1 Thiab hais dua tias: Cia li mloog, auj nej cov uas yog tsev neeg Ixayees, tag nrho nej cov uas tau ntshua tawm thiab raug ntiab tawm vim yog tej kev phem ntawm cov uas saib xyuas kuv cov neeg; muaj tseeb tiag, tag nrho nej cov uas tau ntshua tawm, uas tau tawg khiav ri niab mus nyob qhov txhia chaw, cov uas yog kuv tsev neeg, auj cov neeg Ixayees. Auj cov neeg uas nyob rau tej koog pov txwv, cia li mloog kuv hais, thiab nej sawv daws cov uas nyob deb cia li mloog thiab; tus Tswv tau xaiv kuv thaum tseem nyob hauv plab; txij thaum kuv nyob hauv kuv niam lub plab los nws twb tau muab kuv lub npe hais tawm.

2 Thiab nws tau ua rau kuv lub qhov ncauj zoo li ib rab ntaj ntse ntse; nws tau muab kuv zais rau hauv tus duab ntxoo hauv nws txhais tes, thiab nws muab kuv ua ib xib xub uas ci nplas; nws tau muab kuv zais rau hauv nws lub hnab ntim xub;

3 Thiab hais rau kuv tias: Nej yog kuv cov tub qhe, auj cov neeg Ixayees, cov uas yuav muab yeeb koob rau kuv.

4 Ces kuv hais tias, kuv tau ua hauj lwm tsis muaj nuj nqis, kuv tau siv kuv lub dag zog rau tej yam uas tsis tseem ceeb thiab tsis muaj nuj nqis; kuv txoj kev txiav txim yog nyob ntawm tus Tswv, thiab kuv txoj hauj lwm yog nrog kuv tus Vajtswv.

5 Thiab nim no, tus Tswv hais tias—tus uas xeeb kuv nyob hauv plab los kom kuv los ua nws tus tub qhe, los coj cov Neeg Yakhauj rov qab mus cuag nws—txawm hais tias cov neeg Ixayees tsis tau sib sau los, kuv tseem yuav muaj yeeb koob ci ntsa iab rau ntawm tus Tswv lub qhov muag, thiab kuv tus Vajtswv yuav yog kuv lub dag zog.

6 Thiab nws hais tias: Yog ib yam tsis tseem ceeb uas koj yuav los ua kuv tus tub qhe los tsa Yakhauj tej xeem neeg, thiab los txum tim cov uas tus Tswv ceev tseg ntawm Ixayees. Kuv kuj yuav siv koj ua ib lub teeb rau Lwm Haiv Neeg, kom koj yuav ua tau kuv txoj kev cawm seej mus thoob plaws lub ntiaj teb.

7 Tus Tswv, cov neeg Ixayees tus Txhiv Dim, nws Tus Dawb Huv, tau hais li no rau tus uas neeg saib tsis taus, rau tus uas tej haiv neeg ntxub, rau tus tub qhe ntawm cov kav teb kav chaw: Tej vaj ntxwv yuav pom thiab yuav sawv ntsug, tej tub huab tais los yuav teev tiam, vim yog tus Tswv uas ncaj tsis tu tsis tseg.

8 Tus Tswv hais li no: Thaum lub sij hawm zoo kuv twb tau hnov nej, auj cov neeg nyob hauv tej koog pov txwv ntawm cov dej hiav txwv, thiab thaum txog hnub cawm seej kuv twb tau pab nej; thiab kuv yuav tsom kwm nej sawv daws, thiab kuv yuav xa kuv tus tub qhe los rau txoj kev khi lus tseg ntawm cov neeg, los npaj thaj av, kom txais tau tej teb chaws uas tsis muaj neeg nyob ua nej tug;

9 Kom koj yuav hais rau cov neeg uas raug kaw tias: Cia li tawm mus; hais rau cov uas zaum hauv txoj kev tsaus ntuj tias: Nej cia li tawm los. Lawv yuav noj rau tom tej kev, thiab lawv tej nras zaub yuav nyob puag saum txhua qhov chaw siab.

10 Lawv yuav tsis tshaib tsis nqhis, thiab tej hluav taws los sis lub hnub yuav tsis kub lawv; vim tus uas hlub tshua lawv yuav coj lawv kev, nws twb yuav coj lawv los ntawm tej qhov dej txhawv.

11 Thiab kuv yuav muab kuv tej roob huv si ua ib txoj kev, thiab kuv tej kev loj yuav raug rhawv kom siab.

12 Thiab tom qab ntawd ces, auj tsev neeg Ixayees, saib seb, tej no yuav tuaj deb deb tuaj; thiab xyuas seb, tej no tuaj qaum teb thiab sab hnub poob tuaj; thiab tej no tuaj tim lub teb chaws Xinis tuaj.

