1 Thiab nim no kuv xaus kuv phau ceev xwm txheej hais txog kuv cov neeg, cov Neeg Nifais, txoj kev puas tsuaj. Thiab tau muaj tias peb tau tawm mus ua ntej cov Neeg Lamas.

2 Thiab kuv, Maumoos, tau sau ib tsab ntawv mus rau cov Neeg Lamas tus vaj ntxwv, thiab thov kom nws pub rau peb sib sau peb cov neeg tuaj ua ke rau tom thaj av Khumaulas, ze ib lub pov roob uas hu ua Khumaulas, thiab peb yuav ua rog nrog lawv nyob rau qhov chaw ntawd.

3 Thiab tau muaj tias cov Neeg Lamas tus vaj ntxwv pub rau kuv yam uas kuv thov.

4 Thiab tau muaj tias peb tau tawm mus rau tom thaj av Khumaulas, thiab peb tau rub peb tej tsev pheeb suab ntaub ncig lub pov roob Khumaulas; thiab qhov chaw ntawd yog nyob hauv ib thaj av uas muaj dej ntau, muaj tej dej ntws, thiab tej qhov dej txhawv; thiab nyob rau ntawm no peb cia siab tias nyaj yuav kov yeej cov Neeg Lamas.

5 Thiab thaum peb puas yim caum plaub xyoos tau dhau mus, peb tau sau tag nrho cov uas tseem tshuav ntawm peb cov neeg tuaj ua ke rau tom thaj av Khumaulas.

6 Thiab tau muaj tias thaum peb tau sau tag nrho peb cov neeg tuaj ua ke ua ib pab rau hauv thaj av Khumaulas, saib seb kuv, Maumoos, pib laus lawm; thiab vim kuv paub tias zaum no yog zaum kawg ntawm kuv cov neeg txoj kev sib ntswg, thiab vim tus Tswv tau txib kom kuv tsis txhob cia tej ceev xwm txheej uas dawb ceev, uas peb cov yawg koob tau muab cev los, poob mus rau hauv cov Neeg Lamas tes, (vim cov Neeg Lamas yuav ua kom lawv puas tsuaj) yog li ntawd kuv thiaj ua phau ceev xwm txheej no tawm ntawm Nifais cov phiaj los, thiab muab tag nrho tej ceev xwm txheej, uas tus Tswv txhais tes tau muab rau kuv, coj mus zais rau saum lub pov roob Khumaulas, tsuas yog tshuav ob peb daig phiaj no uas kuv muab rau kuv tus tub Maulaunais.

7 Thiab tau muaj tias kuv cov neeg, nrog rau lawv cov poj niam thiab lawv cov me nyuam, nim no lawv pom cov Neeg Lamas cov tub rog taug kev tuaj rau ntawm lawv; thiab lawv nyob tos cov Neeg Lamas nrog txoj kev ntshai tuag heev uas muaj puv npo nyob hauv cov neeg phem lub siab.

8 Thiab tau muaj tias cov Neeg Lamas tuaj ua rog tawm tsam peb, thiab txhua txhua tus puav leej muaj kev ntshai puv nkaus vim yog lawv cov neeg muaj coob heev.

9 Thiab tau muaj tias lawv xuas ntaj, hneev, thiab xub, thiab taus, thiab txhua yam cuab yeej ua rog tua kuv cov neeg.

10 Thiab tau muaj tias kuv cov neeg raug ntov vau, muaj tseeb tiag, kaum txhiab leej uas nrog kuv, thiab kuv raug mob vau rau hauv lawv nruab nrab; thiab lawv hla dhau kuv mus tiam sis tsis txov kuv txoj sia.

11 Thiab thaum lawv tau mus dhau thiab muab tag nrho kuv cov neeg ntov vau tsuas yog tshuav peb nees nkaum plaub leeg xwb, (ntawm cov muaj sia no tshuav kuv tus tub Maulaunais) thiab vim peb tau dim txoj kev tuag ntawm peb cov neeg, hnub tom qab thaum cov Neeg Lamas rov qab saum lub ncov pov roob Khumaulas mus rau hauv lawv tej yeej lawm, peb thiaj pom kaum txhiab leej ntawm kuv cov neeg uas raug ntov vau, uas kuv yog tus coj ua ntej.

