1 Thiab nim no, Yakhauj, kuv hais rau koj: Koj yog kuv thawj tug tub uas yug nyob rau hauv lub caij ntawm kuv txoj kev txom nyem nyob rau hauv hav zoov. Thiab saib seb, thaum koj tseem yau koj tau raug tej kev txom nyem thiab ntau yam kev tu siab, vim txoj kev ua lwj ua liam ntawm koj cov tij laug.

2 Tiam sis, Yakhauj, kuv thawj tug me tub uas yug nyob hauv hav zoov, koj paub Vajtswv txoj kev koob meej; thiab nws yuav fij koj tej kev txom nyem los ua tej yam uas pab tau koj.

3 Yog li ntawd, koj tus ntsuj plig yuav tau txais koob hmoov, thiab koj yuav ua neej nyob nyab xeeb nrog koj tus tij laug Nifais; thiab koj yuav siv tas koj lub neej ua hauj lwm pub rau koj tus Vajtswv. Yog li ntawd, kuv paub tias koj twb txais kev txhiv dim, vim koj tus Txhiv Dim txoj kev ncaj ncees; vim koj tau pom lawm tias thaum txog lub caij nyoog uas muaj txhij txhua nws yuav coj txoj kev cawm seej los rau tib neeg.

4 Thiab koj tau pom nws lub yeeb koob thaum uas koj tseem hluas; yog li ntawd, koj yuav tau txais koob hmoov tib yam li cov uas nws yuav los txhawb pab nyob hauv sab cev nqaij daim tawv; vim tus Ntsuj Plig yeej zoo tib yam li qub, nag hmo, hnub no, thiab mus ib txhis li. Thiab Vajtswv npaj txoj kev txij thaum tib neeg poob los, thiab txoj kev cawm seej yog pub dawb.

5 Thiab neeg twb tau txais kev qhia txaus kom lawv paub qhov zoo thiab qhov phem. Thiab tau muab txoj kev cai rau neeg. Thiab los ntawm txoj kev cai tsis muaj ib tug neeg uas yuav tsis muaj txim; los sis los ntawm txoj kev cai neeg raug txiav tawm. Muaj tseeb tiag, los ntawm txoj kev cai ntawm sab nqaij daim tawv lawv raug txiav tawm; thiab los ntawm txoj kev cai ntawm sab ntsuj plig lawv piam sij tsis txais qhov uas zoo, thiab hloov los ua ib co neeg nyuaj siab mus ib txhis li.

6 Yog li ntawd, txoj kev txhiv dim los ntawm tus Mexiyas uas Dawb Huv; vim nws muaj kev tshav ntuj thiab kev tseeb nplua mias.

7 Saib seb, nws cia nws tus kheej los ua ib txoj kev theej txhoj rau kev txhaum, kom muaj raws li txhua qhov ntsiab lus ntawm txoj kev cai, pub rau tag nrho cov uas muaj lub siab mob thiab muaj lub siab xav ua zoo; thiab yuav tsis muaj lwm tus uas yuav ua tau kom muaj raws li txhua qhov ntsiab lus ntawm txoj kev cai.

8 Yog li ntawd, yog ib qho uas tseem ceeb kawg nkaus kom muab tej xwm txheej no qhia rau tej neeg uas nyob hauv ntiaj teb no paub, kom lawv yuav paub tias tsis muaj ib tug neeg uas muaj peev xwm nyob tau ntawm Vajtswv xub ntiag, tsuas yog los ntawm tus Mexiyas uas Dawb Huv txoj hauj lwm zoo, txoj kev hlub tshua, thiab txoj kev tshav ntuj, tus uas tau tso nws txoj sia raws li sab cev nqaij daim tawv, thiab rov qab txais txoj sia dua los ntawm tus Ntsuj Plig lub hwj chim, xwv kom nws yuav coj tau cov neeg tuag sawv rov los, vim nws yog thawj tug uas yuav sawv los.

9 Yog li ntawd, nws yog cov txiv ntoo thawj tom rau Vajtswv, rau qhov nws yuav ua kev pab daws tag nrho noob neej; thiab lawv cov uas ntseeg nws yuav txais kev cawm dim.

