1 Vim saib seb, tau muaj tias tus Tswv hais rau kuv txiv, muaj tseeb tiag, twb hais nyob hauv ib zaj npau suav, thiab hais rau nws tias: Lihais koj tau koob hmoov, vim yog tej uas koj tau ua; thiab vim koj rau siab ntseeg thiab tshaj tawm tej yam uas kuv tau txib rau cov neeg no, saib seb, lawv nrhiav kev muab koj txoj sia txo pov tseg.

2 Thiab tau muaj tias tus Tswv txib kuv txiv, hais nyob hauv ib zaj npau suav, kom nws coj nws tsev neeg thiab khiav tawm mus rau tom roob moj sab qhua.

3 Thiab tau muaj tias nws mloog tus Tswv txoj lus, yog li ntawd nws ua raws li tus Tswv tau txib nws.

4 Thiab tau muaj tias nws tau khiav tawm mus rau tom roob moj sab qhua. Thiab nws tau tso nws lub vaj lub tsev tseg, thiab thaj av uas yog nws qub txeeg qub teg, thiab nws tej nyiaj, thiab nws tej kub, thiab nws tej khoom muaj nuj nqis, thiab tsis nqa ib yam dab tsi nrog nws li, tsuas yog coj nws tsev neeg nkaus xwb, thiab tej yam yuav siv, thiab cov tsev pheeb suab ntaub, thiab tau khiav tawm mus rau tom roob moj sab qhua.

5 Thiab nws tau mus rau nram ciam teb ze ntawm ntug Dej Hiav Txwv Liab; thiab nws tau mus rau hauv roob moj sab qhua hauv ciam teb uas nyob ze zog rau ntawm Dej Hiav Txwv Liab; thiab nws tau mus rau hauv roob moj sab qhua nrog nws tsev neeg, uas muaj kuv niam, Xaliyas, thiab kuv cov tij laug, uas yog Lamas, Lemu-ees, thiab Xam.

6 Thiab tau muaj tias thaum nws mus tau peb hnub rau hauv roob moj sab qhua, nws tsa nws lub tsev pheeb suab ntaub nyob hauv ib lub hav nyob ib sab ntawm ib tug dej.

7 Thiab tau muaj tias nws tsa ib lub thaj pob zeb, thiab nws ua kev tiam pub rau tus Tswv, thiab ua tus Tswv uas yog peb tus Vajtswv tsaug.

8 Thiab tau muaj tias nws tis npe rau tus dej ntawd hu ua tus dej Lamas, thiab tus dej ntawd ntws mus tshuam rau Dej Hiav Txwv Liab; thiab lub hav ntawd nyob rau ntawm ciam teb ze ntawm qhov dej tshuam.

9 Thiab thaum kuv txiv pom tias tus dej ntawd ntws mus rau hauv qhov txhawv dej ntawm Dej Hiav Txwv Liab, nws hais rau Lamas hais tias: Auj xav kom koj yuav zoo npaum li tus dej no, uas ntws mus tsis tu ncua rau hauv qhov txhawv ntawm tag nrho kev ncaj ncees!

10 Thiab nws kuj hais rau Lemu-ees hais tias: Auj xav kom koj yuav zoo tau npaum li lub hav no, khov thiab ruaj nrees, thiab nyob khov kho kom coj raws nraim li tus Tswv tej lus txib!

11 Nim no nws hais li no los vim Lamas thiab Lemu-ees nkawd txoj kev tawv ncauj; vim saib seb nkawd tau yws yws ntau yam rau nkawd txiv, vim nws yog ib tug neeg uas pheej ua yog toog, thiab tau coj lawv tawm ntawm thaj av Yeluxalees, kom tso thaj av uas yog lawv qub txeeg qub teg tseg, thiab tau tso lawv tej nyiaj tej kub, thiab tso lawv tej khoom muaj nuj nqis, coj lawv tuaj piam sij nyob rau tom roob moj sab qhua. Thiab nkawd hais tias nws tau ua li no los yog vim tej zeem muag ruam ntsuav ntawm nws lub siab.