13 Cia li hu nkauj, auj lub ntuj; thiab cia li xyiv fab, auj lub ntiaj teb; vim yuav txhawb cov neeg uas nyob rau sab hnub tuaj txhais ko taw; thiab cia li tsa suab hu nkauj, auj tej roob; vim lawv yuav tsis raug nplawm ntxiv; vim tus Tswv tau nplij nws cov neeg lub siab, thiab yuav muaj txoj kev hlub tshua rau nws cov neeg uas raug kev txom nyem.

14 Tiam sis, saib seb, Xi-oos tau hais tias: Tus Tswv tau tso kuv tseg, thiab kuv tus Tswv tau hnov qab txog kuv—tiam sis nws yuav qhia hais tias nws tsis tau ua li ntawd.

15 Vim ib tug poj niam puas yuav muaj cuab kav hnov qab tau nws tus me nyuam uas tseem noj nws mis, hais tias nws tsis muaj kev khuv leej rau tus tub uas nws yug? Muaj tseeb tiag, tej zaum lawv yuav hnov qab tau, tiam sis kuv yeej yuav tsis hnov qab nej li, auj tsev neeg Ixayees.

16 Saib seb, kuv tau muab nej txaug rau hauv kuv tej xib teg; kuv yeej saib ntsoov nej tej ntsa loog.

17 Nej cov me nyuam yuav kov yeej nej cov yeeb ncuab; thiab lawv cov uas saib tsis taus nej yuav raug tawm ntawm nej mus.

18 Cia li tsa nej tej qhov muag ntsia ib puag ncig thiab saib seb; txhua txhia leej no sib sau los ua ke, thiab lawv yuav los rau nej. Thiab ib yam li kuv muaj txoj sia nyob, tus Tswv hais tias, lawv sawv daws yeej yuav los koom nyob ua pab ua pawg ib yam li tus nkauj nyab hnav tej tsuj tej npuag ua npaim ua npus.

19 Vim nej tej chaw uas raug puas tsuaj thiab tej chaw uas tsuag tas lawm, thiab nej tej liaj tej teb uas raug puas tsuaj, nim no yuav nqaim heev li vim yuav muaj neeg coob heev los nyob; thiab lawv cov uas tau muab nej nqos yuav nyob deb deb.

20 Tej me nyuam uas nej yuav muaj, tom qab nej tau ua thawj tug poob lawm, yuav hais dua rau nej tej pob ntseg tias: Qhov chaw no nqaim heev rau kuv; muab chaw rau kuv kom kuv thiaj tau nyob.

21 Ces nej yuav hais nyob hauv nej lub siab hais tias: Leej twg yug cov me nyuam no rau kuv, vim rau qhov kuv tau ua kuv cov me nyuam poob, thiab yuav tsis yug ib co ntxiv, thiab yog ib tug neeg raug txim, thiab yog ib tug neeg uas mus rau ub rau no? Thiab leej twg tau coj cov no los? Saib seb, kuv nyob tib leeg xwb; cov no, lawv mus qhov twg los?

22 Tus Tswv uas yog Vajtswv tau hais li no hais tias: Saib seb, kuv yuav tsa kuv txhais tes mus rau Lwm Haiv Neeg, thiab tsa kuv tus chij rau tej neeg; thiab lawv yuav coj nej cov tub hauv lawv txhais caj npab los, thiab lawv yuav ev nej cov ntxhais saum lawv lub xub pwg los.

23 Thiab tej vaj ntxwv yuav ua nej txiv qhuav tu yug nej, thiab lawv tej niam vaj ntxwv yuav ua nej niam qhuav tu yug nej; lawv yuav nyo taub hau mus rau hauv av pe nej, thiab yaim tej plua tshauv ntawm nej tej ko taw; thiab nej yuav paub tias kuv yog tus Tswv; vim lawv cov uas tos ntsoov kuv yuav tsis txaj muag li.

24 Vim tus tsiaj puas yuav raug muab txeeb tawm ntawm tus uas muaj zog mus, los sis puas yuav muab tej neeg raug txim raws kev cai tso kom dim?

25 Tiam sis tus Tswv hais li no tias, cov neeg raug txim ntawm tej neeg muaj hwj chim los kuj yuav raug coj mus thiab, thiab tus tsiaj uas raug tus phem heev txhom los yeej yuav raug muab tso kom dim; vim kuv yuav tawm tsam tus uas tawm tsam nej, thiab kuv yuav cawm nej tej me nyuam.

26 Thiab kuv yuav muab lawv cov uas ua nruj ua tsiv rau nej tej nqaij rov qab yug lawv; lawv yuav rov qab qaug rau lawv cov ntshav li qaug cawv txiv hmab qab zib; thiab txhua tus tib neeg yuav paub tias kuv, tus uas yog tus Tswv, yog nej tus Cawm Seej thiab nej tus Txhiv Dim, tus Muaj Hwj Chim ntawm Yakhauj.