1 Thiab tau muaj tias nkawd tau teev tiam tus Tswv thiab tau tawm nrog kuv mus; thiab peb tau muab ntoo ua tib zoo txua ua ntau yam. Thiab tej lub sij hawm tus Tswv tau qhia rau kuv saib kuv yuav tsum txua cov ntoo ua lub nkoj li cas.

2 Nim no kuv, Nifais, txua cov ntoo tsis raws li txoj kev uas tib neeg tau kawm thiab kuv txua lub nkoj tsis raws li tib neeg tus txheej txheem; tiam sis kuv txawm txua lub nkoj raws li tus txheej txheem tus Tswv tau qhia rau kuv; yog li ntawd, lub nkoj thiaj tsis zoo li tib neeg ua.

3 Thiab kuv Nifais, tau mus pem roob ntau zaus, thiab kuv tau thov tus Tswv ntau zaus; yog li ntawd tus Tswv tau qhia tej yam tseem ceeb rau kuv.

4 Thiab tau muaj tias tom qab kuv txua lub nkoj tiav, raws li tus Tswv txoj lus, kuv ob tug tij laug pom tias lub nkoj ntawd yeej zoo, thiab hais tias tus qauv tes uas txua lub nkoj ntawd zoo kawg nkaus; yog li ntawd, nkawd thiaj rov qab txo nkawd lub hwj chim rau tus Tswv.

5 Thiab tau muaj tias tus Tswv lub suab los hais rau kuv txiv, hais tias peb yuav tsum sawv thiab mus rau hauv lub nkoj.

6 Thiab tau muaj tias kaj ntug tag kis, tom qab peb tau npaj txhua yam, ntau yam txiv hmab txiv ntoo thiab nqaij uas nrhiav tau tom roob moj sab qhua los, thiab nqa zib ntab ntau heev, thiab nqa tej khoom siv raws li tej uas tus Tswv tau txib kom peb nqa, peb tau mus rau hauv lub nkoj, nrog tag nrho peb cov khoom thiab peb tej noob qoob noob loo, thiab txhua yam uas peb tau nqa nrog peb los, txhua txhia leej raws li nws hnub nyoog; yog li ntawd, peb sawv daws thiaj tau mus rau hauv lub nkoj, nrog peb cov poj niam thiab peb cov me nyuam.

7 Thiab nim no, kuv txiv tau muaj ob tug tub nyob rau tom roob moj sab qhua, tus hlob hu ua Yakhauj thiab tus yau hu ua Yauxej.

8 Thiab tau muaj tias tom qab peb sawv daws tau mus rau hauv lub nkoj, thiab tau nqa peb tej khoom siv thiab tej yam uas tus Tswv tau txib peb nqa, peb tau mus rau tom dej hiav txwv thiab tej cua tau tshuab peb mus rau tim thaj av uas cog lus cia.

9 Thiab tom qab tej cua tau tshuab peb mus tau ntau hnub, saib seb, kuv ob tug tij laug thiab Ixama-ees cov tub thiab cov nyab pib ua kev lom zem, lawv thiaj li pib seev cev, thiab hu nkauj, thiab hais lus lwj liam ntau yam, muaj tseeb tiag, twb ua rau lawv tsis nco qab txog lub hwj chim uas tau coj lawv los txog qhov ntawd; muaj tseeb tiag, lawv khav theeb ua lwj ua liam heev kawg li.

10 Thiab kuv, Nifais, pib ntshai heev tsam tus Tswv npau taws rau peb, thiab qhuab peb vim peb txoj kev ua phem, xwv kom peb yuav raug nqos mus hauv qab thu dej hiav txwv; yog li ntawd, kuv, Nifais, pib ua tib zoo hais lus rau lawv; tiam sis saib seb lawv npau taws rau kuv, hais tias: Peb tsis xav kom peb tus kwv yau los ua ib tug nom kav peb.

11 Thiab tau muaj tias Lamas thiab Lemu-ees tau ntes kuv thiab muab hlua los khi kuv, thiab nkawd tau ua kub ua ceev heev rau kuv; txawm li ntawd los, tus Tswv cia kom muaj tej ntawd es nws thiaj ua tau nws lub hwj chim tawm los, kom muaj raws li nws cov lus uas nws tau hais txog cov neeg phem.

12 Thiab tau muaj tias tom qab nkawd tau khi kuv ruaj kawg uas kuv nti tsis taus, lub koob qhia kev, uas tus Tswv tau npaj los, tau nres tsis ua hauj lwm.

13 Yog li ntawd, lawv tsis paub saib yuav tig lub nkoj rau sab twg, thiaj li muaj cua daj cua dub loj sawv tuaj, muaj tseeb tiag, ib npluav nag xob nag cua uas phem heev, thiab peb raug ntsawj rov qab nyob saum dej hiav txwv tau peb hnub; thiab lawv pib ntshai heev nyob tsam lawv poob dej tuag rau hauv dej hiav txwv; txawm li ntawd los lawv tseem tsis tso kuv thiab.

