1 Thiab tau muaj tias tus tim tswv tau hais rau kuv tias: Ntsia, thiab saib seb koj cov tub ki, thiab koj cov tij laug tej tub ki thiab. Thiab kuv ntsia thiab pom thaj av uas cog lus cia; thiab kuv pom muaj neeg coob heev, muaj tseeb tiag, twb ntau npaum li cov xuab zeb nram ntug dej hiav txwv.

2 Thiab tau muaj tias kuv pom ntau pab neeg tuaj sib sau ua ke sib ntaus sib tua, ib leeg tawm tsam ib leeg; thiab kuv pom tej kev ua rog, thiab hnov lus paj lus cua txog kev ua rog, thiab kuv cov neeg coob leej poob tsam los ntawm hniav ntaj.

3 Thiab tau muaj tias kuv pom ntau tiam neeg tau dhau mus, raws li tej kev ua rog thiab kev sib cav sib ceg nyob rau hauv thaj av; thiab kuv pom ntau lub nroog heev, muaj tseeb tiag, yog li ntawd kuv thiaj tsis suav tej nroog ntawd.

4 Thiab tau muaj tias kuv pom ib txoj kev tsaus ntuj uas muaj huab zig niab nyob rau hauv thaj av uas cog lus cia; thiab kuv pom xob laim liab pes vog, thiab hnov xob quaj nroo pes ntws, thiab hnov av qeeg, thiab hnov txhua txhia yam suab nrov; thiab kuv pom tej av thiab tej pob zeb tawg; thiab kuv pom tej roob tau nphau pes nphwv ua doj ua daim; thiab kuv pom tej tiaj nrag ntawm lub ntiaj teb tawg ntsoog ntxaws; thiab kuv pom ntau lub nroog saus; thiab kuv pom ntau lub nroog raug hluav taws kub hnyiab; thiab kuv pom ntau lub nroog nphau rau hauv pem teb, vim tej kev av qeeg ntawd.

5 Thiab tau muaj tias tom qab kuv pom tej yam no, kuv pom tias txoj kev tsaus ntuj uas muaj huab zig niab tau sawv dhau ntawm daim av mus; thiab saib seb, kuv pom ntau pab neeg uas tsis raug puas tsuaj los ntawm tus Tswv txoj kev txiav txim loj thiab txaus ntshai heev.

6 Thiab kuv pom rooj ntug qhib, thiab Vajtswv tus Me Nyuam Yaj nqis saum ntuj ceeb tsheej los; thiab nws nqis los thiab qhia nws tus kheej rau lawv.

7 Thiab kuv kuj pom thiab ua tim khawv tias tus Vaj Ntsuj Plig Dawb Huv nqis los rau kaum ob tug ntxiv; thiab Vajtswv tau muab lawv tsa, thiab xaiv lawv.

8 Thiab tus tim tswv hais rau kuv, hais tias: Saib seb tus Me Nyuam Yaj kaum ob tug thwj tim, cov uas Vajtswv xaiv los txhawb pab koj cov tub ki.

9 Thiab nws hais rau kuv tias: Koj puas nco qab txog tus Me Nyuam Yaj kaum ob tug thwj tim thaud? Saib seb lawv yog cov uas yuav txiav txim rau kaum ob xeem neeg Ixayees; yog li ntawd, cov no yuav txiav txim rau kaum ob tug qhuab qhia ntawm koj cov tub ki; vim nej yog los ntawm tsev neeg Ixayees los.

10 Thiab kaum ob tug qhuab qhia uas koj pom no yuav txiav txim rau koj cov tub ki. Thiab, saib seb, lawv ua ncaj ncees ib txhis li; vim yog lawv txoj kev ntseeg Vajtswv tus Me Nyuam Yaj nws cov ntshav thiaj ua rau lawv tej tsoos tsho dawb paug.

