1 Thiab tau muaj tias tus Tswv txib kuv, yog li ntawd kuv tau muab tej quav tooj quav hlau los ua ib co phiaj xwv kom kuv yuav sau tau kuv cov neeg tej ceev xwm txheej rau saud. Thiab nyob rau saum cov phiaj uas kuv ua kuv tau muab kuv txiv tej ceev xwm txheej sau rau saud, thiab kuj tau sau txog peb tej kev tsiv nyob hauv hav zoov, thiab kuv txiv tej lus qhia uas yuav muaj los yav tom ntej; thiab kuv kuj tau muab ntau yam ntawm kuv tus kheej tej kev qhia uas yuav muaj los yav tom ntej sau rau saum cov phiaj no thiab.

2 Thiab thaum lub sij hawm uas kuv ua cov no kuv tsis tau paub tias tus Tswv yuav txib kom kuv ua cov phiaj no; yog li ntawd, kuv txiv cov ceev xwm txheej, thiab nws tej yawg koob tej caj ceg, thiab feem ntau ntawm tej yam uas tau tshwm sim rau peb nyob rau hauv hav zoov tau muab sau rau saum thawj cov phiaj uas kuv tau hais txog; yog li ntawd, tej teeb meem uas tshwm sim ua ntej kuv ua cov phiaj no, tiag tiag, yeej yog cov uas tau muab hais ntxaws rau saum thawj cov phiaj.

3 Thiab tom qab kuv tau ua cov phiaj no raws li txoj lus txib, kuv, Nifais, txais ib lo lus txib tias yuav tsum muab txoj kev qhuab qhia thiab tej yam uas yuav muaj los yav tom ntej, tej yam uas meej thiab muaj nuj nqis heev ntawm cov ntawd, sau rau saum cov phiaj no; thiab hais tias yuav tsum muab tej yam uas tau muab sau ceev tseg cia qhia rau kuv cov neeg, cov uas yuav tau nyob hauv thaj av, thiab rau lwm yam hom phiaj uas tseem ceeb, tej hom phiaj uas tus Tswv thiaj paub.

4 Yog li ntawd, kuv, Nifais, tau sau ib phau ceev xwm txheej rau saum lwm cov phiaj, uas qhia ib zaj, los yog qhia ntau dua txog tej kev ua rog thiab tej kev sib cav sib ceg thiab tej kev puas tsuaj ntawm kuv cov neeg. Thiab kuv tau ua li no, thiab tau txib kuv cov neeg kom lawv paub ua li cas tom qab kuv tau ncaim mus; thiab txib tias yuav tsum muab cov phiaj no cev los ntawm ib tiam mus rau ib tiam, los sis los ntawm ib tug yaj saub mus rau ib tug yaj saub, kom txog thaum tus Tswv muab dua ib co lus txib ntxiv.

5 Thiab tom qab no kuv mam qhia ib zaj txog qhov kuv ua cov phiaj no; thiab tom qab ntawd, saib seb, kuv mam ua raws li uas kuv tau hais; thiab kuv ua li no kom yuav ceev tau tej yam uas dawb ceev dua rau kuv cov neeg paub.

6 Txawm li ntawd los, kuv tsuas yog sau rau saum cov phiaj tej yam uas kuv xav tias dawb ceev xwb. Thiab nim no, yog tias kuv ua yuam kev, thaum ub lawv twb ua yuam kev ib yam; tsis yog tias kuv yuav zam rau kuv tus kheej vim yog lwm tus neeg, tiam sis yog vim txoj kev qaug zog uas nyob hauv kuv, raws li sab nqaij daim tawv, kuv thiaj thov zam rau kuv tus kheej.

7 Vim tej yam uas ib txhia neeg suav hais tias muaj nuj nqis heev, tsis hais rau sab cev nqaij daim tawv los sis rau sab ntsuj plig, lwm cov ho saib tej yam ntawd tsis muaj nqis thiab muab tsuj rau hauv lawv ko taw. Muaj tseeb tiag, twb yog cov neeg Ixayees tus Vajtswv kiag los neeg tseem muab tsuj ntiag rau hauv lawv ko taw; kuv hais tias, muab tsuj rau hauv lawv ko taw tiam sis kuv yuav hais lwm yam ntxiv—lawv saib nws tsis muaj nqis, thiab tsis mloog nws lub suab ntuas.

