Tshooj 14
Tus Tswv yuav muab Xi-oos thiab Xi-oos cov ntxhais txhiv dim thiab ntxuav lawv kom huv nyob rau lub caij milenias—Piv rau Yaxayas 4. Kwv yees li 559–545 xyoos ua ntej Yexus yug los.
1 Thiab nyob rau hnub ntawd, xya tus poj niam yuav ntho ib tug txiv neej, hais tias: Peb mam noj peb zaub peb mov, thiab hnav peb tsoos peb tsho; tsuas yog cia peb hu raws li koj lub npe xwb xwv kom tshem tau peb txoj kev txaj muag mus.
2 Nyob rau hnub ntawd tus Tswv tus ceg ntoo yuav zoo nkauj thiab muaj yeeb koob; lub ntiaj teb tej txiv hmab txiv ntoo yuav loj hlob thiab zoo nkauj rau lawv cov ntawm Ixayees uas tau khiav dim.
3 Thiab yuav muaj tias, yuav hais tias lawv cov uas tseg nyob rau hauv Xi-oos thiab tseem nyob rau hauv Yeluxalees yog cov uas dawb huv, txhua tus uas tau sau ntawv hais tias lawv nrog cov tseem muaj sia nyob rau hauv Yeluxalees—
4 Thaum tus Tswv tau ntxuav Xi-oos cov ntxhais qhov vuab tsuab lawm, thiab tau ntxuav Yeluxalees cov ntshav kom dawb huv tawm ntawm sawv daws uas nyob hauv los ntawm txoj kev txiav txim thiab los ntawm txoj kev kub hnyiab.
5 Thiab tus Tswv yuav tsim ib tauv huab uas muaj pa hluav taws thaum nruab hnub thiab tsim ib tug nplaim hluav taws uas ci ntsa iab thaum tsaus ntuj nyob rau saum lub roob Xi-oos txhua qhov chaw nyob; vim nyob rau saum tag nrho Xi-oos lub yeeb koob yuav muaj kev thaiv.
6 Thiab yuav muaj ib lub tsev ntaub kom muaj duab ntxoo thaum nruab hnub thiaj tsis kub kub, thiab kom muaj ib qho chaw nkaum, thiab ib qho chaw nyob nkaum cua daj cua dub thiab nkaum nag.