1 Thiab yuav muaj tias, yog Lwm Haiv Neeg mloog Vajtswv tus Me Nyuam Yaj lus nyob rau hnub uas nws yuav ua nws tus kheej tshwm sim los rau lawv los ntawm nws txoj lus, thiab los ntawm hwj chim, los ntawm txhua yam uas nws ua, kom nws tshem tej yam uas dawm lawv ko taw—

2 Thiab yog tias lawv tsis ua siab tawv tawm tsam Vajtswv tus Me Nyuam Yaj, ces yuav suav lawv nrog koj txiv cov tub ki; muaj tseeb tiag, yuav suav lawv nrog tsev neeg Ixayees; thiab lawv yuav yog ib co neeg uas tau koob hmoov nyob rau hauv thaj av uas cog lus cia mus ib txhis; lawv yuav tsis raug coj mus rau hauv txoj kev poob cev qhev; thiab tsev neeg Ixayees yuav tsis raug kev ntxhov hnyo ntxiv lawm.

3 Thiab lub qhov uas tob heev ntawd, uas lub koom txoos uas muaj zog thiab txaus ntxub tau khawb cia rau lawv, lub koom txoos uas tus dab phem thiab nws tej me nyuam tau txhim tsa, kom nws yuav coj tau neeg tej ntsuj plig mus rau hauv ntuj txiag teb tsaus—muaj tseeb tiag, lub qhov uas tob heev ntawd uas tau khawb cia rau tej neeg txoj kev puas tsuaj yuav ntim cov uas tau khawb lub qhov ntawd kom puv nkaus, kom lawv raug puas tsuaj huv tib si li, Vajtswv tus Me Nyuam Yaj tau hais li ntawd; tsis yog kev puas tsuaj ntawm tus ntsuj plig, tsuas yog yuav muab nws pov rau hauv ntuj txiag teb tsaus uas tsis muaj qhov kawg.

4 Vim saib seb, tej yam no yog raws li txoj kev poob cev qhev rau tus dab phem, thiab kuj yog raws li Vajtswv txoj kev txim lij, rau tag nrho lawv cov uas ua kev phem thiab kev qias rau tus Tswv pom.

5 Thiab tau muaj tias tus tim tswv hais rau kuv, Nifais, hais tias: Koj tau pom tias yog Lwm Haiv Neeg hloov siab lees txim qhov ntawd yuav zoo rau lawv; thiab koj kuj paub ntsig txog tus Tswv tej kev khi lus tseg rau tsev neeg Ixayees; thiab koj kuj tau hnov tias tus uas tsis hloov siab lees txim ces tus ntawd yeej yuav raug piam sij.

6 Yog li ntawd, kev txom nyem yuav los raug Lwm Haiv Neeg yog tias lawv ua lawv lub siab tawv tawm tsam Vajtswv tus Me Nyuam Yaj.

7 Vim lub sij hawm los yuav txog, Vajtswv tus Me Nyuam Yaj hais li, uas kuv yuav ua ib txoj hauj lwm tseem ceeb thiab zoo kawg nkaus rau noob neej; ib txoj hauj lwm uas yuav kav ib txhis, kom mus rau sab no los yog mus rau sab tod—kom yaum lawv los rau txoj kev kaj siab lug thiab txoj sia nyob mus ib txhis, los sis ua rau lawv lub siab tawv thiab tsis thoob tsib to nrog kom lawv raug coj mus rau txoj kev poob cev qhev, thiab mus rau txoj kev puas tsuaj, tsis hais sab cev nqaij daim tawv los yog sab ntsuj plig, raws li txoj kev poob cev qhev rau tus dab phem, uas kuv tau hais txog.

8 Thiab tau muaj tias thaum tus tim tswv tau hais cov lus no, nws hais rau kuv tias: Koj puas nco qab txog tej kev khi lus uas Leej Txiv khi rau tsev neeg Ixayees? Kuv hais rau nws tias, Kuv nco.

9 Thiab tau muaj tias nws hais rau kuv tias: Ntsia thiab saib lub koom txoos uas muaj zog thiab txaus ntxub ntawd, uas yog leej niam ntawm tej kev qias, lub uas tus txhim tsa yog tus dab phem.

10 Thiab nws hais rau kuv tias: Saib seb tsuas muaj ob lub koom txoos nkaus xwb; ib lub yog Vajtswv tus Me Nyuam Yaj lub, thiab ib lub yog tus dab phem lub; yog li ntawd, tus uas tsis zwm rau Vajtswv tus Me Nyuam Yaj lub koom txoos ces tus ntawd zwm rau lub koom txoos uas muaj zog ntawd, lub uas yog leej niam ntawm tej kev qias; thiab nws yog tag nrho ntiaj teb tus niam ntiav.

11 Thiab tau muaj tias kuv ntsia thiab pom tag nrho ntiaj teb tus niam ntiav, thiab nws zaum saum ntau cov dej hiav txwv; thiab nws kav ntiaj teb tag nrho, nrog rau txhua haiv neeg, txhua xeem neeg, txhua yam lus, thiab txhua yam neeg.

12 Thiab tau muaj tias kuv pom Vajtswv tus Me Nyuam Yaj lub koom txoos, thiab tsis muaj neeg coob pes tsawg, vim yog tej kev phem thiab kev qias ntawm tus niam ntiav uas zaum saum cov dej hiav txwv; txawm li ntawd los, kuv pom tias tus Me Nyuam Yaj lub koom txoos, uas yog Vajtswv haiv neeg ntseeg, kuj nyob thoob plaws hauv lub ntiaj teb; thiab lawv txoj kev kav tej teb chaws hauv ntiaj teb no tsis muaj ntau, vim yog txoj kev phem ntawm tus niam ntiav phem heev uas kuv pom.

