1 Thiab nim no kuv, Nifais, rov sau ntxiv ib zaj rau saum cov phiaj no txog tej yam uas kuv tau ua, thiab txog kuv txoj kev kav teb kav chaw thiab txoj kev qhuab qhia; yog li ntawd, ua ntej yuav sau txog kuv zaj ntxiv, kuv yuav tsum hais me ntsis txog tej yam uas kuv txiv ua, thiab txog kuv cov tij laug.

2 Vim saib seb, tau muaj tias tom qab kuv txiv tau hais tej lus ntawm nws zaj npau suav tiav, thiab ntuas nkawd kom nkawd rau siab ntso rau txhua yam, nws hais rau nkawd txog cov Neeg Yudais—

3 Hais tias tom qab lawv raug puas tsuaj tas, cov nyob rau hauv lub tuam nroog Yeluxalees, thiab coob leej raug txhom cab mus rau hauv Npanpiloos, raws li lub caij nyoog uas tus Tswv pom zoo, lawv yuav rov qab los dua, muaj tseeb tiag, tus Tswv yeej yuav coj lawv coj rov qab tawm ntawm txoj kev poob cev qhev; thiab tom qab tus Tswv coj lawv rov qab tawm ntawm txoj kev poob cev qhev ces lawv yuav rov qab tau thaj av uas yog lawv qub txeeg qub teg dua.

4 Muaj tseeb tiag, twb yog rau pua xyoo txij thaum kuv txiv tau ncaim Yeluxalees, tus Tswv uas yog Vajtswv yuav tsa ib tug yaj saub sawv hauv cov Neeg Yudais los—twb yog ib tug Mexiyas, los yog hais tias, yog neeg ntiaj teb ib tug Cawm Seej.

5 Thiab nws kuj tau hais txog cov yaj saub, muaj coob leej ntau tus kawg uas tau ua tim khawv txog tej yam no, hais txog tus Mexiyas no, tus uas nws tau hais txog, los sis neeg ntiaj teb tus Txhiv Dim no.

6 Yog li ntawd, tib neeg sawv daws yuam kev thiab poob rau kev txhaum, thiab yuav zoo li ntawd mus ib txhis li tsuas yog lawv yuav vam khom rau tus Txhiv Dim no nkaus xwb.

7 Thiab nws kuj tau hais txog ib tug yaj saub tus uas yuav los ua ntej tus Mexiyas, los npaj tus Tswv txoj kev—

8 Muaj tseeb tiag, nws twb yuav mus rau tom roob moj sab qhua thiab tshaj tawm hais tias: Nej cia li npaj tus Tswv txoj kev, thiab kho nws txoj kev kom ncaj; vim muaj ib tug nrog nej sawv ua ke uas nej twb tsis paub nws; thiab nws muaj hwj chim loj dua kuv, nws txoj hlua khau xwb los kuv twb tsis tsim nyog daws. Thiab kuv txiv hais ntau yam txog qhov no.

9 Thiab kuv txiv tau hais tias nws yuav ua kev cai raus dej nyob rau hauv lub zos Npethanpalas, hauv tus dej Yauladees; thiab kuv txiv kuj hais tias nws yuav muab neeg ua kev cai raus dej; nws twb yuav muab tus Mexiyas ua kev cai raus dej.

10 Thiab tom qab nws tau muab tus Mexiyas ua kev cai raus dej, nws yuav paub thiab ua tim khawv hais tias nws tau muab Vajtswv tus Me Nyuam Yaj ua kev cai raus dej, tus uas yuav los tshem neeg ntiaj teb tej kev txhaum.

11 Thiab tau muaj tias tom qab kuv txiv tau hais cov lus no nws hais rau kuv cov tij laug txog txoj moo zoo uas yuav muab tshaj tawm rau cov Neeg Yudais, thiab nws kuj tau hais txog cov Neeg Yudais txoj kev tso kev ntseeg tseg zuj zus. Thiab tom qab lawv muab tus Mexiyas tua, tus uas tseem yuav los, thiab tom qab nws raug tua tuag nws yuav sawv hauv qhov tuag rov qab los, thiab nws yuav ua nws tus kheej tshwm sim los rau Lwm Haiv Neeg, los ntawm tus Vaj Ntsuj Plig Dawb Huv.

