1 Thiab tau muaj tias tus tim tswv hais rau kuv, hais tias: Ntsia saib! Thiab kuv ntsia thiab pom ntau haiv neeg thiab ntau lub nceeg vaj.

2 Thiab tus tim tswv hais rau kuv tias: Koj pom dab tsi? Thiab kuv hais tias: Kuv pom ntau haiv neeg thiab ntau lub nceeg vaj.

3 Thiab nws hais rau kuv tias: Cov no yog tej haiv neeg thiab tej nceeg vaj ntawm Lwm Haiv Neeg.

4 Thiab tau muaj tias kuv pom txoj kev txhim tsa ib lub koom txoos uas muaj zog nyob hauv Lwm Haiv Neeg.

5 Thiab tus tim tswv hais rau kuv tias: Saib seb txoj kev txhim tsa lub koom txoos uas yog lub txaus ntxub tshaj plaws ntawm tag nrho lwm cov koom txoos, lub uas muab cov ntseeg Vajtswv tua pov tseg, muaj tseeb tiag, thiab tsim txom lawv thiab muab lawv khi cia, thiab yuam lawv ris tus quab hlau, thiab coj lawv mus rau txoj kev poob cev qhev.

6 Thiab tau muaj tias kuv pom lub koom txoos uas muaj zog thiab txaus ntxub no; thiab kuv pom tias tus dab phem yog tus tsim lub koom txoos no.

7 Thiab kuv kuj pom tej nyiaj, thiab tej kub, thiab tej ntaub yaj pwm, thiab tej ntaub liab, thiab tej ntaub npuag, thiab txhua txhia yam ntaub uas muaj nuj nqis heev; thiab kuv pom ntau tus niam ntiav.

8 Thiab tus tim tswv hais rau kuv, hais tias: Saib seb tej nyiaj, thiab tej kub, thiab tej ntaub yaj pwm thiab tej ntaub liab, thiab tej ntaub npuag, thiab tej ntaub uas muaj nuj nqis heev, thiab tej niam ntiav, yog lub koom txoos uas muaj zog thiab txaus ntxub no tej kev ntshaw.

9 Thiab xwm kom lawv tau neeg ntiaj teb txoj kev qhuas lawv thiaj ua kom Vajtswv haiv neeg ntseeg puas tsuaj, thiab coj lawv mus rau txoj kev poob cev qhev.

10 Thiab tau muaj tias kuv saib thiab pom cov dej hiav txwv; thiab cov dej no cais Lwm Haiv Neeg deb ntawm kuv cov tij laug tej tub ki.

11 Thiab tau muaj tias tus tim tswv hais rau kuv tias: Saib seb Vajtswv npau taws rau koj cov tij laug tej tub ki.

12 Thiab kuv saib thiab pom ib tug txiv neej uas nyob nrog Lwm Haiv Neeg, tus uas cov dej hiav txwv muab cais deb ntawm kuv cov tij laug tej tub ki; thiab kuv pom Vajtswv tus Ntsuj Plig, tias nws tau nqis los thiab los tshoov tus txiv neej no lub siab; thiab tus txiv neej no tau mus rau saum cov dej hiav txwv, mus txog ntua rau kuv cov tij laug tej tub ki, cov uas nyob hauv thaj av uas cog lus cia.

13 Thiab tau muaj tias kuv pom Vajtswv tus Ntsuj Plig, hais tias nws los tshoov lwm tus lub siab ntawm Lwm Haiv Neeg; thiab lawv tawm ntawm txoj kev poob cev qhev, mus rau saum cov dej hiav txwv.

14 Thiab tau muaj tias kuv pom muaj ntau pab neeg ntawm Lwm Haiv Neeg nyob rau hauv thaj av uas cog lus cia; thiab kuv pom tias Vajtswv npau taws rau kuv cov tij laug tej tub ki; thiab lawv tawg khiav ri niab los ntawm Lwm Haiv Neeg thiab raug tsim txom.

15 Thiab kuv pom Vajtswv tus Ntsuj Plig, hais tias nws los nyob nrog Lwm Haiv Neeg, thiab lawv tau vam meej thiab tau txais thaj av ua lawv qub txeeg qub teg; thiab kuv pom tias lawv yog neeg tawv dawb, thiab txaus nyiam thiab zoo nkauj heev, zoo li kuv cov neeg ua ntej lawv raug tua tuag.

