Phau Ntawv Nifais thib Ob

1 Thiab nim no tau muaj tias tom qab kuv, Nifais, xaus kuv tej lus qhia kuv cov tij laug lawm, peb txiv, Lihais, kuj hais ntau yam rau lawv thiab, thiab rov qhia dua rau lawv tias, tus Tswv tau ua ntau yam tseem ceeb rau lawv los ntawm qhov uas nws coj lawv tawm ntawm thaj av Yeluxalees.

2 Thiab nws hais rau lawv ntsig txog lawv tej kev ntxeev siab nyob saum dej hiav txwv, thiab ntsig txog Vajtswv txoj kev hlub tshua uas nws cawm lawv txoj sia, kom lawv thiaj li tsis raug nqos mus rau hauv dej hiav txwv.

3 Thiab nws kuj hais rau lawv ntsig txog thaj av uas cog lus cia, thaj av uas lawv tau txais—tus Tswv hlub tshua peb kawg nkaus nws thiaj ceeb toom kom peb yuav tsum khiav tawm hauv thaj av Yeluxalees mus.

4 Vim, saib seb, nws hais tias, kuv tau ua yog toog, uas tau ua rau kuv paub hais tias Yeluxalees raug puas tsuaj lawm; thiab yog hais tias peb tseem nyob hauv Yeluxalees ces ntshe peb twb raug piam sij lawm thiab.

5 Tiam sis, nws hais tias, txawm peb raug txom nyem los, peb twb tau txais ib thaj av uas cog lus cia, ib thaj av uas zoo tshaj tag nrho lwm thaj av; ib thaj av uas tus Tswv uas yog Vajtswv tau khi lus rau kuv tias yuav yog ib thaj av cia rau kuv cov tub ki ua qub txeeg qub teg. Muaj tseeb tiag, tus Tswv tau muab thaj av no khi lus rau kuv thiab rau kuv cov me nyuam mus ib txhis li, thiab muab rau tag nrho cov uas yog tus Tswv txhais tes coj tawm ntawm lwm lub teb chaws tuaj.

6 Yog li ntawd, kuv, Lihais, qhia tej yuav muaj los yav tom ntej no raws li tej kev tshoov siab ntawm tus Ntsuj Plig uas nyob hauv kuv, hais tias yuav tsis muaj ib tug neeg uas yuav tuaj tau rau thaj av no hlo li tsuas yog tus Tswv txhais tes coj lawv xwb.

7 Yog li ntawd, nws muab thaj av no fij tseg cia rau tus uas nws yuav coj tuaj. Thiab yog hais tias lawv teev tiam nws raws nraim li tej lus txib uas nws tau muab, ces thaj av yuav yog ib thaj av ywj pheej pub rau lawv; yog li ntawd, lawv yuav tsis raug coj mus kom poob cev qhev ib zaug hlo li; tiam sis yog hais tias lawv ho raug, ces ntshe yog vim lawv tej kev ua phem; yog hais tias muaj txoj kev ua phem ntau heev ces thaj av yuav raug foom tsis zoo rau lawv, tiam sis thaj av yuav tau txais koob hmoov mus ib txhis li pub rau cov neeg ncaj ncees.

8 Thiab saib seb, yog tswv yim uas tus Tswv tsis tau pub lwm haiv neeg paub txog thaj av no; vim saib seb, ntau haiv neeg yuav tuaj nyob puv nkaus rau hauv thaj av no, ces yuav tsis tshuav chaw cia ua qub txeeg qub teg.

9 Yog li ntawd, kuv, Lihais, tau txais ib lo lus cog tseg, hais tias yog cov uas tus Tswv uas yog Vajtswv coj tawm ntawm thaj av Yeluxalees yuav ua raws li nws tej lus txib, lawv yuav vam meej nyob rau hauv thaj av no; thiab lwm haiv neeg yuav tsis paub txog lawv, kom lawv yuav muaj thaj av no los ua lawv tug. Thiab yog hais tias lawv ua raws li nws tej lus txib ces lawv yuav tau txais koob hmoov nyob rau hauv thaj av no, thiab yuav tsis muaj leej twg tuaj thab lawv, los sis tuaj txeeb thaj av uas yog lawv qub txeeg qub teg; thiab lawv yuav nyob nyab xeeb mus ib txhis li.

10 Tiam sis saib seb, thaum lub sij hawm los txog uas lawv tso txoj kev ntseeg tseg zuj zus, tom qab lawv tau txais tej koob hmoov uas ntau heev los ntawm tus Tswv txhais tes—twb paub txog txoj kev tsim lub ntiaj teb, thiab txoj kev tsim neeg txhua tus, twb paub txog tej hauj lwm tseem ceeb thiab zoo kawg nkaus ntawm tus Tswv txij puag thaum tsim lub ntiaj teb los; tus Tswv tau muab lub hwj chim rau lawv ua tau txhua yam los ntawm kev ntseeg; tau muab tej lus txib rau lawv txij puag thaum chiv keeb los, thiab nws txoj kev zoo uas tsis tu tsis tseg tau coj lawv tuaj rau hauv thaj av muaj nuj nqis no uas cog lus cia—saib seb, kuv hais tias, yog hnub ntawd los txog uas lawv xyeej cov neeg Ixayees tus Dawb Huv, tus Mexiyas uas tseeb, lawv tus Txhiv Dim thiab lawv tus Vajtswv, ces saib seb, nws tej kev txiav txim uas ncaj ncees yuav los rau lawv ris.