11 Thiab tus tim tswv hais rau kuv tias: Ntsia saib! Thiab kuv ntsia, thiab pom peb tiam neeg coj ncaj ncees tuag dhau mus; thiab lawv tej tsoos tsho dawb paug zoo ib yam li Vajtswv tus Me Nyuam Yaj. Thiab tus tim tswv hais rau kuv tias: Tus Me Nyuam Yaj cov ntshav ua rau cov no dawb paug, vim yog lawv txoj kev ntseeg nws.

12 Thiab kuv, Nifais, kuj pom neeg coob leej ntawm tiam neeg thib plaub uas coj ncaj ncees tuag dhau mus.

13 Thiab tau muaj tias kuv pom ntau pab neeg hauv ntiaj teb tuaj sib sau ua ke.

14 Thiab tus tim tswv tau hais rau kuv tias: Saib seb koj cov tub ki, thiab koj cov kwv tij cov tub ki.

15 Thiab tau muaj tias kuv ntsia thiab pom kuv cov tub ki cov neeg tuaj sib sau ua ke tsheej pab tawm tsam kuv cov tij laug cov tub ki; thiab lawv tau sib sau ua ke tuaj sib ntaus sib tua.

16 Thiab tus tim tswv tau hais rau kuv, hais tias: Saib seb lub qhov dej uas txhawv cov dej vuab tsuab uas koj txiv pom; muaj tseeb tiag, twb yog tus dej uas nws hais txog; thiab qhov tob ntawm tus dej ntawd yog qhov tob ntawm ntuj txiag teb tsaus.

17 Thiab txoj kev tsaus ntuj uas muaj huab zig niab yog tus dab phem tej kev ntxias uas npog noob neej tej qhov muag thiab ua rau lawv lub siab tawv, thiab coj lawv mus rau tej kev dav, kom lawv piam sij thiab ploj mus.

18 Thiab lub tsev loj thiab dav, uas koj txiv pom, yog noob neej tej zeem muag tsis muaj nuj nqis thiab lawv txoj kev muab hlob. Thiab muaj ib tug kwj tob tob uas loj thiab txaus ntshai heev uas muab lawv kem; muaj tseeb tiag, twb yog txoj lus ntawm Vajtswv tus uas Nyob Mus Ib Txhis txoj kev txim lij, thiab tus Mexiyas uas yog Vajtswv tus Me Nyuam Yaj, tus uas tus Vaj Ntsuj Plig Dawb Huv ua pov thawj txog, txij puag thaum chiv keeb lub ntiaj teb los mus txog rau lub sij hawm no, thiab txij lub sij hawm no mus lawm yav tom ntej thiab mus ib txhis li.

19 Thiab thaum tus tim tswv hais tej lus no, kuv saib thiab pom kuv cov tij laug cov tub ki sib tawm tsam nrog kuv cov tub ki, raws li tus tim tswv cov lus hais; thiab vim kuv cov tub ki txoj kev muab hlob, thiab tus dab phem tej kev ntxias, kuv pom tias kuv cov tij laug cov tub ki tau kov yeej kuv cov tub ki cov neeg.

20 Thiab tau muaj tias kuv saib, thiab pom kuv cov tij laug cov tub ki cov neeg pom tias lawv tau kov yeej kuv cov tub ki; thiab lawv tau tawm mus tsheej pab rau hauv thaj av.

21 Thiab kuv pom lawv sib sau ua ke tsheej pab; thiab kuv pom tej kev ua rog thiab hnov lus paj lus cua txog kev ua rog nyob hauv lawv; thiab kuv pom ntau tiam neeg tuag dhau mus nyob hauv tej kev ua rog thiab kev hnov lus paj lus cua txog kev ua rog.

22 Thiab tus tim tswv hais rau kuv tias: Saib seb cov no yuav tso lawv txoj kev ntseeg tseg zuj zus.

23 Thiab tau muaj tias kuv pom hais tias, tom qab lawv tau tso txoj kev ntseeg tseg lawv tau los ua ib co neeg dub, thiab ntxim ntxub, thiab vuab tsuab, ua neeg tub nkeeg heev thiab muaj kev qias txhua yam.