1 Thiab nim no tau muaj tias nyob hauv xyoo peb puas rau caum peb cov Neeg Nifais tau mus ua rog tawm tsam cov Neeg Lamas nrog lawv cov tub rog, tawm ntawm thaj av Quav Poj mus.

2 Thiab tau muaj tias cov Neeg Lamas muab cov Neeg Nifais cov tub rog raws rov qab los rau thaj av Quav Poj. Thiab thaum lawv tseem nkees nkees, cov Neeg Lamas ib pab tub rog uas tseem muaj zog tau tuaj tawm tsam lawv; thiab lawv muaj ib npluav rog uas sab heev, cov Neeg Lamas thiaj txeeb tau lub nroog Quav Poj, thiab tua cov Neeg Nifais tuag coob leej, thiab txhom tau coob leej mus ua neeg raug txim.

3 Thiab cov uas tseem tshuav tau khiav mus thiab koom nrog cov neeg ntawm lub nroog Thi-akhas. Nim no lub nroog Thi-akhas nyob rau hauv tej ciam teb ze ntug dej hiav txwv; thiab lub nroog no kuj nyob ze lub nroog Quav Poj thiab.

4 Thiab twb yog vim cov Neeg Nifais cov tub rog tau mus tawm tsam cov Neeg Lamas es lawv thiaj raug tua; yog tsis li ntawd, cov Neeg Lamas yeej tsis muaj hwj chim kov yeej lawv.

5 Tiam sis, saib seb, Vajtswv tej kev txiav txim yuav raug cov neeg phem; thiab cov neeg phem yog cov yuav rau txim rau cov neeg phem; vim twb yog cov neeg phem uas txhaub noob neej lub siab kom muaj nqaij ntuag ntshav nrog.

6 Thiab tau muaj tias cov Neeg Lamas npaj tuaj tawm tsam lub nroog Thi-akhas.

7 Thiab tau muaj tias nyob hauv xyoo peb puas rau caum plaub cov Neeg Lamas tau tuaj tawm tsam lub nroog Thi-akhas, saib lawv puas txeeb tau lub nroog Thi-akhas thiab.

8 Thiab tau muaj tias lawv raug cov Neeg Nifais muab yuam thiab raws rov qab. Thiab thaum cov Neeg Nifais pom tias lawv tau muab cov Neeg Lamas raws lawv rov khav dua txog lawv tus kheej lub zog; thiab lawv tau tawm mus nrog lawv tus kheej lub zog, thiab rov txeeb tau lub nroog Quav Poj.

9 Thiab nim no tau muaj txhua yam no, thiab muaj txhiab txhiab leej uas raug tua tuag nyob rau ob tog, hauv cov Neeg Nifais thiab cov Neeg Lamas.

10 Thiab tau muaj tias xyoo peb puas rau caum rau tau dhau mus, thiab cov Neeg Lamas rov tuaj ua rog rau cov Neeg Nifais; thiab cov Neeg Nifais los tseem tsis tau hloov siab lees txim rau txoj kev phem uas lawv tau ua, tiam sis tseem pheej ua lawv txoj kev phem tsis tu ncua.

11 Thiab twb tsis muaj hnub uas tus nplaig yuav piav tau, los sis tib neeg yuav sau meej tag nrho txog txoj kev qias heev ntawm tej ntshav thiab tej kev puas tsuaj uas tau muaj nyob hauv cov neeg, ob tog ntawm cov Neeg Nifais thiab ntawm cov Neeg Lamas; thiab txhua tus lub siab tawv, lawv thiaj zoo siab ua kom nqaij ntuag ntshav nrog tsis tu ncua.

12 Thiab yeej ib txwm tsis tau muaj txoj kev phem loj npaum li no nyob hauv tsev neeg Lihais, los sis nyob tag nrho hauv tsev neeg Ixayees, raws li tus Tswv tej lus, ib yam li tau muaj nyob hauv cov neeg no.

13 Thiab tau muaj tias cov Neeg Lamas txeeb tau lub nroog Quav Poj, thiab li no los twb vim yog lawv cov neeg muaj coob tshaj cov Neeg Nifais.

14 Thiab lawv kuj tau tawm mus tawm tsam lub nroog Thi-akhas, thiab muab cov neeg uas nyob hauv raws tawm ntawm lub nroog ntawd mus, thiab txhom tau coob leej poj niam thiab me nyuam mus ua neeg raug txim, thiab muab lawv tua txi rau lawv tej mlom vaj tswv.

15 Thiab tau muaj tias nyob hauv xyoo peb puas rau caum xya, cov Neeg Nifais npau taws vim yog cov Neeg Lamas muab lawv cov poj niam thiab cov me nyuam tua txi, lawv tau mus tawm tsam cov Neeg Lamas nrog kev npau taws heev, npaum li uas lawv rov kov yeej cov Neeg Lamas dua, thiab muab lawv raws tawm ntawm lawv tej av mus.

16 Thiab cov Neeg Lamas twb tsis rov tuaj tawm tsam cov Neeg Nifais txog rau thaum xyoo peb puas xya caum tsib.

17 Thiab nyob hauv xyoo no lawv tau tuaj tawm tsam cov Neeg Nifais nrog tag nrho lawv lub zog; thiab twb tsis suav lawv vim lawv muaj coob heev kawg nkaus li.

18 Thiab txij li lub sij hawm no mus cov Neeg Nifais twb tsis muaj peev xwm kov yeej cov Neeg Lamas li lawm, tiam sis pib raug lawv muab ntsaig zoo li tej lwg dej thaum lub hnub tuaj.

19 Thiab tau muaj tias cov Neeg Lamas tau tuaj tawm tsam lub nroog Quav Poj; thiab tau muaj ib npluav rog uas mob heev nyob hauv thaj av Quav Poj, nyob hauv npluav rog ntawd lawv tau kov yeej cov Neeg Nifais.

20 Thiab lawv rov khiav ntawm lawv dua, thiab lawv los rau lub nroog Npau-am; thiab nyob rau qhov chaw ntawd lawv tau tawm tsam cov Neeg Lamas yam tsis ntshai kiag li, npaum li uas cov Neeg Lamas twb kov tsis yeej lawv txog rau thaum lawv rov tuaj dua zaum ob.

21 Thiab thaum lawv rov tuaj dua zaum ob, cov Neeg Nifais raug muab raws thiab tua tuag coob heev kawg nkaus li; lawv cov poj niam thiab lawv cov me nyuam rov raug muab txi rau tej mlom.

22 Thiab tau muaj tias cov Neeg Nifais rov khiav ua ntej ntawm lawv mus, coj tag nrho cov neeg nrog lawv, cov uas nyob hauv tej nroog thiab hauv tej zos.

23 Thiab nim no kuv, Maumoos, vim kuv pom tias cov Neeg Lamas tab tom yuav ua kom thaj av puas tsuaj, yog li ntawd kuv thiaj tau mus rau pem lub pov roob See, thiab tshem tag nrho tej ceev xwm txheej uas Amaloos tau muab zais rau tus Tswv.