1 Vim tau muaj tias tom qab kuv tau xav pom tej yam uas kuv txiv tau pom, thiab vim kuv ntseeg tias tus Tswv yeej muaj peev xwm ua tau tej ntawd rau kuv pom, thaum kuv tab tom zaum xav hauv kuv nruab siab tus Tswv tus Ntsuj Plig tau coj kuv tawm mus, muaj tseeb tiag, coj kuv mus rau puag saum ib lub ncov roob uas siab kawg, lub uas kuv tsis tau pom dua li, thiab lub uas kuv txhais ko taw tsis tau mus txog dua li.

2 Thiab tus Ntsuj Plig hais rau kuv tias: Saib seb, koj xav tau dab tsi?

3 Thiab kuv hais tias: Kuv xav pom tej yam uas kuv txiv tau pom.

4 Thiab tus Ntsuj Plig hais rau kuv tias: Koj puas ntseeg tias koj txiv tau pom tsob ntoo uas nws tau hais?

5 Thiab kuv hais tias: Muaj tseeb tiag, koj yeej paub tias kuv ntseeg tag nrho kuv txiv cov lus.

6 Thiab thaum kuv tau hais cov lus no tas, tus Ntsuj Plig qw nrog ib lub suab nrov nrov hais tias: Hauxanas rau tus Tswv, tus Vajtswv uas siab tshaj plaws; vim nws yog Vajtswv tus uas kav lub ntiaj teb tag nrho, muaj tseeb tiag, twb siab tshaj txhua yam. Thiab koj tau koob hmoov, Nifais, vim koj ntseeg tus Vajtswv uas siab tshaj plaws Leej Tub; yog li ntawd, koj yuav pom tej uas koj xav pom.

7 Thiab saib seb yuav muab qhov no ua ib lub cim rau koj, hais tias tom qab koj tau pom tsob ntoo uas txi cov txiv uas koj txiv tau noj, koj kuj yuav pom ib tug txiv neej nqis saum ntuj ceeb tsheej los, thiab koj yuav pom nws; thiab tom qab koj pom nws koj yuav ua pov thawj hais tias nws yog Vajtswv Leej Tub.

8 Thiab tau muaj tias tus Ntsuj Plig hais rau kuv tias: Ntsia saib! Thiab kuv ntsia thiab pom ib tsob ntoo; thiab nws zoo li tsob ntoo uas kuv txiv tau pom; thiab qhov zoo nkauj ntawm tsob ntoo mas zoo nkauj tshaj, muaj tseeb tiag, zoo nkauj tshaj txhua yam uas zoo nkauj; thiab qhov dawb ntawm tsob ntoo yeej dawb tshaj qhov dawb ntawm cov daus uas cua muab ntsawj ya.

9 Thiab tau muaj tias tom qab kuv pom tsob ntoo, kuv hais rau tus Ntsuj Plig hais tias: Kuv pom tias koj tau muab tsob ntoo uas muaj nuj nqis tshaj dua li lwm tsob ntoo rau kuv pom.

10 Thiab nws hais rau kuv tias: Koj xav tau dab tsi?

11 Thiab kuv hais rau nws hais tias: Xav paub saib tsob ntoo txhais li cas—vim kuv hais lus rau nws ib yam li ib tug tib neeg hais lus; vim kuv pom tias nws muaj yam ntxwv zoo li ib tug neeg; tiam sis, kuv paub hais tias nws yog tus Tswv tus Ntsuj Plig; thiab nws hais lus rau kuv ib yam li ib tug neeg hais lus nrog rau lwm tus.

12 Thiab tau muaj tias nws hais rau kuv hais tias: Ntsia saib! Thiab kuv tig hlo mus ntsia nws, thiab kuv tsis pom nws; vim nws tau ncaim ntawm kuv xub ntiag mus lawm.

