1 Thiab tau muaj tias tom qab Vajtswv tau muab kuv, Nifais, coj mus los ntawm tus Ntsuj Plig, thiab kuv tau pom txhua yam no, kuv rov qab los rau tom kuv txiv lub tsev pheeb suab ntaub.

2 Thiab tau muaj tias kuv pom kuv cov tij laug, thiab lawv tab tom sib cav zom zaws txog tej yam uas kuv txiv tau hais rau lawv.

3 Vim nws yeej tau hais ntau yam tseem ceeb rau lawv, tej yam uas nyuaj rau ib tug neeg to taub, yog nws tsis nug tus Tswv; thiab vim lawv ua lawv lub siab tawv qhawv, yog li ntawd lawv tsis tau ntsia ntsoov tus Tswv li lawv yuav tsum ua.

4 Thiab nim no kuv, Nifais, tu siab heev vim yog lawv lub siab tawv, thiab vim yog tej yam uas kuv tau pom, thiab kuv paub tias tej ntawd yeej yuav muaj raws li hais vim yog noob neej tej kev phem heev.

5 Thiab tau muaj tias kuv qaug zog heev vim yog kuv tej kev txom nyem, vim kuv xav tias ntshe kuv tej kev txom nyem loj tshaj txhua yam huv tib si, vim yog txoj kev puas tsuaj ntawm kuv cov neeg, vim kuv tau pom lawv txoj kev poob mus.

6 Thiab tau muaj tias tom qab kuv rov qab muaj zog kuv tau nug kuv cov tij laug, xav paub saib xwm txheej dab tsi ua rau lawv sib cav.

7 Thiab lawv hais tias: Saib seb, peb tsis to taub cov lus uas peb txiv tau hais txog cov ceg ntoo txiv roj nyeg ntawm tsob ntoo txiv roj, thiab ntsig txog Lwm Haiv Neeg.

8 Thiab kuv hais rau lawv tias: Nej puas tau nug tus Tswv?

9 Thiab lawv teb rau kuv tias: Peb tsis tau; vim tus Tswv tsis ua tej yam zoo li no rau peb paub.

10 Saib seb, kuv hais rau lawv tias: Yog vim li cas nej thiaj tsis ua raws li tus Tswv tej lus txib? Yog vim li cas nej thiaj yuav piam sij, los ntawm nej txoj kev siab tawv?

11 Nej tsis nco qab txog tej yam uas tus Tswv tau hais lawm los?—Yog hais tias nej tsis ua nej lub siab tawv qhawv, thiab nug kuv los ntawm txoj kev ntseeg, ntseeg tias nej yeej yuav tau txais, rau siab ntso coj kuv tej lus txib, ces tus Tswv yeej yuav ua tej yam no rau nej paub.

12 Saib seb, kuv hais rau nej tias, tau muab tsev neeg Ixayees piv rau ib tsob ntoo txiv roj, los ntawm tus Tswv tus Ntsuj Plig uas peb txiv muaj; thiab saib seb tsis yog peb tawg ntawm tsev neeg Ixayees los los, thiab peb tsis yog ib ceg ntawm tsev neeg Ixayees los?

13 Thiab nim no, qhov uas peb txiv hais tias yuav muab cov ceg nyeg los txuas rau, los ntawm txoj kev muaj txhij txhua ntawm Lwm Haiv Neeg, yog txhais li no, hais tias nyob rau hauv hnub nyoog kawg, thaum uas peb cov tub ki tau tso txoj kev ntseeg tseg zuj zus, muaj tseeb tiag, tau ntau xyoo, thiab ntau tiam neeg tom qab tus Mexiyas tau tshwm sim ntawm sab nqaij daim tawv los rau noob neej, thaum ntawd qhov txhij txhua ntawm tus Mexiyas txoj moo zoo yuav los rau Lwm Haiv Neeg, thiab los ntawm Lwm Haiv Neeg mus rau peb cov tub ki uas seem tshuav—

14 Thiab nyob rau hnub ntawd peb cov tub ki uas seem tshuav yuav paub tias lawv yog ib co ntawm tsev neeg Ixayees, thiab lawv yog tus Tswv cov neeg khi lus; thiab thaum ntawd lawv yuav paub thiab los mus paub txog lawv tej yawg koob, thiab kuj yuav los mus paub txog lawv tus Txhiv Dim txoj moo zoo, uas nws tau qhia rau lawv tej yawg koob; yog li ntawd, lawv yuav los paub txog lawv tus Txhiv Dim thiab txhua yam txog nws txoj lus qhuab qhia, kom lawv yuav paub los cuag nws thiab txais kev cawm dim.

