1 Saib seb, tau muaj tias kuv, Nifais, tau thov tus Tswv uas yog kuv tus Vajtswv ntau kawg li, vim kuv cov tij laug npau taws.

2 Tiam sis saib seb, lawv txoj kev npau taws loj zuj zus tawm tsam kuv, npaum li uas lawv tau nrhiav kev muab kuv txoj sia txo pov tseg.

3 Muaj tseeb tiag, lawv tau yws yws nkaug kuv, hais tias: Peb tus kwv xav kav peb; thiab peb tau raug txom nyem ntau los yog vim nws xwb; yog li ntawd, nim no cia peb muab nws tua pov tseg, xwv kom peb thiaj yuav tsis raug kev kub ntxhov ntxiv lawm los ntawm nws tej lus. Vim saib seb, peb yuav tsis cia nws los ua tus kav peb; vim txoj cai ntawd yog peb li, cov uas ua nws tij laug, uas yuav los kav cov neeg no.

4 Nim no kuv tsis sau tag nrho tej lus uas lawv yws yws nkaug kuv rau saum cov phiaj no. Tiam sis txaus kuv siab hais tias, lawv tau nrhiav kev txo kuv txoj sia pov tseg.

5 Thiab tau muaj tias tus Tswv tau ceeb toom kuv tias, kuv, Nifais, thiab tag nrho cov uas kam nrog kuv mus, yuav tsum tawm ntawm lawv mus thiab khiav mus lawm tom hav zoov.

6 Yog li ntawd, tau muaj tias kuv, Nifais, tau coj kuv tsev neeg, thiab kuj tau coj Xaulas thiab nws tsev neeg, thiab Xam, uas yog kuv tus tij laug thiab nws tsev neeg, thiab Yakhauj thiab Yauxej, uas yog kuv ob tug kwv, thiab kuv cov muam thiab, thiab tag nrho cov uas kam nrog kuv mus. Thiab tag nrho cov uas kam nrog kuv mus yog cov uas ntseeg tej lus ceeb toom thiab Vajtswv tej kev tshwm sim; yog li ntawd, lawv thiaj mloog kuv tej lus.

7 Thiab peb tau nqa peb tej tsev pheeb suab ntaub thiab txhua yam uas peb nqa tau, thiab mus tau ntau hnub nyob hauv hav zoov. Thiab tom qab peb mus tau ntau hnub peb tau tsa peb tej tsev pheeb suab ntaub.

8 Thiab kuv cov neeg xav kom peb muab qhov chaw ntawd tis npe hu ua Nifais; yog li ntawd, peb tau muab qhov chaw ntawd hu ua Nifais.

9 Thiab tag nrho cov uas los nrog kuv tau muab lawv tus kheej hu ua Nifais cov neeg.

10 Thiab peb tau mob siab ua raws li tus Tswv tej kev txiav txim, thiab tej kev cai, thiab tej lus txib, ua txhua yam raws li Mauxes txoj kev cai.

11 Thiab tus Tswv nrog peb nyob; thiab peb vam meej heev kawg li; peb cog qoob loo, thiab peb sau tau tej qoob loo ntau kawg nkaus li. Thiab peb pib yug tsiaj yug txhuv, yug nyuj yug twm, thiab txhua txhia yam tsiaj.

12 Thiab kuv, Nifais kuj tau nqa cov ceev xwm txheej uas tau muab sau rau saum cov phiaj toog; thiab kuj tau nqa lub pob, los sis lub koob qhia kev, uas tus Tswv txhais tes tau npaj rau kuv txiv, raws li tej uas tau sau cia.

13 Thiab tau muaj tias peb pib vam meej heev kawg li, thiab pib huaj vam nyob hauv thaj av.

14 Thiab kuv, Nifais, tau muab Lanpas rab ntaj los saib, thiab tau ntaus ntau rab ntaj zoo li rab ntawd, tsam cov neeg uas nim no hu ua Neeg Lamas ho tuaj tawm tsam peb thiab tua peb; vim kuv paub tias lawv ntxub kuv thiab kuv cov me nyuam thiab cov uas yog kuv cov neeg.

15 Thiab kuv tau qhia kuv cov neeg ua vaj ua tsev, thiab muab ntoo, thiab hlau, thiab tooj liab, thiab tooj dag, thiab kab, nyiaj thiab kub, thiab tej pob zeb qhua uas muaj nuj nqis, uas muaj siv tsis tag coj los ua txhua yam txhua tsav.

16 Thiab kuv, Nifais, tau tsa ib lub tuam tsev; thiab kuv tau ua lub tsev no raws li tus yam ntxwv ntawm Xalumoos lub tuam tsev tsuas yog tsis muab ntau yam khoom muaj nuj nqis coj los ua xwb; vim tsis muaj tej khoom no nyob hauv thaj av, yog li ntawd, thiaj ua tsis tau zoo li Xalumoos lub tuam tsev. Tiam sis tus yam ntxwv ua yeej zoo li Xalumoos lub tuam tsev; thiab tus qauv tes ua lub tsev ntawd ua tau zoo nkauj kawg nkaus li.

