1 Thiab nim no, kuv kuj hais txog cov uas tsis ntseeg Khetos thiab.

2 Saib seb, nej puas ntseeg hnub uas kev raug txim yuav los xyuas nej—saib seb, thaum tus Tswv los, muaj tseeb tiag, twb yog hnub tseem ceeb ntawd thaum lub ntiaj teb yuav raug muab kauv zoo li ib daim ntawv kauv, thiab txhua yam yuav yaj nrog tej kua leej faj kub, muaj tseeb tiag, nyob rau hnub tseem ceeb ntawd thaum nej yuav raug coj los sawv rau ntawm Vajtswv tus Me Nyuam Yaj lub xub ntiag—thaum ntawd nej puas yuav hais tias tsis muaj Vajtswv?

3 Thaum ntawd nej puas tseem yuav xyeej tus Khetos, los sis nej puas yuav muaj cuab kav ntsia Vajtswv tus Me Nyuam Yaj? Nej puas xav tias nej yuav nyob tau nrog nws thaum nej paub ntsoov nej lub txim? Nej puas xav tias nej yuav zoo siab mus nyob nrog Tus uas dawb huv ntawd, thaum nej tej ntsuj plig raug tsim txom los ntawm kev paub tias nej muaj txim vim nej ib txwm ua txhaum nws tej kev cai?

4 Saib seb, kuv hais rau nej tias nej yuav nyuaj siab nyob nrog Vajtswv tus uas dawb huv thiab ncaj ncees, paub ntsoov txog nej tej kev vuab tsuab nyob ntawm nws xub ntiag, tshaj li nej nyob nrog tej ntsuj plig raug txim uas nyob hauv ntuj txiag teb tsaus.

5 Vim saib seb, thaum nej raug coj los pom nej tej kev liab qab nyob ntawm Vajtswv xub ntiag, thiab pom Vajtswv lub yeeb koob, thiab Yexus Khetos txoj kev dawb huv, qhov no yuav zes tau ib tug nplaim hluav taws uas cig tsis txawj tuag rau nej.

6 Auj yog li ntawd nej cov uas tsis ntseeg es, nej cia li tig mus cuag tus Tswv; cia li sib sib zog thov Leej Txiv los ntawm Yexus lub npe, xwv kom tej zaum nws yuav pom tias nej twb huv, zoo nkauj, dawb, thiab tsis muaj qhov phem, vim tau muab nej ntxuav los ntawm tus Me Nyuam Yaj cov ntshav, nyob rau hnub tseem ceeb thiab kawg ntawd.

7 Thiab kuv rov hais rau cov uas xyeej Vajtswv tej kev tshwm sim, thiab hais tias tej ntawd tsis muaj ntxiv lawm, hais tias tsis muaj tej kev tshwm sim, thiab tsis muaj tej kev qhia tej yuav muaj los yav tom ntej, thiab tsis muaj tej txiaj ntsim, thiab tsis muaj txoj kev kho mob zoo, thiab tsis muaj txoj kev txawj hais lwm yam lus, thiab tsis muaj txoj kev txhais lwm yam lus;

8 Saib seb kuv hais rau nej tias, tus uas xyeej tej no ces twb tsis paub Khetos txoj moo zoo; muaj tseeb tiag, nws twb tsis tau nyeem cov vaj lug kub; yog tias nws nyeem, ces nws tsis to taub.

9 Vim puas yog peb twb tau nyeem tias Vajtswv yeej zoo ib yam nag hmo, hnub no, thiab mus ib txhis, thiab nws twb tsis muaj ib yam uas nws ua txawv thiab tsis muaj ib nyuag qhov uas txawj hloov li?

10 Thiab nim no, yog tias nej tau xav nej tus kheej hais tias muaj ib tug vaj tswv uas ua txawv, thiab nws muaj ib nyuag qhov uas txawj hloov, ces yog nej xav tias muaj ib tug vaj tswv uas tsis yog tus Vajtswv ua tau tej txuj ci tseem ceeb.