16 Thiab tau muaj tias kuv, Nifais, pom tias Lwm Haiv Neeg uas tau tawm ntawm txoj kev poob cev qhev tau txo lawv lub hwj chim rau tus Tswv; thiab tus Tswv lub hwj chim tau los nrog lawv nyob.

17 Thiab kuv pom tias Lwm Haiv Neeg cov uas tseem nyob tim lawv qub teb qub chaw tau sib sau tuaj ua ke rau saum dej hiav txwv thiab rau saum av, tuaj sib tua tawm tsam lawv.

18 Thiab kuv pom tias Vajtswv lub hwj chim tau los nrog lawv nyob, thiab Vajtswv tau npau taws rau cov neeg uas tau sib sau ua ke tuaj sib tua tawm tsam lawv.

19 Thiab kuv, Nifais, pom tias Vajtswv lub hwj chim tau coj Lwm Haiv Neeg, cov uas tau tawm ntawm txoj kev poob cev qhev, dim ntawm txhua txhia lwm haiv neeg tes.

20 Thiab tau muaj tias kuv, Nifais, pom tias lawv tau vam meej nyob hauv thaj av; thiab kuv pom ib phau ntawv, thiab lawv tau nqa phau ntawv no nrog lawv.

21 Thiab tus tim tswv hais rau kuv tias: Koj puas paub lub ntsiab ntawm phau ntawv no?

22 Thiab kuv hais rau nws tias: Kuv tsis paub.

23 Thiab nws hais tias: Saib seb phau ntawv no tawm ntawm cov Neeg Yudais lub qhov ncauj los. Thiab kuv, Nifais, pom phau ntawv no; thiab nws hais rau kuv tias: Phau ntawv uas koj pom yog cov Neeg Yudais ib phau ceev xwm txheej, uas muaj tus Tswv tej kev khi lus nyob rau hauv, uas nws tau khi rau tsev neeg Ixayees; thiab phau ntawv no kuj muaj cov yaj saub dawb huv tej kev qhia ntau yam uas yuav muaj los yav tom ntej; thiab yog ib phau ceev xwm txheej zoo li phau uas tau muab sau rau saum cov phiaj toog, tsuas yog tias tsis muaj ntau phau npaum li ntawd xwb; txawm li ntawd los, cov ceev xwm txheej no yeej muaj tus Tswv tej kev khi lus nyob rau hauv, uas nws tau khi rau tsev neeg Ixayees; yog li ntawd, cov no muaj nuj nqis heev rau Lwm Haiv Neeg.

24 Thiab tus Tswv tus tim tswv tau hais rau kuv tias: Koj tau pom tias phau ntawv no tawm ntawm cov Neeg Yudais lub qhov ncauj los; thiab thaum muab tawm ntawm cov Neeg Yudais lub qhov ncauj los phau ntawv no muaj qhov txhij txhua ntawm tus Tswv txoj moo zoo nyob rau hauv, tus Tswv uas kaum ob tug thwj tim tau ua pov thawj txog, thiab lawv ua pov thawj raws li txoj kev tseeb uas muaj nyob hauv Vajtswv tus Me Nyuam Yaj.

25 Yog li ntawd, tej yam no tawm ntawm cov Neeg Yudais dawb paug mus rau Lwm Haiv Neeg, raws li txoj kev tseeb uas los ntawm Vajtswv.

26 Thiab tom qab tej yam no tawm los ntawm tus Me Nyuam Yaj kaum ob tug thwj tim txhais tes mus, ntawm cov Neeg Yudais mus rau Lwm Haiv Neeg, koj pom txoj kev txhim tsa lub koom txoos uas muaj zog thiab txaus ntxub, uas yog lub txaus ntxub tshaj plaws ntawm tag nrho lwm cov koom txoos; vim saib seb, lawv tau muab ntau yam uas meej thiab muaj nuj nqis heev hauv tus Me Nyuam Yaj txoj moo zoo rho tawm; thiab lawv kuj tau rho tawm tus Tswv ntau txoj kev khi lus.

27 Thiab lawv tau ua txhua yam no kom lawv thiaj yuav hloov tau tus Tswv tej kev uas yog, kom lawv thiaj yuav npog tau noob neej tej qhov muag thiab ua rau noob neej lub siab tawv.

28 Yog li ntawd, koj pom tias tom qab phau ntawv tau mus los ntawm lub koom txoos uas muaj zog thiab txaus ntxub txhais tes, muaj ntau yam uas meej thiab muaj nuj nqis heev raug muab rho tawm hauv phau ntawv mus, phau uas yog Vajtswv tus Me Nyuam Yaj phau ntawv.

