1 Cia li cuab pob ntseg thiab mloog qhov no, auj tsev neeg Yakhauj, cov uas hu ua Ixayees, thiab cov uas tau tawm hauv cov dej Yudas los, los sis tawm hauv cov dej ntawm kev cai raus dej los, cov uas cog lus los ntawm tus Tswv lub npe, thiab cav txog cov neeg Ixayees tus Vajtswv, tiam sis lawv tsis yog cog lus tseeb thiab tsis cog lus ncaj ncees.

2 Txawm li ntawd los, lawv hais tias lawv yog cov neeg ntawm lub nroog dawb huv, tiam sis lawv tsis vam khom txog cov neeg Ixayees tus Vajtswv, tus uas yog Ib Tsoom Tub Rog tus Tswv; muaj tseeb tiag, Ib Tsoom Tub Rog tus Tswv yog nws lub npe.

3 Saib seb, kuv twb tshaj tawm tej yam uas muaj ua ntej ntawd txij puag thaum chiv keeb los; thiab tej ntawd tau tawm ntawm kuv lub qhov ncauj mus, thiab kuv ua tej ntawd tshwm sim tuaj. Kuv tau ua kom tej ntawd tshwm sim tuaj sai heev li.

4 Thiab kuv tau ua li no vim kuv paub tias nej tawv ncauj, thiab nej txoj leeg caj dab yog hlau thiab nej lub hauv pliaj yog tooj;

5 Thiab kuv twb tau tshaj tawm rau nej txij thaum chiv keeb los; kuv twb ua rau nej pom ua ntej tej ntawd tshwm sim los; thiab kuv tau ua rau nej pom vim ntshai tsam nej ho hais tias—Tej ntawd yog kuv tej mlom ua, thiab tej mlom kuv puab, thiab tej mlom kuv txua tau ua kom muaj tej ntawd.

6 Nej tau pom thiab tau hnov tag nrho tej yam no; thiab puas yog nej tsis kam tshaj tawm tej yam no? Thiab tsis kam tshaj tawm tias kuv tau qhia rau nej tej yam tshiab los ntawm lub caij nyoog no, tej yam uas tau muab zais cia, thiab nej tsis tau paub tej ntawd.

7 Yog tej uas tsim nim no, thiab tsis yog puag thaum chiv keeb los, ua ntej lub sij hawm uas nej tsis tau hnov txog tej yam no kuv twb muab tej no tshaj tawm rau nej, ntshai tsam nej yuav hais tias—Saib seb kuv twb paub lawm.

8 Muaj tseeb tiag, thiab nej tsis tau hnov; muaj tseeb tiag, nej tsis tau paub; muaj tseeb tiag, txij thaum ntawd nej lub pob ntseg tseem tsis tau qhib; vim kuv paub tias nej yuav xyaum ua neeg fav xeeb, thiab raug hu ua tus niag neeg ua txhaum txij puag thaum nyob hauv plab los.

9 Txawm li ntawd los, vim yog kuv lub npe kuv yuav ncua kuv txoj kev chim, thiab xwv kom neeg qhuas kuv, kuv yuav txuag nej mus, kuv yuav tsis txiav nej tawm.

10 Vim, saib seb, kuv tau muab nej nchuav hauv yeej vub, kuv tau xaiv nej hauv lub cub tawg ntawm kev txom nyem los.

11 Xwv kom pab tau kuv, muaj tseeb tiag, xwv kom pab tau kuv, kuv yuav ua qhov no, vim kuv yuav tsis pub kuv lub npe ceb, thiab kuv yuav tsis muab kuv lub yeeb koob rau lwm tus.

12 Cia li cuab pob ntseg mloog kuv, auj Yakhauj, thiab Ixayees uas kuv hu, vim kuv yog nws; kuv yog tus thawj, thiab kuv kuj yog tus kawg.

13 Kuv txhais tes kuj tau tsim lub ntiaj teb, thiab kuv txhais tes xis tau nthuav puv lub ntuj. Kuv hu lawv thiab lawv sawv tuaj ua ke.

14 Tag nrho nej sawv daws, cia li sau los nyob ua ke, thiab mloog; leej twg uas nyob hauv lawv tau tshaj tej no tawm rau lawv? Tus Tswv tau hlub nws; muaj tseeb tiag, thiab nws yeej yuav ua kom muaj raws li nws cov lus uas nws tau tshaj tawm los ntawm lawv; thiab nws yeej yuav ua raws li nws lub siab nyiam rau Npanpiloos, thiab nws txhais npab yuav los rau saum cov neeg Khadees.

15 Thiab, tus Tswv hais tias; Kuv tus uas yog tus Tswv, muaj tseeb tiag, kuv twb hais lawm; muaj tseeb tiag, kuv tau hu nws los tshaj tawm, kuv tau coj nws los, thiab nws yuav ua kom nws txoj kev tawg paj txi txiv.

16 Nej cia li txav los ze kuv; kuv yeej tsis tau hais lus zais li; txij puag thaum chiv keeb los, txij puag thaum lub sij hawm uas tau tshaj tawm qhov no los kuv twb tau hais; thiab tus Tswv uas yog Vajtswv, thiab nws tus Ntsuj Plig, tau xa kuv los.

17 Thiab tus Tswv hais li no tias, nej tus Txhiv Dim, cov neeg Ixayees tus Dawb Huv; kuv tau xa nws los, tus Tswv nej tus Vajtswv tus uas qhia yam zoo rau nej, tus uas coj nej txoj hau kev uas nej yuav tsum mus, tau ua li no.

18 Auj kheev lam nej tau ua raws li kuv tej lus txib—ces nej txoj kev kaj siab lug twb yuav zoo li tus dej, thiab nej txoj kev ncaj ncees twb yuav zoo li tej nplaim dej ntas hauv hiav txwv.

19 Nej cov tub ki kuj yuav coob npaum li tej xuab zeb; tej me nyuam ntawm nej lub plab ntau npaum li tej tsig xuab zeb; nws lub npe twb tsis tsim nyog muab txiav tawm los sis muab ua kom puas tsuaj rau kuv pom.

20 Nej cia li khiav tawm hauv Npanpiloos mus, nej cia li tsiv tawm ntawm cov neeg Khadees mus, nej cia li tshaj tawm nrog lub suab hu nkauj, qhia qhov no, tshaj tawm mus kom kawg lub ntiaj teb; nej cia li hais tias: Tus Tswv tau txhiv nws tus tub qhe Yakhauj dim.

21 Thiab lawv tsis nqhis dej; nws tau coj lawv hla dhau tej roob moj sab qhua; nws tau ua kom muaj dej txhawv hauv tej pob zeb los rau lawv haus; nws kuj tau muab tej pob zeb phua thiab tej dej ntws tawm los.

22 Thiab txawm hais tias nws tau ua txhua yam no, thiab tej txuj ci uas tseem ceeb dua no thiab, tus Tswv hais tias, yuav tsis muaj kev kaj siab lug rau cov neeg phem.