1 Thiab nim no tau muaj tias thaum Yexus tau nce mus saum ntuj ceeb tsheej lawm, cov neeg coob coob tau sib ncaim, thiab txhua tus txiv neej tau coj nws tus poj niam thiab nws cov me nyuam thiab tau rov qab mus rau nws lub tsev.

2 Thiab tam sim ntawd tau muaj suab nrov mus thoob rau cov neeg, ua ntej thaum tsis tau tsaus ntuj, hais tias cov neeg coob coob tau pom Yexus, thiab hais tias nws tau txhawb pab lawv, thiab hais tias tag kis nws tseem yuav ua nws tus kheej rau cov neeg coob coob pom.

3 Muaj tseeb tiag, thiab hmo ntawd ib hmos tau muaj suab nrov mus thoob ntsig txog Yexus; thiab lawv thiaj li tau xa xov tawm mus rau cov neeg coob heev, muaj tseeb tiag, tau muaj neeg coob kawg nkaus, uas ua hauj lwm hmo ntawd ib hmo, xwv kom tag kis lawv yuav nyob ntawm qhov chaw uas Yexus yuav ua nws tus kheej los rau cov neeg coob coob pom.

4 Thiab tau muaj tias tag kis, thaum cov neeg coob coob tau sib sau ua ke, saib seb, Nifais thiab nws tus kwv tij uas nws tsa sawv hauv qhov tuag los, uas lub npe hu ua Timautes, thiab nws tus tub, uas npe hu ua Yaunas, thiab Mathaunais, thiab Mathaunaihas, nws tus kwv, thiab Khumas, thiab Khumenoohais, thiab Yelemis, thiab Senoos, thiab Yaunas, thiab Xedekiyas, thiab Yaxayas—nim no cov no yog cov npe ntawm cov thwj tim uas Yexus tau xaiv—thiab tau muaj tias lawv tawm mus thiab sawv ntsug hauv nruab nrab ntawm cov neeg coob coob.

5 Thiab saib seb, cov neeg coob coob muaj coob heev lawv thiaj tau hais kom muab lawv faib ua kaum ob pab.

6 Thiab kaum ob leeg ntawd tau qhia cov neeg coob coob; thiab saib seb, lawv tau hais kom cov neeg coob coob txhos caug rau hauv av, thiab kom thov Leej Txiv los ntawm Yexus lub npe.

7 Thiab cov thwj tim los kuj thov Leej Txiv los ntawm Yexus lub npe thiab. Thiab tau muaj tias lawv sawv thiab mus qhuab qhia cov neeg.

8 Thiab thaum lawv tau qhuab qhia txog tib co lus uas Yexus tau hais—tsis muaj ib qho txawv ntawm tej lus uas Yexus tau hais li—saib seb, lawv rov txhos caug dua thiab thov Leej Txiv los ntawm Yexus lub npe.

9 Thiab lawv thov rau qhov uas lawv xav tau tshaj plaws; thiab lawv xav kom muab tus Vaj Ntsuj Plig Dawb Huv rau lawv.

10 Thiab thaum lawv tau thov li no tas lawm lawv tau mus rau nram ntug dej, thiab cov neeg coob coob raws lawv mus.

11 Thiab tau muaj tias Nifais mus nram rau hauv dej thiab ua kev cai raus dej.

12 Thiab nws tawm hauv dej los thiab pib muab neeg ua kev cai raus dej. Thiab nws muab tag nrho cov uas Yexus tau xaiv ua kev cai raus dej.

13 Thiab tau muaj tias thaum lawv txhua tus ua kev cai raus dej thiab tawm hauv dej los, tus Vaj Ntsuj Plig Dawb Huv tau los rau lawv, thiab lawv muaj tus Vaj Ntsuj Plig Dawb Huv thiab hluav taws puv npo.

14 Thiab saib seb, zoo li hluav taws muab lawv khaub zig; thiab hluav taws yog nqis saum ntuj ceeb tsheej los, thiab cov neeg coob coob ua tim khawv, thiab ua pov thawj txog qhov no; thiab cov tim tswv tau nqis saum ntuj ceeb tsheej los thiab txhawb pab lawv.

15 Thiab tau muaj tias thaum cov tim tswv tab tom txhawb pab cov thwj tim, saib seb, Yexus los thiab sawv hauv nruab nrab thiab txhawb pab lawv.

16 Thiab tau muaj tias nws hais lus rau cov neeg coob coob, thiab txib kom lawv rov txhos caug dua rau hauv av, thiab kuj kom nws cov thwj tim txhos caug rau hauv av thiab.

17 Thiab tau muaj tias thaum lawv txhua tus tau txhos caug rau hauv av lawm, nws txib nws cov thwj tim kom lawv thov Vajtswv.

18 Thiab saib seb, lawv pib thov; thiab lawv thov Yexus, muab nws hu ua lawv tus Tswv thiab lawv tus Vajtswv.

19 Thiab tau muaj tias Yexus tawm hauv nruab nrab ntawm lawv mus, thiab nws mus ib nyuag qhov deb tsawv ntawm lawv thiab khoov nws tus kheej rau hauv av, thiab hais tias:

20 Txiv es, kuv ua koj tsaug uas koj muab tus Vaj Ntsuj Plig Dawb Huv rau cov uas kuv tau xaiv no; thiab twb vim yog lawv txoj kev ntseeg kuv es kuv thiaj tau xaiv lawv tawm ntawm lub ntiaj teb los.

