1 Tsis tas li ntawd xwb, tus Tswv txoj lus tau hais rau kuv tias: Koj cia li mus nrhiav ib kauj ntawv, thiab xuas neeg ib tug cwj mem sau rau saum kauj ntawv, hais txog Mahawj-salas-hajsawm-npas.

2 Thiab kuv nrhiav tau tej tim khawv uas ncaj tsis tu tsis tseg los sau tej xwm txheej, tus pov thawj Uliyas, thiab yawg Yenpelikhiyas tus tub Xakhaliyas.

3 Thiab kuv tau mus cuag niam yaj saub; thiab nws tau xeeb tub thiab yug tau ib tug tub. Ces tus Tswv tau hais rau kuv hais tias: Hu nws lub npe ua: Mahawj-salas-hajsawm-npas.

4 Vim saib seb, tus me nyuam yuav tsis paub qw, Kuv txiv, thiab kuv niam, ua ntej Damaxes tej kev nplua nuj thiab Xamalis tej khoom uas txeeb tau los yuav raug vaj ntxwv Axilias tuaj txeeb mus.

5 Tus Tswv rov qab hais rau kuv dua hais tias:

6 Vim cov neeg no tsis kam lees yuav Silau-as tej dej uas ntws mus ntsiag to, thiab zoo siab rau Lexees thiab Lemaliyas tus tub;

7 Nim no yog li ntawd, saib seb, tus Tswv yuav ua kom tej dej uas muaj zog thiab ntau heev hauv tus dej ntws los rau lawv, twb yog Axilias tus vaj ntxwv thiab tag nrho nws tej yeeb koob; thiab nws yuav puv tuaj thoob tag nrho nws tej kwj deg, thiab nyab tag nrho nws tej ntug dej.

8 Thiab nws yuav hla dhau mus hauv Yudas; nws yuav ntws puv nkaus thiab phwj yees, nws yuav puv mus kom txij caj dab; thiab nws ob txhais tis yuav nthuav dav li koj ib dag tes, auj Emanu-es.

9 Cia li los koom ua ib pab, auj nej cov neeg sawv daws, thiab nej yuav raug tawg ntsoog ntxaws; thiab nej cov uas nyob tej teb chaws deb cia li cuab pob ntseg; npaj nej tus kheej, thiab nej yuav raug tawg ntsoog ntxaws; npaj nej tus kheej, thiab nej yuav raug tawg ntsoog ntxaws.

10 Cia li tuaj sab laj ua ke, thiab yuav pab tsis tau dab tsi; hais lus, los yuav tsis muaj qab hau dab tsi; vim Vajtswv nyob nrog peb.

11 Vim tus Tswv xuas txhais tes muaj zog hais rau kuv li no, thiab qhia rau kuv tias kuv yuav tsum tsis txhob taug mus raws li cov neeg tej kev no, hais tias:

12 Nej tsis txhob hais tias, Ib txoj kev tuav hauv, rau tag nrho cov uas cov neeg no yuav hais tias, ib txoj kev tuav hauv; thiab nej tsis txhob ntshai yam uas lawv ntshai, los sis txhawj.

13 Qhuas Ib Tsoom Tub Rog tus Tswv tib leeg, thiab cia nws ua tus uas nej ntshai, thiab cia nws ua tus uas nej txhawj.

14 Thiab nws yuav ua ib qho chaw dawb huv; tiam sis rau ob tsev neeg Ixayees, nws yuav ua ib txhib zeb dawm taw thiab ib lub pob zeb ua mob ntsaj, yuav ua ib rooj ntxiab thiab ib xub yej rau cov neeg hauv Yeluxalees.

15 Thiab lawv coob leej ntau tus yuav dawm taw thiab ntog, thiab raug lov npab lov tes thiab mag ntxiab, thiab raug txhom mus.

16 Khaws tej lus lus tim khawv, khi txoj kev cai tseg cia rau kuv cov thwj tim.

17 Thiab kuv yuav tso siab rau tus Tswv, tus uas nraim nws lub ntsej muag rau tsev neeg Yakhauj, thiab kuv yuav tos ntsoov nws.

18 Saib seb, kuv thiab cov me nyuam uas tus Tswv tau muab rau kuv yog Ib Tsoom Tub Rog tus Tswv, tus uas nyob saum lub Roob Xi-oos, muab los ua tej cim thiab ua tej txuj ci uas xav tsis thoob nyob hauv Ixayees.

19 Thiab thaum lawv hais rau nej hais tias: Cia li tig mus rau lawv cov uas txawj ua dab, thiab mus nrhiav cov kws yees siv uas hais lus tuj taws thiab yws yws—tiam sis puas tsim nyog uas ib co neeg tig mus rau lawv tus Vajtswv kom cov neeg ciaj hnov xov los ntawm cov neeg tuag?

20 Tig mus rau txoj kev cai thiab tej lus tim khawv; thiab yog lawv tsis hais raws li txoj kev cai thiab tej lus tim khawv, ces yog vim tsis muaj qhov kaj nyob hauv lawv.

21 Thiab lawv yuav ua neej nyob nyuaj siab thiab tshaib nqhis; thiab yuav muaj tias thaum lawv tshaib plab, lawv yuav npau taws rau lawv tus kheej, thiab foom phem rau lawv tus vaj ntxwv thiab lawv tus Vajtswv, thiab yuav ntsia saum ntuj.

22 Thiab lawv yuav ntsia rau hauv lub ntiaj teb thiab yuav pom teeb meem, pom kev tsaus ntuj, pom kev ntxhov siab tsaus nti, thiab yuav raug ntiab mus rau txoj kev tsaus ntuj.