1 Saib seb kuv, Maulaunais, sau kuv txiv, Maumoos, phau ceev xwm txheej kom tiav. Saib seb, kuv tsuas muaj ob peb yam sau xwb, tej yam uas kuv txiv tau txib kom kuv sau.

2 Thiab nim no tau muaj tias tom qab npluav rog uas tseem ceeb thiab hnyav heev nyob saum Khumaulas, saib seb, cov Neeg Nifais uas tau khiav dim mus rau tej chaw nyob nram sab qab teb tau raug cov Neeg Lamas muab plob tua, txog rau thaum lawv txhua tus puas tsuaj tag.

3 Thiab kuv txiv los kuj raug lawv muab tua, thiab tshuav kuv tib leeg nyob sau zaj dab neeg uas tu siab txog txoj kev puas tsuaj ntawm kuv cov neeg. Tiam sis saib seb, kuv cov neeg twb mus lawm, thiab kuv ua raws li kuv txiv txoj lus txib. Thiab xyov lawv yuav muab kuv tua los tsis tua, kuv twb tsis paub.

4 Yog li ntawd kuv yuav sau thiab muab tej ceev xwm txheej zais rau hauv av; thiab txawm kuv yuav mus rau qhov twg los twb tsis tseem ceeb.

5 Saib seb, kuv txiv tau ua phau ceev xwm txheej no, thiab nws tau sau txog lub hom phiaj ntawm qhov uas nws tau ua li ntawd. Thiab saib seb, yog tias kuv muaj chaw nyob hauv cov phiaj, ntshe kuv twb sau txog lub hom phiaj ntawd thiab, tiam sis kuv tsis muaj; thiab kuv twb tsis muaj tej quav hlau, vim kuv tib leeg xwb. Kuv txiv tau raug tua nyob hauv hav rog, thiab tag nrho kuv tej neeg txheeb ze, thiab kuv twb tsis muaj phooj ywg thiab tsis pom qab yuav mus qhov twg; thiab kuv tsis paub xyov tus Tswv yuav cia kuv muaj sia nyob ntev npaum li cas.

6 Saib seb, plaub puas xyoo tau dhau mus txij li thaum peb tus Tswv thiab tus Cawm Seej los.

7 Thiab saib seb, cov Neeg Lamas tau plob tua kuv cov neeg, cov Neeg Nifais, ntawm ib lub nroog mus rau ib lub nroog thiab ntawm ib qho chaw mus rau ib qho chaw, twb yog txog rau thaum tsis muaj lawv tas; thiab kuv cov neeg txoj kev poob yeej loj heev; muaj tseeb tiag, kuv cov neeg, cov Neeg Nifais, txoj kev puas tsuaj yeej loj thiab phem heev.

8 Thiab saib seb, twb yog tus Tswv txhais tes uas tau ua qhov ntawd. Thiab kuj saib seb, cov Neeg Lamas ib leeg kuj ua rog rau ib leeg; thiab tag nrho hauv thaj av no yog ib txoj kev tua neeg thiab ntshav nrog uas tsis tu ncua hlo li; thiab tsis muaj leej twg paub xyov npluav rog yuav xaus thaum twg.

9 Thiab nim no, saib seb, kuv yuav tsis hais txog lawv ntxiv lawm, vim tsis tshuav leej twg ntxiv tsuas yog tshuav cov Neeg Lamas thiab cov tub sab nyob rau hauv thaj av lawm xwb.

10 Thiab twb tsis muaj leej twg paub txog tus Vajtswv tseeb tsuas yog Yexus cov thwj tim xwb, uas tau nyob hauv thaj av txog rau thaum cov neeg txoj kev phem tau loj heev tus Tswv thiaj li tsis kam cia lawv nyob nrog cov neeg; thiab xyov lawv puas tseem nyob hauv thaj av los tsis nyob twb tsis muaj neeg paub.

11 Tiam sis saib seb, kuv txiv thiab kuv tau pom lawv, thiab lawv tau txhawb pab wb.

12 Thiab tus uas tau txais phau ceev xwm txheej no, thiab yuav tsis thuam phau ceev xwv txheej vim yog muaj tej uas tsis zoo tag nrho nyob rau haud, tus ntawd yuav paub tej yam uas tseem ceeb dua tej no. Saib seb, kuv yog Maulaunais; thiab kheev lam yog ua tau, ntshe kuv twb qhia txhua yam rau nej paub lawm.

13 Saib seb, kuv xaus hais txog cov neeg no. Kuv yog Maumoos tus tub, thiab kuv txiv yog ib tug xeeb ntxwv ntawm Nifais.

14 Thiab kuv yog tib tug uas muab phau ceev xwm txheej no zais rau tus Tswv; cov phiaj ntawd twb tsis muaj nuj nqis dab tsi, vim yog tus Tswv txoj lus txib. Vim nws hais tseeb tias yeej tsis muaj leej twg yuav tau cov phiaj ntawd kom muaj nyiaj nplua nuj; tiam sis cov xwm txheej uas nyob hauv muaj nuj nqis heev; thiab tus uas yuav muab cov xwm txheej ntawd los rau neeg pom, tus Tswv yuav foom koob hmoov rau tus ntawd.

15 Vim yeej tsis muaj leej twg muaj hwj chim coj tau cov xwm txheej los rau qhov kaj tsuas yog Vajtswv muab rau nws xwb; vim Vajtswv xav kom ua tej ntawd nrog lub qhov muag ntsia ntsoov rau nws lub yeeb koob, los sis rau txoj kev nyab xeeb ntawm tus Tswv cov neeg khi lus txheej thaum ub uas tau tawg ri niab los ntev lawm.

16 Thiab tus uas muab tej no los rau neeg pom yuav tau koob hmoov; vim yuav coj tej no tawm hauv qhov tsaus ntuj los rau qhov kaj, raws li Vajtswv txoj lus; muaj tseeb tiag, yuav coj tej no tawm hauv av los, thiab tej no yuav ci tawm hauv qhov tsaus ntuj los, thiab los mus rau cov neeg txoj kev paub; thiab yuav ua tej no los ntawm Vajtswv lub hwj chim.

17 Thiab yog tias muaj tej yam uas ua yuam kev ces tsuas yog tib neeg ua yuam kev xwb. Tiam sis saib seb, peb paub tias tsis muaj tej yam uas ua yuam kev; txawm li ntawd los Vajtswv yeej paub txhua yam; yog li ntawd, tus uas rau txim rau tej no, tus ntawd yuav tsum ceev faj nyob tsam nws yuav raug ntuj txiag teb tsaus tej hluav taws.

18 Thiab tus uas hais tias: Cia li ua rau kuv saib, tsis li ntawd nej yuav raug nplawm—tus ntawd yuav tsum ceev faj nyob tsam nws txib tej uas tus Tswv txwv.

19 Vim saib seb, tus uas maj txiav txim rau lwm tus, tus Tswv kuj yuav maj txiav txim rau nws thiab; vim nws yuav tau txais nqi zog raws li tej yam nws ua; yog li ntawd, tus uas ntaus lwm tus, tus Tswv kuj yuav ntaus nws thiab.

20 Saib seb vaj lug kub hais li cas—tib neeg yuav tsum tsis txhob ntaus lwm tus, thiab tsis txhob txiav txim; vim kev txiav txim yog kuv li, tus Tswv hais li, thiab kev pauj kuj yog kuv li, thiab kuv mam pauj rov qab.

21 Thiab tus uas hais kev npau taws thiab kev sib cav sib ceg tawm tsam tus Tswv txoj hauj lwm, thiab tawm tsam tus Tswv cov neeg khi lus uas yog tsev neeg Ixayees, thiab yuav hais tias: Peb yuav rhuav tus Tswv txoj hauj lwm kom puas tsuaj, thiab tus Tswv yuav tsis nco qab txoj kev khi lus uas nws tau khi rau tsev neeg Ixayees—ntshe tus ntawd yuav raug ntov vau thiab muab pov rau hauv hluav taws;

22 Vim tus Tswv tej hom phiaj uas nyob mus ib txhis yuav dov mus, kom txog thaum muaj raws li tag nrho nws tej lus cog tseg.

23 Cia li tshawb xyuas Yaxayas tej kev qhia tej yuav muaj los yav tom ntej. Saib seb, kuv twb sau tsis tau tej ntawd. Muaj tseeb tiag, saib seb kuv hais rau nej tias, cov ntseeg uas tau mus ua ntej kuv ntawd, cov uas tau nyob hauv thaj av no, yuav thov, muaj tseeb tiag, lawv twb yuav thov tawm hauv av tuaj rau tus Tswv; thiab ib yam li tus Tswv muaj txoj sia nyob nws yuav nco ntsoov txoj kev khi lus uas nws khi nrog lawv.

24 Thiab nws paub lawv tej kev thov, paub tias tej kev thov ntawd twb yog los pab rau lawv cov kwv tij. Thiab nws paub lawv txoj kev ntseeg, vim los ntawm nws lub npe lawv muaj peev xwm tshem tau tej roob; thiab los ntawm nws lub npe lawv muaj peev xwm ua rau cov av co qeeg nkaws; thiab los ntawm nws txoj lus lub hwj chim lawv ua rau tej tsev kaw vau rau hauv av; muaj tseeb tiag, tej qhov cub kub kub, tej tsiaj qus thiab tej nab muaj taug twb ua tsis taus rau lawv raug mob, vim yog nws txoj lus lub hwj chim.

25 Thiab saib seb, lawv tej kev thov kuj yog los pab rau tus uas tus Tswv yuav cia coj tej no tawm los.

26 Thiab tsis tas leej twg yuav hais tias tej no yuav tsis muaj los, vim tej no yeej yuav los tiag tiag, vim tus Tswv tau hais li ntawd; vim tej no yuav tawm hauv tej av los, los ntawm tus Tswv txhais tes, thiab twb tsis muaj leej twg yuav txwv tau; thiab tej no yuav los nyob hauv ib lub caij uas tib neeg yuav hais tias tej txuj ci tseem ceeb twb tag tsis muaj lawm; thiab tej no yuav los zoo li ib tug neeg hais tawm hauv qhov tuag los.

27 Thiab tej no yuav los nyob hauv ib lub caij uas cov ntshav ntawm haiv neeg ntseeg yuav thov tus Tswv, vim yog tej kev tuav hauv ntsiag to thiab tej hauj lwm ntawm kev tsaus ntuj.

28 Muaj tseeb tiag, tej no yuav los nyob hauv ib lub caij uas tib neeg yuav xyeej Vajtswv lub hwj chim, thiab tej koom txoos yuav hloov los ua phem ua qias thiab khav theeb los ntawm lawv lub siab muab hlob; muaj tseeb tiag, twb yog nyob hauv ib lub caij uas cov thawj coj ntawm tej koom txoos thiab cov xib hwb yuav khav theeb vim lawv lub siab muab hlob, ua rau lawv cia li sib khib txog tej mej zeej uas zwm rau lawv tej koom txoos.

29 Muaj tseeb tiag, tej no yuav los nyob hauv ib lub caij thaum tib neeg yuav hnov txog hluav taws, thiab cua daj cua dub, thiab pa hluav taws nyob rau pej kum teb chaws;

30 Thiab kuj yuav hnov txog kev ua rog, lus paj lus cua txog kev ua rog, thiab av qeeg nyob ntau qhov chaw.

31 Muaj tseeb tiag, tej no yuav los nyob hauv ib lub caij thaum yuav muaj kev vuab tsuab loj heev nyob saum lub ntiaj teb; yuav muaj kev tua neeg, thiab kev ua tub sab, thiab kev dag, thiab kev ntxias, thiab kev sib daj sib deev, thiab txhua yam kev qias; thaum yuav muaj coob leej uas hais tias, Cia li ua qhov no, los sis ua qhov tod, thiab twb tsis ua li cas, vim tus Tswv yuav pom zoo rau tej ntawd nyob hauv hnub kawg. Tiam sis kev txom nyem yuav raug cov uas hais li ntawd, vim lawv poob siab tag nrho thiab raug tej hlua khi ntawm kev ua phem.

32 Muaj tseeb tiag, tej no yuav los nyob hauv ib lub caij thaum yuav muaj tej koom txoos txhim tsa los uas hais tias: Cia li los cuag kuv, thiab yog nej them nyiaj ces yuav zam txim rau nej tej kev txhaum.

33 Auj cov niag neeg phem thiab tsis yuav lus thiab tawv ncauj es, vim li cas nej thiaj tau txhim tsa tej koom txoos rau nej tus kheej kom muaj nyiaj nplua nuj? Vim li cas nej thiaj tau hloov Vajtswv txoj lus dawb huv, xwv kom nej yuav coj tau kev raug txim los rau nej tej ntsuj plig? Saib seb, nej cia li tso siab rau Vajtswv tej kev tshwm sim; vim saib seb, lub sij hawm yuav los nyob rau hnub ntawd thaum yeej yuav muaj raws li txhua yam no.

34 Saib seb, tus Tswv tau ua rau kuv paub tej yam uas tseem ceeb thiab zoo kawg nkaus ntsig txog tej uas tsis ntev no yeej yuav muaj los, nyob rau hnub ntawd thaum uas tej yam no yeej yuav muaj los nyob hauv nej.

35 Saib seb, kuv hais lus rau nej ib yam li nej nyob ntawm no, thiab tiam sis nej twb tsis nyob. Tiam sis saib seb, Yexus Khetos tau ua rau kuv pom nej, thiab kuv paub tej uas nej ua.

36 Thiab kuv paub tias nej yeej taug kev raws li txoj kev muab hlob ntawm nej lub siab; thiab tsuas yog tshuav ob peb leeg xwb uas tsis khav theeb txog lawv tus kheej los ntawm lawv lub siab muab hlob, mus rau txoj kev hnav tej ris tsho zoo zoo, rau txoj kev ntshaw luag tug, thiab tej kev cam ncauj, thiab txoj kev xav ua kom lwm tus puas tsuaj, thiab tej kev tsim txom, thiab txhua yam kev tsis ncaj; thiab nej tej koom txoos, muaj tseeb tiag, twb tag nrho txhua lub, tau hloov los ua vuab tsuab vim yog txoj kev muab hlob ntawm nej lub siab.

37 Vim saib seb, nej muab nej tej nyiaj, thiab nej tej khoom, thiab nej tej ris tsho zoo, thiab txoj kev tsab zam rau nej tej koom txoos, saib rau nqi tshaj cov neeg pluag thiab cov neeg txom nyem, cov neeg muaj mob thiab cov neeg muaj kev nyuaj siab.

38 Auj nej cov neeg vuab tsuab es, nej cov neeg siab dag, nej cov uas yog xib hwb, cov uas muab nej tus kheej muag rau tej uas yuav lwj siab, vim li cas nej thiaj tau ua vuab tsuab rau Vajtswv lub koom txoos dawb huv? Vim li cas nej thiaj txaj muag ris Khetos lub npe? Vim li cas nej ho tsis xav tias lub txiaj ntsim ntawm txoj kev zoo siab uas tsis txawj kawg muaj nuj nqis dua txoj kev nyuaj siab uas tsis txawj tuag—vim yog txoj kev qhuas ntawm neeg ntiaj teb?

39 Vim li cas nej ho tsab zam rau nej tus kheej nrog tej uas tsis muaj sia, thiab ho cia tej neeg tshaib plab, thiab cov neeg txom nyem, thiab cov neeg liab qab, thiab cov neeg muaj mob thiab cov neeg muaj kev nyuaj siab hla nej, thiab tsis pom lawv?

40 Muaj tseeb tiag, vim li cas nej thiaj txhim tsa nej tej kev qias ntsiag to kom muaj nyiaj nplua nuj, thiab ua rau cov poj ntsuam quaj ntsuag rau tus Tswv, thiab kuj ua rau cov me nyuam ntsuag quaj ntsuag rau tus Tswv, thiab ua rau lawv txiv thiab lawv tej txiv cov ntshav quaj tawm hauv av tuaj rau tus Tswv, kom muaj kev pauj rau saum nej lub taub hau?

41 Saib seb, rab ntaj ntawm kev pauj twb dai rawv ntawm nej saud; thiab tsis ntev lub sij hawm twb yuav los uas nws yuav pauj rau cov ntseeg tej ntshav rau nej, vim nws yuav tsis cia lawv quaj ntxiv lawm.