12 Muaj tseeb tiag, kuv txiv twb tau hais ntau yam txog Lwm Haiv Neeg, thiab kuj tau hais txog tsev neeg Ixayees tias, yuav muab lawv piv rau ib tsob ntoo txiv roj, uas tej ceg yuav lov thiab yuav tawg khiav ri niab mus thoob plaws hauv lub ntiaj teb.

13 Yog li ntawd, nws tau hais tias yeej yuav tsum muaj tias tus Tswv yuav coj peb ua ke mus rau hauv thaj av uas cog lus cia, kom yuav muaj raws li tus Tswv txoj lus, hais tias peb yuav tawg khiav ri niab mus thoob plaws hauv lub ntiaj teb.

14 Thiab tom qab tsev neeg Ixayees tau tawg khiav ri niab tus Tswv yuav sau lawv los ua ke dua; los sis; lub ntsiab yog li no hais tias, tom qab Lwm Haiv Neeg tau txais qhov txhij txhua ntawm Txoj Moo Zoo, ces yuav muab tej ceg ntoo txiv roj nyeg, los sis cov uas seem tshuav nyob hauv tsev neeg Ixayees, coj los txuas rau, los sis los paub txog tus Mexiyas tseeb, lawv tus Tswv thiab lawv tus Txhiv Dim.

15 Thiab kuv txiv tau qhia txog tej yuav muaj los yav tom ntej thiab tau hais rau kuv cov tij laug zoo li no, thiab ntau yam ntxiv uas kuv tsis sau rau hauv phau ntawv no; vim kuv tau sau tej no ntau npaum li uas kuv pom zoo nyob rau hauv lwm phau ntawv.

16 Thiab txhua yam no, uas kuv tau hais, tau tshwm sim thaum kuv txiv nyob hauv ib lub tsev pheeb suab ntaub, nyob rau hauv lub hav Lemu-ees.

17 Thiab tau muaj tias tom qab kuv, Nifais, tau hnov tag nrho kuv txiv tej lus, ntsig txog tej yam uas nws tau pom nyob rau hauv ib txoj kev ua yog toog, thiab tej uas nws tau hais los ntawm tus Vaj Ntsuj Plig Dawb Huv lub hwj chim, lub hwj chim uas nws tau txais los ntawm txoj kev ntseeg Vajtswv Leej Tub—thiab Vajtswv Leej Tub yog tus Mexiyas uas tseem yuav los—kuv, Nifais, kuj tau xav tias kheev lam kuv yuav pom, thiab yuav hnov, thiab yuav paub txog tej yam no, los ntawm tus Vaj Ntsuj Plig Dawb Huv lub hwj chim, uas yog Vajtswv ib lub txiaj ntsim rau txhua tus neeg uas rau siab nrhiav nws, nyob rau txheej thaum ub ib yam li nyob rau txheej uas nws yuav ua nws tus kheej tshwm los rau noob neej pom.

18 Vim nws yeej zoo ib yam nag hmo, hnub no, thiab mus ib txhis li; thiab twb npaj tau txoj hau kev rau neeg txhua tus txij thaum ntuj tsim teb raug los, yog tias lawv hloov siab lees txim thiab los cuag nws.

19 Vim tus uas rau siab nrhiav yuav ntsib; thiab tej txuj ci uas neeg tsis paub txog Vajtswv yuav qhib plho los rau lawv, los ntawm tus Vaj Ntsuj Plig Dawb Huv lub hwj chim, nyob rau txheej nim no ib yam li nyob rau txheej thaum ub, thiab nyob rau txheej thaum ub ib yam li nyob rau txheej uas tseem yuav los; vim tias, tus Tswv txoj kev yeej yog ib txoj uas ncig mus ib txhis li.

20 Yog li ntawd cia li nco ntsoov, auj tib neeg es, vim tus Tswv yuav txiav txim rau txhua yam uas nej ua.

21 Yog li ntawd, yog hais tias nej pheej nrhiav kev ua txoj kev phem nyob hauv nej lub caij sim siab no, ces yuav suav tias nej tsis dawb huv nyob rau ntawm Vajtswv lub rooj txiav txim; thiab tsis muaj ib yam uas tsis dawb huv yuav nyob tau nrog Vajtswv; yog li ntawd, nej yeej yuav raug ntiab tawm mus ib txhis li.

22 Thiab tus Vaj Ntsuj Plig Dawb Huv muab cai kom kuv yuav tsum hais tej yam no, thiab tsis txhob xyeej.