1 Thiab txhua yam uas kuv txiv tau pom, tau hnov, thiab tau hais no, yog thaum nws nyob hauv ib lub tsev pheeb suab ntaub, nyob hauv lub hav Lemu-ees, thiab kuj muaj ntau yam tseem ceeb, uas sau tsis tau rau saum cov phiaj no.

2 Thiab nim no, ib yam li kuv twb tau hais txog cov phiaj no, saib seb cov phiaj no tsis yog cov phiaj uas kuv sau tag nrho kuv cov neeg tej keeb kwm rau hauv; vim cov phiaj uas kuv sau tag nrho kuv cov neeg tej keeb kwm rau hauv kuv tau tis npe rau hu ua Nifais; yog li ntawd, cov phiaj ntawd hu ua Nifais cov phiaj, raws li kuv lub npe; thiab cov phiaj no los kuj hu ua Nifais cov phiaj thiab.

3 Txawm li ntawd los, kuv tau txais tus Tswv ib lo lus txib kom kuv yuav tsum ua cov phiaj no, rau lub hom phiaj tshwj xeeb kom sau tau ib zaj keeb kwm txog kev ua hauj lwm qhuab qhia ntawm kuv cov neeg.

4 Nyob rau saum lwm cov phiaj yuav tsum sau ib zaj txog cov vaj ntxwv tej kev kav teb kav chaw, thiab tej kev ua rog thiab tej kev sib cav sib ceg ntawm kuv cov neeg; yog li ntawd cov phiaj no yuav cia sau txog txoj kev ua hauj lwm qhuab qhia; thiab lwm cov phiaj yog cia sau txog cov vaj ntxwv tej kev kav teb kav chaw thiab kuv cov neeg tej kev ua rog thiab tej kev sib cav sib ceg.

5 Yog li ntawd, tus Tswv tau txib kom kuv ua cov phiaj no rau nws ib lub hom phiaj tseem ceeb, lub hom phiaj uas kuv tsis paub.

6 Tiam sis tus Tswv paub txhua yam txij thaum chiv keeb los; yog li ntawd, nws yeej npaj ib txoj kev kom ua tau txhua yam nws yuav ua nyob hauv noob neej; vim saib seb, nws yeej muaj hwj chim tag nrho los ua tau kom muaj raws li tag nrho nws cov lus. Thiab muaj li ntawd tiag. Amees.