21 Txiv es, kuv thov kom koj yuav muab tus Vaj Ntsuj Plig Dawb Huv rau txhua tus uas yuav ntseeg lawv tej lus.

22 Txiv es, koj tau muab tus Vaj Ntsuj Plig Dawb Huv rau lawv vim yog lawv ntseeg kuv; thiab koj twb pom tias lawv ntseeg kuv vim koj twb hnov lawv, thiab lawv thov kuv; thiab lawv thov kuv twb vim yog kuv nrog lawv nyob.

23 Thiab nim no Txiv es, kuv thov koj rau lawv, thiab rau txhua tus uas yuav ntseeg lawv tej lus, xwv kom lawv yuav ntseeg kuv, xwv kom kuv yuav koom nrog lawv, Txiv es, ib yam li koj koom nrog kuv, kom peb yuav yog ib tug.

24 Thiab tau muaj tias thaum Yexus thov Leej Txiv li no tas lawm, nws los rau ntawm nws cov thwj tim, thiab saib seb, lawv tseem thov nws, tsis tau tsum; thiab lawv tsis siv tej lus ntau los thov, vim tus Vaj Ntsuj Plig Dawb Huv twb muab tej lus rau lawv thov, thiab lawv muaj txoj kev xav tau puv npo.

25 Thiab tau muaj tias Yexus foom koob hmoov rau lawv thaum lawv thov nws; thiab nws lub ntsej muag luag ntxhi rau lawv, thiab txoj kev kaj ntawm nws lub ntsej muag tau ci rau lawv, thiab saib seb lawv dawb paug npaum li Yexus lub ntsej muag thiab tej tsoos tsho; thiab saib seb txoj kev dawb ntawd dawb tshaj txhua yam dawb, muaj tseeb tiag, twb tsis muaj ib yam dab tsi nyob hauv lub ntiaj teb uas yuav dawb npaum li txoj kev dawb ntawd.

26 Thiab Yexus hais rau lawv tias: Kav tsij thov mus ntxiv; thiab lawv tau thov tsis tu tsis tseg.

27 Thiab nws rov tig ntawm lawv mus, thiab mus ib nyuag qhov deb tsawv ntawm lawv thiab khoov nws tus kheej rau hauv av; thiab nws thov Leej Txiv dua, hais tias:

28 Txiv es, kuv ua koj tsaug uas koj tau ua rau cov uas kuv tau xaiv dawb huv tuaj, vim yog lawv txoj kev ntseeg, thiab kuv thov rau lawv, thiab rau cov uas yuav ntseeg lawv tej lus, xwv kom yuav ua rau lawv dawb huv los ntawm kuv, los ntawm txoj kev ntseeg lawv tej lus, ib yam li twb tau ua rau lawv dawb huv los ntawm kuv.

29 Txiv es, kuv tsis thov rau neeg ntiaj teb, tiam sis tsuas yog rau cov uas koj tau muab rau kuv tawm ntawm neeg ntiaj teb los, vim yog lawv txoj kev ntseeg, xwv kom yuav ua rau lawv dawb huv vim yog los ntawm kuv, xwv kom kuv yuav nyob hauv lawv, Txiv es, ib yam li koj nyob hauv kuv, xwv kom peb yuav ua tau ib tug, xwv kom kuv yuav tau yeeb koob los ntawm lawv.

30 Thiab thaum Yexus tau hais tej lus no tas nws rov los rau ntawm nws cov thwj tim; thiab saib seb lawv thov nws tsis tu ncua, tsis tsum li; thiab nws rov luag ntxhi rau lawv; thiab saib seb lawv dawb paug, ib yam li Yexus.

31 Thiab tau muaj tias nws rov mus ib nyuag qhov deb tsawv thiab thov Leej Txiv;

32 Thiab tus nplaig twb hais tsis tau tej lus uas nws thov, thiab tib neeg twb tsis muaj peev xwm sau tej lus uas nws thov.

33 Thiab cov neeg coob coob tau hnov thiab ua tim khawv; thiab lawv lub siab tau qhib thiab lawv to taub cov lus uas nws thov nyob hauv lawv lub siab.

34 Txawm li ntawd los, tej lus uas nws thov tseem ceeb thiab zoo kawg nkaus thiaj li tsis muaj peev xwm sau tau, thiab tib neeg twb tsis muaj peev xwm hais tau.

35 Thiab tau muaj tias thaum Yexus xaus txoj kev thov Vajtswv nws rov los rau ntawm cov thwj tim, thiab hais rau lawv tias: Kuv tsis tau pom dua txoj kev ntseeg uas loj li no nyob hauv tag nrho cov Neeg Yudais li; yog li ntawd kuv thiaj ua tsis tau tej txuj ci tseem ceeb loj rau lawv pom, vim yog lawv txoj kev tsis ntseeg.

36 Kuv hais tseeb rau nej tias, lawv tsis tau muaj leej twg pom tej yam tseem ceeb npaum li nej tau pom; thiab lawv twb tsis tau hnov tej yam tseem ceeb npaum li nej tau hnov.