1 Thiab tau muaj tias kuv hais rau kuv cov tij laug, hais tias: Cia peb rov qab mus pem Yeluxalees dua, thiab cia peb rau siab ntso coj tus Tswv tej lus txib; vim saib seb nws yog tus uas muaj hwj chim loj tshaj tag nrho neeg sawv daws hauv lub ntiaj teb, yog li ntawd vim li cas nws thiaj yuav tsis muaj hwj chim dua Lanpas thiab nws tsib caug leej, muaj tseeb tiag, los sis muaj hwj chim tshaj dua Lanpas txhiab txhiab vam vam leej?

2 Yog li ntawd cia peb mus; cia peb ua khov kho zoo li Mauxes; vim muaj tseeb tias nws hais lus rau cov dej ntawm Dej Hiav Txwv Liab thiab cov dej ntawd tau faib hlo rau ob sab, thiab peb cov yawg koob thiaj tau los dhau, tawm ntawm txoj kev poob cev qhev, rau saum tej av qhuav los, thiab Falaus cov tub rog tau tuaj raws lawv qab thiab tau poob dej tuag nyob hauv tus Dej Hiav Txwv Liab.

3 Nim no saib seb neb paub tias tej no muaj tseeb; thiab neb kuj paub tias ib tug tim tswv tau hais lus rau neb; yog li ntawd ua li cas neb pheej tsis ntseeg? Cia peb mus ped; tus Tswv muaj peev xwm pab peb dim, ib yam li nws twb tau pab peb cov yawg koob, thiab ua kom Lanpas puas tsuaj, ib yam li cov neeg Iyiv.

4 Nim no thaum kuv tau hais cov lus no, nkawd tseem npau taws, thiab nkawd tseem yws yws ntxiv thiab; txawm li ntawd los nkawd tau raws kuv qab mus txog sab nraum Yeluxalees cov ntsa loog.

5 Thiab yog lub sij hawm tsaus ntuj; thiab kuv kom lawv nkaum nyob sab ntsa loog nraud. Thiab tom qab lawv tau nkaum tas lawm, kuv, Nifais, nkag ntsiag to mus rau hauv nroog thiab mus rau tom Lanpas lub tsev.

6 Thiab tus Ntsuj Plig tau coj kuv kev, kuv tsis paub ua ntej txog tej uas kuv yuav ua.

7 Txawm li ntawd los kuv taug kev mus ntxiv, thiab thaum kuv mus ze rau ntawm Lanpas lub tsev, kuv pom ib tug txiv neej, thiab nws tau vau rau hauv pem teb ntawm kuv xub ntiag, vim nws qaug cawv txiv hmab.

8 Thiab thaum kuv los ze nws kuv pom hais tias nws yog Lanpas.

9 Thiab kuv tau pom nws rab ntaj, thiab kuv tau rho rab ntaj tawm ntawm lub hnab ntaj ntawd; thiab tus ko yog tseem kub, thiab tus qauv tes uas ntaus rab ntaj ntawd ntaus tau zoo nkauj kawg nkaus, thiab kuv pom tias tus hniav ntaj ntawd yog ib yam hlau uas zoo tshaj plaws.

10 Thiab tau muaj tias tus Ntsuj Plig txhib kom kuv tua Lanpas; tiam sis kuv xav hauv kuv nruab siab tias: Tsis tau muaj ib zaug li uas kuv ua rau neeg nqaij ntuag ntshav nrog. Thiab kuv thim hlo thiab kuv tsis xav muab nws tua.

11 Thiab tus Ntsuj Plig rov hais dua rau kuv tias: Saib seb tus Tswv tau coj nws los rau hauv koj tes. Muaj tseeb tiag, thiab kuv kuj paub tias nws tau nrhiav kev muab kuv txoj sia txo pov tseg; muaj tseeb tiag, thiab nws tsis mloog tus Tswv tej lus txib; thiab nws kuj tau txeeb peb tej khoom.

12 Thiab tau muaj tias tus Ntsuj Plig rov hais dua rau kuv tias: Muab nws tua, vim tus Tswv tau coj nws los rau hauv koj tes;

13 Saib seb tus Tswv tua tej neeg phem kom thiaj muaj raws li nws tej hom phiaj ncaj ncees. Qhov uas ib tug neeg raug piam sij yuav zoo dua li qhov uas ib haiv neeg yuav tso kev ntseeg tseg zuj zus thiab piam sij.

14 Thiab nim no, thaum kuv, Nifais, tau hnov cov lus no, kuv rov nco txog tus Tswv cov lus uas nws tau hais rau kuv nyob tom roob moj sab qhua, hais tias: Npaum li uas koj cov tub ki ua raws li kuv tej lus txib, lawv yuav vam meej nyob rau hauv thaj av uas cog lus cia.

15 Muaj tseeb tiag, thiab kuv kuj xav tias lawv yuav coj tsis tau tus Tswv tej lus txib raws li Mauxes txoj kev cai, tsuas yog hais tias lawv tau txoj kev cai xwb.

16 Thiab kuv kuj paub tias tau muab txoj kev cai sau rau saum cov phiaj toog.

17 Thiab ntxiv, kuv paub tias tus Tswv tau coj Lanpas los rau hauv kuv tes kom ua li no—xwv kom kuv yuav nqa tau cov ceev xwm txheej raws li nws tej lus txib.

18 Yog li ntawd kuv thiaj tau ua raws li tus Ntsuj Plig lub suab hais, thiab ntsiab nkaus Lanpas cov plaub hau, thiab kuv tau muab nws rab ntaj txiav nws lub taub hau.