11 Muaj tseeb tiag, nws yuav coj lwm haiv neeg tuaj rau lawv, thiab nws yuav muab hwj chim rau lawv cov uas nws coj tuaj no, thiab nws yuav muab tej thaj av uas yog lawv ntiag tug tshem tawm ntawm lawv mus, thiab nws yuav ua kom lawv tawg khiav ri niab thiab raug nplawm.

12 Muaj tseeb tiag, yuav muaj nqaij ntuag ntshav nrog ib tiam dhau ib tiam, thiab yuav muaj kev rau txim hnyav nyob nrog lawv; yog li ntawd, kuv cov me tub es, kuv xav kom nej nco qab ntsoov; muaj tseeb tiag, kuv xav kom nej cia li cuab pob ntseg mloog kuv tej lus.

13 Auj kuv xav kom nej cia li tsim los; tsim ntawm txoj kev tsaug zog heev, muaj tseeb tiag, twb yog tsim ntawm ntuj txiag teb tsaus txoj kev tsaug zog, thiab cia li daws pov tseg tej saw hlau phem heev uas khi nej, uas yog cov saw hlau uas khi noob neej, kom lawv yuav raug cab coj mus ua cev qhev nyob rau hauv tej kwj tob tob uas nyob mus ib txhis li ntawm txoj kev nyuaj siab thiab txoj kev txom nyem.

14 Cia li tsim dheev! thiab cia li sawv tsees hauv tej plua av los, thiab cia li mloog ib tug txiv uas qaug zog tej lus, tus uas tsis ntev no nej yeej yuav coj nws tej npab tej ceg coj mus tso cia rau hauv lub qhov ntxa uas txias zias thiab ntsiag to, uas yog qhov chaw uas tsis muaj neeg rov qab los tau; ob peb hnub ntxiv xwb ces kuv twb yuav mus rau txoj kev uas neeg ntiaj teb txhua tus mus.

15 Tiam sis saib seb, tus Tswv tau txhiv kuv tus ntsuj plig tawm ntawm ntuj txiag teb tsaus; kuv tau pom nws lub yeeb koob, thiab ob txhais npab ntawm nws txoj kev hlub tau muab kuv puag khawm mus ib txhis li.

16 Thiab kuv thov kom nej yuav nco qab ntsoov ua raws li tus Tswv tej kev cai thiab tej kev txiav txim; saib seb, tej no yog tej uas tau ua rau kuv ntxhov siab txij puag thaum chiv keeb los.

17 Qee lub sij hawm kev tu siab ua rau kuv poob siab heev, vim kuv ntshai tias, tsam los ntawm nej txoj kev siab tawv ces tus Tswv nej tus Vajtswv yuav tso tag nrho nws txoj kev npau taws los rau nej, ces nej yuav raug muab txiav tawm thiab raug puas tsuaj mus ib txhis li;

18 Los sis kuv ntshai tias, tsam kev foom tsis zoo yuav poob los rau nej rau ntau tiam neeg; thiab nej yuav ntsib hniav ntaj hniav riam, thiab ntsib kev tshaib nqhis, thiab yuav raug luag ntxub, thiab yuav raug coj mus raws li tus dab phem lub siab nyiam thiab mus poob cev qhev.

19 Auj kuv cov me tub es, kheev lam tej no tsis txhob los raug nej, thiab xav kom nej yog cov neeg uas tus Tswv nyiam thiab xaiv tseg. Tiam sis saib seb, yuav muaj raws li nws lub siab nyiam; vim nws tej kev yeej ncaj ncees mus ib txhis li.

20 Thiab nws tau hais tias: Npaum li uas nej ua raws li kuv tej lus txib nej yuav vam meej nyob rau hauv thaj av; tiam sis npaum li uas nej tsis coj kuv tej lus txib nej yuav raug txiav tawm ntawm kuv xub ntiag mus.

21 Thiab nim no xwv kom kuv tus ntsuj plig muaj kev xyiv fab rau nej, thiab xwv kom kuv lub siab ncaim lub neej no mus nrog txoj kev zoo siab vim yog nej, xwv kom kuv tsis txhob mus rau hauv qhov ntxa nrog txoj kev nyuaj siab thiab kev tu siab, cia li sawv tsees hauv tej plua av los, kuv cov me tub es, thiab ua li txiv neej yawg, thiab cia li koom siab koom ntsws tsis tu tsis tseg, koom ua ke rau txhua yam, xwv kom nej thiaj tsis poob rau hauv txoj kev ua cev qhev;

22 Xwv kom nej thiaj tsis raug foom tsis zoo nrog ib txoj kev foom tsis zoo uas mob heev li; thiab xwv kom nej tsis txhob ua rau Vajtswv tus uas ncaj ncees npau taws rau nej, ua rau nej puas tsuaj, muaj tseeb tiag, puas tsuaj mus ib txhis ntawm sab ntsuj plig thiab sab cev nqaij daim tawv.

