1 Thiab tau muaj tias tau hnov ib lub suab nyob thoob plaws hauv cov neeg ntawm lub ntiaj teb, nyob hauv tag nrho thaj av no, hais tias:

2 Kev txom nyem, kev txom nyem, kev txom nyem raug cov neeg no; kev txom nyem raug cov neeg ntawm tag nrho lub ntiaj teb tsuas yog lawv yuav hloov siab lees txim xwb; vim tus dab phem luag ntxhi, thiab nws cov tim tswv zoo siab, vim yog cov tub zoo nraug thiab cov ntxhais zoo nkauj ntawm kuv cov neeg tau tuag; thiab twb vim yog lawv txoj kev ua phem thiab tej kev qias es lawv thiaj tuag!

3 Saib seb, kuv tau xuas hluav taws hlawv lub nroog loj Xalahelas ntawd, thiab hlawv cov neeg uas nyob haud.

4 Thiab saib seb, kuv tau ua kom lub nroog loj Maulaunais ntawd tog mus rau hauv qab thu dej hiav txwv, thiab kom cov neeg uas nyob hauv poob dej tuag.

5 Thiab saib seb, kuv tau muab av faus lub nroog loj Maulaunaihas ntawd, thiab cov neeg uas nyob hauv, kom zais tau lawv tej kev ua phem thiab lawv tej kev qias tawm ntawm kuv lub ntsej muag mus, xwv kom cov yaj saub thiab cov ntseeg tej ntshav tsis txhob los tawm tsam lawv rau ntawm kuv ntxiv lawm.

6 Thiab saib seb, kuv tau ua kom lub nroog Nkilenkas saus, thiab kom cov neeg uas nyob hauv raug faus tob rau hauv lub ntiaj teb;

7 Muaj tseeb tiag, thiab lub nroog Aunaihas thiab cov neeg uas nyob hauv, thiab lub nroog Maukhas thiab cov neeg uas nyob hauv, thiab lub nroog Yeluxalees thiab cov neeg uas nyob hauv; thiab kuv tau ua kom tej dej sawv tuaj nyob rau tej chaw ntawd, kom zais tau lawv tej kev phem thiab tej kev qias tawm ntawm kuv lub ntsej muag mus, xwv kom cov yaj saub thiab cov ntseeg cov ntshav tsis txhob los tawm tsam lawv rau ntawm kuv ntxiv lawm.

8 Thiab saib seb, lub nroog Nkadi-adais, thiab lub nroog Nkadi-oonas, thiab lub nroog Yakhauj, thiab lub nroog Nkinkinaus, kuv tau ua rau tag nrho cov nroog no saus, thiab tau ua kom tej pov roob thiab tej vos hav sawv tuaj nyob hauv tej chaw ntawd; thiab kuv tau muab cov neeg uas nyob hauv faus tob rau hauv av, kom zais tau lawv tej kev phem thiab tej kev qias tawm ntawm kuv lub ntsej muag mus, xwv kom cov yaj saub thiab cov ntseeg tej ntshav tsis txhob los rau kuv kom tawm tsam lawv lawm.

9 Thiab saib seb, lub nroog loj Yakhaunpankas, uas yog vaj ntxwv Yakhauj cov neeg nyob, kuv tau xuas hluav taws hlawv vim yog lawv tej kev txhaum thiab lawv tej kev phem, uas phem dua ntais tej kev phem ntawm tag nrho lub ntiaj teb, vim yog lawv tej kev tua neeg ntsiag to thiab tej kev tuav hauv; vim twb yog lawv uas tau rhuav txoj kev thaj yeeb ntawm kuv cov neeg thiab lub tsoom fwv ntawm thaj av; yog li ntawd kuv thiaj ua kom lawv kub hnyiab, ua kom lawv puas tsuaj tawm ntawm kuv lub ntsej muag mus, xwv kom cov yaj saub thiab cov ntseeg tej ntshav tsis txhob los tawm tsam lawv rau ntawm kuv ntxiv lawm.

10 Thiab saib seb, lub nroog Lamas, thiab lub nroog Yausaws, thiab lub nroog Khas, thiab lub nroog Kisawkhumas, kuv tau xuas hluav taws hlawv, thiab cov neeg uas nyob hauv, vim yog lawv txoj kev phem ntawm kev ntiab cov yaj saub tawm, thiab xuas pob zeb ntaus cov uas kuv xa mus tshaj tawm rau lawv txog lawv tej kev phem thiab lawv tej kev qias.

