1 Thiab nim no kuv xav kom nej paub tias, tom qab kuv txiv, Lihais, tau qhia tej yuav muaj los yav tom ntej txog nws cov tub ki, tau muaj tias tus Tswv rov qab hais rau nws dua, hais tias tsis tsim nyog rau nws, Lihais, kom nws coj nws tsev neeg mus rau tom roob moj sab qhua xwb; tiam sis nws cov tub yuav tsum coj luag tej ntxhais los ua poj niam, xwv kom lawv yuav yug tau cov tub ki rau tus Tswv nyob rau hauv thaj av uas cog lus cia.

2 Thiab tau muaj tias tus Tswv txib nws tias kom kuv, Nifais, thiab kuv cov tij laug, rov qab mus lawm pem thaj av Yeluxalees dua, thiab mus coj Ixama-ees thiab nws tsev neeg los rau nram roob moj sab qhua.

3 Thiab tau muaj tias kuv, Nifais, nrog rau kuv cov tij laug, tau rov qab mus rau hauv roob moj sab qhua rov mus lawm pem Yeluxalees dua.

4 Thiab tau muaj tias peb mus rau hauv Ixama-ees lub tsev, thiab peb tau ua rau Ixama-ees txaus siab rau peb, peb thiaj tau hais tus Tswv cov lus rau nws.

5 Thiab tau muaj tias tus Tswv tau ua rau Ixama-ees lub siab mos muag, thiab kuj tau ua rau nws tsev neeg lub siab mos muag, lawv thiaj kam nrog peb los mus rau nram roob moj sab qhua los cuag peb txiv nram nws lub tsev pheeb suab ntaub.

6 Thiab tau muaj tias thaum peb tab tom taug kev nyob hauv roob moj sab qhua, saib seb Lamas thiab Lemu-ees, thiab Ixama-ees ob tug ntxhais, thiab Ixama-ees ob tug tub thiab nkawd tsev neeg, tau ntxeev siab tawm tsam peb; muaj tseeb tiag, tau tawm tsam kuv, Nifais, thiab Xam, thiab lawv txiv, Ixama-ees, thiab nws tus poj niam, thiab nws peb tug ntxhais.

7 Thiab tau muaj tias nyob hauv txoj kev ntxeev siab no, lawv xav rov qab mus lawm pem thaj av Yeluxalees.

8 Thiab nim no kuv, Nifais, nyuaj siab txog lawv txoj kev siab tawv, yog li ntawd kuv thiaj hais rau lawv, hais tias, muaj tseeb tiag, twb hais rau Lamas thiab Lemu-ees tias: Saib seb neb yog kuv ob tug tij laug, yog vim li cas neb lub siab yuav tawv ua luaj, thiab neb lub cim xeeb yuav dig ua luaj, es neb yuav kom kuv, uas yog neb tus kwv, yuav tsum hais neb, muaj tseeb tiag, thiab ua ib tug yam ntxwv rau neb?

9 Yog vim li cas neb ho tsis mloog tus Tswv txoj lus?

10 Yog vim li cas neb ho tsis nco qab tias neb tau pom tus Tswv ib tug tim tswv?

11 Muaj tseeb tiag, thiab yog vim li cas neb ho tsis nco qab tej yam xwm tseem ceeb uas tus Tswv tau ua rau peb, tau cawm peb dim ntawm Lanpas tes, thiab kom peb nqa tau phau ceev xwm txheej?

12 Muaj tseeb tiag, thiab yog vim li cas neb ho tsis nco qab tias tus Tswv muaj peev xwm ua tau txhua yam raws li nws lub siab nyiam, rau noob neej, yog tias lawv muab siab rau ntseeg nws? Yog li ntawd, cia peb rau siab ntseeg nws.

13 Thiab yog tias peb rau siab ntseeg nws, peb yuav tau txais thaj av uas cog lus cia; thiab ib ntus tom ntej no neb yuav paub tias tus Tswv txoj lus ntsig txog kev puas tsuaj ntawm Yeluxalees yeej yuav muaj raws li hais; vim tias txhua yam uas tus Tswv tau hais txog kev puas tsuaj ntawm Yeluxalees yeej yuav muaj raws li ntawd.

