1 Thiab tau muaj tias peb tau rov qab mus rau hauv roob moj sab qhua; thiab peb tau mus rau sab hnub tuaj txij li lub sij hawm ntawd mus. Thiab peb tau mus thiab ntsib ntau yam kev txom nyem nyob hauv roob moj sab qhua; thiab peb cov poj niam tau yug me nyuam nyob hauv roob moj sab qhua.

2 Thiab tus Tswv tau foom koob hmoov ntau kawg nkaus rau peb, kom thaum peb noj nqaij nyoos nyob hauv roob moj sab qhua xwb, peb cov poj niam tseem muaj mis txaus rau lawv cov me nyuam noj thiab, thiab lawv muaj zog, muaj tseeb tiag, ib yam li cov txiv neej; thiab lawv pib uv taus lawv tej kev tsiv tsis yws lawm.

3 Thiab yog li no peb pom tias yeej yuav tsum muaj raws li Vajtswv tej lus txib. Thiab yog hais tias noob neej ua raws li Vajtswv tej lus txib, nws yuav pub lawv noj, thiab txhawb lawv lub dag zog, thiab npaj kev kom lawv ua tau tiav tej yam uas nws tau txib lawv ua; yog li ntawd, nws thiaj tau npaj kev rau peb thaum peb tseem nyob hauv roob moj sab qhua.

4 Thiab peb nyob tau ntau xyoo, muaj tseeb tiag, twb nyob tau yim xyoo rau hauv roob moj sab qhua.

5 Thiab peb tau los txog thaj av uas peb hu ua Huaj Vam, vim qhov ntawd muaj txiv hmab txiv ntoo ntau thiab kuj muaj zib ntab qus; thiab txhua yam no yog tus Tswv tau npaj los xwv kom peb txhob piam sij. Thiab peb tau pom dej hiav txwv, cov uas peb hu ua Ile-atus, uas txhais hais tias, cov dej hiav txwv.

6 Thiab tau muaj tias peb tau tsa peb cov tsev pheeb suab ntaub rau ntawm ntug dej hiav txwv; thiab txawm hais tias peb tau raug ntau yam kev txom nyem thiab ntau yam kev nyuaj, muaj tseeb tiag, twb muaj ntau kawg nkaus uas peb sau tsis tas, los peb tseem zoo siab kawg nkaus thaum peb los txog ntawm ntug dej hiav txwv; thiab peb muab qhov chaw ntawd hu ua Huaj Vam, vim rau qhov muaj txiv hmab txiv ntoo ntau heev.

7 Thiab tau muaj tias tom qab kuv, Nifais, los nyob hauv thaj av Huaj Vam tau ntau hnub, tus Tswv lub suab los hais rau kuv hais tias: Sawv thiab koj cia li mus rau pem roob. Thiab tau muaj tias kuv sawv thiab mus rau pem roob, thiab thov tus Tswv.

8 Thiab tau muaj tias tus Tswv hais rau kuv, hais tias: Koj yuav tsum txua ib lub nkoj, raws li txoj kev uas kuv yuav qhia rau koj, xwv kom kuv yuav thauj tau koj cov neeg hla cov dej no.

9 Thiab kuv hais tias: Tus tswv, kuv yuav mus nrhiav hlau qhov twg coj los nchuav, es kuv thiaj yuav ua tau tej twj tes los txua lub nkoj raws li txoj kev uas koj tau qhia rau kuv?

10 Thiab tau muaj tias tus Tswv qhia rau kuv qhov chaw uas kuv yuav mus nrhiav tau hlau, xwv kom kuv yuav ua tau tej twj tes.

11 Thiab tau muaj tias kuv, Nifais, xuas tawv tsiaj qus los ua tau ib lub foob xab tshuab hluav taws; thiab tom qab kuv ua tau lub foob xab, xwv kom kuv muaj ib yam coj los tshuab hluav taws, kuv tau txhuam ob lub pob zeb ua ke xwv kom kuv ua tau hluav taws.

12 Vim ua ntej no tus Tswv tsis cia peb rauv taws ntau, thaum peb tsiv nyob hauv roob moj sab qhua; vim nws hais tias: Kuv yuav ua kom nej cov nqaij noj qab zib, kom nej tsis tas muab ua kom siav;

13 Thiab kuv kuj yuav ua nej lub teeb nyob hauv roob moj sab qhua; thiab kuv yuav npaj txoj hau kev ua nej ntej, yog hais tias nej ua raws li kuv tej lus txib; yog li ntawd, npaum li uas nej ua raws li kuv tej lus txib ces yuav coj nej mus rau thaj av uas cog lus cia; thiab nej yuav paub tias kuv yog tus uas coj nej.

