1 Thiab tau muaj tias cov Neeg Lamas twb tsis rov tuaj ua rog txog rau thaum kaum xyoo ntxiv tau dhau mus. Thiab saib seb, kuv tau hais kom kuv cov neeg, cov Neeg Nifais, ua hauj lwm npaj lawv tej av thiab lawv tej cuab yeej ua rog rau lub caij ua rog.

2 Thiab tau muaj tias tus Tswv hais rau kuv tias: Tshaj tawm rau cov neeg no—Nej cia li hloov siab lees txim, thiab los cuag kuv, thiab ua kev cai raus dej, thiab rov tsa kuv lub koom txoos dua, thiab yuav tseg nej.

3 Thiab kuv tau tshaj tawm rau cov neeg no, tiam sis twb tsis muaj nuj nqis; thiab lawv tsis paub tias twb yog tus Tswv uas tau tseg lawv, thiab muab ib lub caij nyoog rau lawv los hloov siab lees txim. Thiab saib seb lawv tau ua lawv lub siab tawv tawm tsam tus Tswv lawv tus Vajtswv.

4 Thiab tau muaj tias tom qab kaum xyoo no tau dhau mus, uas yog, tag nrho, muaj peb puas rau caum xyoo txij thaum Khetos los, cov Neeg Lamas tus vaj ntxwv tau xa ib tsab ntawv tuaj rau kuv, uas qhia rau kuv paub tias lawv tab tom npaj yuav rov tuaj ua rog tawm tsam peb.

5 Thiab tau muaj tias kuv hais kom kuv cov neeg sib sau lawv tus kheej tuaj ua ke nyob rau tom thaj av Quav Poj, rau hauv ib lub nroog uas yog nyob hauv tej ciam teb, uas nyob ze txoj kev nqaim uas mus rau nram thaj av sab qab teb.

6 Thiab peb tau tso peb cov tub rog nyob rau qhov chaw ntawd, xwv kom peb yuav cheem tau cov Neeg Lamas cov tub rog, xwv kom lawv thiaj txeeb tsis tau peb tej av ib qho hlo li; yog li ntawd peb tau tiv thaiv tawm tsam lawv nrog tag nrho peb cov tub rog.

7 Thiab tau muaj tias nyob hauv xyoo peb puas rau caum ib cov Neeg Lamas tau tuaj rau nram lub nroog Quav Poj tuaj ua rog tawm tsam peb; thiab tau muaj tias nyob hauv xyoo ntawd peb kov yeej lawv, ua rau lawv thiaj tig rov qab mus rau lawv tej av.

8 Thiab nyob hauv xyoo peb puas rau caum ob lawv tau rov qab tuaj ua rog dua. Thiab peb rov kov yeej lawv dua, thiab muab lawv tua tuag coob leej heev, thiab lawv cov tuag raug muab pov rau hauv dej hiav txwv.

9 Thiab nim no, vim yog qhov tseem ceeb no uas kuv cov neeg, uas yog cov Neeg Nifais, tau ua, lawv pib khav txog lawv tus kheej lub zog, thiab pib cog lus rau lub ntuj tias lawv yuav ua pauj rau lawv cov kwv tij cov ntshav, uas raug lawv cov yeeb ncuab tua tuag.

10 Thiab lawv cog lus rau lub ntuj, thiab kuj cog lus rau Vajtswv lub rooj theej kiab, hais tias lawv yuav mus ua rog tawm tsam lawv cov yeeb ncuab, thiab yuav muab lawv txiav tawm ntawm thaj av mus.

11 Thiab tau muaj tias txij lub sij hawm ntawd mus kuv, Maumoos, tsis kam ua tus thawj tub rog thiab tus thawj coj ntawm cov neeg no, vim yog lawv txoj kev phem thiab kev qias.

