Tshooj 5
Xaliyas yws Lihais—Nkawd zoo siab rau qhov nkawd cov tub rov qab los txog—Lawv ua kev cai txi—Cov phiaj toog muaj Mauxes thiab cov yaj saub tej lus sau—Cov phiaj qhia tias Lihais yog Yauxej ib tug xeeb leej xeeb ntxwv—Lihais qhia tej yuav muaj los yav tom ntej txog nws cov tub ki thiab txog kev ceev cov phiaj. Kwv yees li 600–592 xyoos ua ntej Yexus yug los.
1 Thiab tau muaj tias tom qab peb tau los rau nram roob moj sab qhua los cuag peb txiv, saib seb, nws xyiv fab heev, thiab kuv niam, Xaliyas, zoo siab heev ib yam nkaus, vim nws quaj ntsuag tiag yog vim peb.
2 Vim nws tau xav tias peb tau piam sij nyob rau pem roob moj sab qhua lawm; thiab nws kuj tau yws yws rau kuv txiv, hais rau nws tias nws yog ib tug neeg uas pheej ua yog toog pom ntau yam; hais tias: Saib seb koj tau coj peb tawm ntawm thaj av uas yog peb qub txeeg qub teg, thiab kuv cov tub los tsis muaj lawm, thiab wb yuav piam sij nyob hauv roob moj sab qhua no.
3 Thiab kuv niam tau siv yam lus li no yws kuv txiv.
4 Thiab tau muaj tias kuv txiv hais rau nws, hais tias: Kuv paub tias kuv yog ib tug neeg uas pheej ua yog toog pom ntau yam; vim tias yog kuv tsis tau pom tej yam ntawm Vajtswv nyob hauv txoj kev ua yog toog ntshe kuv twb tsis paub txog Vajtswv txoj kev zoo, tiam sis tseem nyob hauv Yeluxalees, thiab raug piam sij nrog kuv cov kwv tij.
5 Tiam sis saib seb, kuv tau txais ib thaj av uas cog lus cia, qhov ntawd ua rau kuv zoo siab; muaj tseeb tiag, thiab kuv paub tias tus Tswv yuav cawm kuv cov tub dim tawm ntawm Lanpas txhais tes, thiab coj lawv rov qab los rau wb nyob nram roob moj sab qhua no.
6 Thiab kuv txiv, Lihais, tau hais cov lus zoo li no txog peb kom nplij kuv niam, Xaliyas, lub siab, thaum peb taug kev nyob hauv roob moj sab qhua mus pem thaj av Yeluxalees, mus nqa cov Neeg Yudais phau ceev xwm txheej.
7 Thiab thaum peb tau rov qab los txog ntawm peb txiv lub tsev pheeb suab ntaub, saib seb nkawd txoj kev xyiv fab twb puv npo, thiab qhov no nplij kuv niam lub siab.
8 Thiab kuv niam tau hais li no tias: Nim no kuv paub tseeb tias tus Tswv tau txib kom kuv tus txiv khiav tawm mus rau tom roob moj sab qhua; muaj tseeb tiag, thiab kuv kuj paub tseeb tias tus Tswv tau tsom kwm kuv cov tub, thiab tau cawm lawv tawm ntawm Lanpas tes, thiab tau muab hwj chim rau lawv xwv kom lawv yuav muaj peev xwm ua tiav tej yam uas tus Tswv tau txib kom lawv ua. Thiab nws tau hais tej yam lus zoo li no.
9 Thiab tau muaj tias lawv tau xyiv fab heev kawg li, thiab tau ua kev cai txi thiab hlawv tsiaj pub rau tus Tswv; thiab lawv ua Ixayees tus Vajtswv tsaug.
10 Thiab tom qab lawv tau ua Ixayees tus Vajtswv tsaug, kuv txiv, Lihais, muab cov ceev xwm txheej uas tau sau rau saum cov phiaj toog los, thiab nws muab los tshawb xyuas tom hauv paus tuaj.
11 Thiab nws pom tias cov ceev xwm txheej no muaj Mauxes tsib phau ntawv nyob hauv, uas qhia ib zaj txog kev tsim lub ntiaj teb, thiab kuj qhia txog Adas thiab Evas, ob tug uas yog peb thawj tus niam thiab txiv.
12 Thiab kuj muaj cov Neeg Yudais ib phau ceev xwm txheej txij thaum chiv keeb los, mus txog rau thaum vaj ntxwv Xedekiyas sawv kav teb chaws Yudas.
13 Thiab kuj muaj cov yaj saub dawb huv tej kev qhia tej yuav muaj los yav tom ntej, txij puag thaum chiv keeb los, mus txog rau thaum Xedekiyas pib sawv los kav teb chaws; thiab kuj muaj ntau zaj lus qhia tej yuav muaj los yav tom ntej uas yog Yelemis lub qhov ncauj hais.
14 Thiab tau muaj tias kuv txiv, Lihais, kuj tshawb pom tias nyob hauv cov phiaj toog ntawd muaj ib zaj keeb kwm qhia txog nws tej poj koob yawm txwv, yog li ntawd nws thiaj paub tias nws yog Yauxej ib tug xeeb ntxwv; muaj tseeb tiag, twb yog tus Yauxej uas yog Yakhauj tus tub, tus uas raug muab muag mus rau hauv teb chaws Iyiv, thiab yog tus uas tus Tswv txhais tes tau tsom kwm, xwv kom nws yuav tsom kwm tau nws txiv, Yakhauj, thiab tag nrho nws tsev neeg dim txoj kev tshaib kev nqhis.
15 Thiab tib tug Vajtswv uas tau tsom kwm lawv tau coj lawv tawm ntawm kev poob cev qhev thiab tawm ntawm thaj av Iyiv.
16 Thiab xws li no kuv txiv, Lihais, nrhiav tau nws cov poj koob yawm txwv zaj qhia caj ceg. Thiab Lanpas kuj yog Yauxej ib tug xeeb ntxwv, yog li ntawd nws thiab nws tej poj koob yawm txwv thiaj tau khaws cov ceev xwm txheej no cia.
17 Thiab nim no thaum kuv txiv tau pom tag nrho tej no, nws muaj tus Ntsuj Plig puv npo, thiab pib qhia tej yuav muaj los yav tom ntej txog nws cov tub ki—
18 Hais tias cov phiaj toog no yuav tawm mus rau txhua haiv neeg, txhua xeem neeg, txhua yam lus, thiab txhua yam neeg uas yog nws cov tub ki.
19 Yog li ntawd, nws hais tias cov phiaj toog no yuav tsis raug piam sij ib zaug li; thiab yuav tsis muaj ib lub caij nyoog uas cov phiaj toog no yuav ploj mus li. Thiab nws tau qhia ntau yam uas yuav muaj los yav tom ntej txog nws cov tub ki.
20 Thiab tau muaj tias los txog niaj hnub nim no kuv thiab kuv txiv wb tau ua raws li tej lus txib uas tus Tswv tau txib kom peb ua.
21 Thiab peb twb nqa tau cov ceev xwm txheej uas tus Tswv tau txib peb, thiab tau muab tshawb xyuas thiab pom tias cov ceev xwm txheej no yeej zoo; muaj tseeb tiag, twb muaj nuj nqis heev rau peb, peb thiaj tseem tshwj tau tus Tswv tej lus txib tseg cia rau peb tej me nyuam thiab.
22 Yog li ntawd, yog tus Tswv lub tswv yim uas peb yuav tsum coj cov ceev xwm txheej no nrog peb, thaum peb tsiv nyob hauv roob moj sab qhua mus rau tim thaj av uas cog lus cia.