10 Thiab vim rau qhov nws ua kev pab daws tag nrho noob neej, neeg txhua tus los cuag Vajtswv; yog li ntawd, lawv sawv ntawm nws xub ntiag, rau nws txiav txim raws li txoj kev tseeb thiab txoj kev dawb huv uas nws muaj. Yog li ntawd, txhua qhov ntsiab lus ntawm txoj kev cai uas Tus Dawb Huv tau muab, xwv kom yuav muaj kev rau txim txuas rau txoj kev cai, txoj kev rau txim uas txuas rau txoj kev cai yog qhov fab ntxeev ntawm txoj kev zoo siab uas txuas rau txoj kev cai, kom muaj raws li tej ntsiab lus ntawm txoj kev theej txhoj—

11 Vim yeej yuav tsum muaj tias, txhua yam nyias muaj nyias qhov fab ntxeev. Yog tsis muaj li ntawd, kuv thawj tug tub uas yug nyob hauv hav zoov, yuav coj tsis tau txoj kev ncaj ncees los, thiab txoj kev phem, thiab txoj kev dawb huv thiab txoj kev nyuaj siab, thiab qhov phem thiab qhov zoo. Yog li ntawd, txhua yam yeej yuav tsum koom ua ib ke; yog li ntawd, yog hais tias nyob koom ib lub cev xwb ces yeej yuav nyob zoo li uas twb tuag lawm, tsis muaj txoj sia thiab tsis txawj tuag, tsis muaj kev txawj lwj thiab kev tsis txawj lwj, tsis zoo siab thiab tsis nyuaj siab, thiab tsis muaj qhov hnov thiab qhov tsis hnov.

12 Yog li ntawd, ntshe yeej yuav tsum tsim qhov no los ua ib yam uas tsis muaj nqis dab tsi li; yog li ntawd twb tsis muaj hom phiaj los tsim qhov no. Yog li ntawd, qhov no yeej yuav rhuav Vajtswv lub tswv yim thiab nws tej hom phiaj uas nyob mus ib txhis, thiab kuj yuav rhuav Vajtswv lub hwj chim, thiab txoj kev hlub tshua, thiab txoj kev txim lij.

13 Thiab yog nej hais tias tsis muaj kev cai, nej kuj yuav hais tias tsis muaj kev txhaum. Yog nej hais tias tsis muaj kev txhaum, nej kuj yuav hais tias tsis muaj txoj kev ncaj ncees. Thiab yog tsis muaj txoj kev ncaj ncees ces yeej tsis muaj txoj kev zoo siab. Thiab yog tsis muaj txoj kev ncaj ncees thiab txoj kev zoo siab ces yeej tsis muaj txoj kev rau txim thiab txoj kev nyuaj siab. Thiab yog tsis muaj tej no ces yeej tsis muaj Vajtswv. Thiab yog tsis muaj Vajtswv ces yeej tsis muaj peb, thiab tsis muaj lub ntiaj teb; vim yuav muaj tsis tau txoj kev tsim tej yam, tej uas ua taus tej yam los sis tej uas raug tej yam; yog li ntawd, txhua txhia yam yuav tsum ploj mus kom tas.

14 Thiab nim no, kuv cov tub es, kuv hais tej yam no rau nej kom muaj nqis rau nej thiab kom nej kawm tau; vim yeej muaj ib tug Vajtswv, thiab nws tau tsim txhua yam, lub ntuj thiab lub ntiaj teb, thiab txhua yam uas muaj nyob rau haud, tej uas ua taus tej yam thiab tej uas raug tej yam.

15 Thiab kom muaj raws li nws tej hom phiaj uas nyob mus ib txhis los rau neeg, tom qab nws tau tsim peb thawj nkawm niam txiv, thiab tej tsiaj nruab nrag thiab tej noog uas ya saum nruab ntug, thiab lub ntsiab yog li no, txhua txhia yam tsav uas nws tau tsim, nyias yeej yuav tsum muaj nyias qhov fab ntxeev; twb yog tsob txiv ntoo uas txwv tsis pub noj fab ntxeev rau tsob ntoo uas cawm neeg txoj sia; ib tsob qab zib hos ib tsob iab.

16 Yog li ntawd, tus Tswv uas yog Vajtswv cia rau tib neeg muaj kev ywj siab xaiv ua rau nws tus kheej. Yog li ntawd, tib neeg tsis muaj peev xwm xaiv ua rau nws tus kheej tsuas yog nws raug ntxias kom ua li no los sis kom ua li tod.

17 Thiab kuv, Lihais, raws li tej uas kuv tau nyeem, yeej yuav tsum xav hais tias Vajtswv ib tug tim tswv, raws li tej uas tau sau cia, tau poob saum ntuj ceeb tsheej los; yog li ntawd, nws tau hloov los ua ib tug dab phem, vim nws xav tau tej yam uas Vajtswv suav tias yog kev phem.

18 Thiab vim tias nws tau poob saum ntuj ceeb tsheej los, thiab tau hloov los ua ib tug uas nyuaj siab mus ib txhis li, nws thiaj xav kom tib neeg sawv daws nyuaj siab tib yam li nws thiab. Yog li ntawd, nws hais rau Evas, muaj tseeb tiag twb yog tus nab txwj nab laug ntawd, uas yog tus dab phem, tus uas yog leej txiv ntawm txhua txoj kev dag, yog li ntawd nws hais tias: Cia li noj cov txiv ntoo uas txwv tsis pub noj, thiab neb yuav tsis tuag, tiam sis neb yuav zoo li Vajtswv, yuav paub qhov phem thiab qhov zoo.

