Tshooj 3
Lihais cov tub rov qab mus pem Yeluxalees mus nqa cov phiaj toog—Lanpas tsis kam muab cov phiaj rau lawv—Nifais ntuas thiab yaum nws cov tij laug—Lanpas txhav lawv tej khoom thiab yuav muab lawv tua—Lamas thiab Lemu-ees ntaus Nifais thiab Xam thiab ib tug tim tswv txwv tsis pub nkawd ua li ntawd. Kwv yees li 600–592 xyoos ua ntej Yexus yug los.
1 Thiab tau muaj tias kuv, Nifais, tom qab kuv nrog tus Tswv tham tas lawm, kuv rov qab los rau tom kuv txiv lub tsev pheeb suab ntaub.
2 Thiab tau muaj tias nws hais rau kuv, hais tias: Saib seb kuv tau ua ib zaj npau suav, nyob hauv zaj npau suav no tus Tswv tau txib kuv tias koj thiab koj cov tij laug yuav rov qab mus lawm pem Yeluxalees.
3 Vim saib seb, Lanpas muaj cov Neeg Yudais phau ceev xwm txheej thiab kuj muaj ib zaj qhia caj ceg txog kuv cov poj koob yawm txwv, thiab phau ceev xwm txheej thiab zaj caj ceg no yog muab sau rau hauv cov phiaj toog.
4 Yog li ntawd, tus Tswv tau txib kuv tias koj thiab koj cov tij laug yuav mus lawm pem Lanpas tsev, thiab nrhiav cov ceev xwm txheej, thiab nqa cov ntawd los rau ntawm roob moj sab qhua no.
5 Thiab nim no, saib seb koj cov tij laug yws yws, hais tias qhov uas kuv hais kom lawv ua yog ib qho nyuaj heev; tiam sis saib seb twb tsis yog kuv hais kom lawv ua, tiam sis qhov no yog tus Tswv txoj lus txib.
6 Yog li ntawd, kuv tus me tub, cia li mus, thiab tus Tswv yuav txhawb nqa koj, vim tias koj tsis tau yws.
7 Thiab tau muaj tias kuv, Nifais, hais rau kuv txiv tias: Kuv yuav mus thiab ua tej uas tus Tswv tau txib kom ua, vim kuv paub tias tus Tswv yeej tsis muab tej lus txib rau noob neej ua ib yam dab tsi li, tsuas yog nws twb npaj ib txoj kev rau lawv xwv kom lawv yuav ua tau yam uas nws txib lawv ua.
8 Thiab tau muaj tias thaum kuv txiv tau hnov cov lus no nws zoo siab heev, vim nws paub tias tus Tswv tau foom koob hmoov rau kuv.
9 Thiab kuv, Nifais, thiab kuv cov tij laug taug kev mus hauv roob moj sab qhua, peb nqa peb cov tsev pheeb suab ntaub, rov qab mus pem thaj av Yeluxalees.
10 Thiab tau muaj tias thaum peb rov mus txog pem thaj av Yeluxalees lawm, kuv thiab kuv cov tij laug tau sib tham.
11 Thiab peb sib tw hmoov—saib peb leej twg yuav tsum mus rau hauv Lanpas lub tsev. Thiab tau muaj tias twv hmoov poob rau Lamas; thiab Lamas tau mus hauv Lanpas lub tsev, thiab nws nrog Lanpas tham thaum Lanpas zaum nyob hauv nws lub tsev.
12 Thiab nws thov Lanpas kom muab cov ceev xwm txheej uas tau muab sau rau saum cov phiaj toog, uas muaj zaj qhia caj ceg txog kuv txiv.
13 Thiab saib seb, tau muaj tias Lanpas npau taws, thiab tau muab Lamas ntiab tawm ntawm nws lub xub ntiag mus; thiab nws tsis kam muab cov ceev xwm txheej rau Lamas. Yog li ntawd, nws thiaj hais rau Lamas tias: Saib seb koj yog ib tug tub sab, thiab kuv yuav muab koj tua.
14 Tiam sis Lamas tau khiav ntawm Lanpas lub xub ntiag mus, thiab tau piav tej uas Lanpas tau ua, rau peb. Thiab peb pib tu siab heev, thiab kuv cov tij laug tab tom yuav rov qab mus cuag kuv txiv nram roob moj sab qhua.
15 Tiam sis saib seb kuv hais rau lawv tias: Ib yam li tus Tswv muaj txoj sia nyob, thiab ib yam li peb muaj txoj sia nyob, peb yuav tsis rov qab mus cuag peb txiv nram roob moj sab qhua, kom txog thaum peb ua tiav yam uas tus Tswv tau txib kom peb ua lawm tso.
