Phau Ntawv Maumoos

1 Thiab nim no kuv, Maumoos, ua ib phau ceev xwm txheej txog tej uas kuv tau pom thiab tau hnov, thiab muab hu ua Phau Ntawv Maumoos.

2 Thiab li ntawm lub sij hawm thaum Amaloos muab tej ceev xwm txheej zais rau tus Tswv, nws tuaj cuag kuv, (kuv muaj hnub nyoog li ntawm kaum xyoo, thiab kuv tau pib kawm me ntsis raws li kuv cov neeg txoj kev kawm) thiab Amaloos hais rau kuv tias: Kuv pom tias koj yog ib tug me nyuam ua dab tsi ua tiag tiag, thiab txawj to taub sai heev;

3 Yog li ntawd, thaum koj muaj li ntawm nees nkaum thiab plaub xyoos kuv xav kom koj nco txog tej uas koj tau pom ntsig txog cov neeg no; thiab thaum koj muaj hnub nyoog li ntawd cia li mus rau tom thaj av Atoos, mus rau lub pov roob uas hu ua See; thiab nyob rau ntawd kuv tau muab tag nrho tej kev sau dawb ceev uas hais txog cov neeg no zais rau tus Tswv.

4 Thiab saib seb, koj yuav tsum muab Nifais cov phiaj los rau koj tus kheej, thiab cov seem koj yuav tsum cia nyob qhov qub chaw; thiab koj yuav tsum sau rau saum Nifais cov phiaj txhua yam uas koj tau pom ntsig txog cov neeg no.

5 Thiab kuv, Maumoos, vim kuv yog Nifais ib tug xeeb leej xeeb ntxwv, (thiab kuv txiv lub npe hu ua Maumoos) kuv nco qab txog tej uas Amaloos txib kuv ua.

6 Thiab tau muaj tias vim kuv muaj kaum ib xyoos, kuv txiv thiaj coj kuv mus rau nram thaj av sab qab teb, mus rau nram thaj av Xalahelas.

7 Tau muaj tsev nyob thoob plaws rau hauv thaj av, thiab cov neeg muaj yuav luag coob npaum li tej xuab zeb tom ntug dej hiav txwv.

8 Thiab tau muaj tias nyob hauv xyoo no pib muaj ib npluav rog ntawm cov Neeg Nifais, cov uas yog cov Neeg Nifais thiab cov Neeg Yakhauj thiab cov neeg Yauxej thiab cov Neeg Xaulas; thiab npluav rog no yog cov Neeg Nifais ua rog nrog cov Neeg Lamas thiab cov Neeg Lemu-ees thiab cov Neeg Ixama-ees.

9 Nim no cov Neeg Lamas thiab cov Neeg Lemu-ees thiab cov Neeg Ixama-ees hu ua cov Neeg Lamas, thiab ob pab neeg ntawd yog cov Neeg Nifais thiab cov Neeg Lamas.

10 Thiab tau muaj tias npluav rog tau pib hauv lawv nyob hauv tej ciam teb ntawm Xalahelas, ze tej dej ntawm Xidoos.

11 Thiab tau muaj tias cov Neeg Nifais tau sib sau tuaj ua ke ib co neeg coob heev, twb muaj coob dua li peb caug txhiab leej. Thiab tau muaj tias nyob hauv tib xyoos no lawv tau muaj ntau npluav rog, uas cov Neeg Nifais tau kov yeej cov Neeg Lamas thiab muab lawv tua tuag coob leej.

12 Thiab tau muaj tias cov Neeg Lamas thim lawv lub tswv yim, thiaj txhim tsa tau kev thaj yeeb nyob hauv thaj av; thiab muaj kev thaj yeeb tau plaub xyoos, uas tsis muaj ntshav nrog.

13 Tiam sis kev phem tau huaj vam nyob rau hauv tag nrho thaj av, tus Tswv thiaj tau muab nws cov thwj tim uas nws hlub tshem mus, thiab tej hauj lwm ntawm tej txuj ci tseem ceeb thiab ntawm txoj kev kho mob zoo tau tsum vim yog cov neeg txoj kev ua phem.

14 Thiab tsis muaj tej txiaj ntsim uas yog los ntawm tus Tswv los, thiab tus Vaj Ntsuj Plig Dawb Huv twb tsis los rau leej twg hlo li, vim yog lawv tej kev phem thiab kev tsis ntseeg.

15 Thiab kuv, thaum kuv muaj hnub nyoog kaum tsib xyoos thiab vim kuv muaj lub siab xav ua tiag tiag, yog li ntawd tus Tswv thiaj li los xyuas kuv, thiab kuv thiaj saj thiab paub txog Yexus txoj kev zoo.

16 Thiab kuv sim qhuab qhia rau cov neeg no, tiam sis tus Tswv kaw kuv lub qhov ncauj, thiab txwv kom kuv tsis txhob qhuab qhia rau lawv; vim saib seb lawv txhob txwm ntxeev siab tawm tsam lawv tus Vajtswv; thiab tus Tswv tau coj cov thwj tim uas nws hlub tawm ntawm thaj av mus, vim yog lawv txoj kev ua phem.

17 Tiam sis kuv kuj tseem nyob hauv lawv, tiam sis tus Tswv txwv tsis pub kuv qhuab qhia rau lawv, vim yog lawv lub siab tawv; thiab vim yog lawv lub siab tawv thaj av thiaj raug foom tsis zoo rau lawv.

18 Thiab cov tub sab Nkadi-atoos no, uas nyob hauv cov Neeg Lamas, nyob coob heev rau hauv thaj av, cov neeg uas nyob ntawd thiaj li pib muab lawv tej nyiaj txiag zais rau hauv av; thiab lawv tej nyiaj txiag tau plam mus, vim tus Tswv tau foom tsis zoo rau thaj av, uas lawv tsis muaj peev xwm khaws tau, los sis ceev tau, tej nyiaj txiag ntawd ntxiv.

19 Thiab tau muaj tias muaj kev ua khawv koob, thiab kev ua dab, thiab kev ua yees siv; thiab tau muaj tus niag phem lub hwj chim nyob thoob plaws rau hauv thaj av, twb yog muaj raws li tag nrho Anpinadais cov lus, thiab Xamuyees tus uas yog Neeg Lamas cov lus.