1 Thiab tau muaj tias peb tau sau txhua yam noob los ua ke tsis hais noob qoob noob loo, los yog txhua yam noob nplej, thiab noob txiv hmab txiv ntoo txhua yam.

2 Thiab tau muaj tias thaum kuv txiv tseem nyob tom roob moj sab qhua nws tau hais rau peb li no: Saib seb, kuv tau ua ib zaj npau suav, los yog hais tias, kuv tau ua yog toog.

3 Thiab saib seb, vim tej yam uas kuv tau pom, kuv thiaj li muaj kev zoo siab rau tus Tswv vim yog Nifais thiab kuj yog Xam thiab; rau qhov kuv xav tias nyaj nkawd, thiab nkawd cov tub ki coob leej, yuav txais kev cawm dim.

4 Tiam sis saib seb, Lamas thiab Lemu-ees, kuv txhawj heev kawg nkaus li vim yog neb; vim saib seb, zoo li kuv pom nyob hauv kuv zaj npau suav, ib lub roob moj sab qhua uas tsaus ntuj thiab muaj kev nyuaj siab.

5 Thiab tau muaj tias kuv tau pom ib tug txiv neej, thiab nws hnav ib lub tsho tshaj sab dawb; thiab nws tau los thiab sawv ntawm kuv hauv ntej.

6 Thiab tau muaj tias nws hais lus rau kuv, thiab hais kom kuv lawv nws qab.

7 Thiab tau muaj tias thaum kuv lawv nws qab mus kuv pom tias kuv nyob hauv ib qho chaw uas muaj kev tsaus ntuj thiab kev nyuaj siab.

8 Thiab tom qab kuv tau mus hauv qhov chaw tsaus ntuj ntawd tau ntau ntau teev, kuv pib thov tus Tswv kom nws muaj kev hlub tshua rau kuv, raws li nws txoj kev hlub tshua uas loj kawg nkaus.

9 Thiab tau muaj tias tom qab kuv tau thov tus Tswv kuv pom ib lub nras uas loj thiab dav.

10 Thiab tau muaj tias kuv pom ib tsob ntoo, uas muaj cov txiv uas neeg xav tau kom muaj kev zoo siab.

11 Thiab tau muaj tias kuv tau mus ntawm tsob ntoo thiab kuv tau noj cov txiv ntawd; thiab kuv pom tias cov txiv ntawd qab zib tshaj txhua yam uas kuv tau noj yav tas los. Muaj tseeb tiag, thiab kuv pom hais tias cov txiv ntawd yog ib co uas dawb, dawb tshaj txhua yam uas kuv tau pom.

12 Thiab thaum kuv noj cov txiv ntawd ua rau kuv tus ntsuj plig muaj kev xyiv fab loj heev; yog li ntawd, kuv pib xav kom kuv tsev neeg tau noj thiab; vim kuv paub hais tias yog ib yam txiv uas qab tshaj txhua yam txiv.

13 Thiab thaum kuv tsa qhov muag ntsia ib puag ncig, saib puas pom kuv tsev neeg thiab, kuv pom ib tug kwj deg uas muaj dej; thiab tus dej ntawd ntws, thiab tus dej nyob ze ntawm tsob ntoo uas kuv tau noj cov txiv.

14 Thiab kuv ntsia mus pom qhov uas tus dej ntawd los; thiab kuv tau pom tias tus dej ntawd txhawv nyob tsis deb ntawd; thiab nyob ntawm qhov dej txhawv ntawd kuv pom nej niam Xaliyas, thiab Xam, thiab Nifais; thiab lawv sawv ntsug zoo li lawv tsis paub xyov lawv yuav mus qhov twg.

15 Thiab tau muaj tias kuv co tes rau lawv; thiab kuv kuj tau tsa suab hais nrov nrov rau lawv kom lawv yuav los cuag kuv, thiab los noj cov txiv, uas yog cov qab tshaj txhua yam txiv.

16 Thiab tau muaj tias lawv tau los cuag kuv thiab tau noj cov txiv ntawd thiab.

17 Thiab tau muaj tias kuv xav kom Lamas thiab Lemu-ees los noj cov txiv ntawd thiab; yog li ntawd, kuv tau tsa muag ntsia rau pem lub hau dej, saib kuv puas pom nkawd.

18 Thiab tau muaj tias kuv pom nkawd, tiam sis nkawd tsis kam los cuag kuv thiab los noj cov txiv.

19 Thiab kuv pom ib tug nqaj hlau, thiab tus nqaj hlau mus raws tus ntug dej, thiab tuam los txog ntawm tsob ntoo uas kuv sawv.

20 Thiab kuv kuj pom ib txoj kev ti thiab nqaim, uas los raws tus nqaj hlau, twb los txog ntua ntawm tsob ntoo uas kuv sawv; thiab txoj kev ntawd kuj mus dhau tus hauv dej txhawv, mus txog rau ib lub nras uas loj thiab dav, zoo nkaus li yog ib lub ntiaj teb.

