1 Thiab tom qab Khetos sawv hauv qhov tuag los nws yuav ua kom nej pom nws tus kheej, kuv cov me nyuam, thiab kuv cov kwv tij uas kuv hlub es; thiab tej lus uas nws yuav hais rau nej yuav yog txoj kev cai uas nej yuav tsum coj.

2 Vim saib seb, kuv hais rau nej tias kuv tau pom tias ntau tiam neeg yuav dhau mus, thiab yuav muaj tej kev ua rog loj thiab tej kev sib cav sib ceg nyob hauv kuv cov neeg.

3 Thiab tom qab tus Mexiyas los yuav muab tej cim rau kuv cov neeg txog nws txoj kev yug, thiab txog nws txoj kev tuag thiab txoj kev sawv rov los; thiab hnub ntawd yuav tseem ceeb thiab txaus ntshai heev rau cov neeg phem, vim lawv yuav piam sij; thiab lawv piam sij vim lawv ntiab cov yaj saub tawm, thiab cov ntseeg, thiab xuas pob zeb ntaus lawv, thiab muab lawv tua; yog li ntawd cov ntseeg cov ntshav yuav quaj tawm hauv av nce tuaj mus rau Vajtswv tawm tsam lawv.

4 Yog li ntawd, txhua tus uas muab hlob, thiab cov uas ua phem, hnub uas yuav los ntawd yuav muab lawv hlawv, Ib Tsoom Tub Rog tus Tswv hais li, vim lawv yuav zoo li tej quav nyab npleg.

5 Thiab lawv cov uas tua cov yaj saub, thiab cov ntseeg, tej qhov ntuj tob yuav muab lawv nqos mus, Ib Tsoom Tub Rog tus Tswv hais li; thiab tej roob yuav los npog lawv, thiab tej khaub zig cua yuav nplawm lawv mus, thiab tej vaj tse yuav vau los tsuam lawv thiab tsoo kom lawv tawg ua tej dwb daim thiab zom kom lawv ntsoog ua hmoov.

6 Thiab xob quaj, thiab xob tua, thiab av qeeg, thiab txhua txhia yam kev puas tsuaj yuav los xyuas lawv, vim tej hluav taws ntawm tus Tswv txoj kev npau taws yuav hlawv tawm tsam lawv, thiab lawv yuav zoo li tej quav nyab npleg, thiab hnub uas yuav los ntawd yuav hlawv lawv, Ib Tsoom Tub Rog tus Tswv hais li.

7 Auj txoj kev mob, thiab txoj kev ntxhov siab ntawm kuv lub siab vim kev ploj tuag ntawm kuv cov neeg! Vim kuv, Nifais, tau pom qhov no, thiab qhov no twb yuav luag ua rau kuv puas tsuaj nyob ntawm tus Tswv xub ntiag; tiam sis kuv yuav tsum thov kuv tus Vajtswv: Koj tej kev yeej ncaj.

8 Tiam sis saib seb, cov neeg ncaj ncees uas mloog cov yaj saub tej lus, thiab tsis ua kom lawv puas tsuaj, tiam sis nyob kho kho cia siab tos ntsoov Khetos nrhiav tej cim uas muab los, txawm hais tias raug tag nrho kev tsim txom—saib seb, lawv yog cov uas yuav tsis piam sij.

9 Tiam sis Leej Tub ntawm Kev Ncaj Ncees yuav tshwm sim los rau lawv; thiab nws yuav kho lawv kom zoo, thiab lawv yuav muaj kev kaj siab lug nrog nws, kom txog thaum peb tiam neeg tau dhau mus, thiab muaj coob tus ntawm tiam neeg thib plaub tau dhau mus raws li kev ncaj ncees.

10 Thiab thaum tej xwm txheej no tau dhau mus yuav muaj ib txoj kev puas tsuaj sai heev los rau kuv cov neeg; vim, txawm hais tias kuv tus ntsuj plig mob los, kuv twb tau pom tej ntawd; yog li ntawd, kuv paub tias tej ntawd yeej yuav muaj los; thiab lawv muab lawv tus kheej muag tsis rau nqi; vim, rau qhov nqi zog ntawm lawv txoj kev muab hlob thiab lawv txoj kev ruam lawv yuav raug kev puas tsuaj; vim hais tias lawv ywj rau tus dab phem thiab xum xaiv tej hauj lwm tsaus ntuj dua tej hauj lwm kaj, yog li ntawd lawv yeej yuav nqis mus rau hauv ntuj txiag teb tsaus.

11 Vim tus Tswv tus Ntsuj Plig yuav tsis tshoov neeg lub siab tas mus li. Thiab thaum tus Ntsuj Plig tsum tsis tshoov neeg lub siab lawm thaum ntawd yuav muaj kev puas tsuaj los sai sai, thiab tej no ua rau kuv nyuaj siab.