11 Thiab vim yog lawv tau ntiab lawv tag nrho tawm, thiaj tsis muaj ib tug neeg ncaj ncees nyob hauv tej nroog ntawd li, kuv tau xa hluav taws nqis los thiab ua rau lawv puas tsuaj, xwv kom lawv tej kev phem thiab tej kev qias yuav raug zais tawm ntawm kuv lub ntsej muag mus, xwv kom cov yaj saub thiab cov ntseeg uas kuv xa mus rau hauv lawv tsis txhob quaj tawm hauv cov av tuaj rau kuv kom tawm tsam lawv.

12 Thiab kuv tau ua ntau yam kev puas tsuaj loj los raug thaj av no, thiab raug cov neeg no, vim yog lawv tej kev phem thiab lawv tej kev qias.

13 Auj nej txhua tus uas Khetos tau tseg cia twb vim yog nej ncaj ncees dua lawv, nim no nej puas tseem tsis kam tig rov los cuag kuv, thiab hloov siab lees txim rau nej tej kev txhaum, thiab hloov siab los ntseeg, xwv kom kuv yuav kho tau nej?

14 Muaj tseeb tiag, kuv hais tseeb rau nej, yog nej yuav los cuag kuv nej yuav tau txoj sia nyob mus ib txhis. Saib seb, kuv txhais npab hlub tshua twb muab cev tuaj rau nej, thiab tus uas yuav los, kuv yuav txais yuav tus ntawd; thiab cov uas los cuag kuv tau koob hmoov.

15 Saib seb, kuv yog Yexus Khetos Vajtswv Leej Tub. Kuv tsim lub ntuj thiab lub ntiaj teb, thiab txhua yam uas muaj nyob haud. Kuv twb nrog Leej Txiv txij puag thaum chiv keeb los. Kuv koom nrog Leej Txiv, thiab Leej Txiv koom nrog kuv; thiab yog los ntawm kuv uas Leej Txiv tau yeeb koob rau nws lub npe.

16 Kuv twb los rau hauv kuv cov neeg, thiab kuv cov neeg twb tsis txais yuav kuv. Thiab twb muaj raws li tej vaj lug kub uas hais txog kuv txoj kev los.

17 Thiab tag nrho cov uas txais yuav kuv, kuv cia rau lawv los ua Vajtswv cov tub; thiab tag nrho cov uas yuav ntseeg kuv lub npe kuv yuav cia rau lawv ib yam li ntawd, vim saib seb, kev txhiv dim twb yog los ntawm kuv los, thiab los ntawm kuv los twb muaj raws li Mauxes txoj kev cai lawm.

18 Kuv yog txoj kev kaj thiab txoj sia ntawm neeg ntiaj teb. Kuv yog Alafas thiab Aumenkas, qhov chiv keeb thiab qhov kawg.

19 Thiab nej tsis txhob tua tsiaj txi rau kuv ntxiv lawm; muaj tseeb tiag, tso tseg nej tej kev txi thiab nej tej kev hlawv tsiaj, vim kuv yuav tsis txais nej tej kev txi thiab nej tej kev hlawv tsiaj.

20 Thiab nej yuav muab lub siab mob thiab lub siab xav ua zoo ua kev txi rau kuv. Thiab tus uas yuav los cuag kuv nrog lub siab mob thiab lub siab xav ua zoo, kuv yuav muab tus ntawd ua kev cai raus ntawm hluav taws thiab ntawm tus Vaj Ntsuj Plig Dawb Huv, zoo ib yam li cov Neeg Lamas, vim yog lawv txoj kev ntseeg kuv nyob rau lub sij hawm thaum lawv hloov siab los ntseeg, twb ua kev cai raus ntawm hluav taws thiab ntawm tus Vaj Ntsuj Plig Dawb Huv, thiab lawv twb tsis paub tias tau ua li ntawd.

21 Saib seb, kuv tau los rau neeg ntiaj teb kom coj tau txoj kev txhiv dim los rau neeg ntiaj teb, kom cawm tau neeg ntiaj teb dim ntawm kev txhaum.

22 Yog li ntawd, tus uas hloov siab lees txim thiab los cuag kuv ib yam li ib tug me nyuam yaus, kuv txais yuav tus ntawd, vim Vajtswv lub nceeg vaj yog rau cov uas zoo li no. Saib seb, kuv tau tso kuv txoj sia tseg thiab tau kuv txoj sia rov qab los, rau cov uas zoo li no; yog li ntawd cia li hloov siab lees txim, thiab los cuag kuv, nej cov uas nyob thoob plaws lub ntiaj teb, thiab txais kev cawm dim.