1 Thiab nim no, saib seb, kuv yuav hais me ntsis rau cov uas seem tshuav ntawm cov neeg no uas raug tseg cia, yog hais tias Vajtswv ho muab kuv tej lus rau lawv, xwv kom lawv yuav paub txog tej yam ntawm lawv cov yawg koob; muaj tseeb tiag, kuv hais rau nej, nej cov uas seem tshuav ntawm tsev neeg Ixayees; thiab cov no yog tej lus uas kuv hais:

2 Cia li paub tias nej yog los ntawm tsev neeg Ixayees.

3 Cia li paub tias nej yuav tsum los rau kev hloov siab lees txim, yog tsis li ces yuav cawm tsis tau nej dim.

4 Cia li paub tias nej yuav tsum muab nej tej cuab yeej ua rog tso tseg, thiab tsis txhob nyiam txoj kev ua nqaij ntuag ntshav nrog ntxiv lawm, thiab tsis txhob nqa tej cuab yeej ua rog ntawd ntxiv lawm, tsuas yog tias Vajtswv yuav txib nej xwb.

5 Cia li paub tias nej yuav tsum los kawm kom paub li nej cov yawg koob, thiab hloov siab lees txim rau tag nrho nej tej kev txhaum thiab tej kev ua phem, thiab ntseeg Yexus Khetos, ntseeg tias nws yog Vajtswv Leej Tub, thiab ntseeg tias nws raug cov Neeg Yudais muab tua, thiab los ntawm Leej Txiv lub hwj chim nws tau sawv rov qab los, nws thiaj tau kov yeej lub qhov ntxa; thiab los ntawm nws, qhov uas kev tuag muaj kuab heev raug kov yeej tas lawm.

6 Thiab nws ua kom muaj txoj kev sawv rov los ntawm cov tuag, yog li ntawd nws yeej yuav muab tib neeg tsa los sawv ntawm nws lub rooj txiav txim.

7 Thiab nws tau ua kom muaj neeg ntiaj teb txoj kev txhiv dim, yog li ntawd tus uas nws pom tsis muaj txim nyob rau hnub txiav txim, yuav cia tus ntawd mus nyob ntawm Vajtswv lub xub ntiag nyob hauv nws lub nceeg vaj, mus hu nkauj qhuas tsis tu tsis tseg nrog pawg hu nkauj uas nyob saud, rau Leej Txiv, thiab rau Leej Tub, thiab rau tus Vaj Ntsuj Plig Dawb Huv, uas yog ib tug Vajtswv, nyob hauv ib qho chaw zoo siab uas tsis muaj qhov kawg.

8 Yog li ntawd cia li hloov siab lees txim, thiab ua kev cai raus dej los ntawm Yexus lub npe, thiab cia li tuav nkaus Khetos txoj moo zoo, uas yuav muab los tsa rau nej, tsis yog nyob hauv phau ceev xwm txheej no xwb tiam sis kuj yog nyob hauv phau ceev xwm txheej uas yuav los ntawm cov Neeg Yudais los rau Lwm Haiv Neeg, phau ceev xwm txheej uas yuav los ntawm Lwm Haiv Neeg los rau nej.

9 Vim saib seb, tau sau phau no xwv kom nej yuav ntseeg phau tod; thiab yog tias nej ntseeg phau tod nej kuj yuav ntseeg phau no thiab; thiab yog tias nej ntseeg phau no nej yuav paub ntsig txog nej cov yawg koob, thiab kuj paub txog tej hauj lwm uas xav tsis thoob uas Vajtswv lub hwj chim tau ua nyob hauv lawv.

10 Thiab nej kuj yuav paub tias nej yog ib co uas seem tshuav ntawm Yakhauj cov tub ki; yog li ntawd yuav muab nej suav nyob hauv cov neeg ntawm thawj txoj kev khi lus; thiab yog hais tias nej ho ntseeg Khetos, thiab ua kev cai raus dej, thawj zaug ntawm dej, tom qab ntawd ntawm hluav taws thiab ntawm tus Vaj Ntsuj Plig Dawb Huv, ua raws nraim li peb tus Cawm Seej tus yam ntxwv, raws li tej uas nws tau txib peb, ces yuav zoo rau nej nyob hauv hnub txiav txim. Amees.