8 Thiab saib seb nws yuav los, raws nraim li tus tim tswv cov lus, rau pua xyoo tom qab kuv txiv ncaim Yeluxalees mus.

9 Thiab tej neeg ntiaj teb, vim yog lawv txoj kev ua phem, yuav txiav txim hais tias nws tsis muaj nuj nqis; yog li ntawd lawv thiaj muab nws nplawm, thiab nws ua siab ntev nyiaj; thiab lawv muab nws ntaus, thiab nws ua siab ntev nyiaj. Muaj tseeb tiag, lawv nto qaub ncaug rau nws, thiab nws ua siab ntev nyiaj, vim yog nws txoj kev hlub thiab nws txoj kev ua siab ntev rau noob neej.

10 Thiab tus Vajtswv ntawm peb cov poj koob yawm txwv, cov uas nws tau coj tawm ntawm teb chaws Iyiv, tawm ntawm txoj kev ua cev qhev, thiab nws tsom kwm lawv nyob rau hauv hav zoov, muaj tseeb tiag, Anplaham thiab Ixaj tus Vajtswv, thiab Yakhauj tus Vajtswv, cia nws tus kheej, raws li tus tim tswv cov lus, zoo li ib tug neeg, mus rau hauv cov neeg phem tes, raug coj mus tsa rau saud, raws li Xenoj cov lus, thiab raug coj mus ntsia rau saum ntoo khaub lig, raws li Niyos cov lus, thiab raug coj mus faus rau hauv ib lub ntxa, raws li Xenos cov lus, uas nws tau hais txog qhov uas yuav tsaus ntuj tau peb hnub, qhov uas yog ib lub cim ntawm nws txoj kev tuag muab rau cov neeg uas nyob hauv tej koog pov txwv hauv dej hiav txwv, qhov tseem ceeb dua ces yog ib lub cim muab rau cov uas yog tsev neeg Ixayees.

11 Vim tus yaj saub tau hais li no: Tus Tswv uas yog Vajtswv yeej yuav los xyuas tag nrho tsev neeg Ixayees nyob rau hnub ntawd, xyuas ib txhia nrog nws lub suab, vim yog lawv txoj kev ncaj ncees, ces lawv yuav xyiv fab heev thiab yuav txais txoj kev cawm seej, thiab xyuas lwm cov nrog suab xob quaj thiab nrog xob laim ntawm nws lub hwj chim, los ntawm cua daj cua dub, los ntawm hluav taws, thiab ntawm tej pa hluav taws, thiab tej pa kev tsaus ntuj, thiab los ntawm tej av tawg qhib, thiab los ntawm tej roob uas tus Tswv uas yog Vajtswv yuav tsa.

12 Thiab tus yaj saub Xenos tau hais tias, tag nrho tej no yeej yuav muaj los tiag. Thiab lub ntiaj teb tej pob zeb yuav tsum tawg; thiab vim lub ntiaj teb tej suab nroo, Vajtswv tus Ntsuj Plig yuav tshoov coob tus vaj ntxwv ntawm tej koog pov txwv hauv dej hiav txwv lub siab kom lawv qw hais tias: Ntiaj teb tus Vajtswv raug txom nyem.

13 Thiab tus yaj saub hais tias, rau cov neeg uas nyob hauv Yeluxalees, txhua leej txhua tus yuav nplawm lawv, vim lawv muab cov neeg Ixayees tus Vajtswv ntsia rau saum ntoo khaub lig, thiab tig lawv lub siab mus rau lwm sab, xyeej ntshis tej cim thiab tej txuj ci uas xav tsis thoob, thiab tsis ntseeg cov neeg Ixayees tus Vajtswv lub hwj chim thiab lub yeeb koob.

