lus. Vim kuv yuav muab nws tej lus los piv rau kuv cov neeg, thiab kuv yuav xa tej lus no mus thoob plaws rau kuv cov me nyuam, vim nws tau pom kuv tus Txhiv Dim tiag, twb ib yam li kuv tau pom nws.

3 Thiab kuv tus kwv, Yakhauj, kuj tau pom nws ib yam li kuv tau pom nws; yog li ntawd, kuv yuav xa lawv tej lus mus rau kuv cov me nyuam mus ua pov thawj rau lawv tias kuv tej lus muaj tseeb tiag. Yog li ntawd, Vajtswv tau hais tias, los ntawm peb tug tim khawv tej lus, kuv yuav tsa kuv txoj lus. Txawm li ntawd los, Vajtswv xa ntau tus tim khawv ntxiv, thiab nws ua pov thawj txog tag nrho nws tej lus.

4 Saib seb, kuv tus ntsuj plig zoo siab ua pov thawj txog qhov tseeb rau kuv cov neeg tias Khetos yuav los; vim rau qhov yog lub hom phiaj no thiaj li tau muab Mauxes txoj kev cai; thiab txhua yam uas Vajtswv tau muab los rau noob neej txij thaum chiv keeb ntawm lub ntiaj teb los, yog muab los ua lub cim txog Khetos.

5 Thiab kuv tus ntsuj plig kuj zoo siab rau tus Tswv tej kev khi lus uas nws tau khi tseg rau peb cov yawg koob; muaj tseeb tiag, kuv tus ntsuj plig zoo siab rau nws txoj kev tshav ntuj, thiab nws txoj kev txim lij, thiab nws lub hwj chim, thiab nws txoj kev hlub tshua uas muaj nyob hauv txoj hau kev tseem ceeb uas nyob mus ib txhis ntawm txoj kev dim kev tuag.

6 Thiab kuv tus ntsuj plig zoo siab ua pov thawj rau kuv cov neeg tias yog Khetos tsis los ces noob neej txhua tus yeej yuav piam sij.

7 Vim yog tsis muaj tus Khetos ces yeej tsis muaj Vajtswv; thiab yog tsis muaj Vajtswv ces yeej tsis muaj peb, vim yuav muaj tsis tau kev tsim txhua yam. Tiam sis muaj Vajtswv, thiab nws yog Khetos, thiab nws yuav los thaum txog lub sij hawm uas teem cia rau nws.

8 Thiab nim no kuv sau Yaxayas ib txhia lus tseg cia, xwv kom kuv cov neeg uas pom tej lus no yuav txhawb nqa lawv lub siab thiab muaj kev zoo siab rau tib neeg sawv daws. Nim no nov yog tej lus ntawd, thiab cia nej muab tej lus ntawd piv rau nej thiab rau neeg txhua tus.