1 Thiab nim no saib seb, kuv cov mi kwv tij uas kuv hlub es, kuv yuav hais rau nej; vim kuv, Nifais, yuav tsis cia nej xav tias nej yog neeg ncaj ncees dua li Lwm Haiv Neeg. Vim saib seb, tsuas yog nej yuav ceev Vajtswv tej lus txib xwb nej txhua tus thiaj yuav tsis raug piam sij tib yam; thiab vim tej lus uas tau hais lawm nej tsis txhob xav tias Lwm Haiv Neeg yuav raug puas tsuaj huv tib si.

2 Vim saib seb, kuv hais rau nej tias Lwm Haiv Neeg coob npaum li cas los yog lawv yuav hloov siab lees txim lawv yeej yog tus Tswv cov neeg sib khi lus; thiab cov Neeg Yudais coob npaum li cas los yog lawv tsis hloov siab lees txim lawv yuav raug ntiab khiav tawm mus; rau qhov tus Tswv yuav tsis sib khi lus nrog ib tug twg li tsuas yog nrog lawv cov uas hloov siab lees txim thiab ntseeg hauv nws tus Tub, tus uas yog Ixayees Tus Dawb Huv xwb.

3 Thiab nim no, kuv yuav qhia tej uas yuav muaj los yav tom ntej me ntsis ntsig txog cov Neeg Yudais thiab Lwm Haiv Neeg. Vim tom qab phau ntawv uas kuv tau hais txog yuav tawm los, thiab raug muab sau rau Lwm Haiv Neeg, thiab rov qab muab zwm cia rau tus Tswv dua lawm, yuav muaj coob leej uas yuav ntseeg tej lus uas tau muab sau; thiab lawv yuav coj tej ntawd tawm mus rau peb tej xeeb leej xeeb ntxwv uas seem tshuav.

4 Thiab tom qab ntawd peb tej noob uas seem tshuav yuav paub txog peb, seb peb tau tawm hauv Yeluxalees tuaj li cas, thiab tias lawv yog cov Neeg Yudais tej noob.

5 Thiab Yexus Khetos txoj moo zoo yuav raug tshaj mus rau lawv; yog li ntawd, lawv yuav raug txum tim rov qab paub txog lawv tej yawg koob, thiab kuj yuav paub txog Yexus Khetos, uas yog tej kev paub uas muaj nyob nrog lawv tej yawg koob.

6 Thiab tom qab ntawd lawv yuav zoo siab; vim lawv yuav paub tias nws yog ib txoj koob hmoov uas los ntawm Vajtswv txhais tes los rau lawv; thiab lawv tej kev tsaus ntuj uas plooj lawv qhov muag yuav pib poob ntawm lawv tej qhov muag mus; thiab yuav tsis muaj ntau tiam neeg uas yuav ploj tuag sai nyob rau hauv lawv, mus txog thaum uas lawv yuav ua tau neeg huv huv thiab ib cov neeg uas nyob kaj siab lug.

7 Thiab yuav tau muaj tias cov Neeg Yudais uas tau tawg khiav ri niab kuj yuav pib ntseeg hauv Khetos thiab; thiab lawv yuav pib sib sau los ua ke rau saum tej npoo av; thiab coob npaum li cas los yog lawv yuav ntseeg hauv Khetos ces kuj yuav rais tau los mus ua ib cov neeg nyob kaj siab lug thiab.

8 Thiab yuav tau muaj tias tus Tswv uas yog Vajtswv yuav pib ua nws txoj hauj lwm mus thoob plaws rau txhua txhia haiv neeg, txhua xeem neeg, txhua yam lus, thiab tej neeg sawv daws, kom coj tau txoj kev txum tim nws cov neeg rov qab los rau saum lub ntiaj teb.

9 Thiab tus Tswv uas yog Vajtswv yuav txiav txim rau cov neeg pluag nrog txoj kev ncaj ncees, thiab yuav txiav txim ncaj rau neeg ntiaj teb cov uas txo hwj chim. Thiab nws yuav xuas tus pas ntawm nws lub qhov ncauj nplawm lub ntiaj teb no; thiab muab cov pa ntawm nws daim di ncauj tua cov neeg phem.

10 Vim lub sij hawm yuav los sai kawg nkaus uas tus Tswv uas yog Vajtswv yuav ua kom muaj ib qhov kev sib faib loj heev nyob hauv lawv, thiab cov neeg phem yuav raug puas tsuaj; thiab nws yuav pab tseg nws cov neeg, muaj tseeb tiag, txawm yog yuav muaj tias, nws yuav tsum muab hluav taws los hlawv cov neeg phem kom puas tsuaj.

11 Thiab kev ncaj ncees yuav yog nws txoj siv sia ntawm nws duav, thiab kev mob siab rau ntseeg yuav yog nws txoj siv sia ntawm nws ntsag.

12 Thiab thaum ntawd tus hma yuav los nrog tus me nyuam yaj nyob; thiab tus tsov txaij yuav da pw nrog tus me nyuam tshis, thiab tus thav nyuj thiab tus thav tsov ntxhuav, thiab tej nyuj twm uas rog, los ua ke tag nrho, thiab ib tug me nyuam yaus yuav coj lawv kev.

13 Thiab tus nyuj thiab tus dais yuav noj zaub ua ke; lawv tej me nyuam mos yuav da pw ua ke; thiab tus tsov ntxhuav yuav noj tej quav nyab ib yam li tus heev nyuj.

14 Thiab tus me nyuam uas tseem noj mis yuav ua si ntawm lub qhov uas nab taug nyob, thiab tus me nyuam uas tso mis lawm yuav tso lawv tej tes rau saum nab raj kub sai lub qhov.

15 Lawv yuav tsis tom mob los sis tsis ua kom puas tsuaj nyob tag nrho saum kuv lub roob dawb huv; vim kev paub tus Tswv yuav nrov mus thoob plaws hauv lub ntiaj teb no, ib yam li cov dej npog puv nkaus dej hiav txwv.

16 Yog li ntawd, txhua txhia yam ntawm txhua haiv neeg huv tib si yuav raug ua kom paub; muaj tseeb tiag, txhua yam tsav yuav raug ua kom paub rau noob neej.

17 Yuav tsis muaj ib yam dab tsi uas yuav zais tau nws tsuas muaj yuav raug muab qhib kom paub xwb; yuav tsis muaj ib txoj hauj lwm tsaus ntuj tsuas muaj yuav muab ua kom tawm hauv qhov pom kev xwb; thiab yuav tsis muaj ib yam dab tsi uas yuav raug muab zwm cia rau hauv ntiaj teb tsuas yog yuav muaj yuav muab qhib xwb.

18 Yog li ntawd, txhua txhia yam uas tau muab qhib rau noob neej paub yuav raug muab qhib nyob rau hnub ntawd; thiab tus Ntxwg Nyoog yuav tsis muaj hwj chim ntxias tau noob neej tej siab ntxiv lawm, yuav tsis muaj hwj chim mus ntev heev li. Thiab nim no, kuv cov kwv tij uas kuv hlub es, kuv tsum kuv tej lus hais.