14 Muaj tseeb tiag, tus Tswv kuj hais thiab hais tias: Tom qab nej mus txog thaj av uas cog lus cia, nej yuav paub tias kuv, tus uas yog tus Tswv, yog Vajtswv; thiab hais tias kuv, tus uas yog tus Tswv, tau cawm nej dim ntawm txoj kev puas tsuaj; muaj tseeb tiag, hais tias kuv tau coj nej tawm ntawm thaj av Yeluxalees.

15 Yog li ntawd, kuv, Nifais tau sib zog ua raws li tus Tswv tej lus txib, thiab kuv tau ntuas kuv cov tij laug kom rau siab ntso thiab muaj kev ntseeg.

16 Thiab tau muaj tias kuv xuas cov hlau uas kuv tau nchuav tawm ntawm tej pob zeb los ua tej twj tes.

17 Thiab thaum kuv ob tug tij laug pom tias kuv tab tom npaj txua ib lub nkoj, nkawd pib yws yws tawm tsam kuv, hais tias: Wb tus kwv yog ib tug neeg ruam, vim nws xav tias nws muaj peev xwm txua tau ib lub nkoj, muaj tseeb tiag, thiab nws kuj xav tias nws muaj peev xwm hla tau cov dej loj no.

18 Thiab kuv ob tug tij laug tau yws tawm tsam kuv li no, thiab nkawd tsis xav pab ua hauj lwm, vim nkawd tsis ntseeg tias kuv muaj peev xwm txua tau ib lub nkoj; thiab nkawd kuj tsis ntseeg tias tus Tswv qhia kuv ua.

19 Thiab nim no tau muaj tias kuv, Nifais, tu siab heev vim yog nkawd tej kev siab tawv; thiab nim no thaum nkawd pom tias kuv pib tu siab nkawd txawm zoo siab, npaum li uas nkawd thuam kuv, hais tias: Wb paub tias koj txua tsis tau ib lub nkoj, vim wb paub tias koj tsis muaj tswv yim; yog li ntawd koj yeej ua tsis tau ib txoj hauj lwm tseem ceeb npaum li ntawd.

20 Thiab koj zoo nkaus li peb txiv, raug coj mus raws li tej zeem muag ruam ntsuav ntawm nws lub siab; muaj tseeb tiag, nws tau coj peb tawm ntawm thaj av Yeluxalees, thiab peb tau ua loj leeb nyob hauv roob moj sab qhua tau ntau xyoo li no; thiab peb cov poj niam tau ua hauj lwm hnyav heev, thaum xeeb me nyuam es plab loj; thiab lawv tau yug me nyuam nyob hauv roob moj sab qhua thiab raug txhua yam mob, tsuas yog tsis tuag xwb; thiab yuav zoo dua yog tias lawv tau tuag ua ntej lawv khiav tawm hauv Yeluxalees tuaj raug tej kev txom nyem no.

21 Saib seb, peb tau txom nyem ntau xyoo npaum li no nyob hauv roob moj sab qhua, yog peb txhob tuaj ntshai lub sij hawm ntawd peb twb tau zoo nyob hauv thaj av uas yog peb qub txeeg qub teg thiab tau zoo siv tej khoom uas peb muaj; muaj tseeb tiag, thiab ntshai peb twb muaj kev zoo siab.

22 Thiab peb paub tias cov neeg uas nyob hauv thaj av Yeluxalees yog ib co neeg ncaj ncees; vim lawv coj tus Tswv tej kev cai thiab kev txiav txim, thiab tag nrho nws tej lus txib, raws li Mauxes txoj kev cai; yog li ntawd, peb paub tias lawv yog ib co neeg ncaj ncees; thiab peb txiv tau txiav txim rau lawv, thiab tau coj peb tawm khiav vim tias peb pheej mloog nws tej lus; muaj tseeb tiag, thiab peb tus kwv los zoo ib yam li nws. Thiab kuv ob tug tij laug tau siv cov lus zoo li no yws yws thiab nkaug tawm tsam wb.

23 Thiab tau muaj tias kuv, Nifais, hais rau nkawd, hais tias: Neb puas ntseeg tias peb cov yawg koob, cov uas yog cov neeg Ixayees, puas yuav raug coj tawm ntawm cov neeg Iyiv tes yog tias lawv tsis mloog tus Tswv tej lus?