12 Thiab ib yam li kuv tau hais txog txoj kev yaum cov Neeg Yudais, hais tias Yexus twb yog tus Khetos ntag, yeej yuav tsum yaum kom Lwm Haiv Neeg ntseeg tias Yexus yog tus Khetos, tus Vajtswv uas Nyob Mus Ib Txhis;

13 Thiab hais tias nws tshwm nws tus kheej los rau tag nrho cov uas ntseeg nws, los ntawm tus Vaj Ntsuj Plig Dawb Huv lub hwj chim; muaj tseeb tiag, rau txhua haiv neeg, txhua xeem neeg, txhua yam lus, thiab txhua yam neeg, ua tej txuj ci tseem ceeb loj, tej cim, thiab tej txuj ci uas xav tsis thoob, rau noob neej raws li lawv txoj kev ntseeg.

14 Tiam sis saib seb, kuv qhia tej yuav muaj los yav tom ntej rau nej txog hnub nyoog kawg; txog lub caij thaum tus Tswv uas yog Vajtswv yuav coj tej xwm txheej no tawm los rau noob neej.

15 Tom qab kuv cov tub ki thiab kuv cov kwv tij cov tub ki tau tso txoj kev ntseeg tseg, thiab tau raug Lwm Haiv Neeg nplawm; muaj tseeb tiag, tom qab tus Tswv uas yog Vajtswv tau tsuam yeej tawm tsam lawv, thiab tau tsa laj kab tawm tsam lawv, thiab tau tsa ntsa loog tawm tsam lawv; thiab tom qab lawv raug txo qis los rau hauv av, ua kom tsis muaj lawv lawm, Vajtswv cov tub qhe tseem yuav muab cov neeg ncaj ncees tej lus sau cia, thiab Vajtswv tseem yuav hnov cov uas rau siab ntseeg tej lus thov, thiab lawv yuav tsis hnov qab txog cov uas tau tso txoj kev ntseeg tseg.

16 Vim cov uas raug puas tsuaj yuav hais lus tawm hauv av mus rau cov uas muaj sia, thiab lawv tej lus hais yuav tawm hauv av tuaj, thiab lawv lub suab yuav zoo li tus uas txawj ua dab; vim tus Tswv uas yog Vajtswv yuav muab hwj chim rau nws, xwv kom nws yuav ntxhi ntsig txog lawv, zoo li tawm hauv av tuaj; thiab lawv tej lus yuav ntxhi tawm hauv av tuaj.

17 Vim tus Tswv uas yog Vajtswv hais li no tias: Lawv yuav sau tej xwm txheej uas tau muaj rau lawv, thiab yuav muab tej xwm txheej no sau tseg thiab khi cia rau hauv ib phau ntawv, thiab cov uas tau tso txoj kev ntseeg tseg yuav tsis tau tej ntawd, vim lawv nrhiav kev muab tej yam txog Vajtswv rhuav pov tseg.

18 Yog li ntawd, ib yam li cov uas tau raug puas tsuaj twb raug puas tsuaj sai heev; thiab lawv cov neeg coob coob uas txaus ntshai yuav zoo li tej npluag nplej uas raug cua ntsawj ya mus—muaj tseeb tiag, tus Tswv uas yog Vajtswv tau hais li no tias: Yeej yuav muaj li no sai sai, tib pliag—

19 Thiab yuav muaj tias, lawv cov uas tau tso txoj kev ntseeg tseg yuav raug tsim txom los ntawm Lwm Haiv Neeg txhais tes.

20 Thiab Lwm Haiv Neeg khav theeb vim lawv qhov muag muab hlob, thiab tau dawm ko taw, vim qhov uas ua rau lawv dawm ko taw loj heev, lawv thiaj tau tsa ntau lub koom txoos; txawm li ntawd los lawv muab Vajtswv lub hwj chim thiab tej txuj ci tseem ceeb pov tseg, thiab lawv qhia lawv tus kheej txog lawv tej kev txawj ntse thiab lawv tej kev kawm, xwv kom lawv yuav muaj nyiaj nplua nuj thiab siv cov neeg pluag lub ntsej muag ua zeb zom.

21 Thiab tau tsa ntau lub koom txoos kom muaj kev sib khib, thiab kev sib cav sib ceg, thiab kev ntxub ntxaug.

22 Thiab kuj muaj kev tuav hauv ntsiag to, zoo ib yam li txheej thaum ub, raws li txoj kev tuav hauv ntawm tus dab phem, vim nws yog tus pib tag nrho tej no; muaj tseeb tiag, yog tus pib kev tua neeg, thiab tej hauj lwm tsaus ntuj; muaj tseeb tiag, thiab nws xuas ib txoj hlua zooj los khi lawv caj dab cab lawv, kom txog thaum nws xuas nws txoj hlua ruaj ruaj los khi tau lawv mus ib txhis.