14 Vim saib seb, tsis ntev no tus Tswv tus Ntsuj Plig yuav tsis tshoov lawv lub siab; vim saib seb, lawv tau xyeej cov yaj saub, thiab lawv tau tso Yelemis rau hauv lub tsev kaw. Thiab lawv tau nrhiav kev muab kuv txiv txoj sia txo pov tseg, lawv thiaj tau ntiab nws tawm hauv thaj av mus.

15 Nim no saib seb, kuv hais rau neb tias yog neb rov qab mus pem Yeluxalees neb yuav piam sij nrog lawv ib yam nkaus. Thiab nim no, yog neb xaiv li no, es neb rov mus pem thaj av, thiab nco ntsoov cov lus uas kuv hais rau neb, hais tias yog neb mus neb yuav piam sij ib yam nkaus; vim tus Tswv tus Ntsuj Plig txhib kom kuv yuav hais li no.

16 Thiab tau muaj tias thaum kuv, Nifais, tau hais cov lus no rau kuv ob tug tij laug, nkawd tau npau taws rau kuv. Thiab tau muaj tias nkawd tau xuas tes ntsiab nthos kuv, vim saib seb, nkawd npau taws heev kawg li, thiab nkawd tau muab hlua los khi kuv, vim nkawd nrhiav kev muab kuv txoj sia txo pov tseg, es nkawd yuav tso kuv rau tom roob moj sab qhua rau tsiaj qus noj.

17 Tiam sis tau muaj tias kuv tau thov tus Tswv, hais tias: Auj tus Tswv, raws li kuv txoj kev ntseeg uas yog kev ntseeg koj, thov koj cawm kom kuv dim ntawm kuv ob tug tij laug tes; muaj tseeb tiag, muab lub zog rau kuv xwv kom kuv yuav nti plam cov hlua uas khi kuv no.

18 Thiab tau muaj tias thaum kuv tau hais cov lus no, saib seb, cov hlua cia li hle ntawm kuv tes thiab taw mus, thiab kuv sawv rau ntawm kuv ob tug tij laug xub ntiag, thiab kuv rov hais lus rau nkawd dua.

19 Thiab tau muaj tias nkawd tau rov npau taws rau kuv dua, thiab nrhiav kev xuas tes ntsiab nthos kuv; tiam sis saib seb, Ixama-ees ib tug ntxhais, muaj tseeb tiag, thiab nws niam, thiab Ixama-ees ib tug tub, tau thov kuv ob tug tij laug, lawv thiaj ua rau nkawd lub siab mos muag; thiab nkawd thiaj tseg tsis nrhiav kev txo kuv txoj sia.

20 Thiab tau muaj tias nkawd tau tu siab, vim nkawd txoj kev phem, nkawd thiaj tau txhos caug rau ntawm kuv; thiab tau thov kom kuv zam txim pub rau nkawd rau yam uas nkawd tau ua rau kuv.

21 Thiab tau muaj tias kuv tau ua siab dawb paug zam txim pub rau nkawd rau tag nrho tej uas nkawd ua, thiab kuv tau ntuas kom nkawd yuav tsum thov kev zam txim ntawm tus Tswv nkawd tus Vajtswv. Thiab tau muaj tias nkawd tau ua li ntawd. Thiab tom qab nkawd tau thov tus Tswv peb tau rov qab taug kev mus rau nram peb txiv lub tsev pheeb suab ntaub.

22 Thiab tau muaj tias peb tau los txog nram peb txiv lub tsev pheeb suab ntaub. Thiab tom qab kuv thiab kuv cov tij laug thiab tag nrho tsev neeg Ixama-ees tau los txog nram kuv txiv lub tsev pheeb suab ntaub, lawv tau ua tus Tswv tus uas yog lawv tus Vajtswv tsaug; thiab lawv tau ua kev cai txi thiab hlawv tsiaj pub rau nws.