24 Muaj tseeb tiag, neb puas xav tias yuav coj tau lawv tawm ntawm kev ua cev qhev, yog hais tias tus Tswv tsis tau txib Mauxes kom nws coj lawv tawm ntawm kev ua cev qhev?

25 Nim no neb paub tias cov neeg Ixayees tau raug ua cev qhev; thiab neb paub tias lawv raug yuam ua hauj lwm, tej hauj lwm uas hnyav heev; yog li ntawd, neb paub tias yeej yog ib qho zoo rau lawv, uas coj lawv tawm ntawm kev ua cev qhev.

26 Nim no neb paub tias tus Tswv tau txib kom Mauxes ua txoj hauj lwm tseem ceeb ntawd; thiab neb paub tias los ntawm nws cov lus cov dej ntawm tus Dej Hiav Txwv Liab tau faib rau sab ped thiab sab nrad, thiab lawv tau hla dhau mus saum av qhuav.

27 Tiam sis neb paub tias cov neeg Iyiv tau poob dej tuag rau hauv tus Dej Hiav Txwv Liab, cov uas yog Falaus cov tub rog.

28 Thiab neb kuj paub tias tus Tswv tau muab manas rau lawv noj nyob hauv roob moj sab qhua.

29 Muaj tseeb tiag, thiab neb kuj paub tias Mauxes, los ntawm nws cov lus raws li Vajtswv lub hwj chim uas muaj nyob hauv nws, tau tsoo lub pob zeb, ces dej txhawv tawm los, xwv kom cov neeg Ixayees tau haus daws lawv txoj kev nqhis dej.

30 Thiab txawm hais tias tus Tswv lawv tus Vajtswv, lawv tus Txhiv Dim, tau coj lawv, mus ua lawv ntej, coj lawv mus thaum nruab hnub, thiab ua lub teeb ci rau lawv thaum hmo ntuj, thiab ua txhua yam rau lawv uas tsim nyog rau neeg tau txais los, lawv tseem ua lawv lub siab tawv qhawv thiab npog lawv lub cim xeeb, thiab cem Mauxes thiab cem Vajtswv tus uas tseeb thiab muaj txoj sia nyob.

31 Thiab tau muaj tias raws li nws txoj lus nws tau ua rau lawv puas tsuaj; thiab raws li nws txoj lus nws tau coj lawv; thiab raws li nws txoj lus nws tau ua txhua yam pab lawv; thiab tsis tau ua ib yam dab tsi hlo li tsuas yog ua los ntawm nws txoj lus xwb.

32 Thiab tom qab lawv tau hla tus dej Yauladees nws tau ua rau lawv muaj zog kom lawv thiaj ntiab tau cov neeg ntawm lub teb chaws ntawd tawm mus, muaj tseeb tiag, ua kom lawv tawg khiav ri niab rau txoj kev puas tsuaj.

33 Thiab nim no, neb puas xav tias cov neeg uas nyob ntawm lub teb chaws ntawd, cov uas nyob hauv thaj av uas cog lus cia, cov uas peb cov poj koob yawm txwv tau ntiab tawm, neb puas xav tias lawv yog neeg ncaj ncees? Saib seb, kuv hais rau neb tias, lawv tsis yog.

34 Neb puas xav tias peb cov poj koob yawm txwv tseem ceeb dua lawv yog hais tias lawv yog neeg ncaj ncees? Kuv hais rau neb tias, tsis yog.

35 Saib seb, tus Tswv saib txhua tus tib neeg muaj nqis ib yam; tus uas ncaj ncees yog tus uas Vajtswv nyiam. Tiam sis saib seb, cov neeg no tau xyeej Vajtswv txhua lo lus, thiab lawv txoj kev ua phem siav lawm; thiab Vajtswv txoj kev npau taws tag nrho huv si tau nyob rau saum lawv; thiab tus Tswv tau foom tsis zoo rau thaj av ntawd tawm tsam lawv, thiab foom koob hmoov rau thaj av rau peb cov poj koob yawm txwv; muaj tseeb tiag, nws tau foom tsis zoo rau thaj av ntawd tawm tsam lawv kom lawv puas tsuaj, thiab nws tau foom koob hmoov rau thaj av rau peb cov poj koob yawm txwv kom lawv muaj hwj chim los kav thaj av.

