1 Thiab nim no tau muaj tias tom qab kuv, Nifais, tau nyeem tej yam uas tau muab sau rau saum cov phiaj toog no, kuv cov tij laug los cuag kuv thiab hais rau kuv tias: Tej yam uas koj tau nyeem tas los no txhais li cas? Saib seb, puas yog peb yuav tsum to taub raws li tej yam ntawm sab ntsuj plig, uas yuav muaj los raws li tus ntsuj plig thiab tsis yog sab cev nqaij daim tawv?

2 Thiab kuv, Nifais, tau hais rau lawv hais tias: Saib seb tau muab tej yam no qhia rau tus yaj saub los ntawm tus Ntsuj Plig lub suab; vim tus Ntsuj Plig yog tus uas qhia txhua txhia yam rau tej yaj saub paub, tej yam uas yuav muaj los rau noob neej raws li sab nqaij daim tawv.

3 Yog li ntawd, tej yam uas kuv tau nyeem yog tej uas sau hais txog tag nrho sab cev nqaij daim tawv thiab sab ntsuj plig; vim zoo nkaus li tsev neeg Ixayees, ziag no los sis lwm hnub, yuav tawg khiav ri niab mus thoob plaws hauv lub ntiaj teb, thiab kuj yuav mus nyob txuam nrog txhua txhia haiv neeg.

4 Thiab saib seb, cov neeg uas tseem nyob hauv Yeluxalees twb tsis paub txog coob leej uas tau ploj mus lawm. Muaj tseeb tiag, tus Tswv twb coj feem coob ntawm tag nrho tej xeem neeg tawm mus; thiab lawv tawg khiav ri niab rau ub rau no nyob rau hauv tej koog pov txwv hauv dej hiav txwv; thiab peb tsis muaj leej twg paub tias lawv mus nyob rau qhov twg, tiam sis peb tsuas paub tias tus Tswv tau coj lawv tawm mus.

5 Thiab vim tus Tswv tau coj lawv tawm mus, tej yaj saub tau qhia tej yam no ntsig txog lawv, thiab kuj tau qhia ntsig txog tag nrho cov uas tseem yuav tawg khiav ri niab thiab raug kev ntxhov hnyo tom qab no mus, vim yog cov neeg Ixayees tus Dawb Huv; vim lawv ua lawv lub siab tawv qhawv tawm tsam nws; yog li ntawd, lawv thiaj yuav tawg khiav ri niab mus nyob nrog txhua txhia haiv neeg thiab txhua leej txhua tus yuav ntxub lawv.

6 Txawm li ntawd los, tom qab Lwm Haiv Neeg tau tu yug lawv, thiab tus Tswv tau tsa nws txhais tes rau saum Lwm Haiv Neeg thiab muab lawv tsa zoo li tus chij, thiab Lwm Haiv Neeg tau muab lawv cov me nyuam nqa rau hauv lawv txhais caj npab, thiab tau muab lawv cov ntxhais ev rau saum lawv lub xub pwg, saib seb tej yam no uas cov yaj saub tau hais yog tej yam ntawm sab cev nqaij daim tawv; vim tej no yog tus Tswv tej kev khi lus nrog rau peb cov yawg koob; thiab qhov no yog hais txog peb nyob rau lub caij nyoog uas tseem yuav los, thiab kuj hais txog tag nrho peb cov kwv tij cov uas yog tsev neeg Ixayees.

7 Thiab qhov no txhais hais tias lub sij hawm los yuav txog tom qab tag nrho tsev neeg Ixayees tau tawg khiav ri niab thiab raug kev ntxhov hnyo, tus Tswv uas yog Vajtswv yuav tsa ib haiv neeg uas muaj zog heev los ntawm Lwm Haiv Neeg, muaj tseeb tiag, twb yog nyob hauv thaj av no; thiab lawv yog cov yuav muab peb cov tub ki ua tawg khiav ri niab.

8 Thiab tom qab peb cov tub ki raug tawg khiav ri niab tus Tswv uas yog Vajtswv yuav pib ua ib txoj hauj lwm zoo kawg nkaus rau Lwm Haiv Neeg, uas yuav muaj nqis heev rau peb cov tub ki; yog li ntawd, txoj hauj lwm no muab piv ib yam li qhov uas Lwm Haiv Neeg tu lawv thiab muab lawv nqa hauv lawv caj npab thiab muab lawv ev saum lawv xub pwg.

9 Thiab txoj hauj lwm no kuj yuav muaj nqis rau Lwm Haiv Neeg thiab; thiab tsis yog muaj nqis rau Lwm Haiv Neeg xwb tiam sis muaj nqis rau tag nrho tsev neeg Ixayees, los qhia Leej Txiv tus uas nyob saum ntuj tej kev khi lus rau Anplaham, hais tias: Los ntawm koj cov tub ki txhua haiv neeg uas nyob hauv ntiaj teb yuav tau koob hmoov.