19 Thiab tom qab kuv tau muab nws rab ntaj txiav nws lub taub hau, kuv muab Lanpas cov tsoos tsho coj los hnav rau saum kuv lub cev; muaj tseeb tiag, kuv twb hnav txhua yam huv tib si; thiab kuv tau muab nws tej cuab yeej ua rog los sia rau ntawm kuv duav.

20 Thiab tom qab kuv tau ua li no, kuv nkag mus rau hauv Lanpas lub txhab nyiaj. Thiab thaum kuv nkag mus rau hauv Lanpas lub txhab nyiaj, saib seb, kuv pom Lanpas tus tub qhe uas muaj cov yawm sij qhib lub txhab nyiaj. Thiab kuv ua Lanpas lub suab txib nws, kom nws nrog kuv mus rau hauv lub txhab nyiaj.

21 Thiab nws xav tias kuv yog nws tus tswv, Lanpas, vim nws pom cov tsoos tsho hnav thiab rab ntaj uas sia rau ntawm kuv lub duav.

22 Thiab nws qhia rau kuv txog cov Neeg Yudais cov txwj laug, vim nws paub tias nws tus tswv Lanpas, tau tawm mus ntsib lawv thaum tsaus ntuj.

23 Thiab kuv hais lus rau nws ib yam li kuv twb yog Lanpas.

24 Thiab kuv kuj hais rau nws tias kuv yuav nqa cov ceev xwm txheej, cov uas tau muab sau rau saum cov phiaj toog, mus rau kuv cov tij laug, uas nyob sab ntsa loog sab nraud.

25 Thiab kuv tau hais kom nws cia li lawv kuv qab.

26 Thiab vim nws xav tias kuv hais txog cov kwv tij ntawm lub koom txoos, thiab tias kuv yeej yog Lanpas tus uas kuv tau muab tua lawm, yog li no nws thiaj tau lawv kuv qab.

27 Thiab nws hais rau kuv ntau zaus txog cov Neeg Yudais cov txwj laug, thaum kuv mus ntsib kuv cov tij laug, uas nyob sab ntsa loog sab nraud.

28 Thiab tau muaj tias thaum Lamas pom kuv nws ntshai heev, thiab Lemu-ees thiab Xam kuj ntshai ib yam nkaus. Thiab lawv tau khiav ntawm kuv mus; vim lawv xav tias kuv yog Lanpas, thiab hais tias ntshe nws muab kuv tua lawm thiab nws tuaj nrhiav kev muab lawv txoj sia txo pov tseg thiab.

29 Thiab tau muaj tias kuv tau hu lawv, thiab lawv tau hnov kuv hu; yog li ntawd, lawv thiaj tau tsum tsis khiav ntawm kuv mus.

30 Thiab tau muaj tias thaum Lanpas tus tub qhe pom kuv cov tij laug nws pib tshee, thiab tab tom yuav khiav ntawm kuv mus thiab rov qab mus rau tom lub nroog Yeluxalees.

31 Thiab nim no kuv, Nifais, vim kuv yog ib tug neeg muaj lub cev siab heev, thiab vim kuv kuj tau txais dag zog ntau heev los ntawm tus Tswv, yog li ntawd kuv thiaj tau ntsiab nkaus Lanpas tus tub qhe, thiab tuav nws tseg, xwv kom nws thiaj khiav tsis tau mus.

32 Thiab tau muaj tias kuv hais rau nws tias, yog nws mloog kuv cov lus, ib yam li tus Tswv muaj txoj sia nyob, thiab ib yam li kuv muaj txoj sia nyob, ib yam li ntawd yog tias nws mloog peb cov lus, peb yuav tseg nws txoj sia.

33 Thiab kuv hais rau nws, nrog kev lav lus hais tias, nws tsis tas ntshai; nws yuav ua ib tug neeg nyob ywj siab ib yam li peb yog tias nws kam nrog peb mus lawm nram roob moj sab qhua.

34 Thiab kuv kuj hais rau nws, hais tias: Tus Tswv tau txib kom peb ua yam no tiag tiag; thiab peb yuav tsis rau siab ua raws li tus Tswv tej lus txib los? Yog li ntawd, yog tias koj nrog peb mus lawm nram roob moj sab qhua mus cuag kuv txiv koj yuav muaj chaw nrog peb nyob.

35 Thiab tau muaj tias Xaulas tau ua siab loj rau cov lus uas kuv hais. Nim no Xaulas yog tus tub qhe ntawd lub npe; thiab nws cog lus tias nws yuav mus lawm nram roob moj sab qhua mus cuag peb txiv. Muaj tseeb tiag, thiab nws kuj lav lus rau peb tias nws yuav nrog peb nyob txij thaum ntawd mus.

36 Nim no peb xav kom nws nrog peb nyob, xwv kom cov Neeg Yudais tsis txhob paub txog qhov uas peb khiav mus rau tom roob moj sab qhua, tsam lawv ho raws peb qab tuaj thiab ua rau peb puas tsuaj.

37 Thiab tau muaj tias thaum Xaulas tau lav lus rau peb, peb thiaj tsis ntshai txog nws lawm.

38 Thiab tau muaj tias peb nqa cov phiaj toog thiab coj Lanpas tus tub qhe, thiab khiav tawm mus rau tom roob moj sab qhua, thiab mus lawm nram peb txiv lub tsev pheeb suab ntaub.