19 Thiab tom qab Adas thiab Evas tau noj cov txiv uas txwv tsis pub noj nkawd raug ntiab tawm ntawm lub Vaj Edees, mus ncaws teb.

20 Thiab nkawd tau muaj tub muaj ki; muaj tseeb tiag, yog tsev neeg uas nyob thoob plaws ntiaj teb.

21 Thiab ua rau noob neej tej hnub nyoog ntev zog, raws li Vajtswv lub siab nyiam, kom lawv muaj sij hawm hloov siab lees txim thaum muaj cev nqaij daim tawv; yog li ntawd, lawv lub neej thiaj li hloov los ua ib lub neej sim siab, thiab ua rau lawv lub sij hawm ntev zog, raws li tej lus txib uas tus Tswv uas yog Vajtswv tau muab rau noob neej. Vim nws txib hais tias txhua tus neeg yuav tsum hloov siab lees txim; vim nws qhia rau neeg txhua tus tias lawv twb yuam kev, vim yog lawv niam lawv txiv txoj kev ua txhaum.

22 Thiab nim no, saib seb, yog hais tias Adas tsis tau ua txhaum ces nws yuav tsis poob, tiam sis nws tseem yuav nyob hauv lub Vaj Edees. Thiab txhua yam uas tau tsim los yeej yuav nyob li qub zoo li thaum uas tau tsim tej ntawd; thiab tej ntawd yeej yuav nyob li ntawd mus ib txhis li, thiab tsis muaj qhov kawg.

23 Thiab ntshe nkawd twb tsis muaj tub muaj ki; yog li ntawd ntshe nkawd yuav nyob tsis muaj txim, thiab tsis muaj kev xyiv fab, vim nkawd tsis paub kev nyuaj siab; tsis ua yam uas zoo, vim nkawd tsis paub kev txhaum.

24 Tiam sis saib seb, tau ua txhua yam raws li tus uas paub txhua yam lub tswv yim.

25 Adas poob xwv kom yuav muaj taus tib neeg; thiab muaj tib neeg xwv kom lawv yuav muaj kev xyiv fab.

26 Thiab tus Mexiyas yuav los thaum txog lub caij nyoog uas muaj txhij txhua, xwv kom nws thiaj yuav txhiv tau noob neej dim ntawm txoj kev poob. Thiab vim nws tau txhiv lawv dim ntawm txoj kev poob lawv los ua ib co neeg uas nyob ywj siab mus ib txhis li, paub qhov zoo thiab qhov phem; ua taus tej yam lawv tus kheej thiab tsis yog raug tej yam, tsuas yog los ntawm txoj kev cai rau txim thaum txog hnub kawg uas yog ib hnub tseem ceeb, raws li tej lus txib uas Vajtswv tau muab.

27 Yog li ntawd, neeg nyob ywj siab ntawm sab cev nqaij daim tawv; thiab twb muab txhua yam uas tsim nyog rau lawv. Thiab lawv muaj kev ywj siab xaiv txoj kev ywj pheej thiab txoj sia nyob mus ib txhis, uas yog los ntawm tus Neeg Nruab Nrab tseem ceeb ntawm tib neeg txhua tus, los sis xaiv txoj kev poob cev qhev thiab txoj kev tuag, raws li tus dab phem txoj kev poob cev qhev thiab lub hwj chim; vim nws xav kom tib neeg txhua tus nyuaj siab ib yam li nws tus kheej.

28 Thiab nim no, kuv cov me tub es, kuv xav kom nej ntsia ntsoov tus Neeg Nruab Nrab tseem ceeb, thiab rau siab mloog nws tej lus txib tseem ceeb; thiab cia siab rau nws tej lus, thiab xaiv yuav txoj sia nyob mus ib txhis, raws li nws tus Ntsuj Plig Dawb Huv lub siab nyiam.

29 Thiab tsis txhob xaiv yuav txoj kev tuag mus ib txhis, raws li cev nqaij daim tawv lub siab nyiam thiab txoj kev phem uas nyob haud, uas muab hwj chim rau tus dab phem kom ntes tau nej, coj nej mus rau hauv ntuj txiag teb tsaus, kom nws muaj hwj chim kav nej nyob hauv nws lub nceeg vaj.

30 Kuv tau hais tej lus no rau nej sawv daws, kuv cov tub, nyob rau thaum kawg hauv kuv lub neej sim siab; thiab kuv tau xaiv yam uas zoo, raws li tus yaj saub tej lus. Thiab kuv tsis muaj lwm lub hom phiaj tsuas yog xav kom nej tej ntsuj plig tau zoo nyob mus ib txhis li xwb. Amees.