23 Cia li tsim dheev, kuv cov me tub es; cia li muab tej cuab yeej ua rog ntawm txoj kev ncaj ncees los hnav. Cia li hle tej saw hlau uas khi nej, thiab khiav tawm ntawm txoj kev pom tsis tseeb, thiab sawv tsees hauv tej plua av los.

24 Tsis txhob ntxeev siab tawm tsam nej tus kwv ntxiv, tus uas ua yog toog uas muaj yeeb koob, thiab tus uas tau ceev tej lus txib txij thaum peb tau ncaim Yeluxalees; thiab tus uas yog ib rab cuab yeej nyob rau hauv Vajtswv txhais tes, uas tau coj peb tuaj rau hauv thaj av uas cog lus cia; yog tsis muaj nws, ces peb twb tuag tshaib nyob rau hauv hav zoov lawm; tsis tas li ntawd xwb, nej tseem nrhiav kev muab nws txoj sia txo pov tseg; muaj tseeb tiag, thiab yog vim nej nws tau raug ntau yam kev tu siab.

25 Thiab nej ua rau kuv ntshai thiab tshee heev kawg nkaus li, tsam nws rov qab raug li ntawd dua; vim saib seb, nej tau liam nws hais tias nws nrhiav hwj chim thiab nrhiav txoj cai kav nej; tiam sis kuv paub hais tias nws tsis tau nrhiav hwj chim los sis nrhiav txoj cai kav nej, tiam sis nws tau nrhiav Vajtswv lub yeeb koob, thiab nrhiav txoj kev noj qab nyob zoo mus ib txhis li rau nej.

26 Thiab nej tau yws yws vim nws tau hais ncaj rau nej. Nej hais tias nws tau ua nruj ua tsiv rau nej; nej hais tias nws tau npau taws rau nej; tiam sis saib seb, qhov nws ua nruj ua tsiv tsuas yog qhov nruj qhov tsiv ntawm lub hwj chim ntawm Vajtswv txoj lus, uas muaj nyob hauv nws; thiab qhov uas nej hais tias yog kev npau taws twb yog qhov tseeb, raws li qhov tseeb uas muaj nyob hauv Vajtswv, uas nej tus kwv cheem tsis tau, thiaj tab meeg qhia txog nej tej kev ua phem.

27 Thiab yeej yuav tsum muaj tias Vajtswv lub hwj chim yeej yuav nrog nws nyob, kom nej yuav tsum mloog nws lus thaum nws txib nej. Tiam sis saib seb, twb tsis yog nws, tiam sis yog tus Tswv tus Ntsuj Plig uas nyob hauv nws, uas qhib nws lub qhov ncauj hais uas nws tsis muaj peev xwm kaw tau.

28 Thiab nim no kuv tus tub, Lamas, thiab Lemu-ees thiab Xam, thiab kuv cov tub cov uas yog Ixama-ees cov tub, saib seb, yog hais tias nej cuab pob ntseg mloog Nifais lub suab ces nej yuav tsis piam sij. Thiab yog hais tias nej cuab pob ntseg mloog nws kuv yuav tseg ib txoj koob hmoov rau nej, muaj tseeb tiag, twb yog kuv thawj thawj txoj koob hmoov.

29 Tiam sis yog nej tsis cuab pob ntseg mloog nws kuv yuav tshem tawm kuv thawj thawj txoj koob hmoov, muaj tseeb tiag, twb yog kuv txoj koob hmoov, thiab kuv yuav muab rau nws.

30 Thiab nim no, Xaulas, kuv hais rau koj hais tias: Saib seb, koj yog Lanpas tus tub qhe; txawm li ntawd los, tus Tswv tau coj koj khiav tawm ntawm thaj av Yeluxalees, thiab kuv paub tias koj yog kuv tus tub, Nifais, ib tug phooj ywg zoo mus ib txhis li.

31 Yog li ntawd, vim yog koj tau rau siab tsis tu tsis tseg koj cov tub ki yuav tau txais koob hmoov nrog nws cov tub ki, kom lawv yuav nyob vam meej ntev rau hauv thaj av no; thiab yuav tsis muaj dab tsi hlo li, uas yuav rhuav los sis cuam tshuam lawv txoj kev vam meej nyob rau hauv thaj av no mus ib txhis li, tsuas yog muaj kev ua phem nyob nrog lawv xwb.

32 Yog li ntawd, yog hais tias koj yuav ua raws li tus Tswv tej lus txib, tus Tswv tau muab thaj av no fij tseg kom thaj yeeb nyab xeeb rau koj cov tub ki nrog rau kuv tus tub cov tub ki.