10 Thiab kuv cov kwv tij, kuv xav kom nej paub tias txhua haiv neeg uas nyob hauv lub ntiaj teb yuav tsis tau koob hmoov yog nws tsis thws nws txhais npab rau txhua haiv neeg lub qhov muag pom.

11 Yog li ntawd, tus Tswv uas yog Vajtswv yuav pib thws nws txhais npab rau txhua haiv neeg lub qhov muag pom, nws thiaj li coj tau nws tej kev khi lus thiab nws txoj moo zoo mus rau cov uas yog tsev neeg Ixayees.

12 Yog li ntawd, nws yuav rov qab coj lawv tawm ntawm txoj kev poob cev qhev, thiab lawv yuav sib sau mus nyob ua ke rau hauv thaj av uas yog lawv qub txeeg qub teg dua; thiab lawv yuav dim plaws txoj kev pom tsis tseeb thiab dim plaws txoj kev tsaus ntuj; thiab lawv yuav paub tias tus Tswv yog lawv tus Cawm Seej thiab lawv tus Txhiv Dim, cov neeg Ixayees tus Muaj Hwj Chim.

13 Thiab lub koom txoos uas muaj zog thiab txaus ntxub, lub uas yog tag nrho ntiaj teb tus niam ntiav, nws cov ntshav yuav rov qab nchuav los ywg lawv taub hau; vim lawv yuav rov qab ua rog rau lawv cov neeg, thiab rab ntaj ntawm lawv tus kheej txhais tes yuav rov qab los hlais lawv caj dab, thiab lawv yuav qaug rau lawv cov ntshav.

14 Thiab txhua haiv neeg uas ua rog tawm tsam nej, auj tsev neeg Ixayees, lawv yuav tig rov qab tawm tsam lawv, thiab lawv yuav poob mus rau hauv tus kwj uas lawv tau khawb cuab tus Tswv cov neeg. Thiab txhua tus uas ntaus tawm tsam Xi-oos yuav raug puas tsuaj mus, thiab tus niam ntiav loj ntawd, tus uas tau coj tus Tswv tej kev ncaj mus rau qhov tsis zoo, muaj tseeb tiag, lub koom txoos uas muaj zog thiab txaus ntxub ntawd, yuav raug nphau mus rau hauv tej plua tshauv thiab txoj kev puas tsuaj ntawd yuav yog loj kawg nkaus.

15 Vim saib seb, tus yaj saub hais tias, lub sij hawm los yuav txog sai sai uas Dab Ntxwg Nyoog yuav tsis muaj hwj chim ntxias tau noob neej lub siab ntxiv lawm; vim tsis ntev no hnub ntawd twb yuav los uas txhua tus uas muab hlob thiab lawv cov uas ua phem yuav zoo li tej quav nyab npleg; thiab hnub ntawd twb yuav los uas lawv yuav raug muab hlawv.

16 Vim tsis ntev no lub sij hawm twb yuav los uas Vajtswv yuav hliv nws txoj kev npau taws uas puv npo los rau tag nrho noob neej; vim nws yuav tsis cia cov neeg phem ua kom cov neeg ncaj ncees puas tsuaj.

17 Yog li ntawd, nws yuav tsom kwm cov neeg ncaj ncees los ntawm nws lub hwj chim, txawm tias tag nrho nws txoj kev npau taws yuav los, thiab tsom kwm cov neeg ncaj ncees, txawm tias nws yuav muab hluav taws hlawv kom lawv cov yeeb ncuab puas tsuaj mus. Yog li ntawd, cov neeg uas ncaj ncees tsis tas ntshai; vim tus yaj saub hais li no, lawv yuav txais kev cawm dim, txawm tias yuav siv hluav taws los ua.

18 Saib seb, kuv cov kwv tij es, kuv hais rau nej tias, tej yam no yeej yuav muaj los tsis ntev tom ntej no; muaj tseeb tiag, twb yog ntshav thiab hluav taws, thiab pa hluav taws uas yuav los; thiab tej no yuav tshwm sim rau hauv lub ntiaj teb no; thiab tej no yuav los rau noob neej raws li sab cev nqaij daim tawv yog hais tias lawv ua lawv lub siab tawv qhawv tawm tsam cov neeg Ixayees tus Dawb Huv.

19 Vim saib seb, cov neeg ncaj ncees yuav tsis raug piam sij; vim lub sij hawm yeej yuav los uas txhua tus cov uas tawm tsam Xi-oos yuav raug muab txiav tawm mus.