11 Tiam sis saib seb, kuv yuav ua rau nej pom ib tug Vajtswv uas ua tau tej txuj ci tseem ceeb, twb yog Anplaham tus Vajtswv, thiab Ixaj tus Vajtswv, thiab Yakhauj tus Vajtswv; thiab nws twb yog tib tug Vajtswv uas tau tsim lub ntuj thiab lub ntiaj teb, thiab txhua yam uas muaj nyob haud.

12 Saib seb, nws tau tsim Adas, thiab los ntawm Adas tib neeg txoj kev poob thiaj li los. Thiab vim yog tib neeg txoj kev poob Yexus Khetos thiaj li los, tus uas yog Leej Txiv thiab Leej Tub; thiab vim yog Yexus Khetos thiaj li muaj tib neeg txoj kev txhiv dim.

13 Thiab vim yog tib neeg txoj kev txhiv dim, uas yog los ntawm Yexus Khetos, thiaj li coj tau tib neeg rov los rau hauv tus Tswv lub xub ntiag; muaj tseeb tiag, qhov no yog txoj kev uas thiaj txhiv tib neeg txhua tus dim, vim Khetos txoj kev tuag ua kom muaj kev sawv rov los, thiaj muaj txoj kev txhiv dim tawm ntawm txoj kev tsaug zog uas tsis txawj kawg, tawm ntawm txoj kev tsaug zog uas Vajtswv lub hwj chim yuav tsa kom tib neeg txhua tus sawv thaum lub suab raj hlau yuav nrov; thiab lawv yuav tawm los, tsis hais tus loj thiab tus me, thiab txhua tus yuav sawv rau ntawm nws lub rooj txiav txim, vim tau muab lawv txhiv dim thiab daws ntawm txoj kev tuag no tej hlua khi uas nyob mus ib txhis, uas yog txoj kev tuag ntawm sab cev nqaij daim tawv.

14 Thiab tom qab ntawd Tus Dawb Huv txoj kev txiav txim yuav los raug lawv; thiab tom qab ntawd lub caij uas tus vuab tsuab tseem yuav vuab tsuab li qub twb yuav los; thiab tus uas ncaj ncees tseem yuav ncaj ncees li qub; tus uas zoo siab yeej tseem yuav zoo siab li qub; thiab tus uas tsis zoo siab yeej tseem yuav tsis zoo siab li qub.

15 Thiab nim no, auj tag nrho nej cov uas tau xav txog ib tug vaj tswv uas tsis txawj ua tej txuj ci tseem ceeb, kuv xav nug nej, tag nrho tej uas kuv tau hais no puas tau dhau mus? Qhov kawg puas tau los? Saib seb kuv hais rau nej tias, Tsis tau; thiab Vajtswv tseem yog ib tug Vajtswv uas ua tej txuj ci tseem ceeb.

16 Saib seb, tej uas Vajtswv tau ua no puas yog zoo kawg nkaus rau peb tej qhov muag pom? Muaj tseeb tiag, thiab leej twg thiaj muaj peev xwm to taub Vajtswv tej hauj lwm uas zoo kawg nkaus?

17 Puas muaj leej twg yuav hais tias twb tsis yog ib qho txuj ci tseem ceeb uas los ntawm nws txoj lus thiaj li muaj lub ntuj thiab lub ntiaj teb; thiab los ntawm lub hwj chim ntawm nws txoj lus thiaj li siv tej hmoov av ntawm lub ntiaj teb los tsim tau tib neeg; thiab los ntawm lub hwj chim ntawm nws txoj lus thiaj li ua tau tej txuj ci tseem ceeb?

18 Thiab puas muaj leej twg yuav hais tias Yexus Khetos twb tsis tau ua txuj ci tseem ceeb ntau heev? Thiab twb muaj txuj ci tseem ceeb ntau heev uas yog ua los ntawm cov thwj tim txhais tes.