13 Thiab tau muaj tias kuv pom hias tias leej niam uas phem heev ntawm tej kev qias tau sib sau ntau pab neeg uas nyob thoob plaws hauv ntiaj teb, uas nyob nrog txhua haiv ntawm Lwm Haiv Neeg, ua ke tuaj tua tawm tsam Vajtswv tus Me Nyuam Yaj.

14 Thiab tau muaj tias kuv, Nifais, pom Vajtswv tus Me Nyuam Yaj lub hwj chim, pom tias lub hwj chim ntawd tau nqis los rau cov ntseeg ntawm tus Me Nyuam Yaj lub koom txoos, thiab rau tus Tswv cov neeg khi lus, cov uas tau tawg khiav ri niab mus thoob plaws hauv lub ntiaj teb; thiab lawv tau muab txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv.

15 Thiab tau muaj tias kuv pom tias Vajtswv tau hliv nws txoj kev npau taws los rau lub koom txoos uas muaj zog thiab txaus ntxub, thiaj li tau muaj kev ua rog thiab hnov lus paj lus cua txog kev ua rog nyob hauv txhua haiv neeg thiab txhua xeem neeg hauv ntiaj teb.

16 Thiab thaum tab tom pib muaj kev ua rog thiab lus paj lus cua txog kev ua rog nyob hauv txhua haiv neeg uas zwm rau leej niam ntawm tej kev qias, tus tim tswv saum ntuj hais rau kuv, hais tias: Saib seb, Vajtswv npau taws rau cov niam ntiav leej niam; thiab saib seb, koj pom txhua yam tsav no—

17 Thiab thaum txog hnub uas Vajtswv hliv nws txoj kev npau taws los rau cov niam ntiav leej niam, uas yog lub koom txoos uas muaj zog thiab txaus ntxub uas nyob thoob plaws hauv lub ntiaj teb, uas tus txhim tsa yog tus dab phem, ces, thaum hnub ntawd, Leej Txiv txoj hauj lwm yuav pib npaj txoj hau kev kom muaj raws li nws tej kev khi lus, uas nws tau khi nrog nws cov neeg uas yog tsev neeg Ixayees.

18 Thiab tau muaj tias tus tim tswv hais rau kuv, hais tias: Ntsia saib!

19 Thiab kuv ntsia thiab pom ib tug txiv neej, thiab nws hnav ib lub tsho tshaj sab dawb.

20 Thiab tus tim tswv hais rau kuv tias: Saib seb ib tug thwj tim ntawm tus Me Nyuam Yaj kaum ob tug thwj tim.

21 Saib seb, nws yuav pom thiab nws yuav sau tej yam uas tseem tshuav no; muaj tseeb tiag, thiab ntau yam uas tau muaj dhau los.

22 Thiab nws kuj yuav sau ntsig txog qhov kawg ntawm lub ntiaj teb.

23 Yog li ntawd, tej yam uas nws yuav sau yog yam uas ncaj thiab tseeb; thiab saib seb tau muab tej yam ntawd sau rau hauv phau ntawv uas koj pom tawm ntawm cov Neeg Yudais lub qhov ncauj los; thiab thaum lub sij hawm uas tej ntawd tawm ntawm cov Neeg Yudais lub qhov ncauj los, los sis, thaum lub sij hawm uas phau ntawv tau tawm ntawm cov Neeg Yudais lub qhov ncauj los, tej yam uas tau sau yog yam uas meej thiab huv huv xwb, thiab yog tej yam uas muaj nuj nqis tshaj plaws thiab yooj yim rau neeg txhua leej to taub.

24 Thiab saib seb, tej yam uas tus Me Nyuam Yaj tus thwj tim no yuav sau yog ntau yam uas koj twb pom los lawm; thiab saib seb, koj tseem yuav pom cov uas tseem tshuav.

25 Tiam sis tej yam uas koj tseem yuav pom tom qab no koj tsis txhob sau; vim tus Tswv uas yog Vajtswv tau tsa Vajtswv tus Me Nyuam Yaj tus thwj tim kom nws sau tej ntawd.

26 Thiab lwm cov uas tau nyob dhau los, tus Tswv uas yog Vajtswv tau muab txhua yam no rau lawv pom, thiab lawv tau sau tej no tseg; thiab tau muab tej no khi tseg cia kom tej no yuav tawm los yam huv si, raws li txoj kev tseeb uas nyob hauv tus Me Nyuam Yaj, raws li lub sij hawm uas tus Tswv pom zoo, mus rau tsev neeg Ixayees.

27 Thiab kuv, Nifais, tau hnov thiab ua pov thawj hais tias, tus Me Nyuam Yaj tus thwj tim lub npe hu ua Yauhas, raws li tus tim tswv txoj lus.

28 Thiab saib seb, Vajtswv txwv kuv, Nifais, tsis pub sau tej yam uas tseem tshuav uas kuv tau pom thiab tau hnov; yog li ntawd tej yam uas kuv tau sau twb txaus kuv lawm; thiab kuv tsuas sau me ntsis txog tej yam uas kuv tau pom.

29 Thiab kuv ua pov thawj tias kuv pom tej yam uas kuv txiv pom, thiab tus Tswv tus tim tswv tau ua tej no rau kuv paub.

30 Thiab nim no kuv xaus lus txog tej yam uas kuv tau pom thaum tus Ntsuj Plig coj kuv mus; thiab txawm hais tias sau tsis tau txhua yam uas kuv tau pom los, tej yam uas kuv tau sau yeej muaj tseeb. Thiab yeej muaj li ntawd tiag. Amees.