Phau Ntawv Nifais thib Ib
Nws txoj Kev Kav Teb Chaws thiab txoj Kev Qhuab Qhia
Ib zaj piav txog Lihais thiab nws tus poj niam Xaliyas, thiab nws plaub tug tub, hu ua, (pib ntawm tus hlob mus) Lamas, Lemu-ees, Xam, thiab Nifais. Tus Tswv ceeb toom kom Lihais khiav tawm hauv thaj av Yeluxalees mus, vim tias nws tau qhia tej yuav muaj los yav tom ntej rau tej pej xeem hais txog lawv tej kev ua phem thiab lawv nrhiav kev txo nws txoj sia pov tseg. Nws nrog nws tsev neeg mus peb hnub ke rau tom roob moj sab qhua. Nifais coj nws cov tij laug rov qab mus pem thaj av Yeluxalees mus nqa cov Neeg Yudais phau ceev xwm txheej. Zaj piav txog lawv tej kev nyuaj siab. Lawv coj Ixama-ees cov ntxhais los ua poj niam. Lawv coj lawv tsev neeg tawm mus rau tom roob moj sab qhua. Lawv tej kev nyuaj siab thiab kev txom nyem nyob tom roob moj sab qhua. Lawv txoj kev tsiv. Lawv mus txog cov dej hiav txwv. Nifais cov tij laug ntxeev siab tawm tsam nws. Nws ua rau nkawd tsis paub hais nws, thiab txua ib lub nkoj. Lawv muab qhov chaw tis npe hu ua Huaj Vam. Lawv hla cov dej hiav txwv mus rau thaj av uas cog lus cia, thiab lwm yam ntxiv. Zaj no yog hais raws nraim li Nifais zaj; los yog hais tias, kuv, Nifais tau sau phau ceev xwm txheej no.
Tshooj 1
Nifais pib sau nws cov neeg phau ceev xwm txheej—Lihais ua yog toog pom ib tug ncej nplaim hluav taws thiab nyeem ib phau ntawv uas qhia tej yuav muaj los yav tom ntej—Nws qhuas Vajtswv, nws qhia txog qhov uas tus Mexiyas yuav los, thiab nws qhia txog qhov uas Yeluxalees yuav raug puas tsuaj mus—Cov Neeg Yudais tsim txom nws. Kwv yees li 600 xyoo ua ntej Yexus yug los.
1 Kuv, Nifais, vim tau yug los ntawm niam thiab txiv uas zoo, yog li ntawd kuv tau kawm me ntsis ntawm tag nrho kuv txiv tej kev txawj ntse; thiab vim kuv tau pom kev txom nyem ntau nyob hauv kuv lub neej, txawm li ntawd los, vim tus Tswv tau txhawb pab kuv ntau heev nyob hauv tag nrho kuv lub neej; muaj tseeb tiag, vim kuv tau paub ntau txog Vajtswv txoj kev zoo thiab tej txuj ci uas neeg paub tsis txog, yog li ntawd kuv thiaj li sau ib phau ceev xwm txheej txog tej yam uas kuv ua nyob rau hauv kuv lub neej.
2 Muaj tseeb tiag, kuv sau ib phau ceev xwm txheej raws li kuv txiv yam lus, uas yog cov Neeg Yudais kev txawj ntse thiab cov neeg Iyiv yam lus.
3 Thiab kuv paub tias phau ceev xwm txheej uas kuv sau no muaj tseeb; thiab kuv muab kiag kuv txhais tes sau; thiab kuv sau raws nraim li kuv txoj kev txawj ntse.
4 Vim tau muaj tias thawj xyoo thaum Xedekiyas, teb chaws Yudas tus vaj ntxwv, pib sawv los kav teb chaws, (kuv txiv, Lihais, tau nyob hauv Yeluxalees tas nws sim neej); thiab tib lub xyoo ntawd muaj ntau tus yaj saub tau tuaj, qhia tej uas yuav muaj los yav tom ntej rau cov neeg sawv daws hais tias lawv yuav tsum hloov siab lees txim, los sis lub nroog Yeluxalees uas muaj zog yuav raug puas tsuaj mus.
5 Yog li ntawd tau muaj tias kuv txiv, Lihais, thaum nws tawm mus nws tau thov tus Tswv, muaj tseeb tiag, nws tau thov tas nws lub siab lub ntsws, kom pab nws cov neeg.
6 Thiab tau muaj tias thaum nws thov tus Tswv, muaj ib tug ncej nplaim hluav taws tshwm tuaj nyob rau saum ib lub pob zeb ntawm nws xub ntiag; thiab nws tau pom ntau yam thiab tau hnov ntau yam; thiab vim tej yam uas nws tau pom thiab tau hnov nws ib ce xob vog thiab tshee heev kawg li.
7 Thiab tau muaj tias nws rov qab los tom nws lub tsev hauv Yeluxalees; thiab nws qhau cev rau saum nws lub txaj, vim tus Ntsuj Plig thiab tej yam uas nws tau pom ua rau nws tsis muaj zog.
8 Thiab thaum tus Ntsuj Plig tseem ua rau nws tsis muaj zog li ntawd, nws ua yog toog pom mus deb, nws twb pom ntuj ceeb tsheej qhib, thiab nws xav tias nws pom Vajtswv zaum saum nws lub rooj theej kiab, muaj tim tswv coob leej suav tsis txheeb nyob nrog ncig nws tab tom hu nkauj thiab qhuas lawv tus Vajtswv.