36 Saib seb, tus Tswv tau tsim lub ntiaj teb xwv kom tib neeg thiaj tau nyob; thiab nws tau tsim nws cov me nyuam xwv kom lawv thiaj tau lub ntiaj teb ua lawv tug.

37 Thiab nws tsa ib haiv neeg ncaj ncees, thiab ua kom tej haiv neeg phem puas tsuaj mus.

38 Thiab nws coj cov neeg ncaj ncees mus rau hauv tej thaj av uas muaj nqis, thiab nws ua kom cov neeg phem puas tsuaj, thiab foom tsis zoo rau thaj av rau lawv vim lawv txoj kev phem.

39 Nws kav nyob siab puag saum ntuj, vim qhov ntawd yog nws lub rooj theej kiab, thiab lub ntiaj teb no yog nws lub rooj tiag taw.

40 Thiab nws hlub cov uas xav tau nws los ua lawv tus Vajtswv. Saib seb, nws hlub peb cov poj koob yawm txwv, thiab nws khi lus rau lawv, muaj tseeb tiag, twb tau khi lus rau Anplaham, Ixaj, thiab Yakhauj; thiab nws nco ntsoov cov lus uas nws tau khi tseg; yog li ntawd, nws thiaj tau coj lawv tawm ntawm lub teb chaws Iyiv.

41 Thiab nws tau muab nws rab nplawm qhuab lawv nyob rau tom roob moj sab qhua; vim lawv ua lawv lub siab tawv qhawv, tib yam li neb; thiab tus Tswv qhuab lawv vim lawv txoj kev ua phem. Nws tso cov nab ya uas tsiv tsaim tuaj rau lawv; thiab tom qab lawv raug nab tom nws npaj tau ib txoj kev los kho kom lawv zoo; thiab txoj hauj lwm kom lawv ua yog muab lub qhov muag los ntsia xwb; thiab vim txoj kev ntawd yooj yim, los sis vim txoj kev ntawd tsis nyuaj, muaj coob leej tau piam sij.

42 Thiab lawv tau ua lawv lub siab tawv ib lub sij hawm rau ib lub sij hawm, thiab lawv tau cem Mauxes, thiab cem Vajtswv thiab; tiam sis, neb paub tias Vajtswv lub hwj chim uas loj tshaj txhua yam, tau coj lawv tawm mus rau hauv thaj av uas cog lus cia.

43 Thiab nim no, tom qab txhua yam no, lub sij hawm twb los txog uas lawv tau hloov los ua ib co neeg phem, muaj tseeb tiag, yuav luag siav lawm; thiab kuv xav tias niaj hnub nim no lawv twb yuav raug puas tsuaj mus; vim kuv paub tias hnub ntawd yeej yuav los tiag kom lawv yuav tsum raug puas tsuaj, tsuas tshuav ob peb leeg xwb, cov uas yuav raug coj mus poob cev qhev.

44 Yog li ntawd, tus Tswv txib kom kuv txiv khiav tawm mus rau hauv roob moj sab qhua; thiab cov Neeg Yudais kuj tau nrhiav kev muab nws txoj sia txo pov tseg, muaj tseeb tiag, thiab neb los kuj tau nrhiav kev muab nws txoj sia txo pov tseg; yog li ntawd, neb yog neeg tua neeg nyob hauv neb ob lub siab thiab neb zoo li lawv.

45 Neb nrawm kawg mus ua phem tiam sis qeeb heev nco txog tus Tswv neb tus Vajtswv. Neb twb tau pom ib tug tim tswv, thiab nws hais lus rau neb; muaj tseeb tiag, tej lub sij hawm neb tau hnov nws lub suab; thiab nws tau maj mam ua suab yau yau hais lus rau neb, tiam sis neb lub siab tsis xeev li, es neb thiaj hnov tsis tau nws cov lus; yog li ntawd, nws tau hais lus rau neb zoo li suab xob quaj, uas tau ua rau tej av qeeg zoo nkaus li yuav faib hlo ua ob sab.

46 Thiab neb kuj paub hais tias los ntawm lub hwj chim ntawm nws txoj lus uas muaj hwj chim tag nrho nws ua tau rau lub ntiaj teb no dhau mus; muaj tseeb tiag, thiab neb paub tias los ntawm nws txoj lus nws ua tau rau tej chaw siab kom tiaj qis, thiab tej chaw tiaj tus kom tawg ntsoog ntxaws. Au, yog li ntawd, vim li cas, neb lub siab thiaj yuav tawv ua luaj?