16 Yog li ntawd, cia peb rau siab ntso ua raws li tus Tswv tej lus txib; yog li ntawd cia peb mus lawm nram thaj av uas yog peb txiv qub txeeg qub teg, vim saib seb nws tso tej nyiaj thiab tej kub tseg, thiab txhua yam uas muaj nuj nqis. Thiab nws tau ua txhua yam zoo li no los vim yog tus Tswv tej lus txib.
17 Vim nws paub tias Yeluxalees yuav tsum raug puas tsuaj mus, rau qhov vim tib neeg txoj kev phem.
18 Vim saib seb, lawv tau xyeej cov yaj saub tej lus. Yog li ntawd, yog hais tias kuv txiv tseem nyob hauv thaj av tom qab tus Tswv tau txib kom nws khiav tawm ntawm thaj av mus, saib seb, nws yuav piam sij tib yam. Yog li ntawd, nws thiaj yuav tsum khiav tawm ntawm thaj av mus.
19 Thiab saib seb, yog Vajtswv lub tswv yim uas peb yuav tsum nqa kom tau cov ceev xwm txheej no, xwv kom peb yuav tshwj tau peb cov yawg koob tej lus cia rau peb cov me nyuam.
20 Thiab kom peb yuav muab tag nrho cov yaj saub dawb huv tej lus uas lawv tau hais los ntawm lawv lub qhov ncauj tshwj cia rau peb cov me nyuam, uas yog Vajtswv tus Ntsuj Plig thiab nws lub hwj chim muab los rau lawv, txij thaum lub ntiaj teb chiv keeb, los txog rau niaj hnub nim no.
21 Thiab tau muaj tias kuv tau hais zoo li no yaum kuv cov tij laug, kom lawv yuav rau siab ua raws li Vajtswv tej lus txib.
22 Thiab tau muaj tias peb tau mus nram thaj av uas yog peb qub txeeg qub teg, thiab peb tau sau peb tej nyiaj tej kub thiab peb tej khoom muaj nuj nqis los ua ke.
23 Thiab tom qab peb tau sau tej yam no los ua ke, peb tau rov qab mus rau pem Lanpas lub tsev dua.
24 Thiab tau muaj tias peb mus ntsib Lanpas, thiab thov kom nws muab cov ceev xwm txheej uas muab sau rau saum cov phiaj toog rau peb, ces peb yuav muab peb tej nyiaj tej kub, thiab tag nrho peb tej khoom muaj nuj nqis rau nws.
25 Thiab tau muaj tias thaum Lanpas pom peb tej khoom, thiab pom tias muaj ntau heev kawg li, nws tau ntshaw, nws thiaj muab peb ntiab tawm, thiab xa nws cov tub qhe tuaj muab peb tua, xwv kom nws yuav tau peb tej khoom.
26 Thiab tau muaj tias peb tau khiav ntawm Lanpas cov tub qhe mus, thiab peb yuav tsum tso peb tej khoom rau tom qab, thiab cov khoom tau poob rau Lanpas tes.
27 Thiab tau muaj tias peb tau khiav mus rau tom roob moj sab qhua, thiab Lanpas cov tub qhe raws tsis tau peb, thiab peb tau mus nkaum nyob rau hauv ib lub qhov tsua.
28 Thiab tau muaj tias Lamas npau taws rau kuv, thiab rau kuv txiv; thiab Lemu-ees los kuj npau taws ib yam, vim nws mloog Lamas lus. Yog li ntawd Lamas thiab Lemu-ees tau cem ntau yam lus hnyav rau wb, nkawd ob tug kwv, thiab nkawd tau xuas ib tug pas ntaus wb.
29 Thiab tau muaj tias thaum nkawd tab tom xuas pas ntaus wb, saib seb, tus Tswv ib tug tim tswv tau los thiab sawv ntawm nkawd xub ntiag, thiab nws hais rau nkawd, hais tias: Vim li cas neb xuas pas ntaus neb tus kwv? Neb tsis paub tias tus Tswv tau xaiv nws los ua tus kav neb los, thiab ua li no los twb yog vim neb tej kev ua phem? Saib seb nej yuav tsum rov qab mus lawm pem Yeluxalees dua, thiab tus Tswv yuav coj Lanpas los rau hauv nej tes.
30 Thiab tom qab tus tim tswv tau hais lus rau peb, nws tau ncaim mus.
31 Thiab tom qab tus tim tswv tau ncaim mus, Lamas thiab Lemu-ees rov pib yws yws dua, hais tias: Yuav ua li cas tus Tswv thiaj yuav coj tau Lanpas los rau hauv peb tes? Saib seb, Lanpas yog ib tug neeg muaj meej mom thiab nws muaj peev xwm txib tau tsib caug leej, muaj tseeb tiag, nws muaj peev xwm tua tau tsib caug leej thiab; es vim li cas nws ho tua tsis tau peb?