13 Thiab tau muaj tias kuv ntsia thiab pom lub tuam nroog Yeluxalees, thiab lwm cov nroog thiab. Thiab kuv pom lub nroog Naxales; thiab kuv pom ib tug nkauj xwb nyob hauv lub nroog Naxales, thiab nws yog ib tug nkauj xwb uas dawb thiab zoo nkauj heev.

14 Thiab tau muaj tias kuv pom rooj ntug qhib; thiab ib tug tim tswv nqis saud los thiab los sawv ntawm kuv xub ntiag; thiab nws hais rau kuv hais tias: Nifais, koj pom dab tsi?

15 Thiab kuv hais rau nws hais tias: Kuv pom ib tug nkauj xwb, tus uas dawb thiab zoo nkauj tshaj dua lwm tus nkauj xwb.

16 Thiab nws tau hais rau kuv hais tias: Koj puas paub hais tias Vajtswv twb yuav nqis los nrog neeg nyob?

17 Thiab kuv hais rau nws hais tias: Kuv paub tias nws yeej hlub nws cov me nyuam; txawm li ntawd los, kuv tsis paub tej ntsiab lus ntawm txhua yam.

18 Thiab nws hais rau kuv hais tias: Saib seb, tus nkauj xwb uas koj pom yog leej niam ntawm Vajtswv Leej Tub, raws li sab cev nqaij daim tawv.

19 Thiab tau muaj tias kuv pom tias tus Ntsuj Plig tau muab tus nkauj xwb coj mus; thiab tom qab tus Ntsuj Plig muab nws coj mus tau ib ntus tus tim tswv hais rau kuv hais tias: Ntsia saib!

20 Thiab kuv ntsia thiab pom dua tus nkauj xwb, nws tab tom puag ib tug me nyuam mos hauv nws caj npab.

21 Thiab tus tim tswv hais rau kuv hais tias: Saib seb Vajtswv tus Me Nyuam Yaj, muaj tseeb tiag, twb yog Leej Txiv tus uas Nyob Mus Ib Txhis Leej Tub! Koj puas paub lub ntsiab ntawm tsob ntoo uas koj txiv pom?

22 Thiab kuv teb nws, hais tias: Muaj tseeb tiag, yog Vajtswv txoj kev hlub, uas nthuav kom dav rau txhua txhia qhov chaw nyob hauv noob neej lub siab; yog li ntawd, tsob ntoo ntawd yog yam uas neeg xav tau tshaj txhua txhia yam.

23 Thiab nws hais rau kuv, hais tias: Muaj tseeb tiag, thiab yog qhov uas xyiv fab tshaj plaws rau yus tus ntsuj plig.

24 Thiab tom qab nws tau hais cov lus no tas, nws hais rau kuv tias: Ntsia saib! Thiab kuv ntsia, thiab kuv pom Vajtswv Leej Tub tawm mus rau noob neej; thiab kuv pom coob leej qhau cev rau ntawm nws ko taw thiab teev tiam nws.

25 Thiab tau muaj tias kuv pom tias tus nqaj hlau, uas kuv txiv tau pom, yog Vajtswv txoj lus, uas coj mus rau lub qhov dej txhawv uas muaj sia, los yog coj mus rau tsob ntoo uas cawm neeg txoj sia; cov dej no piv txog Vajtswv txoj kev hlub; thiab kuv kuj pom tias tsob ntoo uas cawm neeg txoj sia piv txog Vajtswv txoj kev hlub.

26 Thiab tus tim tswv tau hais rau kuv dua: Ntsia thiab saib qhov uas Vajtswv nqis los nrog neeg nyob!

27 Thiab kuv ntsia thiab pom neeg ntiaj teb tus Txhiv Dim, tus uas kuv txiv tau hais txog; thiab kuv kuj pom tus yaj saub uas yuav los npaj txoj kev rau nws. Thiab Vajtswv tus Me Nyuam Yaj mus thiab tus yaj saub ntawd tau muab nws ua kev cai raus dej; thiab tom qab nws tau ua kev cai raus dej, kuv pom rooj ntug qhib, thiab tus Vaj Ntsuj Plig Dawb Huv nqis saum ntuj ceeb tsheej los thiab tsaws rau saum nws yam li ib tug nquab.