20 Thiab tus Tswv yeej yuav npaj ib txoj kev rau nws cov neeg, kom muaj raws li Mauxes cov lus, cov lus uas nws tau hais, hais tias: Tus Tswv nej tus Vajtswv yuav tsa ib tug yaj saub los rau nej, zoo ib yam li kuv; nej yuav mloog tag nrho txhua yam uas nws yuav hais rau nej. Thiab yuav muaj tias tag nrho cov uas tsis mloog tus yaj saub ntawd yuav raug muab txiav tawm ntawm cov neeg no mus.

21 Thiab nim no kuv, Nifais, tshaj tawm rau nej tias tus yaj saub uas Mauxes hais txog no twb yog cov neeg Ixayees tus Dawb Huv; yog li ntawd, nws yuav txiav txim kom ncaj ncees.

22 Thiab cov neeg ncaj ncees tsis tas ntshai, vim lawv yog cov uas yuav tsis raug puas tsuaj tas. Tiam sis yog tus dab phem lub nceeg vaj, uas nws yuav txhim tsa nyob nrog noob neej, yog lub nceeg vaj uas tau raug tsa nyob nrog noob neej thaum muaj cev nqaij daim tawv—

23 Vim lub sij hawm yuav los sai sai uas tag nrho cov koom txoos uas tau txhim tsa los kom muaj nyiaj nplua nuj, thiab tag nrho cov uas tau txhim tsa los kom lawv muaj hwj chim kav sab cev nqaij daim tawv, thiab cov uas tau txhim tsa los kom lawv muaj suab muaj npe rau neeg ntiaj teb lub qhov muag, thiab cov uas nrhiav kev plees kev yi ntawm cev nqaij daim tawv thiab nrhiav muaj nyiaj nplua nuj ntawm lub ntiaj teb, thiab xav ua txhua yam kev phem; muaj tseeb tiag, lub ntsiab yog li no, tag nrho cov uas zwm rau tus dab phem lub nceeg vaj yog cov uas tsim nyog ntshai, thiab ceeb, thiab tshee; lawv yog cov uas yeej yuav raug poob kom qis rau hauv av; lawv yog cov uas yeej yuav raug hlawv zoo li tej quav nyab npleg; thiab qhov no yog raws li tus yaj saub tej lus.

24 Thiab lub sij hawm yuav los sai sai uas tus Tswv yeej yuav coj cov neeg ncaj ncees zoo li tej me nyuam nyuj hauv tej nkuaj nyuj, thiab cov neeg Ixayees tus Dawb Huv yuav los kav teb kav chaw yam muaj dag muaj zog, thiab muaj hwj chim, thiab muaj yeeb koob loj kawg li.

25 Thiab nws yuav muab nws cov me nyuam uas nyob tim plaub ceg kaum ntuj sau los ua ke; thiab nws suav nws cov yaj, thiab lawv paub nws; thiab thaum ntawd yuav ua ib pab yaj koom ib tug tswv yug yaj; thiab nws yuav pub nws pab yaj, thiab lawv yuav nrhiav tau zaub noj los ntawm nws.

26 Thiab vim yog nws haiv neeg txoj kev ncaj ncees, Dab Ntxwg Nyoog tsis muaj hwj chim; yog li ntawd, nws yuav dim tsis tau mus ntau niaj ntev xyoo; vim nws yuav tsis muaj hwj chim los kav tau neeg lub siab, vim lawv ua neej raws li txoj kev ncaj ncees, thiab cov neeg Ixayees tus Dawb Huv yog tus uas kav lawv.

27 Thiab nim no saib seb, kuv, Nifais, hais rau nej tias txhua yam no yeej yuav muaj los raws li sab cev nqaij daim tawv.

28 Tiam sis, saib seb, txhua haiv neeg, txhua xeem neeg, txhua yam lus, thiab txhua yam neeg sawv daws yuav nyob nyab xeeb hlo hauv cov neeg Ixayees tus Dawb Huv yog hais tias lawv yuav hloov siab lees txim.

29 Thiab nim no kuv, Nifais, tseg tsis sau ntxiv; vim ntshai kuv yuav tsis hais txog tej yam no mus ntxiv lawm.

30 Yog li ntawd, kuv cov kwv tij, kuv xav kom nej paub tias tej yam uas tau muab sau rau saum cov phiaj toog muaj tseeb tiag; thiab tej lus no ua tim khawv tias ib tug neeg yuav tsum ua raws li Vajtswv tej lus txib.

31 Yog li ntawd, nej tsis txhob xav hais tias tsuas yog kuv thiab kuv txiv wb thiaj yog ob tug uas tau ua tim khawv, thiab yog ob tug uas tau qhia tej lus no xwb. Yog li ntawd, yog hais tias nej yuav ua raws li tej lus txib, thiab nyiaj mus kom txog thaum kawg, ces thaum txog hnub kawg yuav cawm nej dim. Thiab yeej muaj li ntawd. Amees.