1 Thiab nim no tau muaj tias tom qab kuv, Nifais, tau xaus lus rau kuv cov tij laug, saib seb lawv hais rau kuv tias: Koj tau hais tej yam uas nyuaj rau peb, nyuaj tshaj qhov peb muaj peev xwm tiv taus.

2 Thiab tau muaj tias kuv hais rau lawv tias kuv paub tias kuv tau hais tej yam uas nyuaj tawm tsam cov neeg phem, raws li txoj kev tseeb; thiab kuv tau hais tias cov neeg ncaj ncees tsis muaj txim, thiab ua tim khawv tias tus Tswv yuav muab lawv tsa sawv thaum txog hnub kawg; yog li ntawd, cov neeg uas muaj txim xav tias tej lus tseeb nyuaj heev, vim tej no hlais lawv mus txog ntua nruab siab.

3 Thiab nim no kuv cov tij laug, yog hais tias nej yog neeg ncaj ncees thiab txaus siab mloog txoj kev tseeb, thiab mob siab ua raws li txoj kev tseeb, kom nej yuav taug kev ncaj rau Vajtswv, ces nej yuav tsis yws yws vim yog txoj kev tseeb, thiab yuav tsis hais tias: Koj hais tej yam nyuaj heev tawm tsam peb.

4 Thiab tau muaj tias kuv, Nifais, tau rau siab ntso ntuas kuv cov tij laug, kom ua raws li tus Tswv tej lus txib.

5 Thiab tau muaj tias lawv tau txo lawv lub hwj chim rau tus Tswv; kuv thiaj tau xyiv fab thiab muaj kev cia siab heev rau lawv, hais tias lawv yuav taug txoj kev ncaj ncees.

6 Nim no, tau hais thiab ua tag nrho tej yam no thaum kuv txiv nyob hauv ib lub tsev pheeb suab ntaub hauv lub hav uas nws hu ua Lemu-ees.

7 Thiab tau muaj tias kuv, Nifais, tau coj Ixama-ees ib tug ntxhais los ua poj niam; thiab, kuv cov tij laug los kuj tau coj Ixama-ees cov ntxhais los ua poj niam; thiab Xaulas los kuj tau coj Ixama-ees tus ntxhais hlob los ua poj niam thiab.

8 Thiab li no kuv txiv tau ua raws li tag nrho tus Tswv tej lus txib uas tau muab rau nws. Thiab kuv, Nifais, kuj tau txais koob hmoov ntau kawg los ntawm tus Tswv.

9 Thiab tau muaj tias tus Tswv lub suab hais rau kuv txiv thaum hmo ntuj, thiab txib kom tag kis nws cia li mus rau tom roob moj sab qhua.

10 Thiab tau muaj tias thaum kuv txiv sawv los thaum sawv ntxov, thiab tawm mus rau ntawm lub tsev pheeb suab ntaub lub qhov rooj, qhov uas ua rau nws xav tsis thoob heev yog nws pom ib lub pob kheej uas muaj tus qauv tes ntaus zoo heev nyob rau hauv pem teb; thiab lub pob no yog tseem tooj dag. Thiab nyob rau hauv lub pob ntawd muaj ob tug koob; thiab ib tug koob ntawd taw rau txoj kev uas peb yuav tsum taug mus rau tom roob moj sab qhua.

11 Thiab tau muaj tias peb tau sau los ua ib ke txhua yam uas peb yuav nqa mus rau tom roob moj sab qhua, thiab txhua yam khoom seem uas tus Tswv tau pub rau peb; thiab peb tau nqa txhua txhia yam noob qoob noob loo kom peb yuav nqa tau mus rau tom roob moj sab qhua.

12 Thiab tau muaj tias peb tau nqa peb cov tsev pheeb suab ntaub thiab tawm mus rau tom roob moj sab qhua, hla tus dej Lamas mus.

13 Thiab tau muaj tias peb mus tau plaub hnub, rau sab qab teb sab hnub tuaj, thiab peb tau tsa peb cov tsev pheeb suab ntaub dua; thiab peb tau tis npe rau qhov chaw ntawd hu ua Saxes.

14 Thiab tau muaj tias peb tau nqa peb tej hneev thiab peb tej xub, thiab mus rau tom roob moj sab qhua mus tua nqaij los rau peb tsev neeg noj; thiab tom qab peb tua tau nqaij rau peb tsev neeg lawm peb tau rov qab los cuag peb tsev neeg dua nyob rau hauv roob moj sab qhua, ntawm qhov chaw Saxes. Thiab peb tau rov qab mus rau tom roob moj sab qhua dua, raws tib txoj qub ke, mus raws tej koog zoov ntsuab hauv roob moj sab qhua, uas nyob ntawm tej ciaj ciam teb ze tus Dej Hiav Txwv Liab.