12 Thiab peb kuj pom kaum txhiab leej ntawm kuv cov neeg uas kuv tus tub Maulaunais yog tus coj.

13 Thiab saib seb, kaum txhiab leej uas Nkinkidaunas yog tus coj, kuj tau vau, thiab nws kuj tau vau nrog lawv.

14 Thiab Lamaj tau vau nrog nws kaum txhiab leej; thiab Nkilenkas tau vau nrog nws kaum txhiab leej; thiab Leehas tau vau nrog nws kaum txhiab leej; thiab Yenias tau vau nrog nws kaum txhiab leej; thiab Khumenaihas, thiab Maulaunaihas, thiab Eethi-onas, thiab Sinplos, thiab Xees, thiab Yausaws, nyias vau nrog nyias kaum txhiab leej.

15 Thiab tau muaj tias muaj kaum leej ntxiv uas tau vau los ntawm ntaj, nyias nrog nyias kaum txhiab leej; muaj tseeb tiag, twb yog tag nrho kuv cov neeg tau vau, tsuas yog tshuav nees nkaum thiab plaub leeg uas nrog kuv, thiab ob peb tug uas khiav dim mus rau tej chaw nram sab qab teb, thiab ob peb leeg uas khiav mus koom nrog cov Neeg Lamas; thiab lawv cov nqaij, thiab cov pob txha, thiab cov ntshav nyob rau hauv av, vim cov uas tua lawv muab lawv tso tseg kom lwj rau hauv thaj av, thiab kom ntsoog thiab kom rov qab mus ua av.

16 Thiab kuv tus ntsuj plig dua rhe vim yog kev ntxhov siab, vim yog kuv cov neeg txoj kev raug tua, thiab kuv qw nrov nrov tias:

17 Auj nej cov uas zoo nkauj zoo nraug es, ua cas nej thiaj tau ncaim ntawm tus Tswv tej kev mus! Auj nej cov uas zoo nkauj zoo nraug es, ua cas nej thiaj tau xyeej tus Yexus ntawd, tus uas sawv ntsug qhib caj npab lug tos txais nej!

18 Saib seb, yog nej tsis tau ua li no, ces ntshe nej twb tsis tau vau. Tiam sis saib seb, nej twb vau, thiab kuv quaj ntsuag txog nej txoj kev ploj.

19 Auj nej cov tub zoo nraug thiab cov ntxhais zoo nkauj, nej cov txiv thiab cov niam, nej cov ua txiv thiab poj niam, nej cov uas zoo nkauj zoo nraug es, ua cas nej thiaj li tau vau!

20 Tiam sis saib seb, nej twb mus lawm, thiab kuv tej kev nyuaj siab twb coj tsis tau nej rov qab los.

21 Thiab tsis ntev, hnub ntawd twb yuav los uas nej lub cev uas txawj tuag yeej yuav hloov los ua lub cev tsis txawj tuag, thiab lub cev uas nim no tab tom lwj tsus no tsis ntev twb yuav hloov los ua lub cev uas tsis txawj lwj; thiab thaum ntawd nej yuav sawv ntawm Khetos lub rooj txiav txim, raug txiav txim raws li tej yam nej tau ua; thiab yog hais tias nej yog neeg ncaj ncees, ces nej yuav tau koob hmoov nrog nej cov yawg koob uas tau mus ua nej ntej lawm.

22 Auj kheev lam nej tau hloov siab lees txim ua ntej txoj kev puas tsuaj loj no tau los raug nej. Tiam sis saib seb, nej twb mus lawm, thiab Leej Txiv, muaj tseeb tiag, tus Leej Txiv uas Nyob Mus Ib Txhis saum ntuj ceeb tsheej, yeej paub nej zoo li cas; thiab nws ua rau nej raws li nws txoj kev txim lij thiab txoj kev hlub tshua.