9 Thiab tau muaj tias nws pom Ib Tug nqis puag saum nruab ntug los, thiab nws ntsia pom tias tus ntawd qhov ci tseem ci tshaj lub hnub thaum tav su.
10 Thiab nws kuj tau pom kaum ob tug lawv tus ntawd qab, thiab lawv qhov ci tseem ci tshaj cov hnub qub nyob saum nruab ntug.
11 Thiab lawv tau nqis los thiab mus rau hauv lub ntiaj teb; thiab thawj tug tau los thiab sawv ntawm kuv txiv xub ntiag, thiab muab ib phau ntawv rau nws, thiab hais kom nws nyeem.
12 Thiab tau muaj tias thaum nws nyeem, nws muaj tus Tswv tus Ntsuj Plig puv npo.
13 Thiab nws nyeem, hais tias: Kev txom nyem, kev txom nyem, rau Yeluxalees, vim kuv tau pom nej tej kev qias! Muaj tseeb tiag, thiab kuv txiv tau nyeem ntau ntau yam txog Yeluxalees—hais tias Yeluxalees yuav raug puas tsuaj mus, thiab cov neeg uas nyob rau hauv thiab; coob leej yuav tuag los ntawm hniav ntaj hniav riam, thiab coob leej yuav raug txhom cab mus rau hauv Npanpiloos.
14 Thiab tau muaj tias thaum kuv txiv tau nyeem thiab tau pom ntau yam tseem ceeb thiab zoo kawg nkaus, nws tau tsa ncauj hais ntau yam rau tus Tswv; xws li: Tej yam koj ua yeej tseem ceeb thiab zoo kawg nkaus, auj tus Tswv Vajtswv uas Muaj Hwj Chim Tag Nrho! Koj lub rooj theej kiab nyob siab puag saum ntuj, thiab koj lub hwj chim, thiab qhov zoo, thiab lub siab hlub tshua nthuav rau tag nrho cov neeg hauv lub ntiaj teb; thiab, vim koj muaj lub siab hlub tshua, koj yuav tsis cia kom cov neeg uas los cuag koj piam sij mus!
15 Thiab kuv txiv thiaj tsa lus qhuas nws tus Vajtswv zoo li no; vim ua rau nws zoo siab kawg nkaus, thiab tag nrho nws lub siab puv npo, vim tej yam uas nws tau pom, muaj tseeb tiag, tej yam uas tus Tswv tau pub rau nws pom.
16 Thiab nim no kuv, Nifais, tsis sau tag nrho tej zaj uas kuv txiv tau sau cia, vim nws tau sau ntau yam uas nws ua yog toog pom thiab ua npau suav pom; thiab nws kuj tau sau ntau yam uas nws qhia tej yuav muaj los yav tom ntej thiab hais rau nws cov me nyuam, uas kuv yuav tsis sau tag nrho txhua zaj.
17 Tiam sis kuv yuav sau ib zaj txog tej yam uas kuv ua nyob hauv kuv lub neej. Saib seb, kuv sau ib zaj ntsiab lus tawm ntawm kuv txiv phau ceev xwm txheej, rau saum cov phiaj uas kuv tau muab kuv txhais tes ua kiag; yog li ntawd, tom qab kuv sau ib zaj ntsiab lus tawm ntawm kuv txiv phau ceev xwm txheej kuv mam sau ib zaj txog kuv lub neej.
18 Yog li ntawd, kuv xav kom nej paub tias, tom qab tus Tswv tau muab ntau yam zoo kawg nkaus rau kuv txiv, Lihais, pom, muaj tseeb tiag, hais txog kev puas tsuaj ntawm Yeluxalees, saib seb nws tau mus rau ntawm cov neeg, thiab pib mus qhia tej yuav muaj los yav tom ntej thiab mus tshaj tawm rau lawv txog tej yam uas nws tau pom thiab tau hnov.
19 Thiab tau muaj tias cov Neeg Yudais thuam nws vim tej uas nws tau ua tim khawv rau lawv; vim nws ua tim khawv tiag tiag txog lawv tej kev phem thiab lawv tej kev qias; thiab nws ua tim khawv tias tej yam uas nws pom thiab hnov, thiab tej yam uas nws nyeem nyob hauv phau ntawv, qhia meej txog qhov uas tus Mexiyas yuav los, thiab txoj kev txhiv neeg ntiaj teb dim.
20 Thiab thaum cov Neeg Yudais hnov tej no lawv npau taws rau nws; muaj tseeb tiag, twb ib yam nkaus li ua rau cov yaj saub thaum ub, cov uas lawv tau muab ntiab khiav tawm, thiab xuas pob zeb ntaus, thiab tua pov tseg; thiab lawv nrhiav txo nws txoj sia, kom lawv yuav tau muab nws txoj sia txo pov tseg. Tiam sis saib seb, kuv, Nifais, yuav qhia rau nej tias tus Tswv txoj kev hlub tshua muaj nyob nrog txhua tus uas nws tau xaiv tseg, vim lawv txoj kev ntseeg, ua rau lawv muaj zog mus txog thaum lawv muaj hwj chim dim tau.