21 Thiab kuv pom ntau pab neeg coob coob uas suav tsis txheeb, coob leej ntawm cov neeg ntawd tau sib zog mus lawm tom hauv ntej, xwv kom lawv yuav los txog ntawm txoj kev uas mus rau ntawm tsob ntoo uas kuv sawv.

22 Thiab tau muaj tias lawv tau los, thiab pib taug txoj kev uas coj mus txog tsob ntoo.

23 Thiab tau muaj tias muaj kev tsaus ntuj uas muaj huab zig niab los; muaj tseeb tiag, twb yog kev tsaus ntuj uas muaj huab zig niab loj heev, ua rau lawv ib co uas tau taug txoj kev ntawd thiaj nrhiav tsis tau txoj kev, lawv thiaj mus yuam kev thiab tau ploj mus.

24 Thiab tau muaj tias kuv pom lwm cov neeg sib zog mus lawm tom hauv ntej, thiab lawv los tuav tau qhov kawg ntawm tus nqaj hlau; thiab lawv tau sib zog mus dhau kev tsaus ntuj uas muaj huab zig niab, tuav rawv tus nqaj hlau, mus txog thaum uas lawv tau los txog thiab noj cov txiv ntoo.

25 Thiab tom qab lawv tau noj cov txiv ntawm tsob ntoo lawv tau tsa muag ntsia ib puag ncig zoo li lawv txaj muag.

26 Thiab kuv kuj tau tsa qhov muag ntsia ib puag ncig, thiab tau pom, ib lub tsev loj thiab dav nyob ntawm tus kwj dej sab tid; thiab zoo li lub tsev ntawd nyob yuj yees saum nruab cua, siab dua ntiaj teb.

27 Thiab lub tsev ntawd muaj neeg nyob puv nkaus, muaj cov laus cov hluas, muaj poj niam thiab txiv neej; thiab lawv hnav tsuj hnav npuag ci ntsa iab; thiab lawv tab tom luag thuam thiab taw tes ntshis rau cov uas tau los txog ntawm tsob ntoo thiab tab tom noj cov txiv.

28 Thiab tom qab lawv tau saj cov txiv lawv txaj muag, vim cov neeg ntawd tab tom luag thuam lawv; thiab lawv tau poob mus rau tej kev uas txwv tsis pub mus thiab tau ploj mus.

29 Thiab nim no kuv, Nifais, tsis hais tag nrho kuv txiv tej lus.

30 Tiam sis, ua kom txoj kev sau ntawv no luv, saib seb, nws pom ntau pab neeg txiv los sib zog mus lawm tom hauv ntej; thiab lawv los tuav tau qhov kawg ntawm tus nqaj hlau; thiab lawv tau txiv los mus lawm tom hauv ntej, tuav rawv tus nqaj hlau ruaj ruaj tsis tso, mus txog thaum uas lawv los txog thiab qhau cev thiab noj cov txiv ntoo.

31 Thiab nws kuj tau pom ntau pab neeg uas maub xuas mus rau tom lub tsev loj thiab dav ntawd.

32 Thiab tau muaj tias muaj coob leej tau poob dej nyob rau hauv tus dej; thiab muaj coob leej uas nws tsis pom ntxiv li lawm, vim lawv taug tej kev uas txawv txawv mus.

33 Thiab neeg coob coob heev tau nkag mus rau hauv lub tsev txawv txawv ntawd. Thiab tom qab lawv tau nkag mus rau hauv lub tsev ntawd, lawv tau taw tes ntshis thuam kuv thiab cov uas tab tom noj cov txiv; tiam sis peb tsis quav ntsej lawv.

34 Cov no yog kuv txiv tej lus: Tag nrho cov uas tau mloog cov neeg ntawd lus, tau ploj mus.

35 Thiab kuv txiv hais tias Lamas thiab Lemu-ees tsis tau noj cov txiv.

36 Thiab tau muaj tias tom qab kuv txiv tau hais tag nrho nws cov lus ntawm nws zaj npau suav los yog kev ua yog toog, uas ntau heev, nws tau hais rau peb hais tias, vim tej yam uas nws tau pom nyob hauv nws txoj kev ua yog toog, nws txhawj heev txog Lamas thiab Lemu-ees; muaj tseeb tiag, nws txhawj hais tias nyob tsam nkawd yuav raug ntiab tawm ntawm tus Tswv xub ntiag mus.

37 Thiab nws tau qhuab ntuas nkawd kawg siab kawg ntsws yam li ib leej txiv uas muaj siab hlub, kom nkawd mloog nws cov lus, kom tej zaum tus Tswv yuav hlub tshua nkawd, thiab tsis ntiab nkawd tawm; muaj tseeb tiag, kuv txiv tau qhuab qhia nkawd.

38 Thiab tom qab nws tau qhuab qhia nkawd, thiab kuj tau qhia ntau yam rau nkawd txog tej yam uas yuav muaj los yav tom ntej, nws hais kom nkawd ua raws li tus Tswv tej lus txib; thiab nws tau tsum tsis hais nkawd lawm.