19 Thiab yog hais tias twb ua tau tej txuj ci tseem ceeb thaum ntawd, vim li cas Vajtswv ho tsum tsis ua ib tug Vajtswv uas ua tau tej txuj ci tseem ceeb thiab tseem ho ua tau Ib Tug uas tsis hloov? Thiab saib seb, kuv hais rau nej tias nws yeej tsis hloov; yog hloov ces nws kuj tsum tsis ua Vajtswv lawm; thiab nws twb tsis tsum ua Vajtswv, thiab yeej yog ib tug Vajtswv uas ua tau tej txuj ci tseem ceeb.

20 Thiab qhov uas nws ho tsum tsis ua tej txuj ci tseem ceeb nyob hauv noob neej lawm los twb vim yog lawv tso txoj kev ntseeg tseg zuj zus, thiab ncaim ntawm txoj kev uas yog mus lawm, thiab twb tsis paub tus Vajtswv uas tsim nyog lawv cia siab rau.

21 Saib seb, kuv hais rau nej tias tus uas ntseeg Khetos, tsis ua xyem xyav rau dab tsi li, qhov uas nws thov Leej Txiv los ntawm Khetos lub npe ces yuav muab qhov ntawd rau nws; thiab lo lus cog tseg no yog muab rau txhua tus, twb yog muab rau neeg thoob plaws lub ntiaj teb.

22 Vim saib seb, Yexus Khetos, Vajtswv Leej Tub tau hais li no rau nws cov thwj tim uas yuav nyob, muaj tseeb tiag, thiab kuj yog hais rau tag nrho nws cov thwj tim, ua rau pab neeg coob coob hnov hais tias: Nej cia li mus rau hauv lub ntiaj teb tag nrho, thiab tshaj tawm txoj moo zoo rau txhua txhia tus neeg;

23 Thiab tus uas ntseeg thiab ua kev cai raus dej yuav txais kev cawm dim, tiam sis tus uas tsis ntseeg yuav raug txim;

24 Thiab tej cim no yuav muaj nrog cov uas ntseeg—los ntawm kuv lub npe lawv yuav ntiab tau cov dab phem tawm; lawv yuav txawj hais tej yam lus tshiab; lawv yuav txhom tau tej nab; thiab yog lawv haus tej yam dab tsi uas muaj taug tej ntawd yuav tsis ua rau lawv mob; lawv yuav tso tes rau saum cov neeg mob lub taub hau thiab lawv yuav zoo;

25 Thiab tus uas yuav ntseeg kuv lub npe, tsis ua xyem xyav rau dab tsi li, kuv yuav ua kom nws paub tag nrho kuv tej lus muaj tseeb, twb yog mus rau neeg thoob plaws lub ntiaj teb.

26 Thiab nim no, saib seb, leej twg yuav muaj peev xwm sawv tawm tsam tau tus Tswv tej hauj lwm? Leej twg yuav muaj peev xwm xyeej nws tej lus? Leej twg yuav sawv tawm tsam tus Tswv lub hwj chim uas loj heev? Leej twg yuav thuam tus Tswv tej hauj lwm? Leej twg yuav ua saib tsis taus Khetos cov me nyuam? Saib seb, nej txhua tus uas thuam tus Tswv tej hauj lwm, nej yuav xav tsis thoob thiab piam sij.

27 Auj yog li ntawd tsis txhob thuam, thiab tsis txhob xav tsis thoob, tiam sis cia li mloog tus Tswv tej lus, thiab thov Leej Txiv los ntawm Yexus lub npe rau txhua yam uas nej xav tau. Tsis txhob ua xyem xyav, tiam sis cia li ntseeg tiag, thiab pib ib yam li nyob txheej thaum ub, thiab los cuag tus Tswv tag nrho nej lub siab, thiab ua hauj lwm rau nej txoj kev cawm seej nrog txoj kev hwm thiab tshee na rau ntawm nws xub ntiag.