15 Thiab thaum txog hnub ntawd lawv puas yuav zoo siab thiab qhuas lawv tus Vajtswv uas kav ib txhis, uas yog lawv lub pob zeb thiab lawv txoj kev cawm seej? Muaj tseeb tiag, nyob rau hnub ntawd, lawv puas yuav tau txais lub zog thiab txoj kev loj hlob tawg paj txi txiv los ntawm tsob tseem txiv hmab? Muaj tseeb tiag, lawv puas yuav los rau ntawm Vajtswv pab yaj tseeb?

16 Saib seb, kuv hais rau nej tias, lawv yuav ua li ntawd; tsev neeg Ixayees yuav rov qab nco txog lawv dua; tus Tswv yuav coj lawv rov qab los txuas rau tsob ntoo txiv roj tseeb, vim lawv yog ib tug ceg ntoo txiv roj nyeg.

17 Thiab tej uas peb txiv tau hais txhais li no, thiab nws hais tias yuav tsis muaj tej no kom txog thaum Lwm Haiv Neeg tau ua rau lawv tawg khiav ri niab tso; thiab nws hais tias yuav muaj tej no los ntawm Lwm Haiv Neeg los, xwv kom tus Tswv yuav ua tau nws lub hwj chim rau Lwm Haiv Neeg pom, vim rau qhov cov Neeg Yudais los yog tsev neeg Ixayees yuav xyeej nws.

18 Yog li ntawd, peb txiv tsis yog hais txog peb cov tub ki xwb, tiam sis nws hais txog tag nrho tsev neeg Ixayees, taw nrees mus rau qhov uas yuav muaj raws li txoj kev khi lus nyob rau hauv hnub nyoog kawg; txoj kev khi lus uas tus Tswv tau khi tseg rau peb tus yawg koob Anplaham, hais tias: Txhua haiv neeg uas nyob hauv lub ntiaj teb yuav tau koob hmoov los ntawm koj cov tub ki.

19 Thiab tau muaj tias kuv, Nifais, tau hais ntau yam rau lawv ntsig txog tej no; muaj tseeb tiag, kuv tau hais rau lawv ntsig txog cov Neeg Yudais txoj kev txum tim rov qab los nyob rau hauv hnub nyoog kawg.

20 Thiab kuv tau piav Yaxayas tej lus rau lawv, tej uas nws tau hais txog cov Neeg Yudais, los sis tsev neeg Ixayees, txoj kev txum tim rov qab los; thiab tom qab lawv raug txum tim rov qab los lawv yuav tsis raug kev ntxhov hnyo ntxiv lawm, thiab lawv yuav tsis tawg khiav ri niab dua. Thiab tau muaj tias kuv tau hais lus ntau rau kuv cov tij laug, ua rau lawv thiaj nyob tus thiab txo lawv lub hwj chim rau tus Tswv.

21 Thiab tau muaj tias lawv rov hais rau kuv dua, hais tias: Qhov uas peb txiv tau pom nyob hauv zaj npau suav txhais li cas? Tsob ntoo uas nws pom txhais li cas?

22 Thiab kuv hais rau lawv tias: Tsob ntoo ntawd yog ib tug yam ntxwv txog tsob ntoo uas cawm neeg txoj sia.

23 Thiab lawv hais rau kuv tias: Tus nqaj hlau uas peb txiv pom, uas coj mus rau tsob ntoo, txhais li cas?

24 Thiab kuv hais rau lawv tias tus nqaj hlau yog Vajtswv txoj lus; thiab cov uas mloog Vajtswv txoj lus, thiab tuav txoj lus no tsis tso, lawv yuav tsis piam sij ib zaug li; thiab tej kev haub ntxias thiab tus yeeb ncuab tej xib xub hluav taws yuav kov tsis yeej lawv ua rau lawv dig muag, kom coj lawv mus rau txoj kev puas tsuaj.

25 Yog li ntawd, kuv, Nifais, tau ntuas kom lawv mloog tus Tswv txoj lus; muaj tseeb tiag, kuv tau ntuas lawv tas lub zog ntawm kuv lub siab, thiab tas lub peev xwm uas kuv muaj, kom lawv mloog Vajtswv txoj lus thiab nco ntsoov ua txhua yam kom ua raws li nws tej lus txib tas mus li.

