1 Thiab nim no, kuv, Nifais, hais txog tej uas yuav muaj los yav tom ntej uas kuv txiv tau hais, ntsig txog Yauxej, tus uas raug coj mus rau hauv Iyiv teb chaws.

2 Vim saib seb, nws qhia tseeb txog tej yuav muaj los yav tom ntej uas hais txog tag nrho nws cov tub ki. Thiab twb tsis muaj ntau yam uas tseem ceeb dua tej uas yuav muaj los yav tom ntej uas nws tau sau. Thiab nws tau qhia tej yuav muaj los yav tom ntej ntsig txog peb, thiab peb tej tiam neeg uas yuav muaj los yav tom ntej; thiab nws tau sau txog tej ntawd rau saum cov phiaj toog.

3 Yog li ntawd, tom qab kuv txiv tau xaus lus txog Yauxej txoj kev qhia tej uas yuav muaj los yav tom ntej, nws hu Lamas cov me nyuam, nws cov tub, thiab cov ntxhais, thiab hais rau lawv hais tias: Saib seb, kuv tej me tub, thiab me ntxhais, nej cov uas yog kuv thawj tug tub cov tub thiab cov ntxhais, kuv xav kom nej cia li cuab pob ntseg rau kuv tej lus.

4 Vim tus Tswv uas yog Vajtswv tau hais tias: Npaum li uas nej ua raws li kuv tej lus txib ces nej yuav vam meej nyob rau hauv thaj av; thiab npaum li uas nej tsis ua raws li kuv tej lus txib ces nej yuav raug txiav tawm ntawm kuv lub xub ntiag mus.

5 Tiam sis saib seb, kuv cov tub thiab kuv cov ntxhais, kuv tsis kam nqis mus rau hauv kuv lub qhov ntxa yog tias kuv tsis tau foom koob hmoov rau nej; vim saib seb, kuv paub tias yog nej niam nej txiv qhia nej mus raws li txoj kev uas nej yuav tsum mus nej yuav tsis ncaim txoj kev ntawd mus li.

6 Yog li ntawd, yog hais tias nej raug foom tsis zoo, saib seb, kuv yuav foom kuv txoj koob hmoov rau nej, xwv kom txoj kev foom tsis zoo yuav raug tshem tawm ntawm nej mus thiab tso rau saum nej niam nej txiv lub taub hau.

7 Yog li ntawd, vim kuv txoj kev foom koob hmoov tus Tswv uas yog Vajtswv yuav tsis cia kom nej piam sij; yog li ntawd, nws yuav hlub tshua nej thiab nej cov tub ki mus ib txhis li.

8 Thiab tau muaj tias tom qab kuv txiv tau xaus lus rau Lamas cov tub thiab cov ntxhais, nws kom Lemu-ees coj Lemu-ees cov tub thiab cov ntxhais los cuag nws.

9 Thiab nws hais rau lawv, hais tias: Saib seb, kuv cov tub thiab kuv cov ntxhais, nej cov uas yog kuv tus tub thib ob cov tub thiab cov ntxhais; saib seb kuv foom koob hmoov rau nej tib yam li kuv foom rau Lamas cov tub thiab cov ntxhais; yog li ntawd, nej yuav tsis raug puas tsuaj huv tib si; tiam sis thaum kawg nej cov tub ki yuav tau txais koob hmoov.

10 Thiab tau muaj tias thaum uas kuv txiv tau xaus lus rau lawv lawm, saib seb, nws hais rau Ixama-ees cov tub, muaj tseeb tiag, thiab twb hais rau nws tsev neeg tag nrho.

11 Thiab tom qab nws tau xaus lus rau lawv lawm, nws hais rau Xam, hais tias: Koj thiab koj cov tub ki yuav tau koob hmoov; vim nej yuav tau txais thaj av ua nej tug tib yam li koj tus kwv Nifais. Thiab yuav suav koj cov tub ki nrog nws cov tub ki; thiab koj yuav zoo li koj tus kwv, thiab koj cov tub ki yuav zoo li nws cov tub ki; thiab koj yuav tau txais koob hmoov nyob tag nrho hauv koj lub neej.