28 Thiab kuv pom tias nws tawm mus qhuab qhia thiab foom koob hmoov rau cov neeg, nws muaj hwj chim thiab muaj yeeb koob loj kawg; thiab muaj neeg coob tau sib sau ua ke tuaj mloog nws; thiab kuv pom tias lawv muab nws ntiab tawm ntawm lawv mus.

29 Thiab kuv kuj pom kaum ob tug lawv nws qab. Thiab tau muaj tias tus Ntsuj Plig tau coj lawv ncaim ntawm kuv lub qhov muag mus, thiab kuv tsis pom lawv lawm.

30 Thiab tau muaj tias tus tim tswv rov qab hais rau kuv dua, hais tias: Ntsia saib! Thiab kuv ntsia, thiab kuv pom rooj ntug rov qab qhib dua, thiab kuv pom tej tim tswv nqis los nrog noob neej nyob; thiab tej tim tswv tau txhawb pab noob neej.

31 Thiab nws rov qab hais rau kuv dua, hais tias: Ntsia saib! Thiab kuv ntsia, thiab kuv pom Vajtswv tus Me Nyuam Yaj tawm mus rau noob neej. Thiab kuv pom muaj neeg coob cov uas muaj mob, thiab cov uas raug txom nyem los ntawm tej kab mob kev nkeeg, thiab ntawm tej dab phem thiab tej ntsuj plig tsis huv; thiab tus tim tswv hais thiab ua rau kuv pom tag nrho tej no. Thiab lawv zoo mob zoo nkeeg los ntawm Vajtswv tus Me Nyuam Yaj lub hwj chim; thiab nws tau ntiab tej dab phem thiab tej ntsuj plig tsis huv tawm mus.

32 Thiab tau muaj tias tus tim tswv rov qab hais rau kuv dua, hais tias: Ntsia saib! Thiab kuv ntsia thiab pom Vajtswv tus Me Nyuam Yaj, pom hais tias cov neeg tau muab nws txhom; muaj tseeb tiag, neeg ntiaj teb tau txiav txim rau Vajtswv tus uas kav ib txhis Leej Tub; thiab kuv tau pom thiab ua tim khawv.

33 Thiab kuv, Nifais, tau pom tias nws raug ntsia rau saum tus ntoo khaub lig thiab raug tua tuag rau neeg ntiaj teb tej kev txhaum.

34 Thiab tom qab nws raug tua tuag kuv pom hais tias neeg ntiaj teb coob leej tau sib sau ua ke tuaj nkaug tawm tsam tus Me Nyuam Yaj cov thwj tim; vim tus Tswv tus tim tswv muab kaum ob tug hu li no.

35 Thiab cov neeg ntiaj teb coob leej tau tuaj sib sau ua ke; thiab kuv pom tias lawv nyob hauv ib lub tsev loj thiab dav, zoo li lub tsev uas kuv txiv pom. Thiab tus Tswv tus tim tswv rov qab hais rau kuv dua, hais tias: Saib seb cov neeg ntiaj teb thiab lawv tej tswv yim ntawd; muaj tseeb tiag, saib seb tsev neeg Ixayees tau sib sau ua ke tuaj nkaug tawm tsam tus Me Nyuam Yaj kaum ob tug thwj tim.

36 Thiab tau muaj tias kuv pom thiab ua pov thawj, hais tias lub tsev loj thiab dav ntawd yog neeg ntiaj teb txoj kev muab hlob; thiab lub tsev ntawd raug puas tsuaj mus, thiab txoj kev puas tsuaj ntawd yeej phem heev. Thiab tus Tswv tus tim tswv rov qab hais rau kuv dua, hais tias: Txhua haiv neeg, txhua xeem neeg, txhua yam lus, thiab txhua yam neeg, cov uas nkaug tawm tsam tus Me Nyuam Yaj kaum ob tug thwj tim, yuav raug puas tsuaj zoo li no.