17 Thiab tau muaj tias kuv, Nifais, tau qhia kom kuv cov neeg ua neeg nquag, thiab siv lawv txhais tes ua hauj lwm.

18 Thiab tau muaj tias lawv xav kom kuv los ua lawv tus vaj ntxwv. Tiam sis kuv, Nifais, tsis xav kom lawv muaj vaj ntxwv; txawm li ntawd los, kuv ua rau lawv raws li kuv muaj hwj chim ua.

19 Thiab saib seb, tau muaj raws li tus Tswv tej lus rau kuv cov tij laug, tej lus uas nws tau hais txog lawv, hais tias kuv yuav los ua tus kav lawv thiab ua lawv tus xib hwb. Yog li ntawd, kuv tau ua tus kav lawv thiab ua lawv tus xib hwb, raws li tus Tswv tej lus txib, mus txog thaum lub sij hawm uas lawv nrhiav kev txo kuv txoj sia pov tseg.

20 Yog li ntawd, tau muaj raws li tus Tswv txoj lus uas nws hais rau kuv, hais tias: Rau qhov lawv yuav tsis mloog koj tej lus ces lawv yuav raug txiav tawm ntawm tus Tswv xub ntiag mus. Thiab saib seb, lawv tau raug txiav tawm ntawm nws xub ntiag mus.

21 Thiab nws tau tso kev foom tsis zoo los rau lawv, muaj tseeb tiag, twb yog kev foom tsis zoo uas mob heev, vim lawv txoj kev ua phem. Vim saib seb, lawv tau ua lawv lub siab tawv qhawv tawm tsam nws, uas lawv tau hloov los ua zoo li ib lub pob zeb uas tawv heev; yog li ntawd, vim ua ntej no lawv yog neeg tawv dawb, thiab zoo nkauj thiab ntxim nyiam heev, xwv kom lawv tsis txhob deev tau kuv cov neeg lub siab tus Tswv uas yog Vajtswv thiaj tau ua kom lawv daim tawv nqaij dub.

22 Thiab tus Tswv uas yog Vajtswv hais li no hais tias: Kuv yuav ua kom lawv ntxim ntxub rau koj cov neeg, yog lawv tsis hloov siab lees txim rau lawv tej kev ua phem.

23 Thiab tus uas cov tub ki mus xyaw nrog lawv cov tub ki yuav raug foom tsis zoo; vim lawv cov no yuav raug foom tsis zoo tib yam li lawv. Thiab tus Tswv tau hais li ntawd, thiab tau muaj li ntawd.

24 Thiab vim lawv raug foom tsis zoo li no lawv thiaj tau los ua ib co neeg tub nkeeg, neeg thab plaub thiab neeg dag ntxias, thiab tau nrhiav tua tej tsiaj qus uas nyob hauv hav zoov.

25 Thiab tus Tswv uas yog Vajtswv hais rau kuv hais tias: Lawv yuav ua ib txoj kev nplawm rau koj cov tub ki, txhaub koj cov tub ki kom nco txog kuv; thiab vim koj cov tub ki tsis nco txog kuv, thiab tsis mloog kuv tej lus, lawv yuav nplawm koj cov tub ki kom puas tsuaj.

26 Thiab tau muaj tias kuv, Nifais, tau muab Yakhauj thiab Yauxej nkawd fij tseg, kom nkawd los ua pov thawj thiab xib hwb nyob rau hauv kuv cov neeg thaj av.

27 Thiab tau muaj tias peb ua neej nyob zoo siab.

28 Thiab peb caug xyoo tau dhau mus txij li thaum peb tau ncaim Yeluxalees.

29 Thiab kuv, Nifais, tau khaws cov ceev xwm txheej rau saum kuv cov phiaj, uas kuv tau ua, uas hais txog kuv cov neeg los txog li no.

30 Thiab tau muaj tias tus Tswv uas yog Vajtswv hais rau kuv tias: Ua dua ib co phiaj ntxiv; thiab koj yuav sau ntau yam uas kuv pom zoo rau saum cov phiaj no, kom pab tau koj cov neeg.

31 Yog li ntawd, kuv, Nifais, xwv kom ua raws li tus Tswv tej lus txib, tau mus thiab ua cov phiaj no uas kuv tau sau tej yam no rau saud.

32 Thiab kuv sau tej yam uas ua rau Vajtswv zoo siab. Thiab yog hais tias kuv cov neeg zoo siab rau tej yam txog Vajtswv lawv yuav zoo siab rau tej uas kuv muab sau rau saum cov phiaj no.

33 Thiab yog kuv cov neeg xav paub ntau txog kuv cov neeg zaj keeb kwm lawv yuav tsum tshawb xyuas kuv lwm cov phiaj.

34 Thiab txaus kuv siab hais tias plaub caug xyoo tau dhau mus, thiab peb twb tau muaj tej kev ua rog thiab muaj kev sib cav sib ceg nrog peb cov kwv tij lawm.