12 Thiab tau muaj tias tom qab kuv txiv, Lihais, tau hais rau tag nrho nws tsev neeg, raws li nws lub siab xav thiab raws li tus Tswv tus Ntsuj Plig uas nyob hauv nws, nws laus laus lawm. Thiab tau muaj tias nws tuag, thiab tau coj nws mus faus.

13 Thiab tau muaj tias tsis ntev tom qab nws tuag, Lamas thiab Lemu-ees thiab Ixama-ees cov tub npau taws rau kuv vim tus Tswv tej lus qhuab ntuas.

14 Vim tus Tswv tau txhib kuv, Nifais, kom hais rau lawv, raws li nws txoj lus; kuv tau hais ntau yam rau lawv, thiab kuv txiv los kuj hais thiab, ua ntej nws tuag; ntau yam uas tau hais no tau muab sau rau saum lwm cov phiaj; vim feem ntau ntawm tej keeb kwm tau muab sau rau saum lwm cov phiaj.

15 Thiab nyob rau saum cov no kuv sau ntau yam ntawm kuv tus ntsuj plig, thiab sau ntau cov vaj lug kub cov uas muab sau rau saum cov phiaj toog. Vim kuv zoo siab kawg rau cov vaj lug kub, thiab kuv lub siab xav ntsoov txog cov vaj lug kub, thiab sau cov no cia rau kuv tej me nyuam tau kawm thiab kom pab lawv.

16 Saib seb, kuv zoo siab kawg rau tej uas yog tus Tswv li; thiab kuv lub siab yeej xav ntsoov tsis tu ncua rau tej uas kuv tau pom thiab tau hnov.

17 Txawm li ntawd los, txawm tias tus Tswv txoj kev zoo kawg nkaus, uas tau qhia rau kuv txog nws tej hauj lwm tseem ceeb thiab zoo kawg nkaus, kuv lub siab tseem qw hais tias: Auj kuv yog ib tug neeg uas nyuaj siab kawg! Muaj tseeb tiag, kuv tu siab vim yog kuv cev nqaij daim tawv; kuv tus ntsuj plig quaj ntsuag vim yog kuv tej kev ua txhaum.

18 Kuv raug vij vog ib puag ncig, vim yog tej kev ntxias thiab tej kev txhaum uas yooj yim tawm tsam kuv.

19 Thiab thaum kuv xav zoo siab, kuv lub siab ntsaj vim yog kuv tej kev txhaum; txawm li ntawd los, kuv paub kuv tau tso siab rau leej twg.

20 Kuv tus Vajtswv tau txhawb kuv lub zog; nws tau coj kuv dhau kuv tej kev txom nyem nyob rau hauv roob moj sab qhua; thiab nws tau tsom kwm kuv thaum kuv nyob rau saum tej dej tob heev.

21 Nws tau pub nws txoj kev hlub rau kuv puv npo, twb ua rau kuv lub cev kub lug.

22 Nws tau ua rau kuv cov yeeb ncuab poob ntsej muag, ua rau lawv tshee hnyo rau ntawm kuv xub ntiag.

23 Saib seb, nws tau hnov kuv lub suab thov thaum nruab hnub, thiab nws tau muab txoj kev txawj ntse rau kuv los ntawm tej kev ua yog toog thaum hmo ntuj.

24 Thiab thaum nruab hnub kuv tau thov nws kawg siab kawg ntsws; muaj tseeb tiag, kuv tau xa kuv lub suab mus siab; thiab cov tim tswv nqis los thiab los txhawb pab kuv.

25 Thiab nyob rau saum nws tus Ntsuj Plig tej phab tis nws tau coj kuv mus rau puag saum tej roob uas siab heev. Thiab kuv lub qhov muag tau pom tej yam tseem ceeb, muaj tseeb tiag, twb yog tej uas tseem ceeb dhau rau tib neeg pom; yog li ntawd tus Tswv tau txwv kuv kom txhob muab tej ntawd sau cia.

26 Auj yog li ntawd, yog tias kuv twb tau pom tej yam uas tseem ceeb heev li no, yog tias tus Tswv thaum nws nqis los nrog noob neej nyob twb muaj kev hlub tshua rau tib neeg ntau kawg nkaus, vim li cas kuv lub siab ho quaj thiab kuv tus ntsuj plig ho nyob hauv lub hav tu siab, thiab kuv cev nqaij daim tawv ho piam mus, thiab kuv lub zog ho qaug mus, vim yog los ntawm kuv tej kev txom nyem?

