1 Thiab tau muaj tias nyob hauv tib xyoos ntawd rov pib muaj ib npluav rog dua ntawm cov Neeg Nifais thiab cov Neeg Lamas. Thiab txawm tias kuv tseem hluas, los kuv kuj muaj lub cev siab; yog li ntawd Nifais cov neeg tsa kuv los ua lawv tus thawj coj, los sis tus thawj coj ntawm lawv cov tub rog.

2 Yog li ntawd nyob hauv kuv xyoo kaum rau kuv tau mus coj cov Neeg Nifais ib pab tub rog, tawm tsam cov Neeg Lamas; yog li ntawd peb puas nees nkaum rau xyoo tau dhau mus.

3 Thiab tau muaj tias nyob hauv xyoo peb puas nees kaum xya cov Neeg Lamas tau tuaj tawm tsam peb nrog lub zog uas loj heev kawg nkaus, npaum li hais tias lawv ua rau kuv cov tub rog ntshai; yog li ntawd lawv tsis kam sib ntaus sib tua, thiab lawv pib thim mus rau tej teb chaws nyob sab qaum teb.

4 Thiab tau muaj tias peb mus txog rau lub nroog Eenkaulas, thiab peb txeeb tau lub nroog ntawd, thiab npaj tiv thaiv peb tus kheej tawm tsam cov Neeg Lamas. Thiab tau muaj tias peb sib zog kho lub nroog kom ruaj khov; tiam sis txawm tias peb tau sib zog kho kom lub nroog ruaj khov los cov Neeg Lamas tseem tuaj tawm tsam peb thiab muab peb raws tawm ntawm lub nroog mus.

5 Thiab lawv kuj tau raws peb tawm ntawm thaj av Daviv mus.

6 Thiab peb taug kev tawm mus thiab mus rau thaj av Yausuas, uas yog nyob rau hauv tej ciam teb sab hnub poob ze ntug dej hiav txwv.

7 Thiab tau muaj tias peb sau peb cov neeg los ua ke ceev npaum li ua tau, xwv kom peb yuav sau tau lawv los ua ke ib pawg.

8 Tiam sis saib seb, thaj av muaj tub sab thiab cov Neeg Lamas puv nkaus; thiab txawm tias muaj kev puas tsuaj loj heev dai ncuv ntawm kuv cov neeg sab saud los, lawv tseem tsis hloov siab lees txim rau lawv tej kev ua phem; yog li ntawd thiaj muaj ntshav thiab kev puas tsuaj ri thoob plaws rau hauv thaj av, los ntawm cov Neeg Nifais thiab kuj yog los ntawm cov Neeg Lamas thiab; thiab twb yog kev ntxeev siab nyob thoob plaws rau hauv tag nrho thaj av.

9 Thiab nim no, cov Neeg Lamas muaj ib tug vaj ntxwv, thiab nws lub npe hu ua Aloos; thiab nws tau tuaj tawm tsam peb nrog ib pab tub rog uas muaj plaub caug plaub txhiab leej. Thiab saib seb, kuv nres tau nws nrog plaub caug thiab ob txhiab leej. Thiab tau muaj tias kuv kov yeej nws nrog kuv pab tub rog ua rau nws khiav ntawm kuv mus. Thiab saib seb, tau muaj tag nrho tej no, thiab peb puas peb caug xyoo tau dhau mus.

10 Thiab tau muaj tias cov Neeg Nifais pib hloov siab lees txim rau lawv tej kev ua phem, thiab pib quaj nyiav ib yam li tus yaj saub Xamuyees hais tseg; vim saib seb twb tsis muaj leej twg muaj peev xwm ceev tau tej uas yog nws tug, vim yog cov tub sab, thiab cov tub nyiag, thiab cov neeg tua neeg, thiab tej kev ua yees siv, thiab tej kev ua dab uas nyob hauv thaj av.

11 Yog li ntawd pib muaj kev nyiav thiab kev quaj ntsuag nyob hauv thaj av txhua nrho vim yog tej no, thiab haj yam muaj nyob hauv Nifais cov neeg.

12 Thiab tau muaj tias thaum kuv, Maumoos, pom lawv txoj kev quaj ntsuag thiab txoj kev nyiav thiab lawv txoj kev tu siab rau ntawm tus Tswv xub ntiag, kuv lub siab pib xyiv fab nyob hauv kuv, vim kuv paub txog tus Tswv tej kev hlub tshua thiab kev ua siab ntev, yog li ntawd kuv thiaj xav tias nws yuav hlub tshua lawv xwv kom lawv yuav rov hloov los ua ib co neeg ncaj ncees.

13 Tiam sis saib seb kuv txoj kev xyiv fab no twb tsis muaj nuj nqis, vim lawv txoj kev tu siab twb tsis yog rau txoj kev hloov siab lees txim, vim yog Vajtswv txoj kev zoo; tiam sis yog txoj kev tu siab ntawm cov raug txim, vim tus Tswv yuav tsis cia lawv muaj kev zoo siab thaum ua txhaum tas mus li.

14 Thiab lawv twb tsis los cuag Yexus nrog lub siab mob thiab lub siab xav ua zoo, tiam sis lawv foom phem rau Vajtswv, thiab xav tuag. Txawm li ntawd los lawv tseem siv ntaj los sib ntaus sib tua cawm lawv txoj sia.