12 Thiab Lamas thiab Lemu-ees, vim nkawd yog ob tug tub hlob, nkawd tau yws yws rau nkawd txiv li no. Thiab nkawd tau yws yws vim nkawd tsis paub txog tej kev ua dej ua num ntawm tus Vajtswv uas tau tsim nkawd.

13 Thiab nkawd kuj tsis ntseeg tias Yeluxalees, lub nroog uas muaj zog ntawd, yuav raug puas tsuaj tau mus raws li cov yaj saub tej lus. Thiab nkawd zoo li cov Neeg Yudais uas nyob rau hauv Yeluxalees, cov uas nrhiav kev muab kuv txiv txoj sia txo pov tseg.

14 Thiab tau muaj tias kuv txiv tau hais lus rau nkawd nyob hauv lub hav Lemu-ees, nws hais muaj hwj chim, muaj tus Ntsuj Plig puv npo, txog thaum nkawd lub cev tshee na rau ntawm nws xub ntiag. Thiab nws tau cem nkawd ua rau nkawd tsis paub hais, kom nkawd tsis muaj cuab kav cam nrog nws; yog li ntawd, nkawd thiaj ua raws li nws tau txib nkawd.

15 Thiab kuv txiv nyob hauv ib lub tsev pheeb suab ntaub.

16 Thiab tau muaj tias kuv, Nifais, tseem hluas heev, tiam sis kuv muaj lub cev siab, thiab kuj muaj lub siab xav paub txog tej txuj ci uas neeg tsis paub txog Vajtswv, yog li ntawd, kuv thiaj tau thov tus Tswv; thiab saib seb nws tau los xyuas kuv, thiab tau ua rau kuv lub siab mos muag kom kuv thiaj ntseeg txhua lo lus uas kuv txiv tau hais; yog li ntawd, kuv thiaj tsis ntxeev siab tawm tsam nws li kuv ob tug tij laug.

17 Thiab kuv hais rau Xam, kom nws paub txog tej yam uas tus Tswv tau pub rau kuv paub los ntawm nws tus Ntsuj Plig Dawb Huv. Thiab tau muaj tias nws ntseeg kuv tej lus.

18 Tiam sis, saib seb, Lamas thiab Lemu-ees tsis kam mloog kuv tej lus; thiab vim kuv nyuaj siab rau qhov nkawd muaj lub siab tawv kuv thiaj tau thov tus Tswv pab nkawd.

19 Thiab tau muaj tias tus Tswv hais rau kuv, hais tias: Koj tau koob hmoov, Nifais, vim koj txoj kev ntseeg, vim koj tau rau siab ntso nrhiav kuv nrog kev txo siab txo ntsws.

20 Thiab npaum li uas koj coj kuv tej lus txib, koj yuav vam meej, thiab yuav coj koj mus rau ib thaj av uas cog lus cia; muaj tseeb tiag, twb yog ib thaj av uas kuv tau npaj tseg cia rau koj; muaj tseeb tiag, yog ib thaj av uas zoo tshaj li lwm thaj av.

21 Thiab npaum li uas koj ob tug tij laug ntxeev siab tawm tsam koj, nkawd yuav raug txiav tawm ntawm tus Tswv lub xub ntiag mus.

22 Thiab npaum li uas koj coj kuv tej lus txib, ces yuav muab koj tsa ua ib tug kav thiab ib tug xib hwb rau koj ob tug tij laug.

23 Vim saib seb, hnub uas nkawd ntxeev siab tawm tsam kuv, kuv yuav foom rau nkawd ib txoj kev foom tsis zoo uas mob heev li, thiab nkawd yuav tsis muaj hwj chim tshaj koj tej tub ki tsuas yog lawv ho ntxeev siab tawm tsam kuv thiab xwb.

24 Thiab yog hais tias lawv ntxeev siab tawm tsam kuv, lawv yuav ua ib txoj kev nplawm rau koj tej tub ki, kom txhaub lawv ua kom lawv nco txog.