Tshooj 7
Yakhauj nyeem ntxiv nyob hauv Yaxayas: Yaxayas qhia txog tus Mexiyas—Tus Mexiyas yuav muaj tus nplaig li tus neeg txawj ntse—Nws yuav tig Nws lub nraub qaum rau cov uas ntaus Nws—Nws yuav tsis poob ntsej muag—Piv rau Yaxayas 50. Kwv yees li 559–545 xyoos ua ntej Yexus yug los.
1 Muaj tseeb tiag, tus Tswv hais li no: Kuv puas tau muab nej pov tseg, los sis kuv puas tau ntiab nej khiav tawm mus ib txhis li? Vim tus Tswv hais li no: Nej niam daim ntawv sib nrauj nyob qhov twg? Kuv tau muab nej rau leej twg, los sis kuv tau muab nej muag rau kuv tej tub uas luag tshuav nuj nqis tus twg? Muaj tseeb tiag, kuv tau muab nej muag rau leej twg? Saib seb, vim nej tej kev ua phem nej tau muab nej tus kheej muag xwb, thiab vim nej tej kev ua txhaum nej niam thiaj raug rho tawm lawm.
2 Yog li ntawd, thaum uas kuv los, twb tsis muaj ib tug neeg, thaum uas kuv hu, muaj tseeb tiag, twb tsis muaj leej twg teb. Auj tsev neeg Ixayees es, puas yog kuv txhais tes luv lawm kuv thiaj txhiv tsis tau, los sis puas yog kuv tsis muaj hwj chim tso nej dim? Saib seb, thaum kuv cem kuv ua rau tej dej hiav txwv qhuav, kuv ua rau tej dej ntws qhuav li tej tiaj suab puam thiab tej ntses uas nyob rau hauv tuag thiab tsw lwj iab nqhoob vim tej dej tau qhuav.
3 Kuv ua rau lub ntuj dub nciab, thiab kuv ua tej ntaub tsaj npog ntuj.
4 Tus Tswv uas yog Vajtswv tau pub kuv muaj tus nplaig li tus neeg txawj ntse, xwv kom kuv yuav paub hais ib lo lus rau nej thaum yog sij hawm, auj tsev neeg Ixayees. Thaum nej nkees nws tsa nej ib tag kis dhau ib tag kis. Nws tsa kuv lub pob ntseg kom hnov lus li tus neeg txawj ntse.
5 Tus Tswv uas yog Vajtswv tau qhib kuv lub pob ntseg, thiab kuv tsis ntxeev siab, thiab tsis tig khiav ntawm nws mus.
6 Kuv tig kuv lub nraub qaum rau tus uas ntaus neeg, thiab tig kuv ob sab plhu rau cov uas rho tej plaub hwj txwv. Kuv tsis zais kuv lub ntsej muag rau txoj kev txaj muag thiab raug nto qaub ncaug.
7 Vim tus Tswv uas yog Vajtswv yuav pab kuv, yog li ntawd kuv yuav tsis poob ntsej muag. Yog li ntawd kuv tau ua kom kuv lub ntsej muag zoo li lub zeb ntais, thiab kuv paub tias kuv yuav tsis poob ntsej muag.
8 Thiab tus Tswv nyob ze, thiab nws qhia tias kuv tsis muaj txim. Leej twg yuav nrog kuv sib cav? Cia peb sawv ntsug ua ke. Leej twg yog kuv tus yeeb ncuab? Cia nws txav los ze kuv, thiab kuv yuav siv lub zog ntawm kuv lub qhov ncauj nplawm nws.
9 Vim tus Tswv uas yog Vajtswv yuav pab kuv. Thiab lawv txhua tus uas nkaug kuv, saib seb, lawv txhua tus yuav qub mus li tej tsoos tsho, thiab tej npauj yuav muab lawv noj.
10 Muaj leej twg nyob hauv nej uas hwm tus Tswv, uas mloog nws tus tub qhe lub suab, uas mus kev hauv qhov tsaus ntuj thiab tsis muaj teeb?
11 Saib seb tag nrho nej cov uas rauv taws, uas txhuam kom hluav taws tawm txim ib ncig nej, uas mus thaum nej cov hluav taws pom kev thiab mus thaum tej txim hluav taws uas nej txhuam cig. Qhov no nej yuav tau txais los ntawm kuv txhais tes—nej yuav qhau cev pw nrog kev tu siab.