1 Thiab nim no, saib seb, kuv cov kwv tij uas kuv hlub es, kuv xav tias nej yuav xav me ntsis nyob hauv nej nruab siab ntsig txog tej uas nej yuav tsum ua tom qab nej tau nkag mus rau hauv txoj kev. Tiam sis, saib seb, yog vim li cas nej thiaj xav txog tej yam no nyob hauv nej nruab siab?

2 Nej tsis nco qab tias kuv hais rau nej tias tom qab nej tau txais tus Vaj Ntsuj Plig Dawb Huv lawm nej yuav txawj hais tau cov tim tswv yam lus no los? Thiab nim no, nej yuav txawj hais cov tim tswv yam lus tau li cas tsuas yog los ntawm tus Vaj Ntsuj Plig Dawb Huv xwb?

3 Cov tim tswv hais lus los ntawm tus Vaj Ntsuj Plig Dawb Huv lub hwj chim; yog li ntawd, lawv hais Khetos tej lus. Yog li ntawd, kuv hais rau nej tias, mloog ntsoov Khetos tej lus; vim saib seb, Khetos tej lus yuav qhia nej txhua yam uas nej yuav tsum ua.

4 Yog li ntawd, nim no tom qab kuv tau hais tej lus no, yog hais tias nej tsis to taub tej ntawd ces yog vim nej tsis nug, thiab nej tsis khob; yog li ntawd, Vajtswv tsis coj nej los rau hauv qhov kaj, tiam sis nej yeej yuav piam sij nyob hauv qhov tsaus ntuj.

5 Vim saib seb, kuv hais rau nej ntxiv tias yog nej yuav nkag mus rau hauv txoj kev, thiab txais yuav tus Vaj Ntsuj Plig Dawb Huv, nws yuav qhia rau nej txhua yam uas nej yuav tsum ua.

6 Saib seb, nov yog Khetos txoj lus qhuab qhia, thiab yuav tsis muaj cov lus qhuab qhia ntxiv kom txog tom qab nws yuav ua nws tus kheej tshwm los rau nej ntawm cev nqaij daim tawv. Thiab thaum nws yuav ua nws tus kheej tshwm los rau nej ntawm cev nqaij daim tawv, tej yam uas nws yuav hais rau nej los nej yuav tsum mob siab ntso ua.

7 Thiab nim no kuv, Nifais, hais tsis tau ntxiv; tus Ntsuj Plig cheem tsis pub kuv hais, thiab kuv raug cia nyob quaj ntsuag vim yog tib neeg txoj kev tsis ntseeg, thiab txoj kev phem, thiab txoj kev tsis quav ntsej, thiab txoj kev tawv ncauj; vim lawv yuav tsis nrhiav kev txawj ntse, thiab tsis to taub kev txawj ntse uas tseem ceeb, thaum tus Tswv qhia meej muab tej kev txawj ntse ntawd rau lawv, twb meej npaum li cov lus meej tau.

8 Thiab nim no, kuv cov kwv tij uas kuv hlub es, kuv paub tias nej tseem xav nyob hauv nej nruab siab; thiab ua rau kuv nyuaj siab uas kuv yuav tsum hais txog tej yam no. Vim yog tias nej mloog tus Ntsuj Plig uas qhia kom tib neeg thov Vajtswv ces nej yeej paub tias nej yuav tsum thov Vajtswv; vim tus ntsuj plig phem tsis qhia kom tib neeg thov Vajtswv, tiam sis qhia kom nws yuav tsum tsis txhob thov Vajtswv.

9 Tiam sis saib seb, kuv hais rau nej tias nej yuav tsum thov Vajtswv tas mus li, thiab tsis txhob nkees; thiab hais tias nej yuav tsum tsis txhob ua ib yam dab tsi rau tus Tswv tsuas yog ua ntej tshaj plaws nej yuav thov Leej Txiv los ntawm Khetos lub npe, xwv kom nws yuav muab tej uas nej ua fij tseg rau nej, xwv kom tej uas nej ua yuav zoo rau nej tus ntsuj plig.