14 Thiab tus yaj saub hais tias, vim lawv tig lawv lub siab mus rau lwm sab, thiab lawv ntxub Ixayees tus Dawb Huv, lawv yuav ua loj leeb hauv lub neej no, thiab yuav piam sij, thiab yuav los ua ib zaj lus thuam thiab ib zaj lus kwv huam, thiab txhua txhia haiv neeg yuav ntxub lawv.

15 Txawm li ntawd los, tus yaj saub hais tias, thaum hnub ntawd los txog, yog lawv tsis tig lawv lub siab mus tawm tsam Ixayees tus Dawb Huv, thaum ntawd nws yuav nco txog tej kev khi lus uas nws tau khi rau lawv tej poj koob yawm txwv.

16 Muaj tseeb tiag, thaum ntawd nws yuav nco txog tej koog pov txwv uas nyob hauv dej hiav txwv; muaj tseeb tiag, tus Tswv hais tias, kuv yuav nco txog tag nrho cov uas yog tsev neeg Ixayees, kuv yuav sau nthwv lawv cov uas nyob plaub ceg kaum ntuj los ua ke, raws li tus yaj saub Xenos cov lus.

17 Muaj tseeb tiag, tus yaj saub hais tias, thiab tag nrho ntiaj teb yuav pom tus Tswv txoj kev cawm seej; txhua haiv neeg, txhua xeem neeg, txhua yam lus thiab txhua yam neeg yuav tau txais koob hmoov.

18 Thiab kuv, Nifais, tau sau tej yam no rau kuv cov neeg, xwv kom tej zaum kuv yuav yaum tau lawv kom lawv nco txog tus Tswv lawv tus Txhiv Dim.

19 Yog li ntawd, kuv hais rau tag nrho tsev neeg Ixayees, yog tias lawv yuav txais tej yam no.

20 Vim saib seb, kuv tau txais tej kev tshoov siab ntawm sab ntsuj plig, txog cov neeg uas nyob hauv Yeluxalees, ua rau kuv qaug zog heev uas kuv tej pob qij txha tsis muaj zog tas; yog tias tus Tswv tsis tau muaj lub siab hlub tshua, qhia tej yam ntsig txog lawv rau kuv, ib yam li nws tau qhia rau cov yaj saub thaum ub, ces ntshai kuv twb piam sij lawm thiab.

21 Thiab nws yeej tau qhia rau tej yaj saub thaum ub txog txhua txhia yam ntsig txog lawv; thiab nws kuj tau qhia rau ntau tus yaj saub ntsig txog peb; yog li ntawd, peb yeej yuav tsum paub ntsig txog lawv vim twb sau txhua txhia yam ntawd rau saum cov phiaj toog.

22 Nim no tau muaj tias kuv, Nifais, tau qhia tej yam no rau kuv cov kwv tij; thiab tau muaj tias kuv tau nyeem ntau yam rau lawv, tej uas tau muab sau rau saum cov phiaj toog, kom lawv paub txog tus Tswv tej hauj lwm uas nws ua nyob rau hauv lwm thaj av, nrog cov neeg thaum ub.

23 Thiab kuv tau nyeem rau lawv ntau yam uas tau muab sau rau hauv Mauxes cov ntawv; xwv kom kuv yuav muaj peev xwm dua yaum tau lawv los ntseeg tus Tswv lawv tus Txhiv Dim, kuv tau nyeem rau lawv tej uas tus yaj saub Yaxayas sau; vim kuv tau muab tag nrho tej vaj lug kub coj los piv rau peb, kom thiaj muaj nqis rau peb thiab kom peb kawm tau.

24 Yog li ntawd kuv hais rau lawv, hais tias: Nej cia li mloog tus yaj saub tej lus, nej cov uas yog cov neeg seem tshuav ntawm tsev neeg Ixayees, uas yog ib ceg uas tau ntshua mus; nej cia li mloog tus yaj saub tej lus, uas tau sau rau tag nrho tsev neeg Ixayees, thiab muab cov lus no piv rau nej tus kheej, kom nej thiaj yuav muaj chaw cia siab ib yam li nej cov kwv tij uas nej tau tawg ncaim mus; tus yaj saub tau sau ntawv hais li no.