15 Thiab tau muaj tias peb mus tau ntau hnub, muab peb tej hneev thiab peb tej xub thiab peb tej pob zeb thiab peb tej hlua fiav, tua nqaij thaum peb mus.

16 Thiab peb tau mus raws lub pob uas qhia kev, uas coj peb kev mus rau hauv tej koog zoov uas ntsuab tshaj nyob rau hauv roob moj sab qhua.

17 Thiab tom qab peb mus tau ntau ntau hnub, peb tau tsa peb cov tsev pheeb suab ntaub nyob ib ntus, kom peb tau so ntxiv thiab nrhiav tau zaub mov rau peb tsev neeg noj.

18 Thiab tau muaj tias thaum uas kuv, Nifais, tawm mus tua nqaij, saib seb, kuv tau ua kuv rab hneev lov, rab uas tau muab tseem kab ua; thiab tom qab kuv tau ua kuv rab hneev lov, saib seb, kuv cov tij laug npau taws rau kuv vim tias kuv rab hneev tau piam, ua rau peb nrhiav tsis tau nqaij.

19 Thiab tau muaj tias peb tau rov qab los cuag peb tsev neeg nqa tsis tau dab tsi los rau lawv noj, thiab vim yog lawv txoj kev tsiv, ua rau lawv sab heev, lawv thiaj raug txom nyem heev vim lawv tshaib plab.

20 Thiab tau muaj tias Lamas thiab Lemu-ees thiab Ixama-ees cov tub tau pib yws yws heev kawg li, vim yog lawv tej kev nyuaj siab thiab tej kev txom nyem nyob rau hauv roob moj sab qhua; thiab kuv txiv kuj tau pib yws yws tawm tsam tus Tswv nws tus Vajtswv; muaj tseeb tiag, thiab lawv txhua tus tu siab kawg nkaus, ua rau lawv yws yws tawm tsam tus Tswv.

21 Nim no tau muaj tias kuv, Nifais, vim kuv raug kev kub ntxhov los ntawm kuv cov tij laug vim rau qhov kuv rab hneev piam, thiab lawv tej hneev cov nta los tsis muaj zog tas, ces txawm pib nyuaj heev kawg nkaus li, muaj tseeb tiag, ua rau peb nrhiav tsis tau nqaij hlo li.

22 Thiab tau muaj tias kuv, Nifais, tau hais ntau yam rau kuv cov tij laug, vim tias lawv rov qab ua lawv lub siab tawv qhawv, twb tawv mus txog thaum lawv yws yws tus Tswv lawv tus Vajtswv.

23 Thiab tau muaj tias kuv, Nifais, tau xuas ntoo los txua ua ib rab hneev, thiab xuas ib tug pas uas ncaj los txua ua ib xib xub; yog li ntawd, kuv thiaj tau nqa ib rab hneev thiab ib xib xub, nrog ib txoj hlua fiav thiab ib co pob zeb. Thiab kuv hais rau kuv txiv tias: Kuv yuav mus qhov twg thiaj nrhiav tau nqaij?

24 Thiab tau muaj tias nws tau nug tus Tswv, vim lawv tau txo lawv tej hwj chim vim yog kuv cov lus; vim kuv tau hais ntau yam rau lawv kawg siab kawg ntsws.

25 Thiab tau muaj tias tus Tswv lub suab los hais rau kuv txiv; thiab nws raug qhuab ntuas heev vim nws yws yws tawm tsam tus Tswv, npaum li uas ua rau nws tu siab heev.

26 Thiab tau muaj tias tus Tswv lub suab hais rau nws tias: Ntsia lub pob seb, thiab saib tej yam uas sau rau saud.

27 Thiab tau muaj tias thaum kuv txiv pom tej yam uas sau rau saum lub pob, nws tau ntshai thiab tshee heev kawg li, thiab kuv cov tij laug thiab Ixama-ees cov tub thiab peb cov poj niam los kuj ntshai thiab tshee heev kawg li.

28 Thiab tau muaj tias kuv, Nifais, pom ob tug koob taw uas nyob rau hauv lub pob, hais tias ob tug koob taw no ua hauj lwm raws li peb txoj kev ntseeg thiab kev rau siab ntso thiab kev xyuam xim ua raws li ob tug koob taw qhia.