47 Saib seb, kuv lub siab tawg tag nrog kev ntxhov siab los vim yog neb, thiab mob kuv lub siab; kuv ntshai nyob tsam neb raug muab tso pov tseg mus ib txhis li. Saib seb, kuv muaj Vajtswv tus Ntsuj Plig puv npo, ua rau kuv lub cev thiaj tsis muaj zog.

48 Thiab nim no tau muaj tias thaum kuv tau hais cov lus no, nkawd npau taws rau kuv, thiab xav muab kuv pov rau hauv qab thu dej hiav txwv tob; thiab thaum nkawd tab tom yuav los xuas tes nthos kuv, kuv hais rau nkawd, hais tias: Los ntawm tus Vajtswv uas Muaj Hwj Chim Tag Nrho lub npe, kuv txib kom neb tsis txhob kov kuv, vim kuv muaj Vajtswv lub hwj chim puv npo, twb ua rau kuv lub cev kub lug; thiab yog leej twg tsa nws txhais tes rau kuv nws yuav qhuav ib yam li ib tug xyoob rawm qhuav; thiab tus ntawd yuav zoo li tsis muaj dab tsi rau Vajtswv lub hwj chim, vim Vajtswv yuav ua kom nws puas tsuaj.

49 Thiab tau muaj tias kuv, Nifais, tau hais rau nkawd tias kom nkawd tsis txhob yws yws tawm tsam nkawd txiv ntxiv lawm; thiab kom nkawd tsis txhob xyeej pab kuv ua hauj lwm, vim Vajtswv tau txib kom kuv txua ib lub nkoj.

50 Thiab kuv hais rau nkawd tias: Yog Vajtswv tau txib kom kuv ua txhua yam kuv yeej yuav ua tau. Yog tias nws txib kom kuv hais rau cov dej no tias, cia li ua av, ces cov dej no yuav ua av; thiab yog tias kuv hais li ntawd, ces yuav ua li ntawd tiag.

51 Thiab nim no, yog hais tias tus Tswv muaj hwj chim loj npaum li ntawd, thiab tau ua ntau yam txuj ci tseem ceeb rau noob neej, ua li cas nws thiaj yuav tsis muaj peev xwm qhia tau kuv, kom kuv txua tau ib lub nkoj?

52 Thiab tau muaj tias kuv, Nifais, tau hais ntau yam rau kuv ob tug tij laug, nkawd thiaj tsis paub hais kuv thiab tsis muaj peev xwm tawm tsam kuv; thiab nkawd kuj tsis muaj cuab kav muab nkawd tej tes nthos kuv los sis muab nkawd tej ntiv tes kov kuv, twb tau ntau hnub. Nim no nkawd tsis muaj cuab kav ua li no ntshai nyob tsam nkawd yuav qhuav ntawm kuv xub ntiag, vim Vajtswv tus Ntsuj Plig muaj hwj chim loj heev li; thiab nws tau ua qhia rau nkawd zoo li no.

53 Thiab tau muaj tias tus Tswv hais rau kuv tias: Rov qab xyab koj txhais tes dua mus rau koj ob tug tij laug, thiab nkawd yuav tsis qhuav ntawm koj xub ntiag, tiam sis kuv yuav ua kom nkawd ceeb nkaus, tus Tswv hais li, thiab kuv yuav ua li no, xwv kom nkawd thiaj paub tias kuv yog tus Tswv nkawd tus Vajtswv.

54 Thiab tau muaj tias kuv xyab kuv txhais tes mus rau kuv ob tug tij laug, thiab nkawd tsis qhuav ntawm kuv xub ntiag; tiam sis tus Tswv tau ua rau nkawd tshee hnyo, twb yog raws li cov lus uas nws tau hais.

55 Thiab nim no, nkawd tau hais tias: Wb paub tseeb tseeb lawm hais tias tus Tswv nrog koj nyob, vim wb paub tias yog tus Tswv lub hwj chim uas tau ua rau wb tshee hnyo. Thiab nkawd qhau caug ntua ntawm kuv xub ntiag, thiab twb yuav luag pe kuv, tiam sis kuv tsis kheev nkawd ua li, hais tias: Kuv yog neb tus kwv, muaj tseeb tiag, twb yog neb tus kwv yau; yog li ntawd, cia li teev tiam tus Tswv neb tus Vajtswv, thiab hwm neb txiv thiab neb niam, es neb thiaj muaj sia nyob ntev hauv thaj av uas tus Tswv neb tus Vajtswv yuav muab pub rau neb.