28 Cia li ua neeg muaj tswv yim nyob rau hauv nej lub caij sim siab; muab tej uas tsis huv tshem tawm ntawm nej tus kheej mus; tsis txhob thov, tej uas nej yuav coj mus siv raws li nej lub siab ntshaw, tiam sis thov nrog txoj kev ruaj nrees khov kho, xwv kom nej tsis txhob ywj rau ib qho kev haub ntxias li, tiam sis kom nej yuav teev tiam Vajtswv tus uas tseeb thiab muaj txoj sia nyob.

29 Ua tib zoo saib kom nej tsis txhob ua kev cai raus dej yam tsis tsim nyog; ua zoo saib kom nej tsis txhob noj Khetos lub cim nco txog yam tsis tsim nyog; tiam sis ua zoo saib kom nej ua txhua yam raws li kev tsim nyog, thiab ua tej ntawd los ntawm Yexus Khetos, uas yog Vajtswv tus uas muaj txoj sia Leej Tub, lub npe; thiab yog nej ua li no, thiab nyiaj mus kom txog thaum kawg, nej yeej yuav tsis raug ntiab tawm.

30 Saib seb, kuv hais rau nej ib yam li kuv hais tawm hauv qhov tuag los; vim kuv paub tias nej yuav tau kuv tej lus.

31 Tsis txhob yws kuv vim yog kuv tsis zoo tag nrho, thiab tsis txhob yws kuv txiv, vim yog nws tsis zoo tag nrho, thiab tsis txhob yws cov uas tau sau ua ntej nws; tiam sis cia li ua tsaug rau Vajtswv uas nws tau qhia rau nej paub tias peb tsis zoo tag nrho, xwv kom nej yuav kawm tau muaj tswv yim dua peb.

32 Thiab nim no, saib seb, peb tau sau phau ceev xwm txheej no raws li tej uas peb paub, siv yam ntawv uas peb muab hu ua cov ntawv Iyiv kho dua tshiab, vim peb tau muab cev los thiab tau muab hloov, raws li peb yam lus hais.

33 Thiab yog tias peb cov phiaj loj txaus ces ntshe peb twb siv cov lus Henplais los sau lawm; tiam sis cov lus Henplais los peb kuj tau muab hloov lawm thiab; thiab yog tias peb siv cov lus Henplais los sau, saib seb, ntshe nej twb tau phau ceev xwm txheej uas zoo tag nrho.

34 Tiam sis tus Tswv yeej paub tej uas peb tau sau, thiab kuj paub tias tsis muaj lwm cov neeg paub peb yam lus; thiab vim tsis muaj lwm cov neeg paub peb yam lus, yog li ntawd nws thiaj tau npaj ib txoj kev los txhais tej lus ntawd.

35 Thiab tau sau tej no xwv kom peb yuav ntxuav tau peb cov kwv tij tej ntshav tawm ntawm peb tej tshoo tsho mus, cov uas tau tso txoj kev ntseeg tseg zuj zus.

36 Thiab saib seb, tej uas peb xav kom muaj txog peb cov kwv tij no, muaj tseeb tiag, xws li txoj kev txum tim lawv rov qab los paub txog Khetos, twb yog raws li tag nrho cov ntseeg uas tau nyob hauv thaj av tej kev thov Vajtswv.

37 Thiab thov kom tus Tswv Yexus Khetos cia rau lawv txais lus teb lawv tej kev thov Vajtswv raws li lawv txoj kev ntseeg; thiab thov kom Vajtswv uas yog Leej Txiv nco ntsoov txoj kev khi lus uas nws tau khi nrog tsev neeg Ixayees; thiab thov kom nws foom koob hmoov rau lawv mus ib txhis li, los ntawm txoj kev ntseeg Yexus Khetos lub npe. Amees.