14 Thiab hnub plaub, uas peb tau raug ntsawj rov qab, kob nag xob nag cua ntawd pib ua phem heev.

15 Thiab tau muaj tias peb twb yuav luag raug nqos mus hauv qab thu dej hiav txwv. Thiab tom qab peb raug ntsawj rov qab nyob saum dej hiav txwv tau plaub hnub, kuv cov tij laug pib pom tias lawv raug Vajtswv tej kev txiav txim, thiab hais tias lawv yeej yuav raug piam sij yog lawv tsis hloov siab lees txim rau lawv tej kev ua phem; yog li ntawd, lawv thiaj los cuag kuv, thiab daws cov hlua uas khi kuv dab teg, thiab saib seb kuv ob txhais tes o heev kawg li; thiab kuv ob lub dab taw los kuj o kawg li thiab, thiab mob kawg li.

16 Txawm li ntawd los, kuv tseem ntsia ntsoov kuv tus Vajtswv, thiab kuv qhuas nws tag nrho ib hnub li; thiab kuv tsis tau yws tawm tsam tus Tswv vim kuv tej kev txom nyem.

17 Nim no kuv txiv, Lihais, tau hais ntau yam rau lawv, thiab hais rau Ixama-ees cov tub thiab; tiam sis, saib seb, lawv hais lus hawv tawm tsam txhua tus uas hais lus pab kuv; thiab vim kuv niam kuv txiv mob laus heev, thiab vim nkawd raug kev nyuaj siab heev vim nkawd tej me nyuam, nkawd thiaj tau ntshaus ntshov, muaj tseeb tiag, nkawd twb qaug txaj lawm.

18 Vim nkawd txoj kev tu siab thiab kev nyuaj siab ntau, thiab kuv ob tug tij laug txoj kev ua phem, nkawd raug coj los nyob ze qhov uas yuav raug nqa tawm ntawm lub sij hawm no mus cuag nkawd tus Vajtswv; muaj tseeb tiag, nkawd tej plaub hau txheeb twb yuav raug muab tso cia qis nyob hauv tej plua tshauv av; muaj tseeb tiag, nkawd twb nyob ze qhov uas yuav raug pov nrog kev tu siab rau hauv ib lub qhov ntxa dej.

19 Thiab Yakhauj thiab Yauxej los, vim nkawd tseem yau, thiab vim yuav tsum tu nkawd ntau, nkawd kuj nyuaj siab vim nkawd niam tej kev txom nyem; thiab kuv tus poj niam nrog nws tej kua muag thiab tej kev thov Vajtswv thiab kuv cov me nyuam thiab, ua tsis tau rau kuv ob tug tij laug lub siab mos muag kom nkawd daws kuv li.

20 Thiab tsis muaj ib yam dab tsi li tsuas yog Vajtswv lub hwj chim nkaus xwb, uas hem nkawd nrog txoj kev puas tsuaj, thiaj ua rau nkawd lub siab mos muag; yog li ntawd, thaum nkawd pom tias nkawd twb yuav raug nqos mus rau hauv qab thu dej hiav txwv tob nkawd thiaj hloov siab lees txim rau tej yam uas nkawd tau ua, nkawd thiaj muab kuv daws.

21 Thiab tau muaj tias tom qab nkawd daws kuv, saib seb, kuv muab lub koob qhia kev los tuav, thiab lub koob qhia kev ua hauj lwm raws li kuv lub siab xav. Thiab tau muaj tias kuv thov tus Tswv; thiab tom qab kuv thov Vajtswv, cov cua tau tu, thiab tej cua daj cua dub tau tu, thiab tej huab cua nyob ntsiag to.

22 Thiab tau muaj tias kuv, Nifais, thiaj tau tsav lub nkoj, xwv kom peb yuav rov mus tau dua lawm tim thaj av uas cog lus cia.

23 Thiab tau muaj tias tom qab peb caij nkoj mus tau ntau hnub peb tau mus txog thaj av uas cog lus cia; thiab peb tau mus rau pem thaj av, thiab tau tsa peb cov tsev pheeb suab ntaub; thiab peb tau hu thaj av ntawd ua thaj av uas cog lus cia.

24 Thiab tau muaj tias peb tau pib mus ncaws teb, thiab peb pib cog tej noob qoob noob loo; muaj tseeb tiag, peb tau cog tag nrho peb tej noob qoob noob loo rau hauv av, tej uas peb tau nqa hauv thaj av Yeluxalees tuaj. Thiab tau muaj tias tej noob ntawd tau hlob zoo heev li; yog li ntawd, tus Tswv foom koob hmoov nplua mias rau peb.

25 Thiab tau muaj tias nyob rau hauv thaj av uas cog lus cia, thaum peb mus tom hav zoov, peb pom hais tias muaj txhua txhia yam tsiaj qus nyob rau hauv hav zoov, muaj maum nyuj thiab heev nyuj, thiab zag thiab nees, thiab tshis thiab sai, thiab txhua yam tsiaj qus, uas yog cia rau tib neeg siv. Thiab peb kuj nrhiav tau txhua yam quav tooj quav hlau, nrhiav tau kub thiab nyiaj, thiab tooj liab huv tib si.