26 Thiab lawv hais rau kuv tias: Tus dej uas peb txiv pom txhais li cas?

27 Thiab kuv hais rau lawv tias cov dej uas kuv txiv pom yog txoj kev vuab tsuab; thiab vim nws lub siab xav txog ntau yam es nws thiaj tsis pom txoj kev vuab tsuab ntawm cov dej.

28 Thiab kuv hais rau lawv tias tus dej ntawd yog ib tug kwj tob tob uas phem heev, uas cais cov neeg phem deb ntawm tsob ntoo uas cawm neeg txoj sia, thiab deb ntawm Vajtswv haiv neeg ntseeg.

29 Thiab kuv hais rau lawv tias tus dej ntawd sawv cev ntawm ntuj txiag teb tsaus uas phem heev, uas tus tim tswv hais rau kuv tias yog npaj los rau cov neeg phem.

30 Thiab kuv hais rau lawv tias peb txiv kuj tau pom tias Vajtswv txoj kev txim lij uas kuj faib cov neeg phem tawm ntawm cov neeg ncaj ncees; thiab qhov ci ntawd zoo li ib tug nplaim hluav taws ci, uas nce mus rau Vajtswv mus ib txhiab thiab ib txhis, thiab tsis muaj qhov kawg li.

31 Thiab lawv hais rau kuv tias: Qhov no puas txhais hais tias yog txoj kev tsim txom ntawm cev nqaij daim tawv nyob rau lub caij sim siab, los sis puas txhais tias yog theem kawg ntawm tus ntsuj plig tom qab cev nqaij daim tawv tau tuag lawm, los sis puas yog hais txog tej yam uas yog sab cev nqaij daim tawv?

32 Thiab tau muaj tias kuv hais rau lawv tias qhov ntawd piv txog tej yam uas yog sab cev nqaij daim tawv thiab sab ntsuj plig; vim hnub uas lawv yuav raug txiav txim rau tej yam lawv ua yeej yuav los, muaj tseeb tiag, twb yog tej yam uas cev nqaij daim tawv tau ua nyob rau hauv lub caij sim siab.

33 Yog li ntawd, yog hais tias lawv tuag thaum lawv ua phem lawv yeej yuav raug muab pov tseg mus, raws li tej yam ntawm sab ntsuj plig, uas raws li txoj kev ncaj ncees; yog li ntawd, lawv yuav raug coj los sawv ntawm Vajtswv xub ntiag, los raug txiav txim rau tej yam lawv ua; thiab yog hais tias lawv tau ua tej yam vuab tsuab ces lawv yeej vuab tsuab; thiab yog hais tias lawv vuab tsuab ces yeej muaj tseeb tias lawv yuav nyob tsis tau hauv Vajtswv lub nceeg vaj; yog lawv nyob tau, ces Vajtswv lub nceeg vaj kuj yog vuab tsuab tib yam thiab.

34 Tiam sis saib seb, kuv hais rau nej tias, Vajtswv lub nceeg vaj tsis vuab tsuab, thiab yuav muaj tsis tau ib yam dab tsi uas vuab tsuab nkag tau mus rau hauv Vajtswv lub nceeg vaj; yog li ntawd yeej yuav tsum muaj ib qho chaw uas vuab tsuab npaj tseg rau yam uas vuab tsuab.

35 Thiab muaj ib qho chaw uas tau npaj tseg, muaj tseeb tiag, twb yog lub ntuj txiag teb tsaus phem heev uas kuv tau hais txog, thiab tus dab phem yog tus uas npaj qhov chaw ntawd; yog li ntawd qhov kawg ntawm neeg tej ntsuj plig yog los nyob hauv Vajtswv lub nceeg vaj, los sis raug ntiab tawm vim txoj kev txim lij uas kuv tau hais txog ntawd.

36 Yog li ntawd, cov neeg phem raug xyeej tawm ntawm cov ncaj ncees, thiab tawm ntawm tsob ntoo uas cawm neeg txoj sia, uas muaj cov txiv ntoo uas muaj nuj nqis tshaj thiab qab tshaj txhua yam txiv ntoo; muaj tseeb tiag, thiab yog ib lub txiaj ntsim uas zoo tshaj ntawm tag nrho Vajtswv tej txiaj ntsim. Thiab kuv tau hais rau kuv cov tij laug li no. Amees.