15 Thiab tau muaj tias kuv txoj kev tu siab rov qab los rau kuv dua, thiab kuv pom tias lub caij nyoog ntawm kev tshav ntuj twb dhau lawv mus lawm, tag nrho ntawm sab cev nqaij daim tawv thiab sab ntsuj plig; vim kuv twb pom lawv txhiab txhiab leej raug ntov vau nyob hauv kev tab meeg ntxeev siab tawm tsam lawv tus Vajtswv, thiab raug muab tum ib yam li tej chiv rau hauv thaj av. Thiab li no peb puas plaub caug plaub xyoos tau dhau mus.

16 Thiab tau muaj tias nyob hauv xyoo peb puas plaub caug tsib cov Neeg Nifais pib khiav ua ntej ntawm cov Neeg Lamas; thiab lawv raug caum txog rau thaum lawv los rau ntawm thaj av Yaxoos, ua ntej yuav cheem tau lawv txoj kev thim rov qab.

17 Thiab nim no, lub nroog Yaxoos yog nyob ze thaj av uas Amaloos tau muab cov ceev xwm txheej zais rau tus Tswv, xwv kom cov ceev xwm txheej tsis txhob puas tsuaj. Thiab saib seb kuv tau mus raws li Amaloos tej lus, thiab tau muab Nifais cov phiaj, thiab tau sau ib zaj xwm txheej raws li Amaloos tej lus.

18 Thiab nyob rau saum Nifais cov phiaj kuv tau sau ib zaj txog tag nrho tej kev phem thiab tej kev qias; tiam sis nyob rau saum cov phiaj no kuv twb tsis sau ib zaj tag nrho txog lawv tej kev phem thiab tej kev qias, vim saib seb, txij thaum kuv loj txaus to taub tib neeg lub neej twb yeej muaj tej kev phem thiab tej kev qias rau kuv qhov muag pom tsis tu ncua.

19 Thiab kuv txom nyem heev vim yog lawv tej kev phem; vim kuv lub siab yeej muaj kev tu siab puv nkaus vim yog lawv tej kev phem, tag kuv lub neej; txawm li ntawd los, kuv paub tias tus Tswv yuav muab kuv tsa sawv thaum txog hnub kawg.

20 Thiab tau muaj tias nyob hauv xyoo no Nifais cov neeg rov raug yos tua thiab raug raws. Thiab tau muaj tias peb raug raws tawm mus txog rau thaum peb mus txog rau sab qaum teb ntawm thaj av uas hu ua Xees.

21 Thiab tau muaj tias peb tau kho lub nroog Xees kom muaj chaw tiv thaiv zoo, thiab peb tau sau peb cov neeg los ua ke coob npaum li yuav ua tau, saib peb puas yuav cawm tau lawv dim ntawm kev puas tsuaj.

22 Thiab tau muaj tias nyob hauv xyoo peb puas plaub caug rau lawv pib rov tuaj tawm tsam peb dua.

23 Thiab tau muaj tias kuv tau hais rau kuv cov neeg, thiab tau yaum lawv tag zog, kom lawv sawv yam tsis ntshai li tiv cov Neeg Lamas thiab sib ntaus sib tua tiv thaiv lawv cov poj niam, thiab lawv cov me nyuam, thiab lawv tej vaj tej tsev.

24 Thiab kuv tej lus tau tsa lawv me ntsis kom muaj zog, ua rau lawv thiaj tsis khiav ntawm cov Neeg Lamas mus, tiam sis sawv yam tsis ntshai li tawm tsam lawv.

25 Thiab tau muaj tias peb pab tub rog uas muaj peb caug txhiab leej tau sib tua tawm tsam nrog pab tub rog uas muaj tsib caug txhiab leej. Thiab tau muaj tias peb sawv tiv lawv nrog txoj kev ruaj nrees heev uas ua rau lawv khiav ntawm peb mus.

26 Thiab tau muaj tias thaum lawv khiav lawm peb tau raws lawv qab nrog peb cov tub rog, thiab rov ntsib lawv dua, thiab kov yeej lawv; txawm li ntawd los tus Tswv lub zog twb tsis nrog peb nyob; muaj tseeb tiag, tus Tswv tso peb nyob peb, ua rau tus Tswv tus Ntsuj Plig tsis nyob nrog peb; yog li ntawd peb tau hloov los ua neeg qaug zog ib yam li peb cov kwv tij.

27 Thiab kuv tu siab vim yog kuv cov neeg txoj kev txom nyem loj no, vim yog lawv tej kev phem thiab lawv tej kev qias. Tiam sis saib seb, peb tau tawm mus tawm tsam cov Neeg Lamas thiab cov tub sab Nkadi-atoos, txog rau thaum peb rov txeeb tau tej av ntawm peb tej qub txeeg qub teg.

28 Thiab xyoo peb puas plaub caug cuaj tau dhau mus. Thiab nyob hauv xyoo peb puas tsib caug, peb tau ua ib txoj kev sib yeem nrog cov Neeg Lamas thiab cov tub sab Nkadi-atoos, uas peb tau muab tej av ntawm peb tej qub txeeg qub teg faib.

29 Thiab cov Neeg Lamas muab thaj av sab qaum teb rau peb, muaj tseeb tiag, mus txog rau txoj kev nqaim uas mus rau nram thaj av sab qab teb. Thiab peb muab tag nrho thaj av sab qab teb rau cov Neeg Lamas.