23 Vim saib seb, kuv cov kwv tij uas kuv hlub es, kuv hais rau nej hais tias tus Tswv uas yog Vajtswv tsis ua hauj lwm rau hauv qhov tsaus ntuj.

24 Nws tsis ua ib yam dab tsi tsuas yog ua tej yam uas pab neeg ntiaj teb xwb; vim nws hlub neeg ntiaj teb, nws thiaj tso nws txoj sia xwv kom nws yuav coj tau neeg txhua tus los cuag nws. Yog li ntawd, nws tsis txwv ib tug twg kom tsis txhob los txais yuav nws txoj kev cawm seej.

25 Saib seb, nws puas qw rau leej twg, hais tias: Cia li khiav ntawm kuv mus? Saib seb, kuv hais rau nej tias, Nws tsis tau hais li; tiam sis nws hais tais: Nej txhua tus uas nyob thoob plaws lub ntiaj teb cia li los cuag kuv, los yuav mis thiab zib ntab, tsis tas them nyiaj thiab tsis tas tshuav nqi.

26 Saib seb, nws puas txib leej twg kom lawv khiav tawm hauv tej tsev sab laj mus, los sis khiav tawm hauv tej tsev teev tiam Vajtswv? Saib seb, kuv hais rau nej tias, nws tsis txib li ntawd.

27 Nws puas tau txib leej twg kom lawv tsis txhob txais nws txoj kev cawm seej? Saib seb kuv hais rau nej tias, Nws tsis tau txib li ntawd; tiam sis nws tau muab txoj kev cawm seej ntawd pub dawb rau neeg txhua tus; thiab nws tau txib nws cov neeg kom lawv yaum neeg txhua tus los hloov siab lees txim.

28 Saib seb, tus Tswv puas txib leej twg tias kom lawv tsis txhob txais yuav nws txoj kev zoo? Saib seb kuv hais rau nej tias, Nws tsis tau txib li ntawd; tiam sis neeg txhua tus ib tug yeej muaj cai li ib tug, thiab Vajtswv tsis txwv leej twg.

29 Nws txib tias yuav tsum tsis txhob muaj tej tswv yim xib hwb cuav; vim, saib seb tej tswv yim xib hwb cuav yog tej neeg uas qhuab qhia thiab tsa lawv tus kheej ua ib qho kaj rau neeg ntiaj teb, xwv kom lawv yuav muaj nyiaj nplua nuj thiab kom neeg ntiaj teb qhuas lawv; tiam sis lawv tsis nrhiav qhov zoo rau Xi-oos.

30 Saib seb, tus Tswv tau txwv qhov no; yog li ntawd, tus Tswv uas yog Vajtswv tau muab ib lo lus txib tias neeg txhua tus yuav tsum muaj kev siab hlub, uas yog kev hlub. Thiab yog lawv tsis muaj kev siab hlub ces lawv tsis muaj nuj nqis dab tsi li. Yog li ntawd, yog hais tias lawv muaj kev siab hlub lawv yuav tsis cia kom Xi-oos cov tub ua hauj lwm piam sij.

31 Tiam sis Xi-oos cov tub ua hauj lwm yuav tsum ua hauj lwm rau Xi-oos; yog hais tias lawv ua hauj lwm yuav nyiaj lawv yuav tsum piam sij.

32 Thiab ntxiv dua, tus Tswv uas yog Vajtswv tau txib tias neeg yuav tsum tsis txhob tua neeg; hais tias lawv yuav tsum tsis txhob dag; hais tias lawv yuav tsum tsis txhob ua tub sab; hais tias lawv yuav tsum tsis txhob muab tus Tswv uas yog lawv tus Vajtswv lub npe mus hais ua dog ua dig; hais tias lawv yuav tsum tsis txhob ntshaw luag tug; hais tias lawv yuav tsum tsis txhob muaj kev ntxub ntxaug; hais tias lawv yuav tsum tsis nrog lwm tus sib cav sib ceg; hais tias lawv yuav tsum tsis txhob sib daj sib deev; thiab hais tias lawv yuav tsum tsis txhob ua tej no hlo li; vim tus uas ua tej no yuav tsum piam sij.

33 Vim yeej tsis muaj ib yam kev ua phem no los ntawm tus Tswv los li; vim nws tsuas ua tej uas zoo rau noob neej xwb; thiab nws tsis ua dab tsi tsuas tsuas yog tej uas meej rau noob neej xwb; thiab nws caw lawv txhua tus kom los cuag nws thiab los txais yuav nws txoj kev tshav ntuj; thiab nws tsis txwv leej twg ntawm cov uas los cuag nws, tsis hais cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej; thiab nws nco ntsoov txog cov neeg tsis hwm Vajtswv; thiab txhua tus yeej zoo tib yam rau Vajtswv, tsis hais cov Neeg Yudais los yog Lwm Haiv Neeg.