29 Thiab kuj tau muab ib co ntawv tshiab sau rau ob tug koob taw, uas nyeem tau yooj yim, uas tau ua rau peb to taub txog tus Tswv tej kev; thiab tej lub sij hawm tus Tswv tau sau thiab pauv cov lus no, raws li peb txoj kev ntseeg thiab kev rau siab ntso ua raws li cov lus no. Thiab yog li ntawd peb pom tias los ntawm tej yam me me, tus Tswv coj tau tej yam tseem ceeb los.

30 Thiab tau muaj tias kuv, Nifais, tau nce mus rau puag saum ncov roob, raws nraim li kev taw kev uas muaj nyob rau saum lub pob.

31 Thiab tau muaj tias kuv tua tau tsiaj qus, kuv thiaj nrhiav tau nqaij rau peb tsev neeg noj.

32 Thiab tau muaj tias kuv tau rov qab los rau ntawm peb cov tsev pheeb suab ntaub, nqa cov tsiaj uas kuv tau tua los; thiab nim no thaum lawv pom tias kuv nrhiav tau nqaij los, lawv xyiv fab heev kawg li! Thiab tau muaj tias lawv tau txo lawv lub hwj chim rau tus Tswv, thiab tau ua nws tsaug.

33 Thiab tau muaj tias peb tau mus kev dua, taug raws tib seem kev uas yuav luag zoo li thaum peb nyuam qhuav tuaj; thiab tom qab peb mus tau ntau hnub peb tau tsa peb cov tsev pheeb suab ntaub dua, xwv kom peb tau nyob so ib ntus.

34 Thiab tau muaj tias Ixama-ees tuag, thiab tau muab nws faus rau ib qho chaw uas hu ua Nahos.

35 Thiab tau muaj tias Ixama-ees cov ntxhais tu siab heev, vim rau qhov lawv txiv tuag lawm, thiab vim rau qhov lawv tej kev txom nyem nyob hauv roob moj sab qhua; thiab lawv tau yws yws tawm tsam kuv txiv, vim tias nws tau coj lawv tawm ntawm thaj av Yeluxalees, hais tias: Peb txiv tuag lawm, muaj tseeb tiag, thiab peb tau ua loj leeb nteev heev nyob hauv roob moj sab qhua, thiab peb tau raug kev txom nyem, kev tshaib, kev nqhis, thiab sab heev kawg li; thiab tom qab tag nrho tej kev nyuaj siab no peb yeej yuav piam sij nyob hauv roob moj sab qhua rau txoj kev tshaib.

36 Thiab lawv tau yws yws li no rau kuv txiv, thiab rau kuv ib yam; thiab lawv xav rov qab mus lawm pem Yeluxalees.

37 Thiab Lamas hais rau Lemu-ees thiab hais rau Ixama-ees cov tub tias: Saib seb, cia peb muab peb txiv tua, thiab tua peb tus kwv Nifais, tus uas tau tsa nws tus kheej los kav peb thiab ua peb tus xib hwb, cov uas yog nws tij laug.

38 Nim no, nws hais tias tus Tswv tau nrog nws tham, thiab nws hais tias cov tim tswv tau txhawb pab nws. Tiam sis saib seb, peb paub tias nws dag rau peb; thiab nws qhia tej no rau peb, thiab nws ua ntau yam los ntawm nws tej txuj ci tes taw uas txawj ntse, xwv kom nws yuav plooj tau peb lub qhov muag, xav ntsoov tias, tej zaum, nws yuav coj tau peb mus rau tej roob moj sab qhua uas txawv txawv; thiab tom qab nws coj peb mus deb lawm, nws xav tias nws yuav tsa nws tus kheej los ua ib tug vaj ntxwv thiab ib tug nom kav peb, kom nws ua tau rau peb raws li nws lub siab xav thiab lub siab nyiam. Thiab kuv tus tij laug Lamas tau hais li no txhaub lawv lub siab kom npau taws.

39 Thiab tau muaj tias tus Tswv twb nrog peb nyob, muaj tseeb tiag, tus Tswv lub suab twb los thiab hais lus ntau rau lawv, thiab tau qhuab ntuas lawv ntau heev kawg li; thiab tom qab tus Tswv lub suab tau qhuab ntuas lawv lawv thiaj tsis npau taws lawm, thiab lawv thiaj hloov siab lees txim rau lawv tej kev txhaum, ua rau tus Tswv rov qab foom koob hmoov rau peb kom peb muaj zaub mov noj, xwv kom peb thiaj tsis piam sij.