12 Saib seb, kuv tau coj lawv, txawm tias lawv muaj kev phem los kuv tseem tau coj lawv ntau zaus mus ua rog, thiab tau hlub lawv, raws li Vajtswv txoj kev hlub uas muaj nyob hauv kuv, nrog tag nrho kuv lub siab; thiab kuv tau thov Vajtswv kawg siab kawg ntsws tas ib hnub nkaus rau lawv; txawm li ntawd los, twb tsis muaj kev ntseeg, vim yog lawv lub siab tawv.

13 Thiab kuv tau cawm lawv dim ntawm lawv cov yeeb ncuab txhais tes peb zaug nkaus, thiab lawv tseem tsis tau hloov siab lees txim rau lawv tej kev txhaum.

14 Thiab thaum lawv tau cog lus rau tag nrho tej uas peb tus Tswv thiab tus Cawm Seej Yexus Khetos tau txwv, hais tias lawv yuav mus ua rog rau lawv cov yeeb ncuab, thiab ua pauj rau lawv cov kwv tij cov ntshav, saib seb tus Tswv lub suab los rau kuv, hais tias:

15 Txoj kev ua pauj yog kuv li, thiab kuv yuav them rov qab; thiab vim cov neeg no twb tsis hloov siab lees txim tom qab kuv tau cawm lawv dim, saib seb, lawv yuav raug txiav tawm ntawm thaj av mus.

16 Thiab tau muaj tias kuv yeej tsis kam mus tawm tsam kuv cov yeeb ncuab hlo li; thiab kuv tau ua raws li tus Tswv txib kuv; thiab kuv tau ua ib tug tim khawv qhia rau neeg ntiaj teb txog tej uas kuv pom thiab hnov, raws li tus Ntsuj Plig txoj kev ua tshwm sim uas tau ua tim khawv txog tej uas yuav muaj los.

17 Yog li ntawd kuv sau rau nej, cov uas yog Lwm Haiv Neeg, thiab kuj yog rau nej, tsev neeg Ixayees, thaum txoj hauj lwm yuav pib, xwv kom nej twb yuav npaj txhij rov qab mus rau thaj av ntawm nej qub txeeg qub teg;

18 Muaj tseeb tiag, saib seb, kuv sau rau tag nrho cov neeg thoob ntiaj teb; muaj tseeb tiag, sau rau nej, kaum ob xeem neeg Ixayees, cov uas yuav raug txiav txim raws li tej yam nej ua los ntawm kaum ob tug uas Yexus xaiv los ua nws cov thwj tim nyob rau hauv thaj av Yeluxalees.

19 Thiab kuv kuj sau rau cov uas seem tshuav ntawm cov neeg no, cov uas kuj yuav raug txiav txim los ntawm kaum ob tug uas Yexus xaiv nyob hauv thaj av no; thiab lawv yuav raug txiav txim los ntawm lwm cov kaum ob tug uas Yexus xaiv nyob hauv thaj av Yeluxalees.

20 Thiab tus Ntsuj Plig ua tej no tshwm sim rau kuv; yog li ntawd kuv thiaj sau rau nej txhua tus. Thiab vim lub ntsiab no kuv thiaj sau rau nej, xwv kom nej yuav paub tias nej txhua tus yeej yuav sawv ntawm Khetos lub rooj txiav txim, muaj tseeb tiag, txhua tus neeg uas yog los ntawm tag nrho Adas tsev neeg; thiab nej yeej yuav sawv raug txiav txim rau tej yam uas nej ua, seb tej hauj lwm ntawd zoo los sis phem;

21 Thiab kuj yog xwv kom nej ntseeg Yexus Khetos txoj moo zoo, uas nej yuav muaj nyob hauv nej; thiab kuj yog xwv kom cov Neeg Yudais, uas yog tus Tswv cov neeg khi lus, yuav muaj lwm tus tim khawv ntxiv rau tus uas lawv pom thiab hnov, hais tias Yexus, tus uas lawv muab tua, twb yog tus Khetos ntag thiab tus Vajtswv ntag.

22 Thiab kuv xav tias kheev lam kuv muaj peev xwm yaum tau nej txhua tus nyob thoob plaws lub ntiaj teb los hloov siab lees txim thiab npaj tos mus sawv ntawm Khetos lub rooj txiav txim.