27 Thiab vim li cas kuv ho ywj rau tej kev txhaum ntawm kuv cev nqaij daim tawv? Muaj tseeb tiag, vim li cas kuv ho qhib kev rau tej kev haub ntxias, kom tus niag phem muaj chaw los nyob rau hauv kuv lub siab los rhuav kuv txoj kev nyob kaj siab lug thiab los ua kom kuv tus ntsuj plig muaj kev kub ntxhov? Vim li cas kuv ho npau taws rau kuv tus yeeb ncuab?

28 Kuv tus ntsuj plig es, cia li tsim los mas! Tsis txhob poob siab rau tej kev txhaum ntxiv lawm. Cia li zoo siab, auj kuv lub siab es, thiab tsis txhob muab chaw rau tus yeeb ncuab ntawm kuv tus ntsuj plig ntxiv lawm.

29 Tsis txhob npau taws ntxiv vim yog kuv tej yeeb ncuab. Tsis txhob cia kuv lub zog qaug vim yog kuv tej kev txom nyem.

30 Cia li zoo siab, auj kuv lub siab es, thiab cia li thov tus Tswv, thiab hais tias: Auj tus Tswv, kuv yuav qhuas koj mus ib txhis li; muaj tseeb tiag, kuv tus ntsuj plig yuav xyiv fab rau koj, kuv tus Vajtswv, uas yog lub pob zeb ntawm kuv txoj kev cawm seej.

31 Auj tus Tswv es, koj puas yuav txhiv kuv tus ntsuj plig? Koj puas yuav pab kom kuv dim ntawm kuv tej yeeb ncuab tes? Koj puas yuav ua kom kuv tshee thaum kuv pom kev txhaum?

32 Thov kom ntuj txiag teb tsaus lub qhov rooj cia li kaw tsis tu ncua rau kuv, vim tias kuv lub siab twb tawg tag thiab kuv tus ntsuj plig xav ua zoo! Auj tus Tswv es, thov koj txhob kaw tej qhov rooj ntawm koj txoj kev ncaj ncees rau kuv, xwv kom kuv yuav taug tau txoj kev uas mus hauv tej hav qis, xwv kom kuv taug raws nraim txoj kev tiaj!

33 Auj tus Tswv, thov koj muab lub tsho tshaj sab ntawm koj txoj kev ncaj ncees los roos nkaus kuv! Auj tus Tswv, thov koj tho ib txoj kev kom kuv tau kev khiav dim ntawm kuv tej yeeb ncuab! Thov koj kho kom kuv txoj kev ncaj rau kuv pom! Thov koj txhob tso dab tsi uas dawm ko taw rau hauv kuv txoj kev—tiam sis thov koj cheb kom txoj kev du pub rau kuv, thiab thov koj txhob ua laj kab thaiv kuv txoj kev, tiam sis thaiv kuv tus yeeb ncuab tej kev.

34 Auj tus Tswv es, kuv tau tso siab rau koj, thiab kuv yuav tso siab rau koj mus ib txhis li. Kuv yuav tsis tso siab rau neeg lub hwj chim li; vim kuv paub hais tias tus uas raug foom tsis zoo yog tus uas tso siab rau neeg lub hwj chim. Muaj tseeb tiag, tus uas raug foom tsis zoo yog tus uas tso siab rau neeg los sis tso siab rau neeg lub hwj chim.

35 Muaj tseeb tiag, kuv paub tias Vajtswv yuav pub dawb paug rau tus uas thov. Muaj tseeb tiag, kuv tus Vajtswv yuav pub rau kuv, yog kuv tsis thov yam uas tsis tsim nyog; yog li ntawd kuv yuav tsa kuv lub suab rau koj; muaj tseeb tiag, kuv yuav thov koj, kuv tus Vajtswv, uas yog lub pob zeb ntawm kuv txoj kev ncaj ncees. Saib seb, kuv lub suab yuav nce mus rau koj mus ib txhis li, kuv lub pob zeb thiab kuv tus Vajtswv uas kav ib txhis. Amees.