29 Thiab tom qab tau muab tej yam uas meej thiab muaj nuj nqis heev rho tawm phau ntawv no tau mus thoob plaws rau txhua haiv uas yog Lwm Haiv Neeg; thiab tom qab phau ntawv tau mus thoob plaws rau txhua haiv uas yog Lwm Haiv Neeg, muaj tseeb tiag, twb mus hla dhau cov dej hiav txwv uas koj tau pom nrog Lwm Haiv Neeg uas tau tawm hauv txoj kev poob cev qhev, koj pom—vim yog tau muab ntau yam uas meej thiab muaj nuj nqis heev rho tawm hauv phau ntawv mus, uas yooj yim rau noob neej to taub, raws li txoj kev meej uas los ntawm Vajtswv tus Me Nyuam Yaj—vim yog tau muab tej yam no rho tawm hauv tus Me Nyuam Yaj txoj moo zoo, thiaj muaj neeg coob leej heev dawm taw, muaj tseeb tiag, Dab Ntxwg Nyoog thiaj muaj hwj chim loj heev kav lawv.

30 Txawm li ntawd los, koj pom tias Lwm Haiv Neeg cov uas tau tawm hauv txoj kev poob cev qhev, thiab Vajtswv lub hwj chim tau txhawb pab lawv tshaj txhua lwm haiv neeg, nyob rau hauv thaj av uas zoo tshaj txhua thaj av, uas yog thaj av uas tus Tswv uas yog Vajtswv tau khi lus tseg cia rau koj txiv hais tias nws cov tub ki yuav tau txais los ua lawv qub txeeg qub teg; yog li ntawd, koj pom tias tus Tswv uas yog Vajtswv yuav tsis cia kom Lwm Haiv Neeg ua rau koj cov tub ki uas sib xyaw puas tsuaj huv tib si li, cov uas nrog koj cov tij laug cov tub ki nyob.

31 Thiab nws yuav tsis cia kom Lwm Haiv Neeg ua rau koj cov tij laug cov tub ki puas tsuaj mus thiab.

32 Thiab tus Tswv uas yog Vajtswv yuav tsis cia kom Lwm Haiv Neeg nyob dig muag phem heev li ntawd mus ib txhis, raws li koj pom tam sim no lawv nyob, vim lub koom txoos uas txaus ntxub muab tej yam uas meej thiab muaj nuj nqis heev ntawm tus Me Nyuam Yaj txoj moo zoo tuav tseg, lub uas koj pom txhim tsa lawm.

33 Yog li ntawd Vajtswv tus Me Nyuam Yaj hais tias: Kuv yuav hlub tshua Lwm Haiv Neeg, kuv thiaj yuav xyuas tsev neeg Ixayees uas seem tshuav nrog kev txiav txim loj.

34 Thiab tau muaj tias tus Tswv tus tim tswv hais rau kuv, hais tias: Vajtswv tus Me Nyuam Yaj hais tias, saib seb, tom qab kuv tau xyuas tsev neeg Ixayees uas seem tshuav—thiab cov neeg seem tshuav uas kuv hais txog no yog koj txiv cov tub ki—yog li ntawd, tom qab kuv tau txiav txim xyuas lawv, thiab tau tsim txom lawv los ntawm Lwm Haiv Neeg txhais tes, thiab tom qab Lwm Haiv Neeg dawm taw heev, vim yog lub koom txoos uas txaus ntxub, uas yog cov niam ntiav leej niam, tau muab tej yam uas meej thiab muaj nuj nqis tshaj plaws ntawm tus Me Nyuam Yaj txoj moo zoo tuav tseg, tus Me Nyuam Yaj hais li ntawd—Kuv yuav hlub tshua Lwm Haiv Neeg nyob rau hnub ntawd, kuv thiaj yuav coj ntau yam ntawm kuv txoj moo zoo, uas meej thiab muaj nuj nqis, tawm los rau lawv, los ntawm kuv lub hwj chim, tus Me Nyuam Yaj hais li ntawd.

35 Vim, saib seb, tus Me Nyuam Yaj hais tias: Kuv yuav ua kuv tus kheej tshwm sim los rau koj cov tub ki, kom lawv yuav sau ntau yam uas kuv yuav qhia rau lawv, uas yuav meej thiab muaj nuj nqis; thiab tom qab koj cov tub ki raug puas tsuaj, thiab tso txoj kev ntseeg tseg zuj zus, thiab koj cov tij laug cov tub ki thiab, saib seb, yuav muab tej yam no coj mus zais cia, kom tawm los rau Lwm Haiv Neeg, los ntawm tus Me Nyuam Yaj lub txiaj ntsim thiab lub hwj chim.

