1 Txawm li ntawd los, txoj kev tsaus ntuj yuav tsis heev npaum li txoj kev tsim txom thaj av no, thaum xub thawj nws maj mam tsim txom thaj av Xenpuloos xwb, thiab thaj av Nathalis, thiab tom qab ntawd tau tsim txom hnyav dua raws Dej Hiav Txwv Liab mus dhau tus dej Yauladees hauv Kalilais uas yog qhov chaw uas muaj ntau haiv neeg tuaj nyob.

2 Cov neeg uas tau taug kev hauv kev tsaus ntuj tau pom ib txoj kev kaj ci ntsa iab; lawv cov uas nyob hauv thaj av ntawm txoj kev tuag tus duab ntxoo, txoj kev kaj tau ci tuaj rau lawv.

3 Koj tau ua kom haiv neeg huaj vam coob, thiab tau ntxiv kom muaj kev xyiv fab tuaj—lawv muaj kev xyiv fab rau ntawm koj xub ntiag ib yam li muaj kev xyiv fab thaum sau qoob sau loo, thiab ib yam li tej neeg xyiv fab thaum lawv sib faib tej khoom uas lawv txeeb tau.

4 Vim koj tau ua rau Ixayees tus quab hnyav dam, thiab ua rau tus pas saum nws xub pwg lov, uas yog tus uas tsim txom nws tus pas.

5 Txhua txhia npluav rog ntawm tus tub rog yeej muaj suab quaj suab nyiav, thiab tej tsoos tsho yeej tsuas ntshav tas; tiam sis tej no yuav nrog hluav taws kub thiab roj hlawv.

6 Vim ib tug me nyuam yug los rau peb, twb muab ib tug me tub rau peb; thiab tsoom fwv yuav nyob rau saum nws lub xub pwg; thiab nws lub npe yuav hu ua, tus Zoo Kawg Nkaus, tus Coj Kev, tus Vajtswv Muaj Hwj Chim, Leej Txiv uas Kav Ib Txhis, tus Tub Vaj Ntxwv ntawm Kev Thaj Yeeb.

7 Nws txoj kev tswj hwm thiab kev thaj yeeb yuav muaj ntxiv zuj zus mus tsis muaj qhov kawg li, nws yuav zaum saum Daviv lub rooj theej kiab, thiab kho nws lub nceeg vaj, thiab yuav tsim kom muaj kev txiav txim thiab kev txim lij txij no mus, kom nyob ib txhis li. Ib Tsoom Tub Rog tus Tswv yuav kub siab lug ua tej no.

8 Tus Tswv tau xa nws txoj lus los rau Yakhauj thiab nws txoj lus tau los cuag Ixayees.

9 Thiab tag nrho tej neeg yuav paub, tsis hais Efala-is cov xeeb ntxwv thiab cov neeg uas nyob hauv Xamalis, cov uas muaj lub siab khav theeb thiab ua siab hlob hais tias:

10 Tej thwv cib tau vau tag, tiam sis peb yuav muab tej pob zeb txiav coj los ua tsev; cov ntoo saib raug muab ntov, tiam sis peb yuav muab cov ntoo ntshaub coj los hloov cov ntoo saib.

11 Yog li ntawd tus Tswv yuav ua kom Lexees tej yeeb ncuab tuaj tawm tsam nws, thiab yuav sau nws tej yeeb ncuab los ua ke;

12 Cov neeg Xilias nyob pem hauv ntej thiab cov neeg Filitees nyob nram qab; thiab lawv yuav rua qhov ncauj nqos Ixayees. Txawm muaj li no los nws txoj kev npau taws tseem tsis tau thim thiab, tiam sis nws txhais tes tseem xyab li qub.

13 Vim cov neeg tsis tig mus cuag tus uas nplawm lawv, thiab lawv tsis nrhiav Ib Tsoom Tub Rog tus Tswv.

14 Yog li ntawd tus Tswv yuav txiav pov tseg Ixayees lub taub hau thiab tus ko tw, tus ceg thiab lub ntsis, nyob rau tib hnub.

15 Tus txwj laug, nws yog lub taub hau; thiab tus yaj saub uas qhia tej lus dag, nws yog tus ko tw.

16 Vim cov thawj coj ntawm cov neeg no ua rau lawv ua txhaum; thiab lawv cov uas raws cov neeg no raug puas tsuaj.

17 Yog li ntawd tus Tswv yuav tsis xyiv fab rau lawv cov tub hluas, thiab yuav tsis muaj kev hlub tshua rau lawv cov me nyuam ntsuag thiab cov poj ntsuam; vim lawv txhua tus puav leej yog neeg siab dag thiab neeg ua phem, thiab txhua lub qhov ncauj puav leej hais lus ruam. Txawm muaj li no los nws txoj kev npau taws tseem tsis tau thim thiab, tiam sis nws txhais tes tseem xyab li qub.

18 Vim kev phem yuav hlawv li hluav taws hlawv; nws yuav nqos tej pos kaus ntsaj thiab tej ntoo pos, thiab yuav kub tej hav zoov nuj xiab, thiab cov neeg Ixayees yuav sib ntswg zos ploj mus li cov pa taws ncho.

19 Los ntawm Ib Tsoom Tub Rog tus Tswv txoj kev npau taws thaj av thiaj raug kub hnyiab dub nciab, thiab cov neeg yuav zoo li cov roj uas cia zes hluav taws; tsis muaj ib tug neeg twg uas yuav tseg nws tus kwv tij li.

20 Thiab nws sab tes xis yuav nthos mov noj thiab tseem tshaib plab; thiab nws yuav xuas sab tes laug noj mov thiab lawv yuav tsis txaus yees; lawv txhua tus nyias yuav noj nyias tej nqaij ntawm nyias txhais npab—

21 Manaxes, Efala-is; thiab Efala-is, Manaxes; nkawd yuav ua ke tawm tsam Yudas. Txawm muaj li no los nws txoj kev npau taws tseem tsis tau thim thiab, tiam sis nws txhais tes tseem xyab li qub.