1 Tiam sis, saib seb, nyob rau hauv hnub nyoog kawg, los sis nyob rau hauv Lwm Haiv Neeg lub caij—muaj tseeb tiag, saib seb txhua txhia haiv ntawm Lwm Haiv Neeg thiab cov Neeg Yudais thiab, tsis hais cov uas yuav tuaj rau hauv thaj av no thiab cov uas yuav nyob rau hauv lwm thaj av, muaj tseeb tiag, nyob hauv txhua thaj av hauv lub ntiaj teb, saib seb, kev ua phem thiab txhua txhia yam kev qias yuav ua rau lawv qaug—

2 Thiab thaum hnub ntawd los txog Ib Tsoom Tub Rog tus Tswv yuav los xyuas lawv, nrog xob quaj thiab nrog av qeeg, thiab nrog ib lub suab nrov heev, thiab nrog cua daj cua dub, thiab nrog khaub zeeg cua, thiab nrog nplaim hluav taws leej faj.

3 Thiab txhua haiv neeg uas tawm tsam Xi-oos, thiab cov uas ua kom nws muaj kev nyuaj siab, yuav zoo li ib zaj npau suav uas pom thaum tsaus ntuj; muaj tseeb tiag, yuav muaj li no rau lawv, zoo li rau ib tug neeg tshaib plab uas npau suav, thiab saib seb nws noj tiam sis thaum nws tsim los nws plab qhuav qhawv; los sis zoo li ib tug neeg nqhis dej uas npau suav, thiab saib seb nws haus dej tiam sis thaum nws tsim los nws qaug zog, thiab nws tus ntsuj plig tseem nqhis; muaj tseeb tiag, twb yuav muaj li ntawd rau tej neeg ntawm txhua haiv neeg uas nkaug tawm tsam Roob Xi-oos.

4 Vim saib seb, nej txhua tus uas ua kev phem, cia li nyob twj ywm thiab cia li ua zoo xav, vim nej yuav qw, thiab quaj; muaj tseeb tiag, nej yuav qaug tiam sis tsis yog vim cawv txiv hmab, nej yuav vau koj vau kus tiam sis tsis yog vim tej dej cawv.

5 Vim saib seb, tus Tswv tau hliv tus ntsuj plig uas tsaug zog heev rau nej. Vim saib seb, nej tau kaw nej lub qhov muag, thiab nej tau xyeej cov yaj saub; thiab nej cov nom cov tswv, thiab cov pom tau yav tom ntej nws tau muab zais vim yog nej tej kev ua phem.

6 Thiab yuav muaj tias tus Tswv uas yog Vajtswv yuav muab cov lus ntawm ib phau ntawv tawm los rau nej, thiab cov lus no yuav yog cov uas tau pw tsaug zog tej lus.

7 Thiab saib seb Vajtswv yuav muab phau ntawv no khi cia; thiab nyob hauv phau ntawv yuav muaj kev tshwm sim los ntawm Vajtswv, txij thaum chiv keeb ntawm lub ntiaj teb los mus txog thaum ntuj tag teb kawg.

8 Yog li ntawd, vim yog tej uas tau muab khi cia, Vajtswv yuav tsis muab tej uas tau muab khi cia tawm los thaum cov neeg tseem muaj kev phem thiab kev qias. Yog li ntawd yuav tsis muab phau ntawv rau lawv.

9 Tiam sis yuav muab phau ntawv rau ib tug txiv neej, thiab nws yuav muab cov lus ntawm phau ntawv, uas yog cov neeg uas tau pw hauv plua av tej lus, thiab nws yuav nqa cov lus no mus rau lwm tus;

10 Tiam sis nws yuav tsis nqa cov lus uas tau muab khi cia, thiab nws yuav tsis nqa phau ntawv. Vim yuav muab phau ntawv khi cia los ntawm Vajtswv lub hwj chim, thiab tej kev tshwm sim uas tau muab khi cia yuav muab ceev rau hauv phau ntawv kom txog lub sij hawm uas tus Tswv pom zoo, es mam muab tej lus uas tau khi cia ua tawm los; vim saib seb, tej lus ntawd qhia txhua yam txij thaum ntuj tsim teb raug los txog rau thaum ntuj tag teb kawg.

11 Thiab hnub ntawd yuav los uas yuav muab tej lus ntawm phau ntawv uas tau muab khi cia nyeem nyob puag saum tej ruv tsev; thiab yuav nyeem tej lus ntawd los ntawm Khetos lub hwj chim; thiab yuav muab txhua yam ua tshwm sim los rau noob neej, tej uas ib txwm tau ua tshwm sim los rau noob neej, thiab tej uas tseem yuav ua tshwm sim mus txog thaum ntuj tag teb kawg.

12 Yog li ntawd, nyob rau hnub ntawd thaum muab phau ntawv rau tus txiv neej uas kuv tau hais txog, yuav muab phau ntawv zais ntawm neeg ntiaj teb lub qhov muag, xwv kom tsis muaj ib tug neeg twg lub qhov muag pom tsuas yog peb tug tim khawv thiaj li yuav pom xwb, los ntawm Vajtswv lub hwj chim, nrog tus uas Vajtswv tau muab phau ntawv rau; thiab lawv yuav ua tim khawv txog qhov tseeb ntawm phau ntawv thiab txog tej xwm txheej uas nyob rau haud.

13 Thiab yuav tsis muaj dua lwm tus uas yuav pom phau ntawv no, tsuas yog ob peb tug raws li Vajtswv lub siab nyiam, los ua tim khawv txog nws tej lus rau noob neej; vim tus Tswv uas yog Vajtswv tau hais tias tej lus uas cov neeg rau siab ntseeg hais yuav nrov zoo li tej lus uas los ntawm cov tuag los.

14 Yog li ntawd, tus Tswv uas yog Vajtswv yuav muab cov lus ntawm phau ntawv tawm los; thiab nws yuav tsa nws txoj lus los ntawm coob tus tim khawv lub qhov ncauj raws li nws pom zoo; thiab kev txom nyem yuav raug tus uas xyeej Vajtswv txoj lus!

15 Tiam sis saib seb, yuav muaj tias tus Tswv uas yog Vajtswv yuav hais rau tus uas nws yuav muab phau ntawv rau hais tias: Muab cov lus no uas tsis tau muab khi cia thiab muab rau lwm tus, xwv kom nws yuav coj mus qhia rau tus neeg kawm txawj kawm ntse hais tias: Kuv thov koj nyeem qhov no. Thiab tus neeg kawm txawj kawm ntse yuav teb hais tias: Nqa phau ntawv tuaj rau kuv, es kuv mam nyeem.

16 Thiab nim no, vim yog cov neeg kawm txawj kawm ntse xav tau yeeb koob ntawm lub ntiaj teb thiab xav muaj nyiaj nplua nuj lawv yuav hais li no, thiab tsis yog rau Vajtswv lub yeeb koob.

17 Thiab tus txiv neej yuav hais tias: Kuv nqa tsis tau phau ntawv tuaj, vim tau muab phau ntawv khi cia.

18 Ces tus neeg kawm txawj kawm ntse yuav teb hais tias: Kuv nyeem tsis tau phau ntawv uas tau muab zwm cia.

19 Yog li ntawd yuav muaj tias tus Tswv uas yog Vajtswv yuav rov qab muab phau ntawv thiab cov lus nyob rau hauv rau tus uas tsis kawm txawj kawm ntse; thiab tus txiv neej uas tsis kawm txawj kawm ntse yuav hais tias: Kuv twb tsis kawm txawj kawm ntse.

20 Thaum ntawd tus Tswv uas yog Vajtswv yuav hais rau nws hais tias: Cov neeg kawm txawj kawm ntse yuav tsis nyeem cov lus no, vim lawv tau xyeej cov lus no, thiab kuv yeej ua tau kuv txoj hauj lwm; yog li ntawd koj cia li nyeem cov lus uas kuv yuav muab rau koj.

21 Tsis txhob kov tej uas tau muab khi cia, vim kuv mam li muab tej ntawd tawm los thaum txog lub sij hawm uas kuv pom zoo; vim kuv yuav ua rau noob neej paub tias kuv yeej ua tau kuv txoj hauj lwm.

22 Yog li ntawd, thaum koj tau nyeem cov lus uas kuv tau txib kom koj nyeem, thiab tau txais cov tim khawv uas kuv tau cog lus rau koj, thaum ntawd koj yuav tsum rov qab muab phau ntawv khi tseg cia dua, thiab muab phau ntawv coj mus zais rau kuv, xwv kom kuv yuav ceev cov lus uas koj tsis tau nyeem cia, kom txog thaum kuv pom tias tsim nyog raws li kuv lub tswv yim muab txhua yam ua tshwm sim los rau noob neej.

23 Vim saib seb, kuv yog Vajtswv; thiab kuv yog ib tug Vajtswv ua txuj ci tseem ceeb; thiab kuv yuav qhia rau neeg ntiaj teb tias kuv zoo ib yam nag hmo, hnub no, thiab mus ib txhis li; thiab kuv tsuas ua hauj lwm nyob hauv noob neej raws li lawv txoj kev ntseeg.

24 Thiab yuav muaj dua tias tus Tswv yuav hais rau tus uas yuav nyeem cov lus uas yuav muab rau nws:

25 Vim cov neeg no siv lawv lub qhov ncauj txav los ze kuv thiab muab lawv di ncauj hwm kuv, tiam sis tau tshem lawv lub siab mus deb ntawm kuv, thiab lawv tej kev hwm kuv yog kawm los ntawm neeg tej ntsiab cai—

26 Yog li ntawd, kuv yuav ua ib txoj hauj lwm zoo kawg nkaus nyob hauv cov neeg no, muaj tseeb tiag, ib txoj hauj lwm zoo kawg nkaus thiab ib qho txuj ci xav tsis thoob, vim cov neeg txawj ntse thiab cov neeg paub ntaub paub ntawv lawv tej kev txawj ntse yuav piam sij, thiab txoj kev to taub ntawm lawv cov neeg ntse yuav raug muab zais.

27 Thiab kev txom nyem yuav raug cov uas nrhiav chaw tob muab lawv tej kev tom txwv zais deb ntawm tus Tswv! Thiab lawv tej hauj lwm yog nyob hauv qhov tsaus ntuj; thiab lawv hais tias: Leej twg yuav pom peb, thiab leej twg yuav paub? Thiab lawv kuj hais tias: muaj tseeb tiag, cov neeg yuav pom tias qhov uas tus Tswv muab tej no ntxeev sab hauv tuaj sab nraud zoo li tus neeg puab lauj kaub tej av. Tiam sis saib seb, Ib Tsoom Tub Rog tus Tswv hais tias, kuv yuav qhia rau lawv tias, kuv paub tag nrho lawv tej hauj lwm. Puas tsim nyog rau qhov khoom uas tsim tau hais txog tus uas tsim qhov khoom ntawd tias, nws tsis yog tus tsim kuv? Los sis puas tsim nyog rau qhov khoom uas puab tau hais txog tus uas puab qhov khoom ntawd tias, nws tsis muaj kev to taub?

28 Tiam sis saib seb, Ib Tsoom Tub Rog tus Tswv hais tias: Kuv yuav qhia rau noob neej tias tshuav tsis ntev pes tsawg lawm uas tus Tswv yuav muab Lenpanoos pauv mus ua ib thaj teb uas zoo heev; thiab cov neeg yuav saib thaj teb uas zoo ntawd zoo li ib thaj hav zoov.

29 Thiab nyob rau hnub ntawd cov neeg lag ntseg yuav hnov cov lus hauv phau ntawv, thiab cov neeg dig muag tej qhov muag yuav pom tawm hauv txoj kev pom tsis tseeb los thiab tawm hauv qhov tsaus ntuj los.

30 Thiab cov neeg siab mos siab muag yuav tau koob hmoov ntxiv, thiab lawv yuav xyiv fab rau tus Tswv, thiab cov pluag yuav zoo siab rau Ixayees tus Dawb Huv.

31 Vim tseeb npaum li tus Tswv muaj txoj sia nyob cov neeg yuav pom tias tus uas phem kawg nkaus yuav raug ua kom tsis muaj nuj nqis dab tsi, thiab tus uas pheej thuam lwm tus yuav raug puas tsuaj, thiab txhua tus uas tos ntsoov kev ua phem yuav raug muab txiav tawm mus;

32 Thiab cov uas hais lus nkaug ib tug neeg tsis muaj txim tias nws muaj txim, thiab cuab ib rooj ntxiab rau tus uas tau qhuab ntuas ntawm lub rooj vag, thiab muab cov neeg ncaj ncees thawb rau ib sab yam li tsis muaj nuj nqis.

33 Yog li ntawd, tus Tswv hais li no, tus uas tau txhiv Anplaham, ntsig txog tsev neeg Yakhauj: Nim no Yakhauj yuav tsis txaj muag, thiab nim no nws lub ntsej muag yuav tsis daj li.

34 Tiam sis thaum nws pom nws cov me nyuam, txoj hauj lwm ntawm kuv txhais tes, nyob ib puag ncig nws, lawv yuav qhuas kuv lub npe, thiab qhuas Yakhauj Tus Dawb Huv, thiab yuav hwm Ixayees tus Vajtswv.

35 Cov uas tau ua yuam kev ntawm sab ntsuj plig kuj yuav to taub, thiab cov uas yws yws yuav tau los kawm lus qhuab qhia.