36 Thiab nyob rau hauv tej yam no koj cov tub ki yuav sau kuv txoj moo zoo, tus Me Nyuam Yaj hais li, thiab kuv lub pob zeb thiab kuv txoj kev cawm seej.

37 Thiab cov uas nrhiav kev tsa kuv lub Xi-oos nyob rau hnub ntawd yuav tau koob hmoov, vim lawv yuav tau txais tus Vaj Ntsuj Plig Dawb Huv lub txiaj ntsim thiab lub hwj chim; thiab yog tias lawv nyiaj mus kom txog thaum kawg Vajtswv yuav muab lawv tsa sawv thaum txog hnub kawg, thiab Vajtswv yuav cawm lawv dim nyob hauv tus Me Nyuam Yaj lub nceeg vaj uas kav ib txhis; thiab txhua tus uas tshaj tawm txoj kev thaj yeeb, muaj tseeb tiag, tej moo uas muaj kev xyiv fab loj, lawv yuav zoo nkauj kawg nyob rau saum tej roob.

38 Thiab tau muaj tias kuv pom cov neeg seem tshuav ntawm kuv cov tij laug cov tub ki, thiab kuj pom Vajtswv tus Me Nyuam Yaj phau ntawv, phau uas tau tawm los ntawm cov Neeg Yudais lub qhov ncauj, hais tias phau ntawv no tau tawm ntawm Lwm Haiv Neeg mus rau cov neeg seem tshuav ntawm kuv cov tij laug tej tub ki.

39 Thiab tom qab phau ntawv no tau tawm mus rau lawv kuv pom lwm cov ntawv, uas tau tawm mus los ntawm tus Me Nyuam Yaj lub hwj chim, los ntawm Lwm Haiv Neeg mus rau lawv, kom yaum Lwm Haiv Neeg thiab kuv cov tij laug cov tub ki uas seem tshuav, thiab cov Neeg Yudais uas tau tawg khiav ri niab mus thoob plaws lub ntiaj teb, hais tias cov yaj saub thiab tus Me Nyuam Yaj kaum ob tug thwj tim cov ceev xwm txheej muaj tseeb.

40 Thiab tus tim tswv hais rau kuv, hais tias: Cov ceev xwm txheej kawg no, uas koj tau pom nyob nrog Lwm Haiv Neeg, yuav qhia tias thawj cov ceev xwm txheej muaj tseeb, cov uas yog tus Me Nyuam Yaj kaum ob tug thwj tim li, thiab yuav qhia txog tej yam uas meej thiab muaj nuj nqis uas tau raug muab rho tawm ntawm thawj cov ceev xwm txheej; thiab yuav qhia rau txhua xeem neeg, txhua yam lus, thiab tej neeg sawv daws, hais tias Vajtswv tus Me Nyuam Yaj yog Leej Txiv tus uas Nyob Mus Ib Txhis Leej Tub, thiab nws yog neeg ntiaj teb tus Cawm Seej; thiab hais tias tag nrho neeg txhua leej yuav tsum los cuag nws, yog tsis li ces cawm tsis tau lawv dim.

41 Thiab lawv yuav tsum los raws li txoj lus uas tus Me Nyuam Yaj lub qhov ncauj tau tshaj tawm; thiab yuav qhia txog tus Me Nyuam Yaj tej lus nyob rau hauv koj cov tub ki cov ceev xwm txheej, thiab nyob rau hauv tus Me Nyuam Yaj kaum ob tug thwj tim cov ceev xwm txheej; yog li ntawd yuav muab ob co ceev xwm txheej no los ua ib phau; vim muaj ib tug Vajtswv thiab ib tug Tswv Yug Yaj uas kav thoob plaws lub ntiaj teb.

42 Thiab lub sij hawm los txog uas nws yuav ua nws tus kheej tshwm sim los rau txhua haiv neeg, tsis hais rau cov Neeg Yudais los yog rau Lwm Haiv Neeg; thiab tom qab nws tau ua nws tus kheej tshwm sim los rau cov Neeg Yudais thiab rau Lwm Haiv Neeg, ces nws yuav ua nws tus kheej tshwm sim los rau rau Lwm Haiv Neeg thiab rau cov Neeg Yudais, thiab cov uas ua qab yuav ua ntej, thiab cov uas ua ntej yuav ua qab.