1 Thiab tau muaj tias kuv tau tawm mus rau hauv cov Neeg Nifais, thiab tau thim ntawm kev lav lus uas kuv tau lav tias kuv yuav tsis pab lawv ntxiv lawm; thiab lawv rov cia rau kuv coj lawv cov tub rog, vim lawv ntsia kuv zoo li kuv muaj peev xwm cawm tau lawv dim ntawm lawv tej kev txom nyem.

2 Tiam sis saib seb, kuv twb tsis muaj kev cia siab, vim kuv twb paub txog tus Tswv tej kev txiav txim uas yuav los rau lawv; vim lawv tsis hloov siab lees txim rau lawv tej kev ua phem, tiam sis sib ntaus sib tua tiv thaiv lawv txoj sia tsis hu txog Tus uas tau tsim lawv.

3 Thiab tau muaj tias cov Neeg Lamas tuaj tawm tsam peb tom qab peb tau khiav mus rau tom lub nroog Yauladees; tiam sis saib seb, nyob rau lub sij hawm ntawd lawv raug raws rov qab lawv thiaj txeeb tsis tau lub nroog.

4 Thiab tau muaj tias lawv rov qab tuaj tawm tsam peb dua, thiab peb tseem tswj tuav tau lub nroog. Thiab kuj muaj lwm cov nroog uas cov Neeg Nifais tswj tuav tau, uas muaj tej chaw tiv thaiv ruaj khov uas tsis cia rau lawv tuaj tau rau hauv teb chaws uas nyob ze peb, tuaj muab cov neeg uas nyob hauv peb tej av ua kom puas tsuaj.

5 Tiam sis tau muaj tias txhua thaj av uas peb tau mus hla, thiab yog tias tsis tau muab cov neeg ntawd sau los ua ke, cov Neeg Lamas twb muab lawv ua puas tsuaj tag, thiab lawv tej zos loj thiab tej zos, thiab tej nroog raug muab hlawv; thiab li no peb puas xya caum cuaj xyoos tau dhau mus.

6 Thiab tau muaj tias nyob hauv xyoo peb puas yim caum cov Neeg Lamas tau rov tuaj ua rog tawm tsam peb, thiab peb tau sawv tawm tsam lawv yam tsis ntshai li; tiam sis twb tsis muaj nuj nqis dab tsi, vim lawv muaj coob heev lawv thiaj li muab cov Neeg Nifais tsuj rau hauv lawv qab xib taws.

7 Thiab tau muaj tias peb rov khiav dua, thiab cov uas khiav nrawm dua cov Neeg Lamas ces khiav dim, thiab cov uas khiav tsis yeej cov Neeg Lamas ces raug muab txiav vau thiab puas tsuaj.

8 Thiab nim no saib seb, kuv, Maumoos, tsis xav ua rau tib neeg ntxhov siab thaum kuv piav txog tej ntshav thiab tej kev puas tsuaj phem heev uas kuv tau pom; tiam sis kuv, vim kuv paub tias yeej yuav muab tej no qhia kom neeg paub, thiab paub tias yeej yuav muab txhua yam uas raug muab zais lawm ua kom tshwm sim los rau saum tej ruv tsev—

9 Thiab paub tias kev paub txog tej yam no yeej yuav los rau cov uas seem tshuav ntawm cov neeg no, thiab los rau Lwm Haiv Neeg, cov uas tus Tswv hais tias yuav ua rau cov neeg no tawg khiav ri niab, thiab Lwm Haiv Neeg yuav muab cov neeg no suav yam tsis muaj nqis li nyob hauv lawv—yog li ntawd kuv thiaj sau ntsiab lus me ntsis, tsis muaj cuab kav qhia tag nrho raws li tej uas kuv tau pom, vim yog txoj lus txib uas kuv tau txais, thiab kuj yog xwv kom nej tsis txhob tu tu siab heev vim yog txoj kev phem ntawm cov neeg no.

10 Thiab nim no saib seb, kuv hais li no rau lawv cov tub ki, thiab kuj yog hais rau Lwm Haiv Neeg uas muaj siab hlub rau tsev neeg Ixayees, uas pom thiab paub tias lawv cov koob hmoov los qhov twg los.

11 Vim kuv paub tias cov no yuav tu siab rau tsev neeg Ixayees txoj kev txom nyem; muaj tseeb tiag, lawv yuav tu siab rau cov neeg no txoj kev puas tsuaj; lawv yuav tu siab tias cov neeg no tsis tau hloov siab lees txim xwv kom yuav muab lawv puag nyob hauv Yexus txhais caj npab.

12 Nim no tau sau tej no cia rau cov uas seem tshuav ntawm tsev neeg Yakhauj; thiab tau muab tej no sau raws li txoj kev no, vim Vajtswv paub tias kev phem yuav coj tsis tau tej no tawm los rau lawv li; thiab yuav muab tej no zais cia rau tus Tswv xwv kom tej no yuav tawm los thaum txog lub sij hawm uas nws pom zoo.

13 Thiab nov yog txoj lus txib uas kuv tau txais; thiab saib seb, tej no yuav tawm los raws li tus Tswv txoj lus txib, thaum nws pom tias tsim nyog, raws li nws lub tswv yim.

14 Thiab saib seb, lawv yuav mus rau cov Neeg Yudais uas tsis ntseeg; thiab lawv yuav mus rau lub hom phiaj no—xwv kom yuav yaum tau lawv ntseeg tias Yexus yog tus Khetos, tus Vajtswv uas muaj txoj sia nyob Leej Tub; ntseeg tias los ntawm tus uas nws Hlub tshaj, Leej Txiv yuav ua kom muaj raws li nws lub hom phiaj uas tseem ceeb thiab nyob mus ib txhis, uas yog txoj kev txum tim cov Neeg Yudais, los sis tag nrho tsev neeg Ixayees, rov qab los rau thaj av uas yog lawv qub txeeg qub teg, uas tus Tswv lawv tus Vajtswv tau muab rau lawv, kom muaj raws li nws txoj kev khi lus.

15 Thiab kuj yog xwv kom cov neeg no cov tub ki yuav haj yam ntseeg nws txoj moo zoo, uas yuav tawm ntawm Lwm Haiv Neeg mus rau lawv; vim cov neeg no yuav raug tawg khiav ri niab, thiab yuav hloov los ua ib co neeg nqaij tawv tsaus, qias neeg, thiab vuab tsuab, tshaj qhov uas piav tau uas ib txwm tau muaj nyob hauv peb, muaj tseeb tiag, twb tshaj tej uas tau muaj nyob hauv cov Neeg Lamas, thiab muaj li no los twb vim yog lawv txoj kev tsis ntseeg thiab txoj kev pe dab pe mlom.

16 Vim saib seb, tus Tswv tus Ntsuj Plig twb tseg tsis tshoov lawv cov yawg koob lub siab lawm; thiab lawv tsis muaj Khetos thiab Vajtswv nrog lawv nyob hauv lub ntiaj teb; thiab lawv raug muab raws khiav ib yam li tej npluag nplej raug cua ntsawj mus.

17 Thaum ub lawv yog ib co neeg ntxim nyiam, thiab lawv muaj Khetos ua lawv tus tswv yug yaj; muaj tseeb tiag, Vajtswv uas yog Leej Txiv twb yog tus coj lawv.

18 Tiam sis nim no, saib seb, Dab Ntxwg Nyoog yog tus coj lawv rau ub rau no, ib yam li tej npluag nplej raug cua ntsawj mus, los sis ib yam li ib lub nkoj raug tej nphwv dej muab nphau rau ub rau no, tsis muaj daim ntaub nquam thiab tsis muaj tus hlau tuav kom nyob tus, los sis tsis muaj ib yam dab tsi los tsav lub nkoj ntawd; thiab lawv twb zoo tib yam li lub nkoj ntawd.

19 Thiab saib seb, tus Tswv tau tshwj lawv cov koob hmoov tseg, uas lawv twb yuav luag txais nyob hauv thaj av, cia rau Lwm Haiv Neeg cov uas yuav los nyob hauv thaj av.

20 Tiam sis saib seb, yuav muaj tias Lwm Haiv Neeg yuav muab lawv raws khiav thiab ua kom tawg khiav ri niab; thiab tom qab Lwm Haiv Neeg muab lawv raws khiav thiab ua kom tawg khiav ri niab lawm, saib seb, thaum ntawd tus Tswv yuav nco qab txog txoj kev khi lus uas nws khi rau Anplaham thiab rau tag nrho tsev neeg Ixayees.

21 Thiab tus Tswv kuj yuav nco qab txog cov neeg ncaj ncees tej kev thov, uas hais mus rau nws kom pab lawv.

22 Thiab thaum ntawd, auj nej cov uas yog Lwm Haiv Neeg, nej yuav ua cas sawv tiv taus Vajtswv lub hwj chim, tsuas yog tias nej yuav hloov siab lees txim thiab tig ntawm nej tej kev phem los xwb?

23 Nej tsis paub tias nej nyob hauv Vajtswv txhais tes no los? Nej tsis paub tias nws muaj hwj chim tag nrho, thiab los ntawm nws txoj lus txib uas tseem ceeb, lub ntiaj teb yuav raug muab kauv los ua ke zoo li ib daim ntawv kauv no los?

24 Yog li ntawd, nej cia li hloov siab lees txim, thiab txo nej lub hwj chim rau nws pom, tsam nws ho yuav los rau txim rau nej—tsam ib tug uas seem tshuav ntawm Yakhauj cov tub ki yuav mus rau hauv nej yam li ib tug tsov ntxhuav, thiab muab nej dua